Skip to content

Skip to table of contents

Ia Iloa Lou Aga‘iga‘i i Luma

Ia Iloa Lou Aga‘iga‘i i Luma

 Ia Iloa Lou Agaʻigaʻi i Luma

“Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma.”—1 TIMO. 4:15.

1, 2. O le ā e tatou te iloa e faatatau i le olaga talavou o Timoteo, ma suiga na fai ina ua pe tusa o le 20 ona tausaga?

A O LAʻITIITI Timoteo, sa nofo o ia i Kalatia, o le itumalo na pulea e Roma lea ua taʻua o Turkey i le taimi nei. O inā, na faavae ai ni faapotopotoga Kerisiano i le faitau sefulu o tausaga ina ua mavae le maliu o Iesu. Sa iai se taimi na talia ai le faa-Kerisiano e le talavou o Timoteo, o lona tinā, ma le tinā o lona tinā, ma avea i latou ma tagata e maelega i se tasi o faapotopotoga. (2 Timo. 1:5; 3:14, 15) E mautinoa na olioli Timoteo i lona olaga o se talavou Kerisiano, a o iai i na siʻomaga masani. Peitaʻi, na faafuaseʻi ona suia mea.

2 O nei suiga na amata i le asiasiga lona lua a le aposetolo o Paulo i lenā vaipanoa. O le taimi lenā, atonu ua lata i le 20 pe ua sili laʻitiiti foʻi i le 20 tausaga o Timoteo. I le taimi o le asiasiga a Paulo, e foliga mai o Lusa na iai, na ia mātauina ai le mea moni ua “taʻuleleia [Timoteo] e uso” i faapotopotoga na iai i inā. (Galu. 16:2) Sa tatau ona faaalia e le talavou o Timoteo lona tulaga taʻumatuaina i lenā taimi. Ma e ala i le taʻitaʻiga a le agaga paia, na faaee atu ai lima o Paulo ma le ʻautoeaina iā Timoteo, ma tuuesea o ia mo se galuega faapitoa i le faapotopotoga.—1 Timo. 4:14; 2 Timo. 1:6.

3. O le ā le faaeaga o le auaunaga e lē masani ai, na maua e Timoteo?

Sa maua e Timoteo se valaaulia e lē masani ai—e avea ma aumea a Paulo e la te femalagaaʻi faatasi! (Galu. 16:3) Seʻi manatu i le faateʻia ma le fiafia o Timoteo na iai! I tausaga na lumanaʻi ai, sa faimalaga Timoteo ma Paulo, ma i nisi taimi sa faimalaga foʻi ma isi, i le faataunuuina o tofiga eseese na tofia ai o ia e le ʻauaposetolo ma toeaina. Sa auai Paulo ma Timoteo i le galuega femalagaaʻi lea na telē sona sao i le atiaʻe faaleagaga o le ʻauuso. (Faitau le Galuega 16:4, 5.) O lea la, na lauiloa Timoteo i le toʻatele o Kerisiano ona o lona agaʻigaʻi i luma faaleagaga. Ina ua mavae le pe tusa o le sefulu tausaga o galulue faatasi ma Timoteo, na tusi le aposetolo o Paulo i Kerisiano i Filipi e faapea: “E lē o iā te aʻu se tasi e mafaufau lelei e pei o [Timoteo] o lē e manatu mamafa iā te outou. . . . ua outou iloa le faamaoniga ua ia tuuina mai e faatatau iā te ia lava, i le pei o se atalii ma lona tamā, na ma pologa faatasi i le talaʻia o le tala lelei.”—Fili. 2:20-22.

4. (a) O le ā le tiute tauave faigatā na tuu atu iā Timoteo? (e) O ā fesili e mafai ona fai atu e faatatau i upu a Paulo o loo i le 1 Timoteo 4:15?

Pe tusa o le taimi lea na tusi atu ai Paulo i Kerisiano i Filipi, na ia tuu atu ai iā Timoteo le tiute tauave faigatā—o le tofia o toeaina ma auauna o le faiva i faapotopotoga. (1 Timo. 3:1; 5:22) E manino mai, ua avea Timoteo ma  ovasia Kerisiano e faatuatuaina ma faamoemoeina i lenā taimi. Ae i le tusi lava lenā, na timaʻi atu ai Paulo iā Timoteo ‘ia iloa e tagata uma lona agaʻigaʻi i luma.’ (1 Timo. 4:15) Pe e leʻi faailoa ea e Timoteo lona agaʻigaʻi i luma i se tulaga mataʻina? O lea la, o le ā le uiga o upu a Paulo, ma e faapefea ona aogā iā i tatou ana fautuaga?

Faaalia Uiga Faaleagaga

5, 6. Na faapefea ona lamatia le mamā faaleagaga o le faapotopotoga i Efeso, ma na faapefea ona puipuia e Timoteo le lamatiaga ua tulaʻi mai?

5 Seʻi o tatou iloiloina manatu o loo siʻomia ai le 1 Timoteo 4:15. (Faitau le 1 Timoteo 4:11-16.) A o leʻi tusia na upu, na malaga atu Paulo i Maketonia ae na fai atu iā Timoteo e nofo pea i Efeso. Aiseā? Ona ua faatupu e nisi i lenā aai ia fevaevaeaʻiga, i le avatu o aʻoaʻoga sesē i le faapotopotoga. Sa tatau la ona puipuia e Timoteo le mamā faaleagaga o le faapotopotoga. Na faapefea ona ia faataunuuina lenā tulaga? O se tasi o auala, o le faataatia lea o se faataʻitaʻiga lelei e faaaʻoaʻo i ai isi.

6 Na tusi Paulo iā Timoteo: “Ia fai oe ma faaaʻoaʻo i ē e faamaoni i le tautala, ma le amio, ma le alofa, ma le faatuatua, ma le amio mamā.” Ona ia toe faapea atu lea: “Ia manatunatu i nei mea; ia naunau i ai, ina ia iloa ai e tagata uma lou agaʻigaʻi i luma.” (1 Timo. 4:12, 15) O loo faatatau atu lenei agaʻigaʻi i luma i uiga faaleagaga o Timoteo, nai lo so o se tulaga pule ua iā te ia. O le ituaiga agaʻigaʻi i luma lenā e tatau i Kerisiano uma ona mananaʻo e faaalia.

7. O le ā ua faatalitalia mai i tagata uma o le faapotopotoga?

7 I aso nei e pei ona iai i aso o Timoteo, e eseese tulaga o tiute tauave i le faapotopotoga. O loo auauna nisi o ni toeaina po o ni auauna o le faiva. O isi o loo auai i le auaunaga o ni paeonia. O loo fiafia foʻi isi i tofiga o le galuega femalagaaʻi, auaunaga i Peteli, po o le galulue o ni misionare. O loo auai toeaina i polokalame eseese tau aʻoaʻoga, e pei o fonotaga ma tauaofiaga. Ae peitaʻi, o Kerisiano uma—tane, fafine, ma fanau—e mafai ona faaalia lo latou agaʻigaʻi i luma faaleagaga. (Mata. 5:16) O le mea moni, e pei ona iai i le tulaga o Timoteo, e oo lava i Kerisiano o loo iai tiute tauave faapitoa, e faatalitalia e faailoa o latou uiga faaleagaga i tagata uma.

Ia Avea o se Faaaʻoaʻo i le Tautala

8. O le ā se aafiaga o la tatou tautala i la tatou tapuaʻiga?

8 O se tasi o vala sa tatau ona faataatia ai e Timoteo se faaaʻoaʻoga, e ala lea i lana tautala. E faapefea ona tatou faailoa lo tatou agaʻigaʻi i luma i lenā vala? E telē se mea e taʻu atu e la tatou tautala e uiga iā i tatou. Na taʻua ma le tonu e Iesu e faapea: “O le tele o mea i le loto e tautala mai ai le gutu.” (Mata. 12:34) Na iloa foʻi e le ʻafa uso o Iesu o Iakopo, le aafiaga o la tatou tautala i la tatou tapuaʻiga. Na ia tusi e faapea: “Afai e manatu se tasi iā te ia lava o sē e toʻaga i le tapuaʻiga ae lē pulea lona laulaufaiva, ua faasesēina e ia lona lava loto, ua lē aogā la lana tapuaʻiga.”—Iako. 1:26.

9. O ā auala e avea ai la tatou tautala ma faaaʻoaʻoga?

9 O la tatou tautala e mafai ona iloa ai e isi o le faapotopotoga le telē o lo tatou agaʻigaʻi i luma faaleagaga. O lea la, nai lo le tautala lē faaaloalo, pe na o itu leaga e mafaufau i ai, faitio, po o le tautala tutui, ae o Kerisiano taʻumatuaina e taumafai e atiaʻe, faamāfanafana, faamalie, ma faalaeiau i isi. (Faata. 12:18; Efe. 4:29; 1 Timo. 6:3-5, 20) O lo tatou nofo sauni e tautala puipui atu e faatatau i tapulaa maualuluga a le Atua, ma faanaunau e ola i na tapulaa, e faaalia ai lo tatou tuutoina i le Atua. (Roma 1:15, 16) E mautinoa o le a mātauina e i latou e saʻo o latou loto, le auala e tatou te faaaogā ai le meaalofa o le tautala ma mulimuli i la tatou faaaʻoaʻoga.—Fili. 4:8, 9.

Ia Fai ma Faaaʻoaʻo i a Tatou Amioga ma Amio Mamā

10. Aiseā e tāua ai le faatuatua e aunoa ma le faatagāfai i lo tatou agaʻigaʻi i luma faaleagaga?

10 E sili atu mea e manaʻomia nai lo le tau ina tautala e atiaʻe ai, ina ia avea ai se Kerisiano  ma faaaʻoaʻoga lelei. O le taʻua o mea saʻo e aunoa ma le faia o le mea saʻo e avea ai se tasi ma sē e faatagāfai. Sa malamalama lelei Paulo i le faatagāfai o le ʻau Faresaio ma iʻuga leaga o o latou ala. E sili atu i le faatasi ona lapataʻia e Paulo Timoteo i lea ituaiga o faiga faafiaamiotonu ma le faatagā faafoliga. (1 Timo. 1:5; 4:1, 2) Ae o Timoteo e lē o se tagata faatagāfai. I le tusi lona lua a Paulo iā Timoteo, na ia faapea atu ai: “Ua ou manatua lou faatuatua e lē faatagāfai.” (2 Timo. 1:5) Ae, sa manaʻomia pea e Timoteo ona faaalia lona faamaoni o se Kerisiano i isi. Sa tatau ona avea o ia ma faaaʻoaʻoga i tulaga tau amio.

11. O le ā na tusi atu ai Paulo iā Timoteo e uiga i ʻoa?

11 I tusi e lua a Paulo iā Timoteo, na ia timaʻi atu ai i nisi o vala e faatatau i amioga. O se faataʻitaʻiga, sa tatau ona ʻalofia e Timoteo le saʻilia o ʻoa. Na tusi Paulo: “O le manaʻo tele i tupe o le pogai lea o mea leaga eseese uma, ma o le manaʻo tele i ai, ua ō ese ai nisi mai le faatuatua, ma tuia ai i latou e i latou lava i le tele o tigā.” (1 Timo. 6:10) O le manaʻo i ʻoa, o se faailoilo lea e iloa ai le tulaga faalētonu faaleagaga. I le isi itu, o Kerisiano o loo maua le faamalieina i se olaga faigofie i le ‘iai o ni a latou meaʻai, ma mea e oofu ai,’ ua faaalia lo latou agaʻigaʻi i luma faaleagaga.—1 Timo. 6:6-8; Fili. 4:11-13.

12. E faapefea ona faaalia lo tatou agaʻigaʻi i luma i o tatou lava olaga?

12 Na taʻu atu e Paulo iā Timoteo le tāua tele i fafine Kerisiano ona “teuteu iā i latou i ofu e talafeagai, ia onomea ma ia mafaufau lelei.” (1 Timo. 2:9) O fafine e onomea ma mafaufau lelei i a latou filifiliga o lāʻei ma teuga, faapea ma isi vala o o latou lava olaga, ua latou faataatia ni faaaʻoaʻoga lelei. (1 Timo. 3:11) Ua faatatauina foʻi lenei mataupu silisili i tane Kerisiano. Na apoapoaʻi e Paulo ovasia ina ia ‘pulea latou amio, ia mafaufau lelei, ia fai mea maopoopo, ia talimālō, ma ia agavaa e aʻoaʻo  atu.’ (1 Timo. 3:2) Pe a tatou faaalia nei uiga i a tatou gaoioiga fai i aso taʻitasi, o le a iloa ai e tagata uma lo tatou agaʻigaʻi i luma.

13. I le pei o Timoteo, e faapefea ona avea i tatou ma faaaʻoaʻo i le amio mamā?

13 Sa tatau foʻi ona avea Timoteo ma faaaʻoaʻoga lelei i amioga mamā. O le faaaogāina o lea faaupuga, sa fai ai e Paulo se faaupuga lē tuusaʻo e faatatau patino atu i amioga tatau e tusa ai ma feusuaʻiga. Aemaise lava i le auala e feutagaʻi ai Timoteo ma tamaʻitaʻi, sa tatau i lana amio ona matuā lē mataʻuleagaina. Sa tatau ona ia feagai ma “fafine matutua e pei o ni . . tinā, o fafine laiti e pei o ni . . . tuafāfine i le amio mamā.” (1 Timo. 4:12; 5:2) E oo lava i le faia o amioga lē mamā ia e foliga mai e lē iloa atu, ae o loo silafia e le Atua, ma e mautinoa e oo lava ina iloa e uso a tagata. Ma e faapena foʻi galuega lelei a se Kerisiano e lē mafai ona natia. (1 Timo. 5:24, 25) O loo iai avanoa i tagata uma i le faapotopotoga e faaalia ai lo latou agaʻigaʻi i luma i amioga, ma le amio mamā.

E Tāua le Alofa ma le Faatuatua

14. O faapefea ona faamamafa i mau o le Tusi Paia le manaʻoga, ia iai le alofa iā i tatou?

14 O le vala autū o le Faa-Kerisiano moni o le alofa. Na taʻu atu e Iesu i ona soo, “O le mea lea e iloa ai e tagata uma o oʻu soo outou, pe afai tou te fealofani.” (Ioa. 13:35) O faapefea ona tatou faaalia lenā alofa? O loo talosaga mai le Afioga a le Atua iā i tatou ia onosaʻi “le tasi i le isi i le alofa,” ma “ia agalelei le tasi i le isi, ia māfana lo outou alofa, ma ia fefaamagaloaʻi ma le lotoatoa,” ma ia faaalia uiga talimālō. (Efe. 4:2, 32; Epe. 13:1, 2) Na tusi le aposetolo o Paulo, “Ia matuā alofa faapelepele le tasi i le isi i le alofa faaleuso.”—Roma 12:10.

15. Aiseā e tāua ai le alofa i tagata uma, aemaise lava i ovasia Kerisiano?

15 Ana faapea e soonafai pe agaleaga Timoteo i ana feutagaʻiga ma ona uso Kerisiano, o le a faalēaogāina ai mea lelei na ia faia o se faiaʻoga ma se ovasia. (Faitau le 1 Korinito 13:1-3.) I le isi itu, o le faailoaga o le alofa moni o Timoteo mo ona uso, e ō faatasi ma gaoioiga talimālō ma galuega lelei mo i latou, e mautinoa na matilatila ai lona agaʻigaʻi i luma faaleagaga. Ua talafeagai lenā tulaga, ona i lana tusi iā Timoteo, na taʻua patino ai e Paulo le alofa, o se tasi o uiga sa tatau ona avea ai Timoteo ma faaaʻoaʻoga.

16. Aiseā na manaʻomia ai ona faaalia e Timoteo le faatuatua malosi?

16 I le taimi na nofo ai Timoteo i Efeso, na tofotofoina ai lona faatuatua. Sa iai nisi na faaauilumaina ni aʻoaʻoga e lē ōgatusa ma upu moni faa-Kerisiano. Sa faasalalau e nisi ni “tala sesē” po o manatu na saʻilia, lea e leai se aogā i le tulaga faaleagaga o le faapotopotoga. (Faitau le 1 Timoteo 1:3, 4.) Na faamatala e Paulo na tagata o ē “ua faafefeteina . . . i le faamaualuga, e lē o malamalama i se mea, ae ua maʻi lona mafaufau i le suʻesuʻe ma finau i upu.” (1 Timo. 6:3, 4) Po o le a tuua e Timoteo o ia i se tulaga lamatia, i le suʻesuʻeina o manatu e faaleagaina ai lea sa taaʻina ai le faapotopotoga? E leai, auā na uunaʻia e Paulo Timoteo ia “tau le taua lelei o le faatuatua” ma ʻaloʻalo ese “mai upu lē aogā e faaleaga ai mea paia, ma feteenaʻiga o le mea ua taʻua ma le pepelo o le iloa.” (1 Timo. 6:12, 20, 21) E mautinoa sa mulimuli Timoteo i le fautuaga atamai a Paulo.—1 Kori. 10:12.

17. E faapefea ona tofotofoina lo tatou faatuatua i aso nei?

17 O le itu e mataʻina ai, na taʻu atu iā Timoteo e faapea, “i se taimi mulimuli ane e paʻuʻū ese ai nisi mai le faatuatua, ae matuā uaʻi atu i  upu taufaasesē mai agaga ma aʻoaʻoga a temoni.” (1 Timo. 4:1) O tagata uma i le faapotopotoga, e aofia ai ma i latou o loo iai tiute tauave, e manaʻomia ona pei o Timoteo i le faaalia o le faatuatua malosi ma e lē maluelue. E ala i le matuā tetee atu ma faia ni gaoioiga maumauaʻi faasaga i ē tetee i le upu moni, o le a mafai ai ona iloa lo tatou agaʻigaʻi i luma ma avea ma faaaʻoaʻoga i le faatuatua.

Taumafai e Faailoa Atu Lou Agaʻigaʻi i Luma

18, 19. (a) E mafai faapefea ona e faaalia atu lou agaʻigaʻi i luma i tagata uma? (e) O le ā o le a talanoaina i le mataupu o sosoo mai?

18 E manino mai, e leai se fesootaʻiga o le agaʻigaʻi i luma faaleagaga o se Kerisiano moni ma ona foliga vaaia, tomai po o tulaga taualoa. Ma atonu e lē atagia mai ona o le tele o tausaga o le auaunaga i le faapotopotoga. Nai lo lea, o le agaʻigaʻi moni i luma faaleagaga e iloa i lo tatou usiusitaʻi iā Ieova i manatu, le tautala, ma amioga. (Roma 16:19) E ao ona tatou utagia le faatonuga ia alofa le tasi i le isi, ma ia atiaʻe le faatuatua malosi. Ioe, seʻi o tatou manatunatu loloto i upu a Paulo iā Timoteo ma faamasani i ai, ona iloa ai lea e tagata uma lo tatou agaʻigaʻi i luma.

19 O se isi uiga e faaalia ai lo tatou agaʻigaʻi i luma faaleagaga ma le taʻumatuaina o se Kerisiano, o le olioli, o se vaega o le fua o le agaga paia o le Atua. (Kala. 5:22, 23) O le a talanoaina i le mataupu o sosoo mai, le auala e tatou te atiaʻe ma faatumauina ai le olioli i taimi faigatā.

O le a Faapefea Ona E Tali?

• O le ā e mafai ona aʻoaʻoina e isi e uiga iā i tatou, i la tatou tautala?

• E faapefea ona iloa lo tatou agaʻigaʻi i luma i a tatou amioga ma amio mamā?

• Aiseā e ao ai ona avea Kerisiano ma faaaʻoaʻo i le alofa ma le faatuatua?

[Fesili mo le Suʻesuʻega]

[Ata i le itulau 11]

Sa faaalia e le talavou o Timoteo lona tulaga taʻumatuaina

[Ata i le itulau 13]

Po o iloa e isi lou agaʻigaʻi i luma?