Po ua E ‘Mauaa ma Faatumauina i Luga o le Faavae’?

PE NA e vaai i se laau telē ua loʻu ona o le malosi o le matagi? E ui ina loʻu le laau, ae o loo tū pea. Aiseā? Ona ua matuā mau ona aa i le palapala. E mafai ona pei i tatou o lenā laau. Pe a pei o afā le oo mai o tofotofoga, e mafai foʻi ona tatou tutumau pe afai e ‘mauaa ma faatumauina i tatou i luga o le faavae.’ (Efe. 3:14-17) O le ā lenā faavae?

Ua taʻua i le Afioga a le Atua e faapea, “o Keriso Iesu o le maa tulimanu” lea o le faapotopotoga Kerisiano. (Efe. 2:20; 1 Kori. 3:11) Ua faalaeiauina i tatou o Kerisiano ina “ia faaauau pea ona savavali i le autasi ma ia mauaa ma ia atiaʻe outou iā te ia, ia mausalī i le faatuatua.” Afai e tatou te faia faapea, o le a mafai ona tatou tumau i osofaʻiga uma i lo tatou faatuatua, e aofia ai “faamatalaga taufaasesē” e faavae i “tala faasesē lē aogā.”—Kolo. 2:4-8.

‘Le Lautele, le Umi, le Maualuga, ma le Loloto’

E faapefea la ona tatou “mauaa” ma “mausalī i le faatuatua”? O se tasi o auala aogā e tatou te mauaa ai, e ala lea i le suʻesuʻe ma le filigā i le Afioga faagaeeina a le Atua. E finagalo Ieova ina ia tatou “malamalama lelei faatasi ai ma le ʻaupaia, i le lautele, ma le umi, ma le maualuga ma le loloto” o le upu moni. (Efe. 3:18) O lea la, e leai se Kerisiano e tatau ona manatu ua lava le malamalama ua iā te ia ona ua ia iloa “mataupu faavae” o loo i le Afioga a le Atua. (Epe. 5:12; 6:1) Nai lo lea, e ao iā i tatou uma ona naunau ia loloto lo tatou malamalama i upu moni o le Tusi Paia.—Faata. 2:1-5.

E lē faapea e pau le mea e manaʻomia, ia tele le poto ina ia “mauaa ma faatumauina” ai i le upu moni. Auā o loo iloa lelei foʻi e Satani mea o i le Tusi Paia. E manaʻomia se mea e sili atu. E manaʻomia ona tatou “iloa le alofa o Keriso lea e sili atu i le iloa o mea.” (Efe. 3:19) O lea la, pe a tatou suʻesuʻe ona o le alolofa iā Ieova ma naunau i le upu moni, o le a faamalosia ai lo tatou faatuatua ona o le faateleina  o lo tatou iloa o le Afioga a le Atua.—Kolo. 2:2.

Tofotofo Lou Malamalama

E lelei pe a tofotofo nei loa lou malamalama i ni upu moni tāua o loo i le Tusi Paia. O le a faamalosiau ai oe ina ia filigā i le faia o au saʻiliʻiliga i le Tusi Paia. O se faaaʻoaʻoga, ia faitau le fuaiupu amata o le tusi a Paulo i Kerisiano i Efeso. (Tagaʻi i le pusa  “I Kerisiano i Efeso.”) Pe a uma ona faitau, ia e fesili ifo, ‘Po o oʻu malamalama i le uiga o fuaiupu o loo tusi faasisipa i le mau?’ Seʻi o tatou auauaʻi ona iloilo na fuaiupu.

Muaʻi Tofia “a o Leʻi Faavaeina le Lalolagi”

Na tusi atu Paulo i uso talitonu: “Na ia [le Atua] muaʻi tofia i tatou e avea ma ona lava ataliifai e ala iā Iesu Keriso.” O le mea moni, na filifili Ieova e na te vaetamaina ni tagata e auai i lona aiga lelei atoatoa i le lagi. O le a avea nei ataliifai o le Atua o tupu ma ositaulaga faatasi ma Keriso. (Roma 8:19-23; Faaa. 5:9, 10) Na luʻia e Satani le pule silisili ese a Ieova i le amataga i le faapea mai e lē lelei atoatoa le tagata na faia e le Atua. Ua talafeagai ai la ona filifilia e Ieova ni sui o le aiga faaletagata e faia sa latou vaega i le aveesea o le amioleaga mai le vateatea aoao, e aofia ai ma Satani le pogai o le amioleaga! Peitaʻi, e leʻi muaʻi tofia e Ieova po o ai o le a vaetamaina e avea ma ona atalii. Ae na filifili le Atua o le a iai se vaega po o se vasega o tagata e pule faatasi ma Keriso i le lagi.—Faaa. 14:3, 4.

O le ā le “lalolagi” lea na taʻua e Paulo ina ua ia tusi atu i Kerisiano e faapea, o i latou o  se vaega ua tofia “a o leʻi faavaeina le lalolagi”? E leʻi faasino o ia i se taimi a o leʻi faia e le Atua le lalolagi, po o tagata. Ua lē talafeagai lea ma le faamasinotonu. Pe e talafeagai ona tuuaʻia Atamu ma Eva i mea na la faia, pe afai na muaʻi filifili le Atua o le a la agasala a o leʻi foafoaina i laʻua? O lea la, o anafea na filifili ai le Atua o le a ia faasaʻo ai le fouvalega a Atamu ma Eva ma Satani i lana pule silisili ese? Na faatoʻā filifili Ieova ina ua uma ona fouvale o tatou uluaʻi mātua, a o leʻi iai se lalolagi o tagata lē lelei atoatoa e mafai ona togiolaina.

“E Tusa ma le Matuā Tele o Lona Agalelei Faifua”

Aiseā na faapea mai ai Paulo, o sauniuniga o loo taʻua i fuaiupu amata o le Efeso na faia ‘e tusa ma le matuā tele o le agalelei faifua’ o le Atua? Na ia taʻua lenā mea ina ia faamatilatila ai, e lē o Ieova e paʻū i ai le avega tauave o le togiolaina o le fanau agasala a tagata.

Ona ua tatou fananau mai ma le agasala, e leai se isi e maua le faaolataga ona o ana galuega. Peitaʻi, ona o le alofa tele o Ieova i tagata, na ia faia ai ni sauniuniga faapitoa e laveaʻi ai i latou. Pe a fua la i lo tatou lē lelei atoatoa ma le tulaga agasala, e moni ai Paulo, ua avea le togiolaina o i tatou o se faailoaga o le agalelei faifua.

Le Mea Lilo Paia o le Fuafuaga a le Atua

I le amataga, e leʻi faailoa mai e le Atua le auala o le a ia faaleleia ai mea ua faaleagaina e Satani. Sa avea o se “mea lilo paia.” (Efe. 3:4, 5) Ae ina ua faavae le faapotopotoga Kerisiano, na faaalia mai ai e Ieova le auala o le a ia faataunuuina ai lana fuafuaga i le amataga mo le fanau a tagata ma le lalolagi. Na faapea mai Paulo: “I le atoaga o le taimi na atofaina,” na faagaoioia ai e le Atua “se pulega,” e pulea ai mataupu e iʻu ai i le autasia o ana foafoaga atamamai uma.

O le laasaga muamua o lenā autasi, na amata i le Penetekoso 33 T.A., ina ua aoaoina e Ieova i latou o le a pule faatasi ma Keriso i le lagi. (Galu. 1:13-15; 2:1-4) O le laasaga lona lua, o le aoaoina lea o ē o le a ola i le lalolagi parataiso i le Malo faa-Mesia a Keriso. (Faaa. 7:14-17; 21:1-5) O le faaupuga “pulega,” e lē o faasino atu i le Malo faa-Mesia, ona na faatoʻā faavae lenā Malo i le 1914. Ae o loo faasino atu i le tauaaoina po o le pulea e le Atua o mea ina ia faataunuu ai lana fuafuaga ia toe autasi ana foafoaga uma i le vateatea.

Ia “Faatagatamatua i le Mafaufau”

E mautinoa o le a fesoasoani le toʻaga e suʻesuʻe ina ia e malamalama lelei ai i “le lautele, ma le umi, ma le maualuga ma le loloto” o le upu moni. Ae e lē taumatea foʻi, o le pisi o olaga o tagata ua faigofie ai iā Satani ona faavaivaia pe faaleagaina na masaniga. Aua neʻi faatagaina o ia e faavaivaia oe. Ia faaaogā le “tofā mamao” ua tuuina atu e le Atua iā te oe ina ia ‘faatagatamatua ai i le mafaufau.’ (1 Ioa. 5:20; 1 Kori. 14:20) Ia faamautinoa ua e malamalama tonu i le pogai ua e talitonu ai i ou talitonuga, ma e iloa ai ona faamatala atu ‘māfuaaga o lou faamoemoe.’—1 Pete. 3:15.

Seʻi faapea na e iai i Efeso i le taimi muamua na faitauina ai le tusi a Paulo. E mautinoa o le a uunaʻia oe i ana upu ina ia e tuputupu aʻe i le “iloa lelei o le Alo o le Atua.” (Efe. 4:13, 14) O le mea lea, ia faapea foʻi ona uunaʻia oe i na upu i aso nei. O le tele o lou alofa iā Ieova ma le iloa lelei o lana Afioga, o le a fesoasoani iā te oe ina ia e “mauaa ma faatumauina i luga o le faavae,” o Keriso lea. O le auala lenā e mafai ai ona e tumau i tofotofoga o loo faapogaia e Satani e faavaivaia ai oe, a o leʻi oo mai le iʻuga atoatoa o lenei lalolagi amioleaga.—Sala. 1:1-3; Iere. 17:7, 8.

 [Pusa/Ata i le itulau 27]

“I Kerisiano i Efeso”

“Ia viia le Atua, o le Tamā lea o lo tatou Alii o Iesu Keriso, auā ua ia faamanuiaina i tatou i manuia faaleagaga uma i mea o i le lagi, i le autasi ma Keriso, auā a o leʻi faavaeina le lalolagi, na ia filifilia ai i tatou ia autasi ma Keriso, ina ia paia i tatou ma ia lē ponā i ona luma i le alofa. Auā na ia muaʻi tofia i tatou e avea ma ona lava ataliifai e ala iā Iesu Keriso, e tusa ma le mea ua ia finagalo malie i ai, e viia ai lona agalelei faifua lea e mamalu, lea na ia foaʻi mai ma le agalelei iā i tatou e ala i lona Alo pele. Ua ia faasaʻolotoina i tatou i le togiola e ala i lona toto, ioe, o le faamagaloina o a tatou agasala e tusa ma le matuā tele o lona agalelei faifua. O le mea lenā na ia matuā foaʻi mai ai iā i tatou, faatasi ai ma le poto uma ma le faautauta, ina ua ia faailoa mai iā i tatou le mea lilo paia o lona finagalo. O lona finagalo lenei e tusa ma lona faanaunauga mo se pulega i le atoaga o le taimi na atofaina, o lona uiga, ina ia aoaoina ai mea uma lava ma toe faatasia iā Keriso, o mea i le lagi ma mea i le lalolagi. Ioe, ua aoaoina mea uma iā te ia.”—Efe. 1:3-10.