Skip to content

Skip to table of contents

Fesili Mai le ‘Aufaitau

Fesili Mai le ‘Aufaitau

 Fesili Mai le ʻAufaitau

O le ā se lesona o loo aʻoaʻoina mai i le Faataoto 24:27?

Ina ua fautua atu i se alii talavou, ua taʻua e le tusitala o le Faataoto e faapea: “Ia sauniuni i fafo lau galuega, ma e teuteu ai i le vao; mulimuli ane, ona e faia lea o lou fale.” O le ā le manatu o loo iai i lenei faataoto faagaeeina? E tatau i se alii ona sauniuni lelei a o leʻi faaipoipo ma fai sana fanau, ma ia iloa tiute tauave e ō mai faatasi ma lenā filifiliga.

I taimi ua teʻa, na faamatalaina ai i nisi taimi lenei fuaiupu e uiga faapea, e lē gata e tatau i se tane po o le tamā ona galue i se galuega totogi, ae e galue foʻi ina ia atiaʻe pe faalaeiau lona aiga, o se faataʻitaʻiga, e ala i le aʻoaʻo o i latou e uiga i le Atua ma le Tusi Paia. E moni lenā manatu ma e faale-Tusi Paia, ae e lē o le aano po o le manatu autū lenā o lenei fuaiupu. Aiseā? Seʻi manatu i māfuaaga nei e lua.

Muamua, e lē o tautala le fuaiupu e uiga i le faia, i se uiga faapea, ia faalaeiau pe faamalosia se aiga ua iai. Nai lo lea, o le manatu, ia fau moni lava se fale. O le upu ua faaliliuina i le “faia,” e mafai foʻi ona faafaatusa, i se uiga faapea e faia, pe atiaʻe se aiga—o lona uiga, o le faaipoipo ma fai se fanau.

Lona lua, ua faamamafaina i le fuaiupu le faia o mea i se faasologa talafeagai, e pei o loo faapea atu, “Ia fai muamua le mea lenei; ona fai ai lea o le mea lenā.” O lea la, po o fautua mai le faataoto e faapea, e faamuamua le faia o tiute tauave faaletino ae mulimuli ai tiute tauave faaleagaga? E mautinoa e leai!

I taimi o le Tusi Paia, afai e manaʻo se alii e ‘faia sona fale,’ pe fai se aiga e ala i le faaipoipo, e manaʻomia ona ia fesili ifo iā te ia lava, ʻPo ua ou sauni e tausi se avā ma se fanau e maua mulimuli mai?’ A o leʻi amata se aiga, e iai galuega e tatau ona ia faia, o le tausia o laufanua ma faatoʻaga. O lea la, o loo manino ona faaliliuina e le Today’s English Version lenei fuaiupu, e faapea: “Aua le faia sou fale ma amata se aiga seʻia mautū sau faatoʻaga, ma ua e mautinoa ua e maua mea e tausia ai le aiga.” Po o faatatauina foʻi i aso nei lea lava mataupu silisili?

Ioe. O se alii ua manaʻo e faaipoipo, e manaʻomia ona sauniuni lelei mo lenā matafaioi. Afai o loo malosi, e tatau ona faigaluega. O le mea moni, e lē tatau ona tapulaa galuega mamafa a se tane i le tausiaina o le aiga i le itu faaletino. Ua faaalia i le Afioga a le Atua e faapea, o se tane e lē tausi i manaʻoga faaletino, tau faalogona, ma le tulaga faaleagaga o lona aiga, ua sili lona leaga i lo le tagata e lē faatuatua! (1 Timo. 5:8) O lea la, a o sauni e faaipoipo ma ola i se olaga ua fai se aiga, e tatau i se alii talavou ona fesili ifo iā te ia lava i fesili e pei o fesili nei: ʻPo ua ou sauniuni lelei e saunia manaʻoga faaletino mo se aiga? Po ua ou nofosauni e taʻimua i mea faaleagaga i totonu o le aiga? Po o le a ou faataunuu le tiute tauave o le faia e lē aunoa o suʻesuʻega faale-Tusi Paia ma laʻu avā ma le fanau?’ E mautinoa o loo faamamafa mai e le Afioga a le Atua na tiute tauave tāua.—Teu. 6:6-8; Efe. 6:4.

O lea la, e tatau i se alii talavou o loo saʻilia se avā, ona mafaufau lelei i le mataupu silisili o loo i le Faataoto 24:27. I se tulaga tutusa, e lelei foʻi mo se tamaʻitaʻi talavou ona fesili ifo iā te ia lava, po ua nofosauni mo tiute tauave i le avea o se avā ma se tinā i le aiga. E ono fesili ifo foʻi faapena se ulugalii talavou pe a mafaufau i le ono faia o se fanau. (Luka 14:28) O le ola e tusa ai ma lenā taʻiala faagaeeina, e mafai ona fesoasoani i tagata o le Atua e ʻalofia ai le tele o faanoanoaga, ae olioli i se olaga faaleaiga e faamanuiaina.

[Faamatalaga faaopoopo i le itulau 12]

O ā fesili e faatatau i le faaipoipoga, e tatau i se alii talavou ona fesili ifo ai iā te ia lava?