Skip to content

Skip to table of contents

E Uuna‘ia i Tatou e le Alofa o Keriso e Alolofa i Isi

E Uuna‘ia i Tatou e le Alofa o Keriso e Alolofa i Isi

 E Uunaʻia i Tatou e le Alofa o Keriso e Alolofa i Isi

“Ua alofa Iesu i ona soo i le lalolagi, ma ua alofa iā i latou e oo i le gataaga.”—IOA. 13:1.

1, 2. (a) Aiseā e mataʻina ai le alofa o Iesu? (e) O ā vala o le alofa o le a tatou iloiloina i lenei mataupu?

NA FAATAATIA e Iesu le faaaʻoaʻoga sili o le alofa. Na faaalia lona alofa i mea uma na ia faia e aofia ai lana gaoioi ma lana tautala, o lana aʻoaʻo, ma lona maliu faataulagaina. Sa faaalia e Iesu le alofa i ē na ia feiloaʻi i ai, aemaise lava ona soo e oo lava i le toe taimi o lona soifuaga i le lalolagi.

2 O le faaaʻoaʻoga mataʻina o le alofa o Iesu, ua aumaia ai se faatulagaga e sili ona lelei mo ona soo. E uunaʻia ai foʻi i tatou e faaalia lenā alofa i o tatou uso ma tuafāfine faaleagaga, faapea foʻi ma isi. I lenei mataupu, o le a tatou iloiloina ai mea e aʻoaʻoina e toeaina o le faapotopotoga mai iā Iesu, i le auala e faaalia ai le alofa i ē ua faia mea sesē, faapea ma agasala matuiā. O le a tatou iloiloina foʻi le auala e uunaʻia ai Kerisiano e faaalia le alofa e pei o Iesu i taimi o faigatā, o mala, ma maʻi.

3. E ui i le matuiā o vaivaiga o Peteru, ae o le ā le vaaiga a Iesu iā te ia?

3 I le pō a o leʻi maliu Iesu, na faafitia faatolu o ia e le aposetolo o Peteru. (Mare. 14:66-72) Peitaʻi, ina ua toe foʻi mai Peteru e pei ona fetalai ai Iesu, na faamagalo o ia e Iesu ma tuuina atu ni tofiga tāua iā te ia. (Luka 22:32; Galu. 2:14; 8:14-17; 10:44, 45) O ā ni mea e tatou te aʻoaʻoina mai i le auala sa feagai ai Iesu ma ē na faia mea sesē?

Faaalia le Vaaiga a Keriso i Ē Faia le Mea Sesē

4. O le ā le taimi e sili ona manaʻomia ai le faaalia o le vaaiga a Keriso?

4 E tele tulaga e manaʻomia ai ona faaalia le vaaiga e pei o Keriso, ae o se tulaga e sili ona faigatā le feagai ma sē ua faia se sesē matuiā i le aiga, po o le faapotopotoga. O le mea e faanoanoa ai, ua matuā sasao faaafi le agaga o le lalolagi ma atili ai ona leaga amioga ona ua lalata mai le faaumatiaga o le faiga o mea a Satani. Ona o le lē amanaʻia e le lalolagi o amioga tatau, ua afāina ai amioga a ē laiti ma ē matutua ma faavaivaia ai i latou mai le faia o le mea saʻo. I le uluaʻi senituri, sa faateʻaeseina nisi mai le faapotopotoga Kerisiano, ae aʻoaʻia isi. E faapena foʻi aso nei. (1 Kori. 5:11-13; 1 Timo. 5:20) E ui i lea, pe a faaalia e toeaina le alofa e pei o Keriso i le taulimaina o nei mataupu, o le a telē se aogā i le tagata ua faia le mea sesē.

5. I le pei o Keriso, o le ā le vaaiga e ao ona iai i toeaina i ē ua faia mea sesē?

5 I le pei o Iesu, e tatau i toeaina ona lagolagoina tapulaa amiotonu a Ieova i taimi uma. Pe a faia faapea, ua latou faaalia ai le agamalu, agalelei, ma le alofa o Ieova. Pe a salamō moni se tasi, ma “ua loto momomo” ma “loto nutimomoia” ona o lana mea sesē na faia, atonu e lē faigatā i toeaina ona “faasagatonu lenei tagata i le agaga o le agamalu.” (Sala. 34:18; Kala. 6:1) Ae e faapefea pe afai e feagai toeaina ma se tagata e tetee ma e lē salamō?

6. O le ā e ao ona ʻalofia e toeaina pe a feagai ma ē ua faia le mea sesē, ma aiseā?

Pe a teena e se tagata ua faia le mea sesē fautuaga mai le Tusi Paia, pe taumafai e tuuaʻia isi mo le sesē, atonu o le a lē lava ai le onosai o toeaina. Ua latou iloa ua afāina tele  isi ona o lenā tagata, ma e ono mapuna aʻe le lagona e taʻu saʻo atu o latou manatu i le tagata e faatatau i lana mea na fai ma ona uiga. Peitaʻi e iai āuga leaga o le ita ma e lē o atagia atu ai le “manatu o Keriso.” (1 Kori. 2:16; faitau le Iakopo 1:19, 20.) Na manino ona lapataʻia e Iesu nisi i ona vaitaimi, ae e na te leʻi fai atu se upu e faatigā pe ita ai se isi. (1 Pete. 2:23) Ae e ala i ana upu ma gaoioiga, na tuu ai le avanoa mo ē ua faia le mea sesē ina ia salamō ma toe maua le finagalo malie o Ieova. O le mea moni, o se tasi o māfuaaga autū na afio mai ai Iesu i le lalolagi, ina ia “faaolaina ē e agasala.”—1 Timo. 1:15.

7, 8. O le ā e ao ona avea ma taʻiala i toeaina pe a taulimaina mataupu faafaamasinoga?

7 E tusa ai ma le faaaʻoaʻoga a Iesu, o le ā le vaaiga e tatau ona iā i tatou e faatatau i ē e ao ona aʻoaʻia i le faapotopotoga? Ia manatua, o faatonuga mai le Tusi Paia e tusa ai ma tulaga faafaamasinoga i le faapotopotoga, e puipuia ai le lafu ma e ono uunaʻia ai se tagata ua ave i ai se aʻoaʻiga ina ia salamō. (2 Kori. 2:6-8) E faanoanoa ona e lē o salamō nisi ma ua tatau ai ona faateʻaina, ae e faalaeiauina i tatou ona ua toʻatele ē ua salamō ma toe foʻi mai iā Ieova ma lana faapotopotoga. Pe a iai i toeaina le vaaiga e pei ona faaalia e Keriso, ua latou faafaigofie ai i le tagata ona toe foʻi mai pe a salamō. I le lumanaʻi, o nisi na faia mea sesē atonu e lē manatua uma fautuaga mai le Tusi Paia na avatu e toeaina, ae e latou te manatua le auala faaaloalo ma le alofa na faaalia atu e toeaina.

8 O lea la, e tatau ona faaalia e toeaina le “fua o le agaga,” aemaise lava le alofa e pei ona faaalia e Keriso, e oo lava i tulaga faigatā. (Kala. 5:22, 23) E lē tatau ona latou vave faateʻaeseina se tagata ua faia le mea sesē mai le faapotopotoga. Ae ia atagia atu o loo latou mananaʻo e toe foʻi mai lea tagata iā Ieova. O lea la, pe a salamō mulimuli ane se tagata agasala, e pei ona faia e le toʻatele na faateʻaina, e lē taumatea e matuā faafetai  o ia iā Ieova faapea ma “tane e fai ma meaalofa,” ona na latou faafaigofie lona toe foʻi mai i le faapotopotoga.—Efe. 4:8, 11, 12.

Faaalia le Alofa e Pei o Keriso i le Taimi o le Iʻuga

9. Taʻu mai se faaaʻoaʻoga o le alofa o Iesu i ona soo.

9 Ua faamaumau e Luka se mea mataʻina na tupu e uiga i le alofa o Iesu. Na silafia e Iesu e iai le taimi o le a vagaia ai e le ʻautau a Roma le aai o Ierusalema, ma lē mafai ai ona sosola tagata, ma na ia lapataʻia ai ma le alofa ona soo e faapea: ‘Pe a outou iloa ua siʻosiʻomia Ierusalema e ʻautau, ona outou iloa ai lea ua lata lona faatafunaina.’ O le ā le mea e ao ona latou faia? Na tuusaʻo ma manino faatonuga a Iesu i le mea e ao ona fai. “O lea, o ē o i Iutaia ia sosola i mauga, o i latou o i totonu o le aai, ia ō ese, ma aua neʻi toe foʻi atu i le aai i latou o i tua. Auā o ia aso e faaoo atu ai le faamasinoga, ina ia taunuu ai mea uma ua tusia.” (Luka 21:20-22) Ina ua siʻomia e le ʻautau a Roma Ierusalema i le 66 T.A., na faia e ē na usiusitai e tusa ma na faatonuga.

10, 11. Ina ia tatou sauniuni mo le “puapuaga tele,” e faapefea ona aogā le iloiloina o le sosola ese o uluaʻi Kerisiano mai Ierusalema?

10 Ina ua sosola ese Kerisiano mai Ierusalema, na manaʻomia ona fefaaaliaʻi le alofa e pei o Keriso, e pei ona alofa ai Keriso iā i latou. Sa tatau lava ona fetufaaʻi mea na latou maua. Ae o loo iai se isi faataunuuga o le valoaga a Iesu e sili atu i lo le faaumatiaga o lenā aai anamua. Na ia folafola e faapea: “E tupu le puapuaga tele lea e leai sona tusa talu le amataga o le lalolagi, e oo mai lava i aso nei, ma e lē toe tupu foʻi se mea faapea.” (Mata. 24:17, 18, 21) A o leʻi tupu ma pe a tupu le “puapuaga tele” i le lumanaʻi, e tatou te ono fesagaʻia foʻi faigatā ma puapuaga. O le iai iā i tatou o le mafaufau e pei o Keriso, o le a aogā e tatou te tutumau ai.

11 I lenā taimi, e manaʻomia ona tatou mulimuli i le faaaʻoaʻoga a Iesu, e ala i le faaalia o le alofa lē manatu faapito. E tusa ai o lea tulaga, na fautua mai ai Paulo e faapea: “Ia taʻitasi i tatou ma faafiafia i lona tuaoi i le mea lelei, ina ia atiaʻe ai o ia. Auā e oo lava i le Keriso, na te leʻi faafiafia i lona lava loto; . . . Ia foaʻi atu iā te outou e le Atua o lē ua tatou tumau ma aumaia ai faamāfanafanaga, le  mafaufau lava lea e tasi sa iā Keriso Iesu.”—Roma 15:2, 3, 5.

12. O le ā le ituaiga o alofa e ao ona tatou atiaʻe i le taimi nei, ma aiseā?

12 O Peteru, o lē sa faaali i ai e Iesu le alofa, na ia uunaʻia foʻi Kerisiano ina ia atiaʻe le “alofa faamaoni o uso” ma le “usiusitai i le upu moni.” E tatau i Kerisiano ona ‘matuā fealofani mai i o latou loto.’ (1 Pete. 1:22) Ua matuā manaʻomia lava ona tatou atiaʻe uiga e pei o Keriso i aso nei. Ua matuā faateteleina omiga i tagata uma o Ieova. E leai se isi e tatau ona faalagolago i se mea mai lenei lalolagi, e pei ona manino mai i le tulaga faalētonu o le tamaoaiga o le lalolagi o loo iai nei. (Faitau le 1 Ioane 2:15-17.) Peitaʻi, a o lalata mai le gataaga o lenei faiga o mea, e ao ona tatou faalatalata atu iā Ieova faapea ma isi, e ala i le atiaʻe o faauōga māfana ma isi i totonu o le faapotopotoga. Na fautua mai Paulo e faapea: “Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.” (Roma 12:10) Na toe faamamafa e Peteru lenā manatu i le faapea mai: “Ae e sili i nei mea uma, ia tele le alofa o le tasi i le isi, auā o le alofa e ufiufi ai le anoanoaʻi o agasala.”—1 Pete. 4:8.

13-15. O le ā le auala na faaalia ai e nisi uso le alofa e pei o Keriso ina ua mavae ni mala?

13 I le lalolagi aoao, ua lauiloa Molimau a Ieova i le faaalia o le alofa moni e pei o Keriso. Seʻi manatu foʻi i Molimau na ō atu e fesoasoani ina ua mavae ni afā na faaleagaina ai le tele o vaipanoa o le Iunaite Setete i saute i le 2005. Na uunaʻia i latou e le faaaʻoaʻoga a Iesu, ma o le toʻatele o le 20,000 o ē na tauofo, na tuua o latou fale ma galuega lelei ina ia fesoasoani ai i uso mafatia.

14 I se tasi vaipanoa, ona o le afā, e 50 maila le mamao na oo atu ai le sami i uta ma e 30 futu le maualuluga o galu. Ina ua māui le vai, na matuā faaleagaina lava le tele o fale o aiga ma isi nofoaga. Na tauofo mai Molimau mai i isi atunuu e iai le poto masani, ma aumai meafaigaluega ma mea faufale, ma na lotomalilie e faia so o se galuega na manaʻomia ona fai. O se ʻauuso e toʻalua ua maliliu a la tane, na uta uma a la mea totino i se pikiapu ma malaga atu mo le 2,000 maila (3,000 kilomita) ina ia fesoasoani atu. O loo nofo ai pea le isi tuafafine i lenā vaipanoa e fesoasoani i le ʻau laveaʻi ma galue o se paeonia sauatoa.

15 E sili atu i le 5,600 fale o Molimau ma isi i lenā vaipanoa ua toe fausia pe faaleleia. O ā lagona o Molimau i lenā vaipanoa e faatatau i le anoanoaʻi o le alofa ua faaalia atu iā i latou? O se tuafafine na faaleagaina lona fale, na nofo i se kalaveni e tutulu ma e leaga le ogaumu. Na fausia e uso se fale e laʻitiiti ae manaia mo ia. A o tū i luma o lona fale fou, na tagi o ia ona o lona lotofaafetai iā Ieova ma le ʻauuso. O le tele o nisi tulaga, e ui ua  uma ona toe faaleleia fale o nisi Molimau o lenā vaipanoa, ae o loo nonofo pea i o latou fale lē tumau mo se tausaga pe sili atu foʻi. Aiseā? Ina ia nonofo ai le ʻau laveaʻi. O se faaaʻoaʻoga lelei tele lea o le faaalia o le mafaufau e pei o Keriso!

Ia Faaalia le Uiga o Keriso i Ē e Mamaʻi

16, 17. E faapefea ona faaalia le uiga e pei o Keriso i ē mamaʻi?

16 O le mea moni, e lē toʻatele nisi o i tatou ua oo i ai mala faalenatura. Ae ua feagai tagata uma ma faafitauli i le soifua mālōlōina, a lē o ia, o tagata o lona aiga. E aogā le faaaʻoaʻoga a Iesu iā i tatou i le uiga na ia faaalia i tagata mamaʻi. O le alofa na uunaʻia ai o ia e faaalia le tigāalofa iā i latou. Ina ua aumai e le motu o tagata o latou tagata mamaʻi iā te ia, na ia “faamālōlō foʻi i latou uma ua mamaʻi tigāina.”—Mata. 8:16; 14:14.

17 I aso nei, e lē o i Kerisiano se mana e faia ai vavega a pei ona faia e Iesu, ae e latou te faaalia le agaalofa i ē mamaʻi e pei ona sa faia e Iesu. E faapefea? O se tasi o auala, e faaalia e toeaina le uiga sa iā Keriso e ala lea i le faia ma vaavaaia fuafuaga mo le tausiga o ē e mamaʻi i le faapotopotoga, i le mulimuli i le taʻiala o loo i le Mataio 25:39, 40. * (Faitau.)

18. Na faapefea ona faaalia e ni tuafāfine le alofa moni i isi, ma o ā iʻuga?

18 E lē tau manaʻomia ona avea oe ma toeaina ina ia faia ai mea lelei mo isi. Seʻi manatu i le tulaga o Selina e 44 tausaga le matua, ma na maua o ia i le kanesa ma na taʻu atu iā te ia e toe sefulu aso e ola ai. Na iloa e tuafāfine o Sarona ma Nikoleta le faigatā tele o le galuega a lana tane o loo faia, ma na faaavanoa lo la taimi e fesoasoani ai iā Selina i aso mulimuli na ola ai o ia. E ono vaiaso o ola pea o ia, ae na faaalia pea e nei tuafāfine le alofa seʻia oo i lona maliu. Na faapea mai Sarona, “E faigatā tele le iloa e lē toe foʻi i se lelei le maʻi o se tagata. Peitaʻi, na foaʻi mai e Ieova le malosi iā i maʻua. Ma atili ai ona māfana le matou faiā ma ia, ma le tasi i le isi.” Ua faapea mai le tane a Selina: “Ou te manatua pea le agalelei ma le lagolagosua a nei tuafāfine pele. O le saʻo o le la vaai ma uiga lelei na la faaalia, na mafai ona fesoasoani i laʻu avā faamaoni o Selina i faigatā na feagai ma ia, ma aumai ai iā te aʻu le mapusaga i le itu i le tino ma faalogona. Ou te faafetai pea iā i laʻua. O le la galuega alofa, na faamalosia ai loʻu faatuatua iā Ieova ma loʻu alofa i le ʻauuso.”

19, 20. (a) O ā vala e lima o le mafaufau o Keriso ua tatou iloiloina? (e) O le ā le mea ua e filifili e fai?

19 I nei mataupu e tolu, ua tatou iloiloina ai vala e lima o le mafaufau o Keriso, ma le auala e tatou te mafaufau ma gaoioi ai e pei o ia. Ia tatou “agamalu ma lotomaulalo” e pei o Iesu. (Mata. 11:29) Ia taumafai e agalelei i isi e ui ina tatou iloa o latou masei ma vaivaiga. Ia lototetele e usiusitai i mea uma e faafinagaloina e Ieova, e ui lava i tofotofoga.

20 O le vala mulimuli, ia tatou faaalia le alofa e pei o Keriso i o tatou uso uma seʻia “oo i le gataaga.” O le alofa lenā e iloa ai i tatou o soo moni o Iesu. (Ioa. 13:1, 34, 35) O lea la, “ia faaauau pea ona faaalia lo outou alofa faaleuso.” (Epe. 13:1) Aua le faatalatū! Ia faaaogā lou ola e viia ai Ieova ma fesoasoani i isi! O le a matuā tauia e Ieova au taumafaiga filigā.

[Faaopoopoga i lalo]

^ pala. 17 Tagaʻi i le mataupu “Faia Ia Sili i lo o le Na Ona Fai Atu: ‘Ia Māfanafana ma Ia Maoona’” i le Olomatamata o Iulai 1, 1987.

Pe Mafai Ona E Faamatala?

• E faapefea ona faaalia e toeaina le vaaiga na faaalia e Keriso i ē faia le mea sesē?

• Aiseā e tāua tele ai le faaaʻoaʻo i le alofa o Keriso i lenei taimi o le iʻuga?

• E faapefea ona tatou faaalia le uiga na faaalia e Keriso i ē mamaʻi?

[Fesili mo le Suʻesuʻega]

[Ata i le itulau 17]

E mananaʻo toeaina ia toe foʻi mai iā Ieova i latou ua faia mea sesē

[Ata i le itulau 18]

Na faapefea ona faaalia e Kerisiano na tuua Ierusalema le mafaufau o Keriso?

[Ata i le itulau 19]

Ua mātaulia Molimau a Ieova ona o le faaalia o le alofa e pei ona faaalia e Keriso