Skip to content

Skip to table of contents

‘Ua Faamalamalamaina e Ieova Ona Fofoga iā i Latou’

‘Ua Faamalamalamaina e Ieova Ona Fofoga iā i Latou’

 ‘Ua Faamalamalamaina e Ieova Ona Fofoga iā i Latou’

E SILI atu i le 30 maso o loo iai i foliga o le tagata. E na o si au ata lava, ae e 14 maso o loo gaoioi faatasi ai! Seʻi manatu i talanoaga o le a iai pe a aunoa ma nei maso. Pe e manaia? E leai. O i latou e logonoa, e sili atu gaoioiga e faia e maso o foliga, ina ia lelei ai talanoaga. Pe a ō faatasi ma tāga, o se auala sili lea ona lelei e taʻu atu ai manatu ma lagona. Ua maofa le toʻatele i le auala ua mafai ai e le gagana a tagata logonoa, ona faailoa mai manatu lavelave faatasi ma uiga eseese o manatu.

Talu ai nei, ua vaaia e tagata logonoa i le lalolagi aoao le fofoga e sili atu ona tele manatu o loo faailoa mai ai, nai lo o foliga o so o se tagata. I se gagana faafaatusa, ua oo ina latou iloa “fofoga o Ieova.” (Aue. 2:19, NW) E lē o se mea lenei na teʻi lava ua tupu. Ua loa ona faaalia e Ieova lona alofa tele iā i latou e logonoa. Na ia faia foʻi faapea i tuā lava i le nuu o Isaraelu anamua. (Levi. 19:14) I aso nei, o loo manino mai foʻi lona alofa i tagata logonoa. “O lē e finagalo ina ia faaolaina ituaiga uma o tagata, ma ia oo ina iloa lelei le upu moni.” (1 Timo. 2:4) O le mauaina o le poto saʻo o le upu moni e uiga i le Atua, ua oo ai ina iloa e le toʻatele o tagata logonoa ona fofoga. Ua faapefea ona tupu o lenei mea, ae e lē o mafai ona latou faalogo? A o leʻi taliina lenā fesili, seʻi o tatou iloiloina le māfuaaga e tāua ai i tagata logonoa, le gagana e faaaogā ai tāga.

O le Vaai o le Faalogo Foʻi Lea

E tele manatu sesē e faatatau i tagata logonoa, ma le gagana e faaaogā ai tāga. Seʻi o tatou faamanino nisi o na manatu. E mafai e tagata logonoa ona ave se taavale. E matuā faigatā lava mo i latou ona faitau upu mai laugutu o se tagata. O le gagana a tagata logonoa, e matuā eseese lava ma le gagana a tagata tauaso. E lē tasi se gagana e faaaogā ai tāga i le lalolagi. Aemaise o tagata tutuli, e iai si eseesega o tāga e latou te faaaogā i lea vaega ma lea vaega o se atunuu.

Pe e mafai e tagata logonoa ona faitau? O nisi e lelei le faitau, ae peitaʻi, o le toʻatele o tagata logonoa e lē mafai ona faitau. Aiseā? Auā o upu o loo tusia, e faavae mai i le gagana tautala. Seʻi manatu i le auala e aʻoaʻo ai e se tamaitiiti e lelei le faalogo se gagana. O le taimi lava e fanau mai ai, e siʻomia o ia e tagata e tautatala i le gagana a le atunuu. E lē umi, ae mafai ona ia tuufaatasia upu ma faia ai se fuaiupu. E tupu lenā mea i le tau lava o le faalogo atu a o tautatala tagata i lea gagana. O lea la, pe a faalogo atu ua amata ona faitau le tamaitiiti, o lona uiga, ua ia faafesootaʻia upu o loo tusia ma upu ua uma ona ia faalogo i ai.

O lea la, seʻi faaāta i lou mafaufau e faapea o loo e iai i se atunuu ese i se potu tioata, e matuā lē lagona atu lava se mea. E te leʻi faalogo lava i le gagana a lea atunuu. I aso taʻitasi, e ō mai tagata o le atunuu ma taumafai e tautatala mai iā te oe i le tioata. E te lē lagona atu upu o loo latou fai mai ai. E na o laugutu o loo e vaai atu i ai o gaoioi. Ina ua latou iloa e te lē o malamalama atu i mea o loo fai mai ai, ona latou tusia lea o na upu i se fasipepa, ma  faaali mai iā te oe i le tioata. E latou te manatu e tatau ona e malamalama i ai. Po o le a e malamalama i na upu? O le a faigatā tele ona fai ni a outou fesootaʻiga i tulaga faapena. Aiseā? Auā o upu ua tusia, o se gagana e te leʻi faalogo muamua lava i ai. O le tulaga tonu lenā o loo iai le toʻatele o tagata logonoa.

O le gagana e faaaogā ai tāga, o se auala sili lea e fesootaʻi ai tagata logonoa. E faaaogā e se tagata logonoa tāga e fafau aʻe ai manatu e ala i gaoioiga a lona tino. O ana gaoioiga faatasi ma ona foliga, e mulimuli i le tulafono o le kalama a le gagana a tagata logonoa. O le auala lea ua faia aʻe ai se gagana e mafai ona fesootaʻi atu i le vaai.

O le mea moni, e toetoe o gaoioiga uma a se tagata logonoa e faia i ona lima, tino, ma ona foliga a o faia tāga, e iai ona uiga. O faaupuga e faailoa atu i foliga, e lē o faia e tau ina faafiafia ai tagata. O vaega tāua nei o le kalama o le gagana a tagata logonoa. O se faataʻitaʻiga: Pe a fai atu se fesili a o faamaneʻe i luga laumata, e taʻu mai ai o se fesili faatupu manatu ae e lē manaʻomia se tali, po o se fesili e tali i le ioe po o le leai. Pe a faaifo i lalo laumata, e taʻu mai ai o se fesili e iloa ai po o ai, o le ā, o fea, o anafea, aiseā, ma na faapefea? O nisi gaoioiga o le gutu, atonu e iloa ai le telē o se mea, po o le matuiā o se gaoioiga. O le auala e gaoioi ai le ulu o se tagata tutuli, faamimigi i luga ona tauau, faagaoioi ai ona alafau, ma emoemo ai ona mata, e iloa uma ai uiga ma lagona o le manatu o loo faailoa mai.

Ua tuufaatasia nei mea uma ina ia fesoasoani i se tagata e malamalama lelei ai. O le faaaogāina o nei ituaiga o fesootaʻiga, ua faaauupegaina ai tagata logonoa o ē e iloa lelei le gagana e faaaogā ai tāga, ina ia agavaa lelei ai e faailoa mai so o se manatu; mai i solo e oo i mea tau tekinisi, mai i faigāuō e oo i tala mālie, ma mai i mea e vaaia e oo i mea e lē vaaia.

Ua Iai se Suiga Ona o Lomiga a Tagata Logonoa

Ina ua faailoa mai le poto e uiga iā Ieova i le gagana e faaaogā ai tāga, ua mafai ai e se tagata logonoa ona faalogo i le feʻau, ma “faatuatua” ai i Lē e ana le feʻau. O lea la, ua faia ai e Molimau a Ieova se taumafaiga filigā, e talaʻi atu i tagata logonoa i le lalolagi atoa, ma saunia mea e aogā mo i latou. (Roma 10:14) I le taimi nei, e 58 vaega faaliliu o gagana e faaaogā ai tāga i le lalolagi, ma ua maua foʻi i DVD lomiga a tagata logonoa i gagana e 40. Po ua aogā nei taumafaiga uma?

Ua fai mai Ieremia, o lē e tutuli uma ona mātua, “Ou te manatua le tele o le taimi na suʻesuʻe ma le naunau ai loʻu tamā i ni nai palakalafa i se mataupu o le Olomatamata, ma taumafai e malamalama i ai. Na faafuaseʻi lava ona oso mai i fafo ma le potu, ma fai mai ma le fiafia tāga: ‘⁠Ua ou malamalama! Ua ou malamalama i le uiga!’ Ona ia faamatala mai lea iā te aʻu o le uiga o le mataupu. Sa na o le 12 oʻu tausaga i lenā taimi. Na vave ona ou  faitau i palakalafa ma fai atu tāga: ‘⁠Papa, ou te iloa e lē o le uiga lenā. O lona uiga . . . ’ Na ia fai mai tāga iā te aʻu e tuu, ma toe foʻi i lona potu e toe mafaufau i le uiga o le mataupu. E lē galo iā te aʻu ona foliga lē fiafia, ma le lē mautonu na ou lagona, a o oʻu vaai atu ua toe alu i totonu o le potu. Peitaʻi, o le mauaina o lomiga i le gagana a tagata logonoa i le DVD, ua mafai ai nei ona malamalama lelei o ia i faamatalaga. I le vaai atu i le fiafia o ona foliga a o ia faamatala mai ona lagona e uiga iā Ieova, e lē o se mea ou te manatu māmā i ai.”

Seʻi manatu foʻi i se ulugalii Molimau na talanoa atu i se fafine talavou e logonoa, mai i Chile, e igoa iā Jessenia. Ina ua faataga mai e lona tinā e faaali atu iā Jessenia le DVD o Laʻu Tusi o Tala o le Tusi Paia i le gagana a tagata logonoa i Chile, na la faamatala mai: “Ina ua amata ona matamata Jessenia i le tala, na ʻata o ia ma na maligi ona loimata. Ina ua fesili atu lona tinā pe aiseā ua tagi ai, na ia tali mai, auā na fiafia o ia i mea na ia matamata i ai. Na iloa ai loa e lona tinā, sa malamalama o ia i mea uma i le DVD.”

O se fafine logonoa sa nofo i se nuu maotua i Venezuela, e toʻatasi lana tama, ae o loo tō o ia i le tamaitiiti lona lua. Na la lagona ma lana tane, e lē toe mafai ona faia se isi a la tama ona o faafitauli tautupe, o lea na la mafaufau ai loa e faapaʻū le la tama. I le lē iloa o nei taualumaga, na afe ane ai ni Molimau a Ieova ma faailoa atu iā i laʻua se lesona mai le vitiō, O le ā e Manaʻomia e le Atua Mai iā i Tatou? i le Gagana a Tagata Logonoa i Venezuela. O lenei lesona, o loo faamatala ai le silafaga a le Atua i le faapaʻū tama ma le fasioti tagata. Mulimuli ane, na faamatala atu e le fafine i Molimau lona lotofaafetai ina ua ia suʻesuʻeina lenā lesona. Na faapea mai o ia, na iʻu la laʻua filifiliga e aua le faapaʻūina la la tama. Na faasaoina lea ola ona o le fesoasoani a lomiga i le gagana a tagata logonoa i le DVD!

Ua faamatala mai e Lorraine, o se fafine Molimau e logonoa e faapea: “O le aʻoaʻoina o le Tusi Paia, ua pei o le tuufaatasia o se paso telē. Sa iai ni mea ou te leʻi malamalama atoatoa i ai. Peitaʻi, ina ua maua upu moni o le Tusi Paia i le gagana a tagata logonoa, na ou malamalama atoatoa ai loa.” Ua faapea mai Siaosi e logonoa, ma ua 38 tausaga talu ona avea ma Molimau: “E lē fesiligia e faapea, o le mauaina o tomai e te malamalama ai i se mataupu, o se mea e fiafia ai ma maua ai le mautinoa. Ou te lagona ua aogā tele iā te aʻu le DVD i loʻu tuputupu aʻe faaleagaga.”

“Se Sauniga i Laʻu Gagana!”

E lē gata i lomiga ua faia i le gagana a tagata logonoa, a ua faamaopoopoina foʻi e Molimau a Ieova ni faapotopotoga e faia a latou sauniga i le gagana a tagata logonoa. I le taimi nei, e sili atu i le 1,100 faapotopotoga i le gagana a tagata logonoa i le lalolagi atoa. E faafeiloaʻi atu le aofia o tagata logonoa i la latou lava gagana, ma e aʻoaʻoina upu moni o le  Tusi Paia i se auala e mafaufau ai le tagata logonoa i lana lava gagana. E faailoa atu i se auala e faaalia ai le faaaloalo i ana tū ma aga, ma mea e malamalama ai i lona olaga.

Po o aogā le faavaeina o faapotopotoga e faaaogā ai le gagana a tagata logonoa? Manatu i le mea na tupu iā Cyril, o lē na papatiso e avea ma Molimau a Ieova i le 1955. Sa ia suʻesuʻeina lomiga tusitusia mo le tele o tausaga i le mea e sili na ia mafaia, ma auai e lē aunoa i sauniga faa-Kerisiano. O nisi taimi, sa iai tagata faaliliu, ae o nisi taimi e leai. Pe a leai se tagata faaliliu, e faalagolago o ia i Molimau o ē e taumafai ma le alofa e fesoasoani iā te ia, i le tusiaina o ni faamaumauga o mea na fai mai i le pulelaa. E 34 tausaga na avea ai o ia ma Molimau, ae i le 1989, na faavaeina ai le faapotopotoga muamua i le gagana a tagata logonoa i le Iunaite Setete, i le aai o Niu Ioka. O le ā le lagona o Cyril i le avea o ia ma sui o lenā faapotopotoga? “Na pei e sau o ia mai i se togāvao mai i se ana pogisa, i le malamalama. O se sauniga i laʻu gagana!”

O faapotopotoga i le gagana a tagata logonoa, o ni nofoaga e faapotopoto ai e lē aunoa tagata logonoa, ina ia aʻoaʻo e uiga i le Atua ma tapuaʻi ai iā te ia. O nofoaga na e atiaʻe ai e tagata o le Atua ni faiā ma isi, ma faalaeiauina ai. I totonu o se lalolagi e lē faigofie ai ona talanoa tagata logonoa, ma atonu e faaesea ai i latou mai i isi, ua avea nei faapotopotoga ma nofoaga o fesootaʻiga ma aufaatasiga. I lenā siʻomaga, ua mafai ai e tagata logonoa ona aʻoaʻo, agaʻigaʻi i luma, ma aapa atu i la latou auaunaga iā Ieova. E toʻatele Molimau logonoa ua mafai ona galulue o ni faievagelia faataimi atoa. Ua siitia atu isi i nisi atunuu e fesoasoani i tagata logonoa e aʻoaʻo e uiga iā Ieova. O tane Kerisiano e logonoa, ua aʻoaʻo ina ia avea o ni faiaʻoga tomai o ē e faamaopoopo, o ni leoleo mamoe, ma e toʻatele ua mafai ona agavaa e faia tiute tauave i le faapotopotoga.

I le Iunaite Setete, e sili atu i le 100 faapotopotoga, ma pe tusa e 80 vaega ua faia i gagana a tagata logonoa. I Pasili, e tusa ma le 300 faapotopotoga, ma e sili atu i le 400 vaega ua faia i gagana a tagata logonoa. E latalata i le 300 faapotopotoga i Mekisikō ua faia i le gagana a tagata logonoa. I Rusia, e sili atu i le 30 faapotopotoga i le gagana a tagata logonoa, ma e 113 vaega. O ni faaaʻoaʻoga na i le tuputupu aʻe o loo iai i le lalolagi atoa.

E faia foʻi e Molimau a Ieova ia fonotaga ma tauaofiaga i le gagana a tagata logonoa. I le tausaga ua mavae, e sili atu i le 120 tauaofiaga na faia i le lalolagi aoao i le tele o gagana eseese a tagata logonoa. O na tulaga, ua mafai ai e Molimau logonoa ona iloa, o i latou o se vaega o le ʻauuso Kerisiano o loo maua aogā mai i meaʻai faaleagaga i le taimi tatau.

O Leo, e logonoa ma ua sili atu i le 25 tausaga talu ona avea ma Molimau a Ieova. Ua ia faamatala mai: “Sa ou iloa pea o Ieova o le Atua moni. Ae ou te lē o manino lelei i le pogai ua ia faataga ai mafatiaga. I nisi taimi, ou te ita ai iā te ia pe a ou mafaufau i lenā mea. Ae o se tasi o lauga faapitoa i se tauaofiaga na faia i le gagana a tagata logonoa, na ou matuā malamalama ai i le pogai. Ina ua uma le lauga, sa ʻeu aʻu e laʻu avā ma fesili mai, ‘Po ua e malamalama?’ Na ou tali atu ma le faamaoni, Ioe! Ou te lagona le lotofaafetai ona ua 25 nei tausaga ou te leʻi tuua lava Ieova. Sa ou alofa pea iā Ieova, ae ou te leʻi malamalama lelei iā te ia. A o lea ua ou malamalama nei!”

Lotofaafetai

O ā “foliga” i fofoga o Ieova ua iloa e tagata logonoa, ina ua latou aʻoaʻoina e uiga iā te ia? O le alofa, tigāalofa, faamasinotonu, faamaoni, agalelei faifua, ma le tele lava o isi uiga.

Ua iloa e Molimau logonoa i so o se vaipanoa i le lalolagi ia fofoga o Ieova, ma o le a faaauau pea ona latou iloa atili. Ona o lona finagalo alofa mo tagata logonoa, ua ‘faamalamalamaina ai e Ieova ona fofoga iā i latou.’ (Nu. 6:25) Maʻeu le lotofaafetai o na tagata logonoa ina ua latou iloa Ieova!

[Ata i le itulau 25]

E sili atu ma le 1,100 faapotopotoga a tagata logonoa i le lalolagi atoa

[Ata i le itulau 26]

Ua susulu atu le malamalama o fofoga o Ieova i tagata logonoa