Skip to content

Skip to table of contents

Faaa‘oa‘o iā Iesu—I le Tala‘i ma le Lototele

Faaa‘oa‘o iā Iesu—I le Tala‘i ma le Lototele

 Faaaʻoaʻo iā Iesu—I le Talaʻi ma le Lototele

“Na mafai ona matou lototetele . . . ina ia taʻu atu iā te outou le tala lelei a le Atua.”—1 TESA. 2:2.

1. Aiseā e tosina ai tagata i le tala lelei o le Malo?

E UIGA ese le manaia o le faalogologo atu i se tala lelei! Ma o le tala e sili ona manaia, o le tala lelei lea o le Malo o le Atua. Ua faamautinoa mai ai le tafiesea o mafatiaga, maʻi, tigā, faanoanoaga, ma le oti. Ua maua ai le avanoa i le ola e faavavau, ma faailoa mai ai le finagalo o le Atua, faapea le auala e maua ai se faiā māfana ma ia. E faatalitalia la o le a fiafia tagata uma e faalogo i lea tala ua faailoa mai e Iesu. Ae o le itu e faanoanoa ai, ona e lē o le tulaga lenā.

2. Faamatala le uiga o le fetalaiga a Iesu e faapea: “Ua ou sau e faatupu fevaevaeaʻiga.”

2 Na fetalai Iesu i ona soo e faapea: “Aua tou te manatu ua ou sau e avatu le filemu i le lalolagi; ou te leʻi sau e avatu le filemu a o le pelu. Auā ua ou sau e faatupu fevaevaeaʻiga: o le atalii ma lona tamā, o le tama teine ma lona tinā, o le avā foʻi ma le tinā o lana tane. O le mea moni, e fai le aiga o le tagata ma ona fili.” (Mata. 10:34-36) Nai lo le talia fiafia o le tala lelei, o le toʻatele o tagata ua latou teena. O nisi ua fai i latou ma fili o ē folafola atu le tala lelei, e ui lava o i latou o ni tauaiga vavalalata.

3. O le ā e tatou te manaʻomia ina ia faataunuu ai la tatou galuega talaʻi?

3 O loo tatou folafola atu foʻi upu moni na folafola e Iesu, ma pe a faalogo i ai tagata, e tutusa lava le latou tali mai i aso nei ma le tali mai a le toʻatele i aso o Iesu. Ma o le mea lenā  e tatou te faatalitalia. Na fetalai Iesu i ona soo e faapea: “E lē sili le pologa i lona matai. Afai na latou faasauā mai iā te aʻu, e latou te faasauā foʻi iā te outou.” (Ioa. 15:20) I le tele o atunuu, e lē o tupu iā i tatou ni sauāga ogaoga, ae e tatou te feagai ma le ʻinoʻino ma le lē ano mai o tagata. O lea la, e manaʻomia ona tatou faatuatua ma faamalolosi ina ia tumau ai i la tatou galuega, o le talaʻia lea o le tala lelei ma le lototetele.—Faitau le 2 Peteru 1:5-8.

4. Aiseā na manaʻomia ai e Paulo le ‘lototele’ e talaʻi atu ai?

4 Atonu e iai taimi e faigatā ai ona e alu i le talaʻiga, ia pe atonu foʻi e te popole i nisi vala o le talaʻiga. Pe afai o le tulaga lenā, e lē na o oe o iai lenā lagona. O le aposetolo o Paulo o se tagata talaʻi e lototele ma lē fefe, ma na malamalama lelei i le upu moni, ae sa iai foʻi taimi na lē faigofie ai ona ia talaʻi atu. Na tusi Paulo i Kerisiano i Tesalonia e faapea: “E ui ina muamua ona matou puapuagatia ma faileagaina ma le lē mafaufau i Filipi, (e pei ona outou iloa) ae na mafai ona matou lototetele ona o lo tatou Atua, ina ia taʻu atu iā te outou le tala lelei a le Atua ma le finafinau tele.” (1 Tesa. 2:2) I Filipi, sa sasaina ai e i latou e pule ia Paulo ma lana aumea o Sila i laau, ma lafo i laʻua i le falepuipui, ma faamau o la vae i laau. (Galu. 16:16-24) E ui i lea, ‘na mafai ona lototetele’ Paulo ma Sila e faaauau le la talaʻiga. E mafai faapefea ona tatou faia faapea? Ina ia maua le tali, seʻi o tatou iloilo po o le ā na mafai ai e auauna a le Atua i taimi o le Tusi Paia, ona tautatala atu ma le lototetele i le upu moni e uiga iā Ieova. Ma tatou aʻoaʻoina ai le auala e mulimuli ai i la latou faaaʻoaʻoga.

E Manaʻomia le Lototele e Fesagaʻia ai le Itagia

5. Aiseā e manaʻomia ai pea ona lototetele i latou e faamaoni iā Ieova?

Ioe, o le faaaʻoaʻoga sili o le faamalosi ma le lototele, o Iesu Keriso. E mai lava i le amataga o le talafaasolopito o le tagata, ua manaʻomia pea e tagata uma e faamaoni iā Ieova ona lototetele. Aiseā? Ina ua mavae le fouvalega i Etena, na valoia e Ieova o le a iai le feitagaʻi i le va o auauna a le Atua ma ē e mulimuli iā Satani. (Kene. 3:15) Na manino mai lenei feitagaʻi ina ua fasiotia le tagata amiotonu o Apelu e lona uso. Mulimuli ane, na itagia foʻi Enoka, o se tagata faatuatua na soifua a o leʻi oo i le Lolo. Na ia valoia o le a afio mai le Atua ma Ana ʻaupaia e faasalaina i latou o ē amio faalēmataʻu. (Iuta 14, 15) E leʻi fia faalogo tagata i lea feʻau. Na ʻinoʻino tagata iā Enoka ma semanū e latou te fasiotia o ia, pe ana lē aveesea o ia e Ieova. E uiga ese le lototele na faaalia e Enoka!—Kene. 5:21-24.

6. Aiseā na manaʻomia ai e Mose le lototele e tautala atu ai iā Farao?

6 Seʻi manatu foʻi i le lototele o Mose ina ua tautala atu iā Farao, o se pule na vaai i ai e lē o se sui o atua, ae o ia o se atua; ma na manatu i ai o le atalii o Ra, le atua o le lā. I le pei foʻi o isi Farao, e foliga mai na tapuaʻi o ia i lona lava faatusa. O le mea lava na fai atu ai Farao, sa tatau ona faataunuu, ma o lenei tagata malosi toe faamaualuga, ma faaulumalō, e lē masani ona faatonuina o ia e se isi i le mea e ao ona fai. O ia lenei na feagai pea ma le leoleo mamoe agamalu o Mose, e ui e na te leʻi aamia Mose pe fiafia foʻi iā te ia. O le ā sa taʻu atu e Mose o le a tupu iā Farao? O le a oo mai mala mataʻutia. Ma o le ā lana talosaga na fai atu iā Farao? Ia faasaʻoloto mai le faitau miliona o tagata Isaraelu o loo pologa iā Farao, e tuua Aikupito! Pe sa manaʻomia e Mose le lototele? Ioe, sa manaʻomia!—Nu. 12:3; Epe. 11:27.

7, 8. (a) O ā tofotofoga na feagai ma auauna faamaoni i taimi ua mavae? (e) O le ā sa fesoasoani i ē na ola a o lumanaʻi le faa-Kerisiano, ina ia lototetele ai e lagolago ma faaauiluma le tapuaʻiga moni?

7 A o faagasolo senituri mulimuli ane, sa faaauau ona lagolagoina ma le lototetele e perofeta ma isi auauna faamaoni a le Atua, ia le tapuaʻiga mamā. Sa inosia i latou e le lalolagi a Satani. Ua taʻua e Paulo e faapea: “Na fetogia  i latou i maa, na tofotofoina, na vaevaeina i ili, na feoti i pelu, na feoaʻi solo i ofu paʻu mamoe, ma paʻu o ʻoti, e lē tagolima, ma faapuapuagatia, ma faileagaina.” (Epe. 11:37) O le ā sa fesoasoani i na auauna faamaoni a le Atua ina ia tutumau ai? Sa taʻua e le aposetolo i fuaiupu muamua atu le mea na fesoasoani iā Apelu, Aperaamo, Sara ma isi ina ia tutumau ai. Na ia taʻua e faapea: “E leʻi faataunuuina folafolaga i o latou aso, ae na latou iloa mamao atu nei mea [ona o le faatuatua], ma talia ma le fiafia.” (Epe. 11:13) E mautinoa o le faatuatua i folafolaga a Ieova, sa fesoasoani ina ia tutumau ai perofeta e pei o Elia, Ieremia, ma isi auauna faamaoni a o lumanaʻi le faa-Kerisiano, o ē sa lagolagoina ma le lototetele le tapuaʻiga moni.—Tito 1:2.

8 O na tagata faamaoni sa taulaʻi atu i se lumanaʻi pupula ma le matagofie. Pe a toe faatutūina, o le a oo ina latou maua le lelei atoatoa ma “saʻoloto ai . . . mai le faapologaina i mea leaga,” ona o le auaunaga faaositaulaga a Keriso Iesu ma ana ositaulaga lagolago e 144,000. (Roma 8:21) E lē gata i lea, sa faamalosia Ieremia ma isi auauna lototetele a le Atua i aso anamua, ona o le faamautinoaga a Ieova lea e iloa i lana folafolaga iā Ieremia e faapea: “Latou te sii mai le taua iā te oe, a e latou te lē manumalo iā te oe; auā o aʻu ou te iā te oe e laveaʻi iā te oe, ua fetalai mai ai Ieova.” (Iere. 1:19) I aso nei, pe a tatou manatunatu i folafolaga a le Atua mo lo tatou lumanaʻi, ma lana faamautinoaga i le puipuiga faaleagaga, o le a faamalosia ai foʻi i tatou.—Faata. 2:7; faitau le 2 Korinito 4:17, 18.

Na Uunaʻia Iesu e Talaʻi ma le Lototele Ona o le Alofa

9, 10. O ā auala na faaalia ai e Iesu le lototele i luma o (a) taʻitaʻi lotu, (e) le ʻaufitafita, (i) le faitaulaga sili, (o) Pilato?

9 E tele vala na faaalia ai e lo tatou Faaaʻoaʻo Sili o Iesu le lototele. O se faataʻitaʻiga, e ui ina inosia o ia e i latou e iai le pule ma le malosi, ae sa ia taʻu saʻo atu le feʻau e faatatau i le finagalo o le Atua mo tagata. E leʻi fefe o ia e faailoa atu le faafiaamiotonu o taʻitaʻi lotu, atoa ai ma a latou aʻoaʻoga sesē. Na taʻu saʻo atu ma le manino e Iesu lona taʻusalaina o i latou. Na iai se taimi na ia faapea atu ai: “Oi talofa iā te outou le ʻautusiupu ma le ʻau Faresaio, tagata faafiaamiotonu! auā ua pei outou o tuugamau ua vali papaʻe, ua foliga matagofie mai fafo a o totonu ua tumu i ponaivi o tagata oti ma mea lē mamā uma. Ua faapena foʻi outou, ua outou faatagā amiotonu i luma o tagata, ae ua tumu o outou loto i le pepelo ma le amioleaga.”—Mata. 23:27, 28.

10 Ina ua maua o ia e le ʻaufitafita i le faatoʻaga o Ketesemane, na faailoa atu ma le lototele e Iesu o ia iā i latou. (Ioa. 18:3-8) Ona sosoo lea ma le avatu o ia i luma o le ʻau Saniterini ma faamasinoina e le faitaulaga sili. Peitaʻi, e leʻi fefe Iesu e taʻu saʻo atu o Ia o le Keriso ma o le Alo o le Atua, e ui na ia iloa o loo suʻe e le faitaulaga sili se mea e fasiotia ai o ia. Na ia faamatala atili atu e faapea, o le a latou vāai iā te ia o “nofo i le itu taumatau o Lē e Malosi, ma e sau foʻi o ia i ao o le lagi.” (Mare. 14:53, 57-65) E leʻi leva ae saisai loa Iesu ma avatu i luma o Pilato, o lē sa iai le  pule e faasaʻoloto ai o ia. Ae sa fifilemu pea Iesu e leʻi tali atu i tuuaʻiga na molia ai o ia. (Mare. 15:1-5) O nei mea uma sa manaʻomia ai le lototele.

11. E faapefea ona fesootaʻi le lototele ma le alofa?

11 Peitaʻi, na faapea atu Iesu iā Pilato: “O le mea lea na ou fanau mai ai, o le mea foʻi lea na ou sau ai i le lalolagi, ina ia ou molimau i le upu moni.” (Ioa. 18:37) Na tofia e Ieova Iesu e talaʻi le tala lelei, ma na naunau Iesu e faia faapea ona o le alofa i lona Tamā i le lagi. (Luka 4:18, 19) Na alofa foʻi Iesu i tagata. Na ia silafia le faigatā o o latou olaga. E māfua foʻi ona tatou lototetele ma lē fefefe e talaʻi, ona o le alofa i le Atua faapea ma o tatou tuaoi.—Mata. 22:36-40.

E Fesoasoani le Agaga Paia e Talaʻi ai ma le Lototele

12. O le ā le māfuaaga na olioli tele ai uluaʻi soo?

12 I vaiaso ina ua mavae le maliu o Iesu, sa olioli tele ai soo ina ua faaopoopo atu e Ieova ni soo fou iā i latou. Ona e tasi le aso, ae na papatisoina ai le tusa ma le 3,000 o tagata Iutaia ma tagata liulotu mai le tele o nuu, o ē na ō ane i Ierusalema e faamanatu le Penetekoso. Sa salalau le tala i Ierusalema e faatatau i le mea na tupu! Ua faapea mai le Tusi Paia: “Ua amata ona matataʻu tagata uma, ma ua tutupu foʻi le tele o mea ofoofogia ma faailoga e ala mai i aposetolo.”—Galu. 2:41, 43.

13. Aiseā na tatalo ai le ʻauuso mo le lototele, ma o le ā na iʻu i ai?

13 Na feita taʻitaʻi lotu ma latou puʻea Peteru ma Ioane, ma faafalepuipui seʻia oo i le isi aso, ma faatonu atu e aua le toe tautatala e faatatau iā Iesu. Ina ua tatala mai i laʻua, na la faamatala atu i le ʻauuso le mea na tupu, ma na latou tatalo faatasi e tusa ai ma teteega na fesagaʻia ma talosaga atu e faapea, “Ieova e, ia e . . . tuuina mai i au pologa le malosi e tautatala atu ai pea i lau afioga ma le lototetele.” O le ā na iʻu i ai? “Ua faatutumuina foʻi i latou uma i le agaga paia, ma ua taʻutaʻu atu le afioga paia a le Atua ma le lototetele.”—Galu. 4:24-31.

14. E faapefea ona fesoasoani mai le agaga paia i la tatou galuega talaʻi?

14 Mātau mai, o le agaga paia mamana o Ieova na fesoasoani i le ʻausoo e tautatala ai ma le lototetele i le afioga a le Atua. E lē o i tatou, a o Ieova e faalagolago i ai le mauaina o le lototele e taʻu atu ai le upu moni i isi, e oo lava foʻi i ē e tetee mai i la tatou feʻau. E mafai e Ieova ona aumai lona agaga paia, ma o le a ia faia faapea pe a tatou ole atu iā te ia. Ma e ala i lana fesoasoani, o le a mafai ai foʻi ona tatou faaalia le lototele lea e manaʻomia, ina ia manumalo ai i so o se teteega.—Faitau le Salamo 138:3.

O Loo Talaʻi ma le Lototetele Kerisiano i Aso Nei

15. Ua faapefea ona eseese auala e tali mai ai tagata i le upu moni i aso nei?

15 I le pei o aso anamua, o loo faaauau pea ona eseese le auala e tali mai ai tagata i le upu moni. O nisi e tali lelei mai, a o isi e lē talisapaia ma lē malamalama i la tatou tapuaʻiga. O nisi e tauemu ma faitio, pe ʻinoʻino mai e tusa ai o le fetalaiga a Iesu. (Mata. 10:22) O nisi taimi, ua fai faamatalaga sesē ma lē saʻo e uiga iā i tatou e ala i tusitusiga ma faasalalauga. (Sala. 109:1-3) Peitaʻi, o loo folafola atu pea ma le lototetele e tagata o Ieova le tala lelei i le lalolagi atoa.

16. O le ā se mea na tupu e iloa ai, o le lototele e mafai ona suia ai le tali mai a ē tatou te talaʻi i ai?

16 O lo tatou lototetele e mafai ai ona suia le tali mai a tagata i le feʻau o le Malo. Ua faapea mai se tuafafine i Kyrgyzstan: “A o oʻu auai i le galuega talaʻi, na faapea mai se tagata e ona le fale iā te aʻu: ‘Ou te talitonu i le Atua ae e lē o le Atua e talitonu i ai Kerisiano. E te toe tū mai loa i inei, faaoso atu loa laʻu maile iā te oe!’ Sa i ona tua se maile lapoʻa ma feʻai o loo nonoa i se filifili. Ae i le taimi na tufatufaina ai le Tala o le Malo Nu. 37, ‘Ua i Faitotoʻa le Iʻuga o Lotu Sesē!,’ na ou filifili ai e toe  alu i le fale lava lea e tasi ma le faamoemoe e feiloaʻi i se isi tagata o le aiga. Peitaʻi, na tatala mai e le tamāloa lava lea le faitotoʻa. Sa vave ona fai laʻu tatalo iā Ieova ma faapea atu i le tamāloa: ‘Talofa, ou te manatua le ta talanoaga i le tolu aso ua mavae, ma o loo oʻu manatua foʻi lau taʻifau. Peitaʻi, ou te manaʻo e avatu le savali lenei ona e tutusa lava i taʻua, ou te talitonu foʻi i le Atua moni e toʻatasi. Ua lē o toe umi ona faaumatia lea e le Atua o lotu e lē o faamamaluina o ia. E te maua nisi faamatalaga atili e faatatau i lenā mataupu pe a e faitau i ai.’ Na faateʻia aʻu ina ua talia e le tamāloa le savali. Ona ou alu lea i le isi fale. Ae i nai minute mulimuli ane, na momoʻe mai le tamāloa iā te aʻu ma le Tala o le Malo ma fai mai, ‘Ua uma ona ou faitau i ai. O le ā laʻu mea e tatau ona fai ina ia ou sao ai mai le toʻasā o le Atua?’” Sa amata se suʻesuʻega a le tamāloa ma amata ona auai i sauniga.

17. Na faapefea ona faamalosia se tagata suʻesuʻe ona o le lototele o se tuafafine?

17 O lo tatou lototetele e mafai foʻi ona faamalosia ai isi e lototetele. I Rusia, na ofo ai e se tuafafine se mekasini i se fafine na la malaga faatasi i le pasi. Na oso mai se tamāloa ma seʻi atu le mekasini mai le tuafafine, ma numinumi ma togi i le fola o le pasi. Na palauvale leotele atu i le tuafafine ma fai i ai e taʻu mai le mea e nofo ai, ma aua neʻi toe talaʻi i le nuu. Na tatalo le tuafafine iā Ieova ma ia manatua ai upu a Iesu e faapea: “Aua tou te matataʻu i ē fasiotia le tino.” (Mata. 10:28) Na faaalia lona toʻa ina ua tū i luga ma fai atu i le tamāloa, “Ou te lē taʻu atua le mea ou te nofo ai, ma e faaauau pea ona ou talaʻi i le nuu.” Ona oso ese lea i lalo ma le pasi. E leʻi iloa e le tuafafine o loo iai i totonu o le pasi se fafine e la te suʻesuʻe. O lea fafine, ua lē o toe auai i sauniga ona o le fefe i tagata. Ae ua avea lona vaaia o le lototele o si o tatou tuafafine, ma mea na filifili ai e toe auai i sauniga.

18. O le ā e fesoasoani iā te oe e talaʻi ai ma le lototele e pei ona faia e Iesu?

18 I lenei lalolagi ua faaesea mai le Atua, e manaʻomia le lototele e talaʻi ai e pei ona faia e Iesu. O le ā e fesoasoani iā te oe e faia ai faapea? Ia taulaʻi atu i le lumanaʻi. Ia faamalosia pea lou alofa i le Atua ma tuaoi. Ia tatalo iā Ieova mo le lototele. Ia manatua pea, e lē o tuua na o oe, o loo oulua faatasi pea ma Iesu. (Mata. 28:20) O le a faamalosia oe e le agaga paia, ma o le a faamanuiaina ma lagolagoina oe e Ieova. O lea la, seʻi o tatou lototetele ma faapea atu: “O Ieova o loʻu fesoasoani ia; ou te lē fefe lava. O le ā la se mea e mafai ona faia e tagata iā te aʻu?”—Epe. 13:6.

O le ā Lau Tali?

• Aiseā e manaʻomia ai e auauna a le Atua le lototele?

• E tusa ai o le lototele, o le ā e tatou te aʻoaʻoina mai . . .

i ē faamaoni na ola a o lumanaʻi le faa-Kerisiano?

iā Iesu Keriso

i uluaʻi Kerisiano?

i o tatou uso Kerisiano i aso nei?

[Fesili mo le Suʻesuʻega]

[Ata i le itulau 21]

E leʻi fefe Iesu e taʻusalaina taʻitaʻi lotu

[Ata i le itulau 23]

E foaʻi mai e Ieova le lototele e talaʻi ai