Skip to content

Skip to table of contents

Le Auauna Pule Faamaoni ma Lana Vaega Pule

Le Auauna Pule Faamaoni ma Lana Vaega Pule

 Le Auauna Pule Faamaoni ma Lana Vaega Pule

“O ai foʻi le auauna pule e faamaoni ma faautauta, ua tofia e lona matai e vaavaaia lana ʻautautua, ma avatu ni a latou meaʻai e talafeagai i le taimi tatau?”—LUKA 12:42.

1, 2. O le ā le fesili tāua na lāgā e Iesu a o taʻu atu vala o le faailoga o aso e gata ai?

A O TAʻU atu vala o le faailoga o aso e gata ai, na lāgā e Iesu le fesili lenei: “O ai la le pologa faamaoni ma le faautauta, o lē ua tofia e lona matai e vaavaaia lana ʻaufaigaluega, e avatu a latou meaʻai i le taimi tatau?” Ona fetalai atili atu lea o Iesu e faapea, o le a tauia lenei pologa ona o lona faamaoni, e ala i le tofia e vaavaaia mea uma a le Matai.—Mata. 24:45-47.

2 I ni masina muamua atu, na fesili ai Iesu i se fesili faapena. (Faitau le Luka 12:42-44.) Sa ia taʻua le pologa o le “auauna pule” ma faasino  atu i le “ʻaufaigaluega” o “lana ʻautautua.” O le auauna pule, o sē e vaavaaia mea a le aiga po o sē ua tuu atu i ai le pule e vaavaaia auauna. Peitaʻi, o le auauna pule o ia foʻi o se auauna. O ai lenei pologa po o le auauna pule, ma e faapefea ona ia saunia mai “meaʻai i le taimi tatau”? E tāua tele mo i tatou uma ona iloa le auala lea o loo faaaogā e faasoa mai ai meaʻai faaleagaga.

3. (a) Ua faapefea ona taumafai le ʻaufaimanatu o lotu, e faamatala fetalaiga a Iesu e faatatau i le “pologa”? (e) O ai le “auauna pule” po o le “pologa,” ma o ai le “ʻautautua” po o le “ʻaufaigaluega”?

3 Ua masani ona manatu le ʻaufaimanatu o lotu i fetalaiga nei a Iesu e faapea, o loo faasino atu iā i latou e iai o latou tofiga i lotu. Peitaʻi, e leʻi taʻua e Iesu, le “matai” lea e taʻua i le talafaatusa e faapea, o le a toʻatele pologa e taapeape solo i lotu eseese ua faapea mai o Kerisiano. Nai lo lea, sa manino ona ia faapea mai, o le a na o le tasi le “auauna pule” po o le “pologa,” o lē o le a ia tofia e vaavaaia ana mea uma. O lea la, e pei lava ona sa masani ona faamatala e lenei lomiga, o le auauna pule e tatau ona faaatagia mai ai le “lafu mamoe itiiti” o soo faauuina, i le avea ma vaega tuufaatasi, po o se vasega. I faamatalaga o loo siʻomia ai le Evagelia a Luka, sa faasino atu Iesu iā i latou nei. (Luka 12:32) O le “ʻautautua” po o le “ʻaufaigaluega,” o loo faasino atu i le vaega lava foʻi lenei, ae o loo faamatilatila ai o latou tiute o ni tagata taʻitoʻatasi. Ua lāgā ai nei se fesili faatupu manatu, Po o fai se vaega a sui taʻitoʻatasi o lenei vasega o le pologa, i le sauniaina mai o meaʻai faaleagaga i le taimi tatau? O le a manino le tali pe a tatou iloiloina totoʻa le faamatalaga a le Tusi Paia.

Le Auauna a Ieova i Taimi ua Mavae

4. O le ā le auala na faasino atu ai Ieova i le nuu anamua o Isaraelu, ma o le ā e tāua ona mātau e faatatau i lenā nuu?

4 Na fetalai atu Ieova e faatatau i ona tagata, le nuu anamua o Isaraelu e faapea o se auauna i lona tuufaatasiga. “Ua fetalai mai Ieova, O outou o aʻu molimau, ma laʻu auauna o lē na aʻu filifilia.” (Isa. 43:10) Sa aofia ai sui uma o le nuu i lenā vasega e tasi o le auauna. Peitaʻi, e tāua ona mātau e faapea, e na o ositaulaga ma ē e lē o ni ositaulaga o le ituaiga o sa Levī, sa iā i latou le tiute mo le aʻoaʻoina o le tulafono i le nuu.—2 No. 35:3; Mala. 2:7.

5. E tusa ai o le fetalaiga a Iesu, o le ā le suiga tele o le a tupu?

Pe na faasino atu le pologa lea na fetalai ai Iesu, i le nuu o Isaraelu? E leai. E tatou te iloa lenā mea ona o le fetalaiga a Iesu i tagata Iutaia i ona aso, e faapea: “E aveesea le malo o le Atua mai iā te outou, ae tuuina atu i se nuu e fua mai ai ona fua.” (Mata. 21:43) E manino mai, o le a iai se suiga. O le a faaaogā e Ieova se nuu fou. Peitaʻi, pe a oo mai i faatonuga faaleagaga, o le galuega a le pologa o loo taʻua i le talafaatusa a Iesu, e mulimuli i le faiga lava e tasi lea na faatulaga ai le galuega a le “auauna” a le Atua i Isaraelu anamua.

Aliaʻe Mai le Pologa Faamaoni

6. O le ā le nuu fou na aliaʻe mai i le Penetekoso 33 T.A., ma o ai na avea ma vaega o lenā nuu fou?

6 Ua faia aʻe le nuu fou, “le Isaraelu a le Atua,” i le Isaraelu faaleagaga. (Kala. 6:16; Roma 2:28, 29; 9:6) Na aliaʻe mai le Isaraelu faaleagaga ina ua liligiina ifo le agaga paia o le Atua i le Penetekoso 33 T.A. Mulimuli ane, na avea Kerisiano faauuina uma ma vaega o le nuu, lea ua auauna nei o le vasega o le pologa ua tofia e le Matai, o Iesu Keriso. Ua tuuina mai i sui taʻitoʻatasi o lenā nuu le tofiga ia talaʻi atu le tala lelei ma fai tagata ma soo. (Mata. 28:19, 20) Ae po o aofia ai sui uma o lenā vaega i le sauniaina mai o meaʻai faaleagaga i ona taimi tatau? Seʻi o tatou vāai po o faapefea ona tali e le Tusi Paia lenei fesili.

7. I le taimi muamua, o le ā le galuega autū a aposetolo, ma o le ā le tofiga faaopoopo na latou mauaina?

7 Ina ua tofia e Iesu ona aposetolo e toʻasefululua, o la latou galuega autū na aofia ai le auina atu e talaʻi le tala lelei i isi. (Faitau le Mareko 3:13-15.) O lenei tofiga ua ōgatusa ma  le uiga autū o le upu Eleni e taʻu o le apostolos, lea e maua mai i se veape o lona uiga o le “auina atu.” Peitaʻi, a o faagasolo taimi ma ua lata ina faavaeina le faapotopotoga Kerisiano, sa avea loa le tofiga o se aposetolo ma “sē e taʻimua” po o se ovasia.—Galu. 1:20-26.

8, 9. (a) O le ā le mea sa sili ona tāua i aposetolo e 12? (e) O ai isi na tuuina atu i ai tiute tauave faaopoopo, e pei ona faamaonia e le vaega pule?

8 O le ā le mea sa sili ona tāua i aposetolo e toʻasefululua? E iloa le tali i mea na tutupu ina ua mavae le aso o le Penetekoso. Ina ua aliaʻe se finauga e faatatau i le tufatufaina atu o meaʻai i aso fai soo i fafine ua oti a latou tane, sa faapotopoto e le ʻauaposetolo e toʻasefululua ia soo ma faapea atu: “E lē lelei ona matou tuua le afioga a le Atua ae tufatufa atu meaʻai.” (Faitau le Galuega 6:1-6.) Ona tofia lea e le ʻauaposetolo o isi uso ua agavaa faaleagaga ina ia vaavaaia lenei “galuega tatau,” ina ia mafai ai ona uaʻi atoatoa atu le ʻauaposetolo i le “auaunaga e tusa ai ma le afioga a le Atua.” O lenei faatulagaga na iʻu ai i le faamanuiaga a Ieova ina ua “tupu pea le afioga a le Atua, ma ua matuā faatoʻateleina soo i Ierusalema.” (Galu. 6:7) O lona uiga la, o le tiute autū mo le fafagaina faaleagaga, sa paʻū atu i le ʻauaposetolo.—Galu. 2:42.

9 Mulimuli ane, na tuuina atu i isi tiute faigatā. I le taʻitaʻiga a le agaga paia, sa auina atu ai Paulo ma Panapa o ni misionare e le faapotopotoga i Anetioka. Sa iloa foʻi i laʻua o aposetolo, e ui sa lē aofia ai i laʻua i uluaʻi aposetolo e toʻasefululua. (Galu. 13:1-3; 14:14; Kala. 1:19) Sa faamaonia lo la tofiga e le vaega pule i Ierusalema. (Kala. 2:7-10) E leʻi leva ae faia loa se vaega a Paulo i le faasoaina atu o meaʻai faaleagaga. Sa ia tusia lana uluaʻi tusi faagaeeina.

10. I le uluaʻi senituri, pe na aofia ai Kerisiano faauuina uma i le sauniaina o meaʻai faaleagaga? Faamatala.

10 Peitaʻi, pe na aofia ai Kerisiano faauuina uma i le vaavaaia o le galuega talaʻi ma le sauniaina o meaʻai faaleagaga? E leai. Ua taʻu mai e le aposetolo o Paulo iā i tatou e faapea: “Po o ni aposetolo uma ea i latou? Po o ni perofeta uma ea i latou? Po o ni faiaʻoga uma ea i latou? Pe latou te faia uma ea ni galuega mamana?” (1 Kori. 12:29) E ui lava o Kerisiano faauuina uma na auai i le galuega talaʻi, ae e na o se aofaʻiga toʻaitiiti—e na o le toʻavalu tane eseese—na faaaogā e tusiaina tusi e 27 o Tusitusiga Kerisiano Eleni.

Le Pologa Faamaoni i Aso Nei

11. O ā “mea” ua tofia atu i le pologa e na te vaavaaia?

11 Ua faaalia manino mai i upu a Iesu o loo faamauina i le Mataio 24:45 e faapea, o le a iai pea se vasega o le pologa faamaoni ma le faautauta e soifua pea i luga o le lalolagi, a o faagasolo taimi o le iʻuga. I le Faaaliga 12:17, o loo faasino atu ai iā i latou nei o “ē o totoe” o le fanau a le fafine. I le avea ma vaega, ua tofia ai lenei vaega totoe e vaavaaia mea uma a Keriso i inei i le lalolagi. O “mea” ua tofia i ai le auauna pule faamaoni e na te tausia, o mea ia a le Matai o loo i le lalolagi, lea e aofia ai tagatānuu o le Malo i le lalolagi, fale, faapea ma isi mea totino o loo faaaogā i le talaʻiina o le tala lelei.

12, 13. E faapefea ona iloa e se Kerisiano ua ia mauaina le valaau mo le lagi?

12 E faapefea ona iloa e se Kerisiano ua ia maua le faamoemoe faalelagi, ma ua aofia ai i lenei vaega totoe o le Isaraelu faaleagaga? O loo maua le tali i upu a le aposetolo o Paulo iā i latou na iai le faamoemoe faalelagi faatasi ma ia: “O i latou uma e taʻitaʻiina e le agaga o le Atua, o atalii ia o le Atua. Tou te leʻi maua le agaga o pologa e toe fefefe ai, ae ua outou maua le agaga o ataliifai, o le agaga foʻi lea ua tatou alalaga atu ai: ‘Ava, le Tamā e!’ Ua molimau le agaga lava lea faatasi ma o tatou agaga, o i tatou o fanau a le Atua. Afai o fanau i tatou, o i tatou foʻi o suli: o suli o le Atua, o suli faatasi ma Keriso, pe afai tatou te tigāina faatasi, ina ia faamamaluina faatasi foʻi i tatou.”—Roma 8:14-17.

13 I se faaupuga faigofie, ua faauuina i latou  nei i le agaga paia o le Atua, ma maua se “valaau” po o se valaaulia mo le lagi. (Epe. 3:1) O lenei valaaulia e mai i le Atua. O lea la, e latou te tali atu e aunoa ma le fesiligia pe fefefe foʻi e talia lenei fanauina e avea ma atalii o le Atua. (Faitau le 1 Ioane 2:20, 21.) O lona uiga e latou te leʻi filifilia lenei faamoemoe mo i latou lava, ae ua tuuina e Ieova iā i latou lana faamaufaailoga, po o le agaga paia.—2 Kori. 1:21, 22; 1 Pete. 1:3, 4.

Le Vaaiga Saʻo

14. E faapefea ona manatu ē faauuina i le valaauina o i latou?

14 E ao faapefea i nei Kerisiano ua faauuina i le agaga ona manatu iā i latou lava, a o latou faatalitali i lo latou taui i le lagi? Latou te manatu e faapea e ui lava ua latou mauaina se valaaulia matagofie, ae ua na o se valaaulia. E ao ona latou tumau i le faamaoni seʻia oo ina maliliu, ina ia maua ai lenei taui. Ona o le lotomaulalo, ua latou faaleo atu ai upu a Paulo e faapea: “Uso e, ou te lē o manatu iā te aʻu faapea ua ou maua le taui, ae tasi le mea e tāua: O le faagalo lea o mea ua tuanaʻi, ae tepa taulaʻi atu i mea o i le lumanaʻi, ua ou tausinio i le sini, o le taui lea o le valaau faalelagi mai le Atua, e ala iā Keriso Iesu.” (Fili. 3:13, 14) E ao i le vaega totoe faauuina ona fai le mea sili latou te mafai ina ia ‘savavali ai e tusa ma le valaau na valaauina ai i latou, ma le matuā lotomaulalo,’ ma ia faia faapea “i le mataʻu ma le gatete.”—Efe. 4:1, 2; Fili. 2:12; 1 Tesa. 2:12.

15. E ao faapefea i Kerisiano ona manatu iā i latou e tagofia le areto ma le uaina i le Faamanatuga, ma e faapefea ona manatu ē faauuina iā i latou lava?

15 I le isi itu, e ao faapefea i isi Kerisiano ona manatu i se tagata e faapea mai ua ia maua lenei faauuina, ma ua amata ona ia tagofia le areto ma le uaina i le taimi o le Faamanatuga? E lē tatau ona faamasinosino i lenā tagata. O lenā mataupu e i le va o lenei tagata ma Ieova. (Roma 14:12) Peitaʻi, o Kerisiano ua latou mauaina moni lenei faauuina, e lē mananaʻo e uaʻi faapitoa atu iā i latou. E latou te lē manatu e faapea, a faauuina i latou ua tele atu ai lo latou malamalama nai lo o nisi sui o le “motu o tagata e toʻatele,” lea foʻi o loo iai le tofā mamao ma le utaga poto. (Faaa. 7:9) E latou te lē manatu e faapea e tele atu le fesoasoani a le agaga paia iā i latou nai lo o “isi mamoe.” (Ioa. 10:16) E latou te lē faatalitalia foʻi e auauna atu isi iā i latou; pe manatu e sili atu  i latou i toeaina i le faapotopotoga ona e latou te tagofia le areto ma le uaina.

16-18. (a) Pe e aofia ai Kerisiano faauuina uma i le faailoaina mai o upu moni fou faaleagaga? Faataʻitaʻi. (e) Aiseā e lē manaʻomia ai mo le Vaega Pule ona fetalanoaaʻi ma i latou uma e faapea mai ua faauuina?

16 Pe faamata e manaʻomia e i latou uma nei o ē faauuina ona fetalanoaaʻi, pe aofia ai i le talanoaina ma le faailoaina mai o upu moni fou faaleagaga? E leai. E ui lava i le avea ai o i latou o se vaega, ae o loo gafa le vasega o le pologa ma le fafagaina o le aiga faaleagaga, ae e lē o tagata taʻitoʻatasi o le vasega o le pologa e tutusa uma o latou tiute tauave po o tofiga. (Faitau le 1 Korinito 12:14-18.) E pei ona taʻua i le amataga, i le uluaʻi senituri, sa aofia i latou uma i le galuega tāua o le talaʻi. Ae sa na o se vaega toʻaitiiti na faaaogā e tusiaina tusi o le Tusi Paia ma vaavaaia le faapotopotoga Kerisiano.

17 O se faataʻitaʻiga: O nisi taimi e taʻua ai i le Tusi Paia “le faapotopotoga,” e faia se gaoioiga patino i le taulimaina o mataupu faafaamasinoga. (Mata. 18:17) Peitaʻi, i le uiga moni lava, e na o toeaina e mafai ona faia lenei gaoioiga ona o agavaa o loo iā i latou e fai ma sui o le faapotopotoga. E lē talanoa toeaina ma sui uma o le faapotopotoga, ina ia fesili atu i ni o latou manatu eseese a o leʻi faia la latou faaiʻuga. I le ōgatusa ai ma faatulagaga faale-Atua, e latou te faatino le matafaioi ua tofia atu iā i latou; ma e galulue e fai ma sui o le faapotopotoga atoa.

18 I se tulaga talitutusa, o se vaega toʻaitiiti o tane faauuina i aso nei, ua iā i latou le tiute tauave e fai ma sui o le vasega o le pologa. Ua faia aʻe iā i latou le Vaega Pule a Molimau a Ieova. O nei tane ua faauuina i le agaga o loo latou vaavaaia le galuega o le Malo ma le polokalame o le fafagaina faaleagaga. Peitaʻi, e pei ona sa iai i le uluaʻi senituri, e lē talanoa atu le Vaega Pule i sui taʻitoʻatasi o le vasega o le pologa a o leʻi faia ni faaiʻuga. (Faitau le Galuega 16:4, 5.) Peitaʻi, o Molimau faauuina uma, e matuā aafia i latou i le galuega tāua o le seleselega lea o loo faia i le taimi nei. I le avea ai o se vasega, ona faapea lea, e tino e tasi “le pologa faamaoni ma faautauta,” ae i le avea ai ma tagata taʻitoʻatasi, e eseese galuega ua tofia i ai i latou.—1 Kori. 12:19-26.

19, 20. O le ā le vaaiga paleni o loo iai i le motu o tagata e toʻatele, e faatatau i “le pologa faamaoni ma le faautauta,” ma lana Vaega Pule?

19 O le ā se aafiaga o mea moni o loo taʻua i luga i le faatuputeleina o le motu o tagata e toʻatele, o ē e faamoemoe e ola e faavavau i luga o le lalolagi? I le avea ma vaega o mea a le Tupu, e latou te fiafia e lagolagosua atoatoa i faatulagaga ua faia e le Vaega Pule, lea e fai ma sui o le “pologa faamaoni ma le faautauta.” E talisapaia e sui o le motu o tagata e toʻatele meaʻai faaleagaga, lea e saunia mai i lalo o le taʻitaʻiga a le Vaega Pule. Ae i le taimi e tasi, a o faaaloalo atu i le vasega o le pologa, e faaeteete foʻi sui o le motu o tagata e toʻatele ina neʻi o latou faamaualugaina se tasi e faapea mai o se sui o lenā pologa. E leai se Kerisiano e faauuina moni i le agaga o le Atua e manaʻo pe faatalitalia lenā ituaiga faiga.—Galu. 10:25, 26; 14:14, 15.

20 E tusa po o i tatou o le “ʻaufaigaluega,” o sui o le vaega totoe faauuina, po o ni sui o le motu o tagata e toʻatele, seʻi avea ma a tatou filifiliga maumauaʻi le lagolagosua atoatoa atu i le auauna pule ma lana Vaega Pule. Tau ina ia taʻitoʻatasi i tatou ma ‘faaauau ona mataala,’ ma faamaonia atu lo tatou faamaoni seʻia oo i le iʻuga.—Mata. 24:13, 42.

Pe E te Manatua?

• O ai “le pologa faamaoni ma le faautauta,” ma o ai le ʻaufaigaluega?

• E faapefea ona iloa e se tagata ua ia maua le valaau mo le lagi?

• O ai ua iai le tiute tauave autū mo le sauniaina o meaʻai fou faaleagaga?

• E ao faapefea i se tasi o le ʻaufaauuina ona manatu iā te ia lava?

[Fesili mo le Suʻesuʻega]

[Ata i le itulau 23]

I aso nei, o loo fai le Vaega Pule ma sui o le vasega o le pologa faamaoni ma le faautauta. Sa iai foʻi se faatulagaga faapena i le uluaʻi senituri