Skip to content

Skip to table of contents

Tane, Ia Faaa‘oa‘o i le Alofa o Keriso!

Tane, Ia Faaa‘oa‘o i le Alofa o Keriso!

 Tane, Ia Faaaʻoaʻo i le Alofa o Keriso!

I LE pō mulimuli o lona soifuaga i le lalolagi, na fetalai atu ai Iesu i ona aposetolo faamaoni: “Ua ou tuuina atu iā te outou le poloaʻiga fou, ina ia outou fealofani, e pei ona ou alofa atu iā te outou, ia fealofani foʻi outou. O le mea lea e iloa ai e tagata uma o oʻu soo outou, pe afai tou te fealofani.” (Ioa. 13:34, 35) Ioe, e tatau i Kerisiano moni ona fealofani.

A o tautala tuusaʻo o ia i tane Kerisiano, na tusi le aposetolo o Paulo e faapea: “O outou tane, ia faaauau ona alolofa atu i a outou avā, e pei o le Keriso foʻi ona alofa i le faapotopotoga, ma foaʻi atu lona ola mo le faapotopotoga.” (Efe. 5:25) E faapefea ona faatatauina e se tane Kerisiano lenei fautuaga mai le Tusi Paia i lana faaipoipoga, aemaise lava pe afai o lana avā o se auauna tuuina atu a Ieova?

Na Faapelepele Keriso i le Faapotopotoga

O loo taʻua i le Tusi Paia, “E tatau i tane ona alolofa atu i a latou avā e pei o o latou lava tino. O lē e alofa i lana avā, e alofa o ia iā te ia lava, auā e leai se tane e ita i lona lava tino; ae e na te fafaga ma faapelepele i ai, e pei foʻi ona faia e Keriso i le faapotopotoga.” (Efe. 5:28, 29) Sa matuā alofa faapelepele Iesu i ona soo. E ui lava i lo latou tulaga lē lelei atoatoa, ae na ia alofa ma agalelei iā i latou. Ona o lona faanaunau “ia ofoina atu iā te ia lava le faapotopotoga i lona matagofie,” na ia taulaʻi atu ai i uiga lelei o ona soo.—Efe. 5:27.

E pei lava ona faaalia e Iesu le alofa mo le faapotopotoga, e tatau foʻi i se tane Kerisiano ona alofa i lana avā e ala i ana upu ma gaoioiga. O se avā e masani ona faaali i ai e lana tane le alofa, e masani lava ona ia lagona le faapelepeleina ma le fiafia. Ae i le isi itu, o se fafine e maua mea uma e faafaigofie ai le olaga ma se fale matagofie, e mafai ona lē fiafia, pe afai e lē amanaʻia ma tuulafoaʻia o ia e lana tane.

E faapefea ona faaalia o loo faapelepele e se tane lana avā? E ala i lona tautala lelei e faatatau iā te ia ma viiviia o ia i luma o isi tagata. Afai na fesoasoani lana avā i le faatinoina o se mea tāua i totonu o le aiga, e lē faatalatū le tane e taʻu atu i isi lenā mea. Pe a na o i laʻua, e iloa lelei e le avā le māfana o le alofa o lana tane. O le paʻi atu, o sina ataata, o le opo atu, ma sina faamālō atu i le avā, atonu o ni mea laiti, ae o na mea e matuā tāua tele i se fafine.

‘E Lē Mā o Ia e Taʻua i Latou o Uso’

O Keriso Iesu sa “lē mā . . . o ia e taʻua [ona soo faauuina] o uso.” (Epe. 2:11, 12, 17) Pe afai o oe o se tane Kerisiano, ia manatua o lau avā o ia foʻi o lou tuafafine Kerisiano. E tāua atu lona tulaga tuuina atu iā Ieova nai lo le tautoga o le faaipoipoga, e tusa lava pe na papatiso a o leʻi faaipoipo pe i le taimi foʻi ua uma ona lua faaipoipo. Pe a tofi lau avā e fai sana tali i le sauniga, e tatau i le uso o loo faia se mataupu i le sauniga a le faapotopotoga ona taʻu o ia o le “Tuafafine o—.” O ia foʻi o lou tuafafine, e lē gata i le Maota mo Sauniga ae faapea foʻi i le fale. E pei lava ona e faaaloalo ma alofa i lau avā i le fale, e faapena foʻi le auala e te lua feutagaʻi ai i le Maota mo Sauniga.

Pe afai e iai ni ou faaeaga faaopoopo i le faapotopotoga, atonu e faigatā i nisi taimi ona faapaleni tiute fai i le faapotopotoga ma le aiga. O le lelei o fesootaʻiga a toeaina ma  auauna o le faiva, ma le toleniina lelei o isi e faia nisi o tiute i le faapotopotoga, o le a lava ai le taimi e te fesoasoani ai i le tuafafine o loo sili ona ia manaʻomia oe—o lau avā. Ia manatua, e toʻatele isi uso e mafai ona faia ia tiute tauave a le faapotopotoga lea ua tofia atu iā te oe, ae e na o oe lava le uso ua faatasia ma lau avā i le faaipoipoga.

E lē gata i lea, o oe o le ulu o lau avā. Fai mai le Tusi Paia: “O le ulu o tane taʻitoʻatasi uma o Keriso; o le ulu o le fafine o le tane; a o le ulu o Keriso o le Atua.” (1 Kori. 11:3) O le ā le auala o loo e faatino ai lenei tulaga ulu? E ala i se auala alofa, ae lē i le tau ina faatatauina o le vaega muamua o le mau, ma faatonu e faaaloalo mai lau avā iā te oe. O le ki e faatino ai ma le talafeagai lou tulaga ulu, o lou faaaʻoaʻo lea iā Iesu Keriso i le auala e te lua feutagaʻi ai ma lau avā.—1 Pete. 2:21.

“O Aʻu Uō Outou”

Na taʻua e Iesu ona soo o ana uō. Na ia fai atu iā i latou: “Ou te lē toe taʻua outou o pologa, auā e lē iloa e le pologa le mea e faia e lona matai. A ua ou taʻua outou o uō, auā ua ou faailoa atu iā te outou mea uma na ou faalogo ai i loʻu Tamā.” (Ioa. 15:14, 15) Na lelei fesootaʻiga a Iesu ma ona soo. Na latou faifaimea faatasi foʻi. Na valaaulia “Iesu ma ona soo” i le ʻaiga o le faaipoipoga i Kana. (Ioa. 2:2) Na iai nofoaga na latou fiafia patino i ai, e pei o le faatoʻaga i Ketesemane. O loo taʻua i le Tusi Paia “e tele taimi na feiloaʻi ai Iesu ma ona soo i inā.”—Ioa. 18:2.

E manaʻomia ona lagona e le avā o ia o se uō mamae a lana tane. Maʻeu le tāua mo outou tane ma avā ona olioli faatasi i le olaga! Ia auauna faatasi i le Atua. Ia naunau e suʻesuʻe faatasi le Tusi Paia. Ia faaalu se taimi e te lua faatasitasi ai—savavali, talanoa ma aai faatasi. Ia sili atu nai lo o se ulugalii faaipoipo; ia avea oulua ma uō mamae.

Ua Ia “Alofa iā i Latou e oo i le Gataaga”

Ua ‘alofa Iesu i ona soo e oo i le gataaga.’ (Ioa. 13:1) O nisi tane ua lē taulau ona latou faaaʻoaʻo i le Keriso i lenei tulaga. Atonu ua latou tuua a latou ‘avā sa fai a o tauleleʻa.’—Mala. 2:14, 15.

Ae o isi o loo faaaʻoaʻo i le Keriso, e pei o Willi. Ona o tulaga faalētonu tau i le soifua mālōlōina, na manaʻomia ai e le avā a Willi le tausiga faifai pea mo le tele o tausaga. O le ā le faalogona o Willi i lenei tulaga? Na ia faapea mai: “Ou te vaai pea i si aʻu avā o se meaalofa mai le Atua, ma e faapena ona ou faapelepele iā te ia. E lē gata i lea, i le 60 tausaga ua teʻa, na ou tautō ai o le a ou tausia o ia i taimi lelei faapea foʻi ma taimi lē lelei. E lē taitai galo iā te aʻu lenā tautoga.”

Ia faaaʻoaʻo tane Kerisiano i le alofa o Keriso. Ia faapelepele i lau avā e mataʻu i le Atua—o lou tuafafine ma o lau uō.

[Ata le itulau 20]

Po o avea lau avā ma au uō mamae?

[Ata le itulau 20]

‘Ia faaauau ona e alofa i lau avā’