Pe Mafai Ona E Siitia Atu i Oganuu e Manaʻomia Tele ai Tagata Talaʻi?

“Sa lelei le olaga sa matou maua i le Iunaite Setete, ae sa ma popole neʻi teʻi ua avea le siʻomaga o mea faitino ma aafiaga lē lelei iā i maʻua ma le ma fanau tama e toʻalua. Sa avea i maʻua ma misionare i le taimi ua mavae, ma na ma mananaʻo ia toe maua lenā olaga e faigofie, ae fiafia.”

ONA o lenā faanaunauga, sa filifili ai Ralph ma Pam i le 1991, e tusi atu i ofisa o lālā ina ia faailoa atu lo la faanaunauga e fia galulue i oganuu e manaʻomia tele ai tagata talaʻi. Na tali mai le ofisa o le lālā i Mekisikō, o loo iai se manaʻoga tele mo tagata e talaʻi i ē e tautatala i le gagana faa-Peretania i lenā atunuu. Ioe, sa taʻua e le lālā, o lenā fanua, “ua matua mo le seleselega.” (Ioa. 4:35) E leʻi umi ae talia loa le valaaulia e Ralph ma Pam, ma le la fanau tama e toʻalua e 8 tausaga o le isi ae 12 le isi, ma amata loa ona sauni e siitia atu.

Se Oganuu Telē

Na faapea mai Ralph: “A o matou leʻi tuua le Iunaite Setete, sa fai mai ma le alofa nisi o uso ma tuafāfine: ‘E lē lelei pe a siitia atu i se isi atunuu!’ ‘O le ā le mea e fai pe a tou mamaʻi?’ ‘Aiseā e ō atu ai fua e talaʻi i oganuu o tagata e tautatala faa-Peretania?’ E mautinoa lava, e lē fia faalogo mai i latou i le upu moni!’ Peitaʻi, na mautū la matou filifiliga e siitia atu. Ona ua uma ona matou iloilo totoʻa po o lelei le filifiliga ua matou faia. Ua leva ona matou fuafua i ai. E leai ni a matou aitalafu tetelē na iai, ae na matou sefe le tupe, ma tele taimi o matou talanoa e faatatau i luʻi e ono matou fesagaʻia.”

Sa muamua ona asiasi atu Ralph ma lona aiga i le lālā o Mekisikō. Ma o i inā sa faaali atu ai e uso se faafanua o le atunuu atoa ma faapea atu iā i latou: “O le tou oganuu atoa lea!” Na faamautū le aiga i San Miguel de Allende, o se nuu e nonofo ai le toʻatele o tagata mai isi atunuu, lea e tū e pe ā ma le 150 maila le mamao i mātū i sisifo o le Taulaga o Mekisikō. I le tolu tausaga talu ona latou siitia atu i inā, sa faatūina ai se faapotopotoga faa-Peretania e toʻa 19 tagata talaʻi. O le uluaʻi faapotopotoga faa-Peretania lea i Mekisikō—ae sa tele pea galuega e ao ona fai.

E pe ā ma le tasi le miliona tagatānuu o le Iunaite Setete o loo nonofo i Mekisikō. E faaopoopo atu i lenā, o le toʻatele o tagata Mekisikō e iai tomai faapitoa ma tamaiti aʻoga, e tautatala i le gagana faa-Peretania. Na taʻua e Ralph: “Sa matou tatalo atu mo nisi tagata talaʻi. O loo matou faaavanoa pea le isi a matou  potu moe i le fale, mo uso ma tuafāfine e ‘asiasi mai i le nuu,’ pe mafai ona latou siitia mai.”—Nu. 13:2.

Faafaigofie o Latou Olaga Ina ia Tele le Taimi e Talaʻi Ai

E leʻi umi ae taunuu ane loa nisi uso ma tuafāfine e mananaʻo e faalautele le latou faiva. O nisi o i latou na, o le uso o Bill ma Kathy mai le Iunaite Setete. E 25 tausaga o galulue i laʻua i oganuu e manaʻomia tele ai tagata talaʻi. Sa la mafaufau e aʻoaʻoina le gagana Sipaniolo, peitaʻi na suia lenā fuafuaga ina ua la siitia atu i le nuu o Ajijic, i le talafatai o le Vaituloto o Chapala, o se nofoaga e manaia tele mo tagata Amerika e litaea atu i ai. Na taʻua e Bill, “I le nuu o Ajijic, sa telē lo ma sao i le saʻilia o tagata e tautatala faa-Peretania e mananaʻo e fia iloa le upu moni.” I le lua tausaga talu ona la taunuu atu i inā, na matuā olioli Bill ma Kathy ina ua faatūina le faapotopotoga faa-Peretania lona lua i Mekisikō.

Na mananaʻo Ken ma Joanne mai Kanata, e faafaigofie o la olaga ae faaalu le tele o le taimi i le talaʻiga. Na la siitia atu foʻi i Mekisikō. Na faapea mai Ken, “E alu se taimi o tau faamasani e ola i se nofoaga e ono lē maua ai le vai māfanafana, eletise, ma e umi se taimi e lē ola ai telefoni.” Peitaʻi, o se mea e olioli ai le faia o se sao i le galuega talaʻi. E leʻi umi ae tofia loa Ken e avea ma auauna o le faiva, ma i le lua tausaga mulimuli ane ai, na avea ai o ia ma toeaina. I le amataga, sa faigatā ona faamasani le la tama teine o Britanny ma isi talavou i se faapotopotoga laʻitiiti faa-Peretania. Ae ina ua ia auai i le fausiaina o Maota mo Sauniga, sa ia maua ni uō lelei i le atunuu atoa.

Sa fiafia Patrick ma Roxanne mai le setete o Texas i le Iunaite Setete, ina ua faalogo i se fanua mo misionare lea e lē mamao tele, o loo iai tagata e tautatala faa-Peretania. Na fai mai Patrick: “Ina ua ma asiasi atu i Monterrey, o se nuu i mātū i sasaʻe o Mekisikō, sa ma iloaina ai na taʻitaʻia i maʻua e Ieova e fesoasoani i tagata i inā.” Ina ua faatau atu le la fale i Texas, e leʻi atoa le lima aso ae taulia, ma na pei i laʻua o ē na valaaulia i le mau, e ‘ō atu i Maketonia.’ (Galu. 16:9) Sa lē faigofie ona maua galuega e tausi ai i laʻua i Mekisikō, ae i le lua tausaga talu ona la iai i inā, sa la olioli i le vaai atu i se vaega toʻalaiti e toʻa 17 Molimau, ua faatoʻateleina e avea ma faapotopotoga e toʻa 40 tagata talaʻi.

O se isi ulugalii na faafaigofie o la olaga ina ia faalautele le la faiva, o Jeff ma Deb. Na faatau atu le la fale telē i le Iunaite Setete ae siitia atu e nonofo i se fale mautotogi laʻitiiti i Cancún, o se nuu i le talafatai i sasaʻe o Mekisikō. I taimi ua mavae, na masani ona la auai i fonotaga i fale e iai ea mālūlū. Ae i le taimi nei, e 8 itula e malaga ai ina ia auai i le fonotaga faa-Peretania e lata ane, lea sa faia i se nofoaga e leai se taualuga e malu ai mai le la. Ae ui i lea, ua maua e i laʻua le fiafia tele ona ua faatū se faapotopotoga i Cancún, e toʻa 50 tagata talaʻi.

Na amata foʻi ona fesoasoani ane ni uso ma tuafāfine Mekisikō i le galuega talaʻi i le  gagana faa-Peretania. O se faaaʻoaʻoga, ina ua logotala Rubén ma lona aiga ua faatūina le faapotopotoga faa-Peretania muamua i San Miguel de Allende, ma o Mekisikō atoa le oganuu a lea faapotopotoga, sa latou mananaʻo loa e fesoasoani atu. Ioe, e aofia ai i lenei mea le aʻoaʻoina o le gagana Peretania, faamasani i se aganuu e lē masani ai, ma e mamao mea e faimalaga i ai mo sauniga, e 500 maila i vaiaso taʻitasi. Ae na fai mai Rubén: “Sa matou fiafia e talaʻi atu i tagata mai isi atunuu ua leva ona nonofo i Mekisikō, ae o lea faatoʻā faalogo i le tala lelei i la latou gagana. Na maligi loimata o nisi o i latou ona o le lotofaafetai.” Ina ua māeʻa ona fesoasoani atu Rubén ma lona aiga i le faapotopotoga i San Miguel de Allende, ona latou galulue lea o ni paeonia i le taulaga o Guanajuato, i le ogatotonu o Mekisikō, lea na latou fesoasoani ai i le faavaeina o se faapotopotoga faa-Peretania e sili atu i le toʻa 30 tagata talaʻi. I le taimi nei, o loo galulue i latou i se vaega faa-Peretania i Irapuato, o se nuu e lata ane i Guanajuato.

Faaoo le Feʻau i Ē e Faigatā Ona Maua i Fale

E lē gata i tagata mai isi atunuu, ae e toʻatele foʻi tagata Mekisikō e tautatala i le faa-Peretania. E masani ona lē oo atu le feʻau o le Malo iā i latou talu ai e latou te nonofo i vaipanoa o tagata maumea, ma o teine faigaluega e tali mai pe a tuʻituʻi atu i le faitotoʻa. Ae pe a sau foʻi le tagata e ona le fale i le faitotoʻa, atonu latou te lē fia faalogo i le feʻau, ona latou te manatu i Molimau a Ieova o se lotu laʻitiiti ma e lē tāua. Peitaʻi, pe a talaʻi atu se  Molimau mai se isi atunuu, e fiafia nisi e faalogo mai.

Seʻi manatu foʻi i le faaaʻoaʻoga a Gloria i le taulaga o Querétaro, i Mekisikō. Na ia faapea mai: “Sa talaʻi mai Molimau e tautatala i le faa-Sipaniolo iā te aʻu, ae ou te leʻi taliaina. Ae ina ua lutia lo matou aiga ma aʻu uō i faafitauli, na ou lagona le mafatia ma ōle atu loa i le Atua e fesoasoani mai. E leʻi umi lava ae asiasi mai loa se fafine palagi i lo matou fale. Na ia fesili mai pe iai se isi o lo matou aiga e iloa faa-Peretania. Ona o ia o se palagi, na ou fia iloa ai po o ai o ia, ma na ou fai atu iā te ia ou te iloa tautala faa-Peretania. A o talanoa mai o ia, na ou manatu ifo e faapea, ‘Po o le ā le mea a lenei fafine o fai i inei?’ Ae ona sa ou ōle atu i le Atua e fesoasoani mai, atonu la o le tali lea a le Atua i laʻu tatalo.” Na taliaina e Gloria se suʻesuʻega faale-Tusi Paia, ma vave ona agaʻigaʻi i luma ina ia papatisoina, e ui i teteega mai lona aiga. O loo galue nei Gloria o se paeonia sauatoa, ma o loo auauna foʻi lana tane ma lana tama tama iā Ieova.

Faamanuiaga mo Ē o Faalautele Atu le Latou Faiva

E moni e iai luʻi pe a galulue i oganuu e manaʻomia tele ai tagata talaʻi, ae e tele faamanuiaga e maua mai ai. Na faapea mai Ralph lea na taʻua i le amataga o le mataupu: “Na matou suʻesuʻeina le Tusi Paia ma tagata mai Peretania, Saina, Jamaica, Suetena, faapea ma tagata mai le aigātupu o Ghana. O nisi o i latou nei sa auai i le auaunaga faataimi atoa. I tausaga ua mavae, na vaaia e lo matou aiga le faavaeina o faapotopotoga faa-Peretania e fitu. Sa matou galulue faatasi ma le ma fanau tama i le auaunaga paeonia, ma o loo galulue nei i laʻua i le Peteli i le Iunaite Setete.”

I le taimi nei, e 88 faapotopotoga faapea ma le tele o vaega faa-Peretania o loo iai i Mekisikō. Aiseā ua vave ai ona maua lea faatelega? Ona e toʻatele tagata e tautatala faa-Peretania o loo i Mekisikō, e leʻi talaʻi atu lava se Molimau iā i latou. Na tali lelei mai nisi ona ua lē o toe faalavelave ane o latou aiga ma uō, auā ua ese le atunuu lea o loo latou iai. Ae sa mananaʻo nisi e faia suʻesuʻega faale-Tusi Paia ona ua litaea, ma ua maua le avanoa e suʻesuʻe ai le Tusi Paia. E lē gata i lea, e sili atu i le ¹/3 o tagata talaʻi i faapotopotoga faa-Peretania, o loo galulue o ni paeonia, lea e fesoasoani tele i le tulaga maelega ma le tuputupu aʻe o na faapotopotoga.

Tele Faamanuiaga o le a E Maua

E mautinoa lava o le a fiafia mai tagata mai atunuu uma o le lalolagi a o tatou folafola atu le feʻau o le Malo i la latou lava gagana. O lea la, o se faalaeiauga le vaai atu i le toʻatele o uso ma tuafāfine taʻumatuaina faaleagaga—o ē talavou ma ē matutua, o ē nofofua ma ē ua faaipoipo—o loo lotomalilie e siitia atu i vaipanoa e manaʻomia tele ai tagata talaʻi. E moni e ono fesagaʻi i latou ma faigatā, peitaʻi, e galo uma na faigatā pe a faatusatusa i le fiafiaga lea e maua mai le aʻoaʻoina o ē lotofaamaoni ma talia upu moni o le Tusi Paia. Pe mafai ona e faia ni fetuutuunaʻiga ina ia siitia atu i se oganuu i lou atunuu po o se isi atunuu o loo manaʻomia tele ai tagata talaʻi? * (Luka 14:28-30; 1 Kori. 16:9) O le faia faapea, e mautinoa le tele o faamanuiaga o le a e maua.

[Faaopoopoga i lalo]

[Pusa i le itulau 21]

Mātauina ni Tagata Litaea e Fiafia

Na tuua e Beryl ia Peretania ae siitia atu i Kanata. O i inā sa faigaluega ai o ia e fai ma pule mo le tele o kamupani faavaomalo. O ia foʻi o se tagata talenia i le tiʻetiʻe solofanua ma sa filifilia foʻi o ia e fai ma sui taalo o Kanata i le Olimepeka i le 1980. Ina ua litaea atu Beryl i Chapala, i Mekisikō, sa masani ona la aai ma lana tane i faleʻaiga i inā. Ina ua ia mātauina le fiafia o nisi tagata litaea e tautatala faa-Peretania, sa ia taʻu atu lona igoa iā i latou ma fia iloa le māfuaaga ua latou ō mai ai i Mekisikō. O tagata ia na aai fiafia, e masani lava o Molimau a Ieova. Ina ua iloa e Beryl ma lana tane e maua le fiafia ma se olaga faamalieina i le iloaina o le Atua, sa la mananaʻo foʻi ia iloa le Atua. Ina ua mavae ni nai masina talu ona auai o ia i sauniga, sa manaʻo loa Beryl e faia sana suʻesuʻega i le Tusi Paia. Sa mafai ona galue Beryl o se paeonia sauatoa mo ni nai tausaga.

[Pusa i le itulau 22]

“Ua Fai i Latou ma Faamanuiaga iā i Matou”

E matuā talisapaia e uso ma tuafāfine o le atunuu o loo iai manaʻoga mo tagata talaʻi, ia taumafaiga a ē o loo siitia atu i inā. Sa tusia e se ofisa o le lālā i le Karipiane e faapea: “Pe a toe foʻi uso ia na ō mai e galulue i inei, o le a lē tutusa le malolosi o faapotopotoga. Ua fai i latou ma faamanuiaga iā i matou.”

O loo taʻua i le Afioga a le Atua e “tele ʻau o [fafine] na talaʻiina.” (Sala. 68:11) E lē o se mea la e faateʻia ai le toʻatele o tuafāfine nofofua o loo siitia atu i isi atunuu. E tele le fesoasoani ua aumaia e nei tuafāfine faataulagaina. Na faapea mai se ofisa o le lālā i Europa i Sasaʻe: “I le tele o a matou faapotopotoga, e fai lava sina toʻatele o tuafāfine, o nisi taimi e sili atu ai i le ʻafa o le ʻautalaʻi lo latou aofaʻi. Ona o le toʻatele o i latou e leʻi leva tele ona iai i le upu moni, ua fesoasoani la tuafāfine paeonia nofofua mai isi atunuu i le toleniina o na tuafāfine fou. E matou te matuā talisapaia le fesoasoani a nei tuafāfine!”

O ā ni manatu o nei tuafāfine e faatatau i le galulue i atunuu ese? Ua fai mai Angelica, o se tuafafine e tusa ma le 35 ona tausaga, ma sa galue mo le tele o tausaga o se paeonia nofofua: “E tele luʻi e tulaʻi mai. E tele aso ou te savalia ai auala palapalā ma ou te vaaia le tele o le mafatia o tagata. Peitaʻi, ou te matuā lagona le faamalieina ona o le fesoasoani i tagata i le faiva. Na pāʻia foʻi loʻu loto ona o le faaali mai pea e tuafāfine o le faapotopotoga o le lototalisapaia, ona o loʻu fesoasoani iā i latou. Na fai mai se isi tuafafine, o loʻu tuua o loʻu atunuu ae malaga mamao mai e galue o se paeonia i lona atunuu, ua uunaʻia ai o ia e ulu atu i le auaunaga faataimi atoa.”

Na taʻua foʻi e Sue, o se paeonia e tusa ua 50 ma ona tupu ona tausaga, e faapea: “E mautinoa lava e iai luʻi, ae e lē faatusatusaina na luʻi i le tele o faamanuiaga e te maua. O se fiafiaga le auai i le faiva! Talu ai e tele ina matou galulue faatasi ma tuafāfine talavou, ou te faasoa atu la iā i latou mea na ou aʻoaʻoina mai le Tusi Paia ma lomiga i le auala e faafesagaʻia ai faafitauli. E masani ona latou fai mai ua fesoasoani loʻu tumau ma le faafesagaʻia o faafitauli a o ou galue mo le tele o tausaga o se paeonia nofofua, e latou te iloa ai e mafai foʻi ona latou manumalo i faafitauli o le olaga. O se mea e matuā faamalieina ai!”

[Faafanua i le itulau 20]

(Tagaʻi i le lomiga mo le ata atoa)

MEKISIKŌ

Monterrey

Guanajuato

Irapuato

Ajijic

Chapala

Vaituloto o Chapala

San Miguel de Allende

Querétaro

TAULAGA O MEKISIKŌ

Cancún

[Ata i le itulau 23]

E fiafia nisi e talaʻi atu i tagata mai isi atunuu e faatoʻā faalogo i le tala lelei