O Lou Faamaoni e Faafiafiaina ai le Finagalo o Ieova

“Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.”—FAATA. 27:11.

1, 2. (a) O le ā le luʻi na lāgā e Satani ua faamatalaina i le tusi o Iopu? (e) O le ā e faaalia ai na faaauau pea ona faifai Satani iā Ieova, ina ua mavae aso o Iopu?

E LEʻI taofia e Ieova Satani mai le tofotofoina o lana auauna faamaoni o Iopu. O le iʻuga, sa faaumatia uma lafumanu a Iopu, feoti lana fanau, ma oo iā te ia se maʻi tigāina. Peitaʻi, ina ua luʻia e Satani le faamaoni o Iopu, e toʻatele isi sa mafaufau i ai Satani e ese mai iā Iopu. Fai mai lana finauga, “O le paʻu e sui aʻi le paʻu; o mea uma foʻi ua i ai i le tagata, e avatua e ia e sui aʻi lona ola.” O lenei luʻi na lāgā ai se finauga lea e aofia ai isi e ese mai iā Iopu, ma ua faaauau mai pea talu ina ua mavae lona maliu.—Iopu 2:4.

² Pe tusa o le 600 tausaga talu ona mavae puapuaga o Iopu, sa faagaeeina ai Solomona e tusi e faapea: “Loʻu atalii e, ia poto oe, ma e faafiafia loʻu loto; ona ou mau tali ai lea i lē faifai mai.” (Faata. 27:11) E manino mai la, o le taimi lea o loo faaauau pea ona luʻia e Satani Ieova. E lē gata i lea, i se faaaliga na avatu i le aposetolo o Ioane, na iloa atu ai Satani o loo molia auauna a le Atua ina ua uma ona lafo ese mai o ia mai le lagi, i se taimi mulimuli ane ina ua uma ona faavaeina le Malo o le Atua i le 1914. Ioe, e oo lava foʻi i aso nei, lea ua matuā lalata atu i aso faaiʻu o lenei faiga amioleaga o mea, o loo luʻia pea e Satani le faamaoni o auauna a le Atua!—Faaa. 12:10.

3. O ā lesona tāua tatou te aʻoaʻoina mai i le tusi o Iopu?

³ Seʻi manatu la i lesona tāua e tolu tatou te aʻoaʻoina mai le tusi o Iopu. Muamua, o puapuaga o Iopu ua iloa manino mai ai le fili moni o tagata, ma le faapogai o teteega faasaga i  tagata o le Atua. O lenā fili o Satani le Tiapolo. Lona lua, po o ā lava faigatā tatou te ono fetaiaʻi, ae o le iai o se faiā vavalalata ma le Atua o le a fesoasoani iā i tatou e tausisia ai pea lo tatou faamaoni. Lona tolu, pe a tutupu mai puapuaga ma po o ā lava auala e tofotofoina ai i tatou, e fesoasoani mai le Atua iā i tatou e pei ona sa ia fesoasoani iā Iopu. O loo faia faapea e Ieova i aso nei e ala mai i lana Afioga, lana faalapotopotoga, ma lona agaga paia.

Ia Manatua Pea le Fili

4. O ai e tuuaʻia i mea o loo tutupu i le lalolagi i aso nei?

⁴ O le toʻatele o tagata e lē talitonu e iai moni lava se Satani. O lea la, e ui lava atonu o loo latou popole i mea ua tutupu i le lalolagi, ae latou te lē o iloaina le faapogai moni lava—o Satani le Tiapolo. E moni, o le tele o mafatiaga o tagata e māfua mai lava i tagata. Na filifili o tatou uluaʻi mātua o Atamu ma Eva, e tutoʻatasi ese mai i Lē na Faia i laʻua. Ma talu mai lenā taimi, ua gaoioi foʻi ma le lē atamai le faagasologa mai o augātupulaga. Peitaʻi, o le Tiapolo o ia lea na faasesēina Eva e fouvale i le Atua. O ia lenei ua faia aʻe se faiga o mea a le lalolagi i tagata lē lelei atoatoa, lea ua ia pulea. Ona o Satani o “le atua o faiga o mea a lenei lalolagi,” ua faaatagia mai ai foʻi e tagata uiga autū e pei o uiga o Satani—le faamaualuga, faamisa, lotoleaga, matapeʻapeʻa, taufaasesē, ma le fouvale. (2 Kori. 4:4; 1 Timo. 2:14; 3:6; faitau le Iakopo 3:14, 15.) O na uiga ua taʻitaʻia atu ai i feteenaʻiga faalemalo ma feteenaʻiga faalotu, le feitagaʻi, faiga piʻopiʻo, ma le fevaevaeaʻi, lea e telē se sao i puapuaga o tagata.

5. O le ā tatou te mananaʻo e fai i le malamalamaga tāua lea ua tatou maua?

⁵ Maʻeu se malamalamaga tāua ua tatou mauaina ona o i tatou o auauna a Ieova! Ioe, ua tatou iloa lē e tuuaʻia mo mea leaga ua tutupu i le lalolagi. Pe tatou te lē lagona ai ea la le talafeagai ona auai i le talaʻiga, ina ia faailoa atu i tagata lē ua avea moni lava ma fili? Ma pe tatou te lē fiafia e tutū i le itu a le Atua moni, o Ieova, ma faamatala atu i isi le auala o le a ia faaumatia ai Satani ma tafiesea mafatiaga o tagata?

6, 7. (a) O ai le faapogai o sauāga o loo fetaiaʻi ma tagata tapuaʻi moni? (e) E mafai faapefea ona tatou faaaʻoaʻo i le faaaʻoaʻoga a Eliu anamua?

⁶ E lē gata o Satani e māfua ai le tele o faanoanoaga o le lalolagi, ae o ia foʻi le pogai o teteega o loo fetaiaʻi ma tagata o le Atua. Ua ia maumauaʻi e tofotofoina i tatou. Na fetalai Iesu Keriso i le aposetolo o Peteru e faapea: “Simona e, Simona e, vaai! ua manaʻo Satani e lūlū iā te outou e pei o saito.” (Luka 22:31) I se tulaga tutusa, o i tatou uma lava taʻitoʻatasi o ē mulimuli i tulagāaao o Iesu, o le a oo iai puapuaga i auala eseese. Na faatusa e Peteru le Tiapolo i “se leona o loo tagi leotele, e saʻili se tasi e na te foloina.” Ma na taʻua e Paulo e faapea: “E sauāina i latou uma e naunau e ola ma le faamaoni  i le Atua ma aufaatasi ma Keriso Iesu.”—1 Pete. 5:8; 2 Timo. 3:12.

⁷ E faapefea ona faaalia o loo tatou manatua le fili, pe a tupu se mala i se uso po o se tuafafine i le faapotopotoga? Nai lo le tatou taumamao ese mai le uso ua aafia, e tatou te gaoioi e pei o Eliu, o lē na tautala atu iā Iopu o se uō moni. E tatou te fesoasoani atu i lo tatou uso i le taua faasaga i lo tatou fili o Satani. (Faata. 3:27; 1 Tesa. 5:25) O lo tatou sini ia fesoasoani i lo tatou uso a auauna ina ia tumau lona faamaoni, e tusa lava po o le ā le mea e tupu, ma faafiafia ai le finagalo o Ieova.

8. Aiseā sa leʻi taulau ai Satani i le taofia o Iopu mai le vivii atu iā Ieova?

⁸ Na muamua lava aveese e Satani lafumanu a Iopu. Sa tāua tele na manu, atonu o le auala lea sa maua ai alagātupe a lona aiga. Peitaʻi sa faaaogā foʻi e Iopu na manu i le tapuaʻiga. Ina ua uma ona faapaiaina e Iopu lana fanau, “sa tulaʻi o ia i le taeao lava, ma na faia taulaga mū e faatatau i le atoa o i latou uma; auā sa faapea a Iopu, Atonu ua agasala oʻu atalii, ma faifai i le Atua i o latou loto. Sa faapea lava ona faia e Iopu i aso uma.” (Iopu 1:4, 5) O lona uiga la, sa masani ona ofo atu e Iopu taulaga e fai i manu iā Ieova. Ae ina ua amata tofotofoga, sa lē toe faia loa foʻi na taulaga. Ua aveesea “ʻoa” a Iopu lea sa vivii atu ai iā Ieova. (Faata. 3:9) Peitaʻi na mafai ma na viia e Iopu Ieova i ona laugutu!

Atiaʻe se Faiā Vavalalata ma Ieova

9. O le ā le mea e aupito sili ona tāua iā i tatou?

⁹ Pe tatou te mauʻoa pe matitiva, talavou pe matutua, lelei le soifua mālōlōina pe faalētonu, ae e mafai lava ona tatou atiaʻe se faiā vavalalata ma Ieova. Po o ā lava faigatā tatou te fesagaʻia, ae o le iai o se faiā vavalalata ma le Atua o le a fesoasoani iā i tatou, e tausisia ai pea lo tatou faamaoni ma faafiafia le finagalo o Ieova. E oo lava foʻi i nisi o i latou na itiiti lo latou iloa e faatatau i le upu moni, sa matuā lototetele ma tutumau i lo latou faamaoni.

10, 11. (a) Sa faapefea ona tali atu se tasi o ō tatou tuafafine i tofotofoga o le faamaoni? (e) O le ā le tali e sili ona malosi na avatu e lenei tuafafine iā Satani?

¹⁰ Seʻi manatu i le faaaʻoaʻoga a le tuafafine o Valentina Garnovskaya, o se tasi o le toʻatele o Molimau i Rusia sa tumau lo latou faamaoni e pei o Iopu, e ui lava i tulaga faigatā. I le 1945, ina ua tusa ma le 20 ona tausaga, sa molimau atu ai se uso iā te ia. Sa toe foʻi faalua ane le uso e la te talanoa i le Tusi Paia, ona la lē toe feiloaʻi lea ma le uso. Ae ui i lea, sa amata ona talaʻi atu Valentina i ona tuaoi. O le iʻuga, sa puʻea faapagota o ia ma ave i se nofoaga o faasalaga mamafa mo le valu tausaga. I le 1953, na toe tatala ai o ia ma toe faaauau ai i le taimi lava lenā lana galuega talaʻi. Sa toe puʻea faapagota foʻi o ia ma faafalepuipui—ae i le taimi lea e mo le sefulu tausaga. Ina ua mavae ni nai tausaga sa iai i se tasi o nofoaga o faasalaga, sa avatu o ia i se isi nofoaga. I lenā nofoaga o faasalaga, sa iai ni tuafāfine na iai sa latou Tusi  Paia. I se tasi aso, na faaali atu ai e se tuafafine le Tusi Paia iā Valentina. Maʻeu se taimi fiafia! Seʻi mātau foʻi, e pau le Tusi Paia na vaai i ai Valentina, o le Tusi Paia lea sa uu e le uso lea na molimau atu iā te ia i le 1945!

¹¹ I le 1967, na faasaʻoloto ai Valentina ma mulimuli ane mafai ona faailogaina lona tuuina atu iā Ieova e ala i le papatisoga i le vai. Sa maelega o ia ma faaaogā lona saʻolotoga e auai ai i le faiva seʻia oo i le 1969. Peitaʻi, i le tausaga lenā, na toe puʻea faapagota ai o ia, ma na faasalaina o ia i le taimi lea i le falepuipui mo tausaga e tolu. Peitaʻi, sa faaauau pea ona talaʻi Valentina. A o leʻi maliu o ia i le 2001, e toʻa 44 tagata sa ia fesoasoani i ai e aʻoaʻoina le upu moni. E tusa e 21 tausaga na iai o ia i falepuipui ma nofoaga o faasalaga mamafa. Sa ia lotomalie e tuua mea uma e aofia ai ma lona saʻolotoga, ina ia tausisia pea lona faamaoni. Ina ua lata i lona maliu, na faapea mai Valentina: “E leʻi i ai soʻu fale ou te nofo ai. O mea uma na ou maua sa ofi i totonu o le atopaʻu e tasi, ae na ou fiafia ma lotomalie i le auauna iā Ieova.” Maʻeu se tali e sili ona malosi na avatu e Valentina iā Satani, o lē na faapea mai o le a lē tumau ona faamaoni tagata i le Atua pe a fesagaʻi ma tulaga faigatā! (Iopu 1:9-11) E tatou te mautinoa sa ia faafiafia le finagalo o Ieova, ma o loo taulaʻi atu ma le naunau Ieova i le taimi o le a ia toe faafoʻi mai ai Valentina ma isi tagata uma na maliliu faamaoni, e ala i le toetū.—Iopu 14:15.

12. O le ā le vaega a le alofa e fai i la tatou faiā ma Ieova?

¹² O la tatou faauōga ma Ieova e faavae i lo tatou alofa mo ia. Tatou te fiafia i uiga o le Atua ma fai so o se mea tatou te mafai ina ia ola ai e ōgatusa ma ana fuafuaga. I le tuufaafeagai i le manatu o le Tiapolo, e tatou te alolofa iā Ieova ma lotomalilie ma lolo atu atoatoa iā te ia. O lenei alofa mai le loto e faamalosia ai i tatou e tausisia pea le faamaoni i taimi o faigatā. Ae o Ieova e na te ‘tausia le ala o ona tagata amio Atua.’—Faata. 2:8; Sala. 97:10.

13. E faapefea ona silasila Ieova i mea e tatou te faia mo ia?

¹³ O le alofa e uunaʻia ai i tatou e viia le suafa o Ieova, e tusa lava pe itiiti se mea e mafai ona tatou faia. E silasila o ia i māfuaaga lelei tatou te faia ai mea, ma e na te lē faamasinoina i tatou pe afai ua lē mafai ona tatou faia mea uma tatou te mananaʻo e fai. O le mea e sili ona tāua, e lē gata o le mea tatou te fai ae o le māfuaaga foʻi tatou te faia ai. E ui lava sa pagatia ma onosaia e Iopu le tele o mea, ae sa ia taʻu atu i ē na tuuaʻia o ia, lona naunau i ala o Ieova. (Faitau le Iopu 10:12; 28:28.) I le mataupu mulimuli o le tusi o Iopu, na faailoa mai ai e le Atua le tigā o lona finagalo iā Elifasa, Pilitati, ma Sofara ona latou te leʻi tautatala i le mea moni. Ae i le taimi e tasi, sa faailoa mai e Ieova lona finagalo malie iā Iopu e ala i le faasino faafā atu iā te ia o “laʻu auauna,” ma e ala i le faatonuina o ia e tatalo mo le ʻau faamāfanafana pepelo. (Iopu 42:7-9) Tau ina ia tatou gaoioi foʻi faapena ma tatou maua ai le finagalo malie o Ieova.

E Fesoasoani Ieova i Ana Auauna Faamaoni

14. Sa faapefea ona fesoasoani Ieova iā Iopu ina ia toe faasaʻo ona mafaufauga?

¹⁴ Sa tausisia pea e Iopu lona faamaoni e ui lava i lona lē lelei atoatoa. O nisi taimi, sa iā te ia le vaaiga lē saʻo a o fesagaʻi ma omiga matuā ogaoga. O se faaaʻoaʻoga, na ia faapea atu iā Ieova: “Ua ou alaga atu iā te oe, a e te lē tali mai iā te aʻu; . . . ua e tuliloa mai iā te aʻu i lou aao  malosi.” E lē gata i lea, sa soona faatāua e Iopu ia lava i le taumafai e faamaonia lana amio saʻo, ina ua ia faapea atu: “Ua ou lē amio leaga,” ma “e lē ona ua i ai o se sauā i oʻu lima; ua matuā mamā foʻi laʻu talosaga.” (Iopu 10:7; 16:17; 30:20, 21) E ui i lea, sa fesoasoani atu ma le agalelei Ieova iā Iopu e ala i le lāgā o ni fesili lea na tataʻi ese ai le uaʻi atu o Iopu iā te ia lava. O na foʻi fesili na iloa manino ai e Iopu le silisili ese o le Atua ma le matuā faatauvaa o le tagata. Sa talia e Iopu le taʻitaʻiga ma faasaʻo ia lava.—Faitau le Iopu 40:8; 42:2, 6.

15, 16. O ā auala ua saunia mai ai e Ieova le fesoasoani mo ana auauna i aso nei?

¹⁵ Ua aumaia foʻi e Ieova fautuaga ma taʻiala agalelei i ana auauna i aso nei. E lē gata i lea, ua tatou olioli ai foʻi i le tele o aogā. O se faataʻitaʻiga, sa saunia e Iesu Keriso le taulaga togiola ma faataatia ai le faavae mo le faamagaloina o agasala. E ala i lenā taulaga, ua mafai ai ona tatou maua se faiā vavalalata ma le Atua e ui lava i lo tatou tulaga lē lelei atoatoa. (Iako. 4:8; 1 Ioa. 2:1) Pe a fesagaʻi ma tulaga faigatā, e tatou te tatalo foʻi mo le fesoasoani ma le malosi mai le agaga paia o le Atua. E lē gata i lea, ua iā i tatou le Tusi Paia atoa, ma afai tatou te faitau i ai ma manatunatu i mea o loo tusia ai, o le a sauniunia ai i tatou mo taimi o tofotofoga o le faamaoni. Ua fesoasoani le suʻesuʻe iā i tatou ina ia malamalama ai i finauga o le pule silisili ese i le aoao o mea, ma le faamaoni o le tagata.

¹⁶ E lē gata i lea, e tele aogā ua tatou maua i le avea ma vaega o le ʻauuso i le lalolagi aoao, lea e tausia e Ieova i taumafa faaleagaga e ala mai i le “pologa faamaoni ma le faautauta.” (Mata. 24:45-47) I faapotopotoga taʻitasi a Molimau a Ieova pe tusa ma le 100,000, o loo faia ai sauniga ia e faatonu mai ai e Ieova i tatou, ma faamalosia ai i tatou e feagai ma tofotofoga o le faamaoni. E mafai ona faataʻitaʻia lenei tulaga i le mea na tupu iā Seila, o se Molimau talavou e nofo i Siamani.

17. Faataʻitaʻi mai le atamai o le pipii atu i faatonuga a le faapotopotoga a Ieova i aso nei.

¹⁷ I se tasi aso i le aʻoga, sa aunoa ai le vasega a Seila ma se faiaʻoga na te vaaia. Sa mafaufau tamaiti o lana vasega e ō e taumafai e faataʻitaʻi le laupapa e fesootaʻi ma mea faataulāitu. O le taimi lava lea na alu ese faavavevave ai Seila ma le potu aʻoga, ma a fua i le mea sa ia faalogo mulimuli ane ai, sa faafiafiaina o ia ona o lona faia faapea. A o faaaogāina le laupapa, sa lagona e nisi tamaiti aʻoga le iai o temoni ma na sosola ese ona o le fefevavale. O le ā la sa fesoasoani iā Seila e filifili ai e vave alu ese ma le potu aʻoga? Ua faamatala mai e Seila e faapea, “A o leʻi tupu lenei mea, sa matou talanoaina i se sauniga i le Maota mo Sauniga ia lamatiaga o laupapa e fesootaʻi ma mea faataulāitu. Sa ou iloaina le mea e tatau ona fai. Sa ou manaʻo e faafiafia Ieova, e pei ona fai mai ai le Tusi Paia i le Faataoto 27:11.” O le mea e lelei ai ona na auai Seila i le sauniga ma faalogologo ma le naunau i le polokalame!

18. O le ā ua e filifili e fai?

¹⁸ Seʻi o tatou taʻitoʻatasi ma filifili e mulimuli i faatonuga o loo tatou maua mai le faalapotopotoga a le Atua. E ala i le auai e lē aunoa i sauniga, faitauina o le Tusi Paia, suʻesuʻe i lomiga faale-Tusi Paia, tatalo, ma faifaimea faatasi ma Kerisiano taʻumatuaina, e tatou te maua mai ai le taʻitaʻiga ma le fesoasoani o loo tatou manaʻomia. E finagalo Ieova ia tatou manumalo, ma ua ia mautinoa o le a faaauau ona tatou faamaoni. Maʻeu se faaeaga ua tatou maua o le faasilisilia lea o le suafa o Ieova, ia tausisia pea le faamaoni, ma ia faafiafia le finagalo o Ieova!

Pe E te Manatua?

• O ā mea tutupu, ma tofotofoga e māfua mai ona o Satani?

• O le ā le mea aupito sili ona tāua ua tatou maua?

• O le ā le faavae o la tatou faauōga ma Ieova?

• O ā nisi o auala ua fesoasoani mai ai Ieova iā i tatou i aso nei?

[Fesili mo le Suʻesuʻega]

[Ata i le itulau 8]

Po o e lagona le talafeagai ona faailoa atu o le malamalamaga tāua lea ua e maua?

[Ata i le itulau 9]

E mafai ona tatou fesoasoani i uso tapuaʻi ina ia tumau pea lo latou faamaoni

[Ata i le itulau 10]

Sa lotomalie Valentina e faataulaga mea uma ina ia tumau ai lona faamaoni