Fesili Mai le ʻAufaitau

Pe faamata o le a toetū mai se pepe ua oti i le manava o lona tinā?

Atonu e faigatā mo i latou e leʻi tofo i lenei tulaga o le oti o se pepe ae e leʻi fanau mai, ona faaāta i mafaufau faalogona o i latou ua oo i ai lea tulaga. O nisi mātua e matuā faavauvau lava pe a oti faapena se pepe. O se tasi tinā, na feoti lana fanau e toʻalima a o leʻi fananau mai. Mulimuli ane, sa ia lagona le faamanuiaina i le tausia aʻe o se fanau tama e toʻalua e malolosi ma soifua mālōlōina. Peitaʻi, na te manatua taimi taʻitasi na feoti ai ana pepe. I le taimi atoa na ia soifua ai, sa ia iloa lelei le matutua ua tatau ona iai ana pepe na fananau mai ua feoti ma pepe na fafano, pe ana faapea o loo latou feola mai. Pe e iai se faavae mo na Kerisiano e faamoemoe ai mo le toetū, ina ia toe faatutū mai ai a latou pepe ua feoti?

O le tali faigofie i le fesili, e tatou te lē iloa. E leai se faamatalaga i le Tusi Paia o taʻua tuusaʻo ai se toetū mo pepe na fananau mai ua feoti pe na fafano foʻi. Peitaʻi, o loo iai i le Afioga a le Atua mataupu silisili e fesootaʻi atu i lenei fesili, ma e ono aumaia ai se faamāfanafanaga.

Seʻi o tatou iloiloina ni fesili se lua e fesootaʻi atu i lenei mataupu. Muamua, i le silafaga a Ieova, o fea le taimi e amata ai le ola o se tagata—i le taimi e afuafua ai pe i le taimi e fanau mai ai? Lona lua, o le ā le silasila a Ieova i le pepe e leʻi fanau mai—o se tagata e tutasi pe ua na o ni tuufaatasiga o ni sela ma aano i totonu o le manava o le fafine? Ua aumaia e mataupu silisili o le Tusi Paia tali manino i nei fesili.

Ua faaalia manino mai i le Tulafono a Mose e faapea, e amata le ola i le taimi na afuafua ai, ae lē o le taimi e fanau mai ai. E faapefea ona tatou iloa? Sa faaalia mai i le tulafono e faapea e fasiotia se tagata pe a oti ai se pepe e leʻi fanau mai. Seʻi mātau mai foʻi le tulafono lenei: “Ia e sui atu le oti i le oti.” * (Eso. 21:22, 23) O lea la, o le pepe lea e i le manava o le tinā e leʻi fanau mai, o loo ola ma o se tagata ola. O le malamalama i lenā mea moni ua leva ona iai, ua fesoasoani i le faitau miliona o Kerisiano ina ia teena ai le faapaʻū tama, ona e vaai i ai o se agasala matuiā i le Atua.

Afai la, o loo ola le pepe lea e leʻi fanau mai, o le ā le tāua iā Ieova o lenā ola? Ua taʻu mai i le tulafono na taʻua i luga, e tatau ona fasiotia se tagata matua pe a oti ai se pepe e leʻi fanau mai. E manino mai la, e tāua tele i le silafaga a le Atua le ola o se pepe e leʻi fanau mai. E lē gata i lea, o le tele o isi mau o le Tusi Paia ua faaalia mai ai e silasila Ieova i pepe e leʻi fananau mai, o ni tagata moni lava. O se faataʻitaʻiga, na faagaeeina le tupu o Tavita e faasino atu iā Ieova e faapea: “Na e ufiufi iā te aʻu i le manava o loʻu tinā. . . . Na silasila mai ou fofoga i oʻu tino uma ina o afuafua; ua tusia foʻi uma lava i lau tusi, o ona aso foʻi na faia ai.”—Sala. 139:13-16; Iopu 31:14, 15.

E silafia foʻi e Ieova o loo iai i pepe e leʻi fananau mai ni uiga eseese, ma e ono telē so latou aogā mo le lumanaʻi. A o maʻitaga le avā a Isaako, o Repeka, i se masaga, sa taʻu atu e Ieova se valoaga e faatatau i tama e toʻalua lea o loo tauivi i lona manava, e taʻu mai ai ua ia silafia uiga o loo iā i laʻua lea o le a matuā telē se aafiaga e oo i ai.—Kene. 25:22, 23; Roma 9:10-13.

O se tasi foʻi o tala e aogā, o le mea na tupu iā Ioane le Papatiso. Ua taʻua i le faamatalaga a le Evagelia e faapea: “Ina ua faalogo Elisapeta i le leo o Maria, ona osooso ai lea o le pepe o i lona manava; ma ua faatumuina Elisapeta i le agaga paia.” (Luka 1:41) I le faamatalaina o lenei mea na tupu, na faaaogā ai e le fomaʻi o Luka se upu Eleni e mafai ona faasino atu a lē i se tamaitiiti e leʻi fanau mai, ia po o se pepe foʻi ua fanau mai. Sa ia faaaogā le upu lava foʻi lenā ina ua faasino atu i le pepe o Iesu, a o taoto i le mea e tuu ai meaʻai a manu.—Luka 2:12, 16; 18:15.

I le aotelega la, po ua faia e le Tusi Paia se faaeseesega i le va o se pepe e leʻi fanau mai, ma se  pepe ua amata ona mānava i le taimi lava e fanau mai ai? E foliga mai e leai. Ma ua ōgatusa lenā ma mea ua iloa i suʻesuʻega faasaienisi i aso nei. O se faataʻitaʻiga, ua iloa e le ʻau suʻesuʻe, e mafai e se pepe o loo i le manava o le tinā ona lagona ma tali mai i mea o loo tutupu i fafo o le manava o le tinā. O lea la, e lē o se mea e faateʻia ai ona e mafai e se tinā o loo maʻitaga, ona atiaʻe se faiā vavalalata ma le pepe o loo tuputupu aʻe i lona manava.

E tatau ona iloa le mea lenei, e mafai ona eseese le umi e iai se pepe i le manava o lona tinā. Seʻi manatu i le faataʻitaʻiga lenei: Ua fanau lē au e se tasi tinā lana pepe ma o loo ola pea, ae na oti ina ua mavae ni nai aso. O le isi tinā na atoa lelei le iva masina o lana maʻitaga, ae na oti le pepe a o leʻi fanau mai. Po ua iai i le tinā muamua le faamoemoe o le a toetū mai lana tama ona e ui na fanau lē au ae na ola le pepe, ae ua lē iai i le tinā lona lua lenā faamoemoe?

Ina ia taaofaʻi le manatu, o loo manino ona aʻoaʻo mai e le Tusi Paia e faapea e amata le ola o le tagata i le taimi e afuafua ai, ma e tutasi ma tāua i le silasila a Ieova le pepe e leʻi fanau mai. A fua la i nei upu moni mai le Tusi Paia, e ono manatu nisi faapea ua feteenaʻi nei aʻoaʻoga, ma manatu ai faapea e leai se faamoemoe mo le toetū o se pepe na oti a o leʻi fanau mai. E latou te ono manatu foʻi e feteenaʻi lenā manatu ma lo tatou talitonuga faavae faale-Tusi Paia e uiga i le faapaʻu tama, lea e faavae mai i na mea moni.

I taimi ua mavae, na lāgā ai i lenei lomiga nisi o fesili tāua e foliga mai na faatulaʻi ai ni masalosaloga, e faatatau i le iai o se toetū mo pepe na feoti a o leʻi fananau mai. O se faataʻitaʻiga, po o le a tuuina ea e le Atua na o sina vaega o le ʻafuʻafu i totonu o le manava o se tinā i le Parataiso? Peitaʻi, ina ua uma ni suʻesuʻega atili, manatunatu loloto, ma le tatalo, na iʻu ai ina iloa e le Vaega Pule e leai se fesootaʻiga o na manatu ma le faamoemoe o le toetū. Na fetalai Iesu: “E mafaia e le Atua mea uma lava.” (Mare. 10:27) Ua faataʻitaʻia mai i le mea na tupu iā Iesu le moni o lenā faamatalaga; sa suia lona soifua mai le lagi ma tuu atu i le manava o se taupou—lea e mautinoa o se faiga e matuā faigatā lava i le vaaiga faaletagata.

Po o lona uiga la o lenei manatu, ua aʻoaʻo mai e le Tusi Paia o le a toetutū mai tamaiti na feoti a o leʻi fananau mai? E ao ona matou faamamafa atu e faapea, e lē o taliina tuusaʻo mai i le Tusi Paia lenā fesili, o lona uiga la, e leai se faavae mo tagata e maumaututū ai i lea mataupu. O lenei mataupu e ono lāgā ai le tele o fesili eseese. Peitaʻi, o le mea moni, e foliga mai o le faiga e sili ona tāua, ia ʻalofia manatu taumatemate. O le mea lenei ua uma ona tatou iloa: E taatia atu iā Ieova le Atua lenā mataupu, o lē e tumu i le agalelei ma le alofa mutimutivale. (Sala. 86:15) E lē fesiligia le mea moni, e finagalo moni lava Ieova ia aveesea le oti e ala i le toetū. (Iopu 14:14, 15) E tatou te mautinoa e na te faia le mea tonu i taimi uma. O le a ia saunia le vaifofō mo le tele o mafatiaga ua aumaia e lenei faiga amioleaga o mea iā i tatou, a o ia faatonutonuina ma le alofa lona Alo e “faalēaogāina . . . galuega a le Tiapolo.”—1 Ioa. 3:8.

[Faaopoopoga i lalo]

[Ata i le itulau 13]

O le a saunia e Ieova le vaifofō mo mea tigā uma o loo iai