Skip to content

Skip to table of contents

Po o Oe o se ‘Auauna o le Agalelei Faifua o le Atua’?

Po o Oe o se ‘Auauna o le Agalelei Faifua o le Atua’?

 Po o Oe o se ‘Auauna o le Agalelei Faifua o le Atua’?

“Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.”—ROMA 12:10.

1. O ā faamautinoaga ua tatou maua i le Afioga a le Atua?

UA TELE taimi o faamautinoa mai e le Afioga a le Atua iā i tatou e faapea, o le a fesoasoani mai Ieova iā i tatou pe a tatou lotovaivai pe loto momomo. O se faataʻitaʻiga, seʻi mātau upu faamāfanafanaloto nei: “E taofia i luga e Ieova atoa uma ē paʻuʻū; o ia foʻi lē faatusaʻoina o ē ua faanoʻunoʻu uma lava.” “E faamālōlōina e ia ē ua loto momomo; e fufusi e ia o latou manuʻa.” (Sala. 145:14; 147:3) E lē gata i lea, ua fetalai mai lo tatou Tamā o i le lagi: “O aʻu o Ieova lou Atua, o lē ua taofi lou lima taumatau; o lē ua fai atu iā te oe, ‘Aua e te fefe, o aʻu, ou te fesoasoani iā te oe.’”—Isa. 41:13.

2. Ua faapefea ona saunia e Ieova le fesoasoani mo ana auauna?

2 Ae faapefea iā Ieova, o lē e afio i le lagi lē vaaia, ona ia ‘⁠taofi i o tatou lima’? E faapefea ona ia ‘faatusaʻoina i tatou pe a tatou faanoʻunoʻu’ ona o le loto momomo? E eseese auala ua saunia ai e Ieova lenā fesoasoani. O se faataʻitaʻiga, e na te aumai i ona tagata le “mana lea e sili atu i le malosi o tagata,” e ala i lona agaga paia. (2 Kori. 4:7; Ioa. 14:16, 17) E lagona foʻi e auauna a le Atua le matuā faamalosia e ala i le mana mai le feʻau o loo i le Afioga faagaeeina a le Atua. (Epe. 4:12) Pe iai se isi auala e faamalosia ai i tatou e Ieova? E tatou te maua le tali i le tusi o le Muamua Peteru.

‘Ua Faaalia le Agalelei Faifua o le Atua i Auala Eseese’

3. (a) O le ā le faamatalaga a le aposetolo o Peteru e faatatau i tofotofoga? (e) O le ā o loo talanoaina i le vaega mulimuli o le tusi muamua a Peteru ?

3 O loo tusi atu le aposetolo o Peteru i uso faauuina e faapea, e iai se māfuaaga lelei mo i latou e olioli ai ona o loo i o latou luma se taui tele. Ona ia faaopoopo atu lea: “E ui lava ua outou mafatia nei i tofotofoga eseese mo sina taimi puupuu pe afai e tatau ai.” (1 Pete. 1:1-6) Seʻi mātau le upu “eseese.” E taʻu mai ai, o le a eseese tofotofoga. Peitaʻi, e lē o uma ai i inā le faamatalaga a Peteru, ae e lē o iloa e ona uso pe faamata o le a mafai ona latou manumalo i na tofotofoga eseese. Nai lo lea, ua taʻua e Peteru e faapea, e mautinoa e Kerisiano o le a fesoasoani mai Ieova iā i latou ina ia manumalo i tofotofoga taʻitasi latou te fesagaʻia, e tusa lava po o le ā le ituaiga tofotofoga e latou te fesagaʻi. O lenā faamautinoaga o loo aumaia i le vaega mulimuli o le tusi a Peteru, lea e talanoaina ai e le aposetolo mataupu e faatatau i “le iʻuga o mea uma lava.”—1 Pete. 4:7.

4. Aiseā e faamāfanafanaina ai i tatou i upu o loo i le 1 Peteru 4:10?

4 Ua taʻua e Peteru e faapea: “E pei ona maua e tagata taʻitoʻatasi se meaalofa, ia faaaogā e auauna ai le tasi i le isi e pei o auauna pule lelei o le agalelei faifua o le Atua, lea ua faaalia i auala eseese.” (1 Pete. 4:10) Ua toe faaaogā foʻi i inei e Peteru le upu “eseese.” O lona uiga ua ia faapea mai, ‘⁠E tele auala eseese e oo mai ai tofotofoga, peitaʻi e tele foʻi auala eseese e faaalia mai ai le agalelei faifua o le Atua.’ Aiseā ua avea ai lea faamatalaga ma faamāfanafanaga iā i tatou? O lona uiga, e tusa lava po o le ā le tofotofoga tatou te fesagaʻia, ae o le a iai foʻi le auala e faaalia mai ai le agalelei faifua o le Atua, lea o le a fesoasoani iā i tatou e onosaia ai lenā tofotofoga. Ae pe na e mātauina i le faamatalaga a Peteru, le auala e faaalia mai ai iā i tatou le agalelei faifua o Ieova? E ala mai i uso Kerisiano.

 “Auauna ai le Tasi i le Isi”

5. (a) O le ā e ao i Kerisiano taʻitasi ona fai? (e) O ā fesili ua lāgā?

5 I le faasino atu i tagata uma o le faapotopotoga Kerisiano, ua faapea mai Peteru: “Ae e sili i nei mea uma, ia tele le alofa o le tasi i le isi.” Ona ia toe faapea atili mai lea: “E pei ona maua e tagata taʻitoʻatasi se meaalofa, ia faaaogā e auauna ai le tasi i le isi.” (1 Pete. 4:8, 10) O lea la, e ao i tagata taʻitoʻatasi i le faapotopotoga ona fai se sao i le atiina aʻe o uso Kerisiano. Ua tuuina mai e Ieova iā i tatou se mea tāua e tatou te vaavaaia, ma o lo tatou tiute tauave le faasoa atu o lenā mea i isi. O lea la, o ā mea ua tuuina mai iā i tatou? Ua taʻua e Peteru e faapea, o “se meaalofa.” O le ā le meaalofa? E faapefea ona tatou “faaaogā e auauna ai le tasi i le isi”?

6. O ā nisi o meaalofa ua tuuina mai i Kerisiano?

6 Ua faapea mai le Afioga a le Atua: “O meaalofa lelei uma ma mea uma e atoatoa ona lelei, e mai lugā.” (Iako. 1:17) O lea la, o meaalofa uma ua tuuina mai e Ieova i ona tagata, o faailoaga ia o lona agalelei faifua. O se tasi o meaalofa mataʻina ua tuuina mai e Ieova iā i tatou, o le agaga paia. O lenā meaalofa ua mafai ai ona tatou atiaʻe uiga faale-Atua e pei o le alofa, mataalofa, ma le agamalu. O le iʻuga, ua uunaʻia ai i tatou e nei uiga e faaalia atu le alofa moni i uso talitonu, ma nofosauni e fesoasoani atu iā i latou. O le atamai moni ma le malamalama, o isi ia meaalofa ua tatou maua, e ala i le fesoasoani a le agaga paia. (1 Kori. 2:10-16; Kala. 5:22, 23) O le mea moni, o lo tatou malosi, tomai, ma taleni, ua manatu i ai i nei mea uma o ni meaalofa e ao ona faaaogā, e avatu ai le viiga ma le mamalu i lo tatou Tamā o i le lagi. Ua iā i tatou le tiute tauave mai le Atua, ia faaaogā o tatou tomai ma uiga, o se auala e faaoo atu ai i o tatou uso talitonu faailoaga o le agalelei faifua o le Atua.

“Ia Faaaogā e Auauna ai”—E Faapefea?

7. (a) O le ā ua faaalia mai ai i le faaupuga “e pei ona”? (e) O ā fesili e ao ona tatou fesili ifo ai iā i tatou lava, ma aiseā?

7 E tusa ai o meaalofa ua tatou maua, ua taʻua foʻi e Peteru e faapea: “E pei ona maua e tagata taʻitoʻatasi se meaalofa, ia faaaogā.” O le faaupuga “e pei ona,” ua faaalia ai e faapea e ono eseese uiga ma tomai, e lē gata i ituaiga ae e eseese foʻi le tele e maua ai. Po o le ā lava la le meaalofa, ae ua uunaʻia tagata taʻitoʻatasi ina ia “faaaogā [le meaalofa ua iā te ia] e auauna ai le tasi i le isi.” E lē gata i lea, o le faaupuga “ia faaaogā . . . e pei o auauna pule lelei,” o se faatonuga. O lea la, e ao ona tatou fesili ifo iā i tatou lava: ‘Po o oʻu faaaogā meaalofa ua tuuina mai iā te aʻu, ina ia faamalosia ai oʻu uso talitonu?’ (Faatusatusa i le 1 Timoteo 5:9, 10.) ‘Ia po o oʻu faaaogā tomai ia ua ou maua mai iā Ieova e mo loʻu lava lelei —atonu ina ia maua ai ni meafaitino pe maua ai ni tulaga taualoa?’ (1 Kori. 4:7) Pe afai tatou te faaaogā a tatou meaalofa ina ia “auauna ai le tasi i le isi,” o le a tatou faafiafia ai Ieova.—Faata. 19:17; faitau le Eperu 13:16.

8, 9. (a) O ā nisi o auala o loo fesoasoani atu ai Kerisiano i le lalolagi aoao i uso talitonu? (e) O faapefea i uso ma tuafāfine i lau faapotopotoga ona fesoasoani le tasi i le isi?

8 O loo taʻua i le Afioga a le Atua auala eseese na faaaogā e Kerisiano o le uluaʻi senituri, ina ia auauna ai le tasi i le isi. (Faitau le Roma 15:25, 26; 2 Timoteo 1:16-18.) I se tulaga tutusa i aso nei, o loo usitaia foʻi e Kerisiano moni le faatonuga ia faaaogā a latou meaalofa e fesoasoani atu ai i o latou uso talitonu. Seʻi manatu i nisi o auala o loo faia ai lenā tulaga.

9 E toʻatele uso o loo latou faaalu le tele o itula i masina taʻitasi ina ia sauniuni ai vaega i sauniga. I sauniga, pe a latou taʻua ni mea tāua faaleagaga na latou maua i a latou suʻesuʻega i le Tusi Paia, o ā latou faamatalaga malamalama e uunaʻia ai tagata uma i le faapotopotoga ina ia tumau. (1 Timo. 5:17) O le toʻatele o uso ma tuafāfine ua mātaulia i lo latou māfana ma le agalelei i uso talitonu. (Roma 12:15) O nisi e asiasi e lē aunoa iā i latou o loo mafatia ma tatalo faatasi ma i latou. (1 Tesa. 5:14) Ona o le manatu mamafa o isi ua latou tusia ai se tusi faalaeiau mo uso Kerisiano o loo fesagaʻi ma tofotofoga. Peitaʻi, o isi e fesoasoani atu ma le alofa iā i latou e lē atoatoa le malosi ina ia auai i sauniga a le faapotopotoga. E faitau afe Molimau o loo faia se sao i galuega e fesoasoani ai i ē o loo mafatia, e ala i le fesoasoani atu i uso talitonu i le toe fauina o latou fale ua faaleagaina i mala faalenatura. O le alofa faapelepele ma fesoasoani aogā e avatu e na uso ma tuafāfine manatu mamafa, o faailoaga uma na o le “agalelei faifua o le Atua, lea ua faaalia i auala eseese.”—Faitau le 1 Peteru 4:11.

O Fea e Sili Ona Tāua?

10. (a) O ā vala e lua o le auaunaga a Paulo i le Atua, sa ia manatu mamafa i ai? (e) E faapefea ona tatou faaaʻoaʻo iā Paulo i aso nei?

10 E lē gata ua tuuina mai i auauna a le Atua se meaalofa e faaaogā e fesoasoani atu ai i o latou uso talitonu, ae ua tuuina mai foʻi iā i latou se feʻau e ao ona faaoo atu i o latou uso a tagata. Sa iloa e le aposetolo o Paulo nei vala e lua o lana auaunaga iā Ieova. Sa ia tusi atu i le faapotopotoga i Efeso e faatatau i “le tofi o le auauna pule i le agalelei faifua o le Atua,” lea ua tuuina mai iā te ia mo lo latou lelei. (Efe. 3:2) Peitaʻi, na ia taʻua foʻi e faapea: ‘Ua faamaonia i matou e le Atua o ē e tatau i ai le avega tauave o le talaʻia o le tala lelei.’ (1 Tesa. 2:4) I le pei o Paulo, ua tatou iloa foʻi ua tuuina mai iā i tatou le tofiga o le auauna o ē talaʻia le Malo o le Atua. E ala i le auai ma le maelega i le galuega talaʻi, ua tatou taumafai ai e faaaʻoaʻo i le faaaʻoaʻoga na faataatia e Paulo, o sē e leʻi faavaivai e folafola le tala lelei. (Galu. 20:20, 21; 1 Kori. 11:1) Ua tatou iloa o le talaʻia o le feʻau o le Malo e faasaoina ai ola. Ae i le taimi e tasi, e tatou te taumafai foʻi e faaaʻoaʻo iā Paulo e ala i le saʻili o ni avanoa e ‘avatu ai ni meaalofa faaleagaga’ i uso talitonu.—Faitau le Roma 1:11, 12; 10:13-15.

11. E ao faapefea ona tatou manatu i o tatou tofiga ia talaʻi ma ia atiaʻe o tatou uso?

11 O lē fea o gaoioiga faa-Kerisiano nei e lua e sili ona tāua? O le fesiligia o se fesili faapena e tai pei o loo fesili e faatatau i se manulele, Po o lē fea o ona apaʻau e lua e sili ona tāua? E manino lava le tali. E manaʻomia e le manulele ona faaaogā uma ona apaʻau e lua ina ia lelei ai lana lele. I se tulaga tutusa, e tatou te manaʻomia foʻi ona auai i vala uma e lua o la tatou auaunaga i le Atua, ina ia atoatoa ai ona avea i tatou ma Kerisiano. O lea la, nai lo le manatu i o tatou tofiga ia talaʻi le tala lelei ma atiaʻe uso talitonu, e faapea o ni tofiga e eseese, ia tatou manatu i na tofiga e pei ona sa manatu i ai aposetolo o Peteru ma Paulo—o ni tiute tauave e fesootaʻi lelei. I le ā le auala?

12. E faapefea ona tatou auauna o se meafaigaluega i aao o Ieova?

12 I le avea ma tagata talaʻi, e tatou te faaaogā so o se tomai tau aʻoaʻo atu o loo iā i tatou, ina ia taumafai e pāʻia ai loto o o tatou uso a tagata i le feʻau faagaeeloto o le Malo o le Atua. I lenā auala, e tatou te faamoemoe e fesoasoani ai iā i latou  ina ia avea ma soo o Keriso. Peitaʻi, e tatou te faaaogā foʻi so o se tomai ma isi meaalofa e tatou te ono maua, ina ia taumafai e faamāfanafana ai loto o o tatou uso talitonu e ala i upu faalaeiau ma galuega lelei, o ni faailoaga o le agalelei faifua o le Atua. (Faata. 3:27; 12:25) I lenā auala, e tatou te faamoemoe ia fesoasoani iā i latou ina ia tumau ai o ni soo o Keriso. I galuega uma nei e lua—o le talaʻi i le lautele ma le ‘auauna o le tasi i le isi’—ua tatou maua ai le faaeaga matagofie o le auauna o se meafaigaluega i aao o Ieova.—Kala. 6:10.

“Ia Matuā Alofa Faapelepele le Tasi i le Isi”

13. O le ā e tupu pe afai e taofia i tatou mai le ‘auauna o le tasi i le isi’?

13 Na uunaʻia e Paulo ona uso talitonu e faapea: “Ia matuā alofa faapelepele le tasi i le isi i le alofa faaleuso. Ia tausolomua ona faaaloalo le tasi i le isi.” (Roma 12:10) Ioe, o le alofa faapelepele i o tatou uso talitonu e uunaʻia ai i tatou e auauna ma le lotoatoa o ni auauna o le agalelei faifua o le Atua. Ua tatou iloa pe afai e manumalo Satani i le taofia o i tatou mai le ‘auauna o le tasi i le isi,’ o le a faavaivaia ai lo tatou autasi. (Kolo. 3:14) O le iʻuga, a leai se autasi o le a leai foʻi se maelega i le galuega talaʻi. I se tulaga faafaatusa, e pei lava ona faamanuʻalia se apaʻau e tasi o le manulele ma lē toe lelei ai lana lele, ua iloa lelei foʻi la e Satani, e tasi lava se vala o le auaunaga e faavaivaia ai i tatou, ona taofia ai lea o i tatou mai le faataunuuina o lo tatou tofiga.

14. O ai latou te mauaina aogā mai lo tatou ‘auauna o le tasi i le isi’? Aumai se faaaʻoaʻoga.

14 O le ‘auauna o le tasi i le isi,’ e lē gata e aogā iā i latou o ē mauaina le agalelei faifua o le Atua, ae o i latou foʻi e faaooina atu. (Faata. 11:25) Seʻi fai ma faaaʻoaʻoga Ryan ma Roni, o se ulugalii mai Illinois, i le Iunaite Setete o Amerika. Ina ua la iloa e faitau selau fale o isi Molimau ua faaleagaina i le Afā o Katerina, sa uunaʻia i laʻua e le alofa faaleuso ina ia lē toe faigaluega, faatau atu lo la fale, faatau se taavale toso ua faaaogā ma toe fai faalelei, ma faimalaga atu i Louisiana mo le 900 maila. Na la nonofo ai i inā mo le sili atu i le tausaga, a o faaaogā lo la taimi, malosi, ma alāmanuia e fesoasoani ai i o la uso. Ua faapea mai Ryan, e 29 ona tausaga, “O le faia o se sao i lenei galuega fesoasoani na atili ai ona ou vavalalata i le Atua. Ua ou vaai i le auala e tausia ai e Ieova ona  tagata.” Ua faaopoopo mai Ryan: “O le galulue faatasi ma uso matutua na ou aʻoaʻoina ai le auala e tausia ai uso. Na ou iloa ai foʻi o loo tele pea galuega mo i tatou o ē o loo malolosi e fai i le faalapotopotoga a Ieova.” Ua faapea mai Roni, e 25 ona tausaga: “Ou te lagona le lotofaafetai ona ua mafai ona fai soʻu sao i le fesoasoani i isi. Ua sili ona ou fiafia nai lo se isi lava taimi o loʻu olaga. Ou te iloa i tausaga o i luma, o le a faaauau pea ona ou mauaina aogā mai lenei mea matagofie ua oo i loʻu olaga.”

15. O ā māfuaaga lelei ua iā i tatou e faaauau ai ona auauna o ni auauna o le agalelei faifua o le Atua?

15 O lea la, o le usitaia o faatonuga a le Atua ia talaʻi le tala lelei ma atiaʻe uso talitonu, e aumaia ai faamanuiaga i tagata uma. E faamalosia ai faaleagaga i latou e tatou te fesoasoani atu i ai, a o le taimi e tasi e tatou te maua ai le olioli lea e na o le foaʻi atu e maua mai ai. (Galu. 20:35) E māfana atili ai le faapotopotoga atoa a o faaalia e tagata taʻitoʻatasi le fiafia i isi. E lē gata i lea, o le alofa lea e tatou te faaalia mo le tasi i le isi, e mātaulia ai i tatou o ni Kerisiano moni. Na fetalai Iesu e faapea: “O le mea lea e iloa ai e tagata uma o oʻu soo outou, pe afai tou te fealofani.” (Ioa. 13:35) Ae sili ai, e avatu ai le viiga i lo tatou Tamā alofa, o Ieova, a o faaatagia mai i ana auauna i le lalolagi lona finagalo ia faamalosia i latou o manaʻomia se fesoasoani. O lea la, e mautinoa ua iā i tatou māfuaaga lelei e faaaogā ai la tatou meaalofa ina ia “auauna ai le tasi i le isi o ni auauna pule lelei o le agalelei faifua o le Atua.” Po o le a faaauau ea ona e faia faapea?—Faitau le Eperu 6:10.

Pe E te Manatua?

• O ā auala e faamalosia ai e Ieova ana auauna?

• O ā mea ua tuuina mai iā i tatou?

• O ā nisi o auala e mafai ona tatou auauna atu ai i o tatou uso talitonu?

• O le ā o le a uunaʻia ai i tatou e faaauau pea ona faaaogā la tatou meaalofa, ina ia “auauna ai le tasi i le isi”?

[Fesili mo le Suʻesuʻega]

[Ata i le itulau 13]

Po o e faaaogā lau “meaalofa” ina ia auauna ai i isi, pe ina ia faamalie ai oe lava?

[Ata i le itulau 15]

E tatou te talaʻi atu le tala lelei i isi ma fesoasoani atu i uso talitonu

[Ata i le itulau 16]

E alagatatau ona faamālō atu iā i latou o loo fesoasoani i ē puapuagatia, ona o lo latou agaga faataulagaina