Skip to content

Skip to table of contents

O “Lē na te Faatupuina, o le Atua Lea”!

O “Lē na te Faatupuina, o le Atua Lea”!

 O “Lē na te Faatupuina, o le Atua Lea”!

“E lē tāua lē e totō, po o lē e faasūsū, ae e tāua lē na te faatupuina, o le Atua lea.”—1 KORI. 3:7.

1. I le ā le auala ua avea ai i tatou ma “ ʻaufaigaluega faatasi ma le Atua”?

“O LE ʻaufaigaluega faatasi ma le Atua.” O le auala lenā na faamatala ai e le aposetolo o Paulo le faaeaga lea e mafai e i tatou uma ona olioli ai. (Faitau le 1 Korinito 3:5-9.) O le galuega lea sa faasino atu i ai Paulo, o le galuega o le faia o isi ma soo. Sa ia faatusaina lenā galuega i le totōina ma le faasūsūina o fatu laau. Pe afai tatou te mananaʻo ia taulau manuia i lenā galuega tāua, e tatou te manaʻomia la le fesoasoani a Ieova. Ua faamanatu mai e Paulo iā i tatou o “lē na te faatupuina, o le Atua lea.”

2. Aiseā e fesoasoani ai iā i tatou le manatu ‘⁠o le Atua na te faatupuina,’ ina ia i ai se vaaiga saʻo i la tatou faiva?

2 Ua fesoasoani iā i tatou lenā mea moni lē maʻalofia ina ia i ai se vaaiga saʻo i la tatou faiva. Atonu tatou te galulue mamafa i le talaʻiga ma le aʻoaʻo atu, ae o le mea moni, e viia Ieova mo so o se iʻuga fiafia e ono maua mai. Aiseā? Talu ai ona e tusa lava po o tatou taumafai malosi, ae e leai se tasi o i tatou e malamalama atoatoa pe na faapefea ona avea se tagata ma soo, o lona uiga e leai so tatou tomai e pulea ai le tuputupu aʻe o le tagata e avea ma soo. Na faailoa mai e le tupu o Solomona le tulaga saʻo ina ua ia tusi e faapea: ‘⁠E lē iloa e oe le galuega a le Atua, o lē na te faia mea uma lava.’—Fai. 11:5.

3. O ā vala e tutusa ai le galuega o le totōina o se fatu laau, ma le galuega o le faia o isi ma soo?

Pe avea lo tatou lē malamalama i le auala na avea ai se tagata ma soo, ma itū e faapea ai ua lē maua se fiafia i la tatou galuega? E leai. Nai lo lea, ua avea la tatou galuega o se mea e fiafia ai, ma o se mea e naunau i ai. Na faapea mai le tupu o Solomona: “O le taeao ia e lūlū ai au saito, aua foʻi le mapu lou lima i le afiafi; auā e te lē iloa po o lē fea e manuia, o lenei, po o lenā, pe gatusa ona lelei o ia mea e lua.” (Fai. 11:6) Ioe, pe a totō se fatu laau, e tatou te lē iloa po o fea o le a tātupu aʻe ai, ae pe faamata foʻi o le a ola lenā fatu laau. O le tele o vala e lē oo i ai lo tatou malamalama. E mafai foʻi ona fai se faamatalaga faapena i la tatou galuega o le faia o isi ma soo. Sa faamatilatila e Iesu lenei mea moni i ni talafaatusa se lua, lea na faamauina mo i tatou i le mataupu e 4 o le Evagelia a Mareko. Seʻi o tatou tilofaʻia po o le ā tatou te aʻoaʻoina mai i nei talafaatusa e lua.

Ituaiga o Eleele Eseese

4, 5. Ia faamatala puupuu mai le talafaatusa a Iesu i le tagata lūlū saito o loo ia faasalalau solo fatu saito.

4 E pei ona faamauina i le Mareko 4:1-9, o loo faamatala ai e Iesu se tagata lūlū saito o loo ia lūlū, pe faasalalau solo fatu saito, ma toʻulu ai i ni nofoaga eseese: “Ia faafofoga mai. Vaai foʻi! Na alu atu le tagata lūlū saito e lūlū fatu. A o ia lūlū, na paʻuʻū ai nisi fatu i tafatafa o le auala, ona ō mai ai lea o manufelelei ma ʻai. Ae na paʻuʻū nisi fatu i le mea papa e itiiti le eleele, ona vave tutupu ai lea auā e lē lava le eleele. Ina ua oso aʻe le lā, ua velasia ma mamate ai ona e leʻi mauaa. Ae na paʻuʻū foʻi isi fatu i le vao tuitui, ma ina ua tutupu aʻe le vao tuitui, ona fetinaʻiina ai lea ma lē fua mai ai. Ae na paʻuʻū isi i le eleele lelei, ma ina ua tutupu aʻe ma faateleina, ona fua mai ai lea e taʻitolu sefulu le tasi, e taʻiono sefulu le isi, ae taʻiselau le isi.”

5 I taimi o le Tusi Paia, e masani lava o le auala e totō ai fatu saito, e ala i le faasalalau solo o  fatu. Sa ave e le tagata lūlū saito fatu saito i se gauga o lona ofu talaloa po o se fagu, ma faasalalau solo. I lenei la talafaatusa, e lē faapea o totō saʻo lava e le tagata lūlū saito fatu saito i ituaiga o eleele eseese. Nai lo lea, o fatu saito ia na faasalalau solo na paʻuʻū i nofoaga eseese.

6. Na faapefea ona faamatala e Iesu le talafaatusa i le tagata lūlū saito?

6 E lē tatau ona tatou taumateina le uiga o lenei talafaatusa. Sa faamatala mai e Iesu le uiga o lenei talafaatusa, e pei ona faamauina i le Mareko 4:14-20: “O lē lūlū saito ua ia lūlūina le upu. O fatu, o i latou ia ua i tafatafa o le auala i le mea ua lūlū ai le upu, ae ina ua faalogo i ai, ona sau ai lea o Satani ma aveese le upu na lūlūina iā i latou. E faapena foʻi fatu ua lūlūina i le mea papa, o i latou ia ina ua faalogo i le upu, ona latou talia loa lea ma le olioli. Peitaʻi e leʻi mauaa le upu iā i latou, ae ua faaauau mo na o sina taimi ma ina ua oo mai puapuaga ma sauāga ona o le upu, ona tautevateva ai lea o i latou. A o isi na lūlūina i le vao tuitui, o i latou ia ua faalogo i le upu, ae ona o le popole i faiga o mea a lenei lalolagi ma le malosi taufaasesē o le ʻoa, ma le tuʻinanau atu i isi mea, ua oo atu i totonu o le loto ma fetinaʻiina ai le upu ma lē fua mai ai. Mulimuli ane, o ē na lūlū i le eleele lelei, o i latou ia ua faalogo i le upu ma talia ma le fiafia, ma fua mai ai e tolu sefulu le tasi, e ono sefulu le isi, ma e selau le isi.”

7. O le ā ua faaāta mai e le fatu ma ituaiga eleele eseese?

7 Mātau, e lē o faapea mai Iesu e eseese ituaiga fatu na faaaogā. Nai lo lea, o loo ia talanoa e faatatau i le ituaiga fatu e tasi na paʻuʻū i ituaiga eleele eseese, lea e eseese iʻuga na maua mai ai. O le ituaiga eleele muamua e malō; o le lona lua e itiiti le eleele; o le lona tolu o loo ola ai le vaotuitui; ma lona fā, e lelei, o le eleele lea e fua tele mai. (Luka 8:8) O le ā la le fatu? O le feʻau o le Malo lea o loo i le Afioga a le Atua. (Mata. 13:19) O le ā o faaāta mai e ituaiga eleele eseese? O tagata e eseese tulaga o o latou loto.—Faitau le Luka 8:12, 15.

8. (a) O ai o loo faaāta mai e le tagata lūlū saito? (e) Aiseā e eseese ai le tali mai a tagata i le galuega talaʻi o le Malo?

8 O ai o loo faaāta mai e le tagata lūlū saito? O loo fai o ia ma sui o le ʻaufaigaluega a le Atua, i latou o ē o loo faalauiloaina atu le tala lelei o le Malo. I le pei o Paulo ma Apolo, e latou te totō ma faasūsū. Peitaʻi, e ui lava latou te galulue mamafa, ae e eseese uma iʻuga e maua mai. Aiseā? Ona o le eseese o tulaga o loto o tagata e faalogo mai i le feʻau. I le talafaatusa, e lē o mafai e le tagata lūlū saito ona ia faatonutonuina nei iʻuga. Maʻeu le faamāfanafana loto o lenei manatu, aemaise lava i o tatou uso ma tuafāfine faamaoni na galulue mo le tele o tausaga, ae foliga mai e itiiti ni iʻuga na maua mai ai! * Aiseā e faamāfanafana loto ai lenei manatu?

9. O le ā le mea moni faamāfanafana loto sa faamamafa e le aposetolo o Paulo ma Iesu?

 9 E lē o fuaina le faamaoni o le tagata lūlū saito i iʻuga o lana galuega. Sa faasino atu Paulo i le manatu lenā ina ua ia tusi e faapea: “E maua e tagata taʻitoʻatasi lona lava taui e tusa ma ana galuega.” (1 Kori. 3:8) E fua le taui e tusa ai o le galuega, ae e lē tusa ai ma iʻuga e maua mai i lenā galuega. Sa faamamafa atu foʻi e Iesu le manatu lenei ina ua foʻi mai ona soo i sa latou malaga talaʻi. Sa matuā fiafia i latou ona na usiusitai temoni iā i latou ona o le suafa o Iesu. E ui i lo latou olioli na iai, ae na fetalai atu Iesu iā i latou: “Aua neʻi outou olioli i lenei mea, ina ua usiusitai agaga iā te outou. Ae ia olioli ona ua tusia o outou igoa i le lagi.” (Luka 10:17-20) E tusa lava foʻi pe e lē o mātauina e le tagata lūlū saito ni iʻuga lelei se tele o lana galuega, e lē uiga ai faapea ua faaitiitia lona tinoū po o lona faatuatua nai lo isi. I se tulaga sili, e faalagolago iʻuga e maua mai i le tulaga o le loto o le tagata e faalogo mai. Ae i le iʻuga, o le Atua o ia lea na te faatupuina!

Le Tiute a i Latou e Faalogo i le Upu

10. E faapefea ona iloa po o le tagata lea e faalogo i le upu, o se eleele lelei pe leai?

10 Ae ā i latou o loo faalogo mai i le upu? Pe ua uma ona tuupōina la latou tali mai? E leai. O le avea o i latou ma eleele lelei pe leai foʻi, o la latou filifiliga lenā. O le mea moni, e mafai ona suia le tulaga o le loto o se tagata, i le lelei po o le leaga. (Roma 6:17) I lana talafaatusa, na fetalai ai Iesu e faapea “ina ua faalogo [nisi]” i le upu, ona sau ai lea o Satani ma aveese le upu. Peitaʻi, e lē tatau ona tupu lenei tulaga. O loo faalaeiauina Kerisiano i le Iakopo 4:7 “ia tetee atu i le Tiapolo,” ona sola ese ai lea o ia mai iā i latou. O loo taʻua foʻi e Iesu isi o ē i le taimi muamua na latou talia ma le fiafia le upu, peitaʻi na tautevateva i latou ona “e leʻi mauaa le upu iā i latou.” Ae ua fautuaina auauna a le Atua ia ‘⁠mauaa ma faatumauina i latou i luga o le faavae mausalī,’ ona mafai lea ona latou malamalama lelei i le “lautele, ma le umi, ma le maualuga ma le loloto o le upu moni, ma ia iloa le alofa o Keriso lea e sili atu i le iloa o mea.”—Efe. 3:17-19; Kolo. 2:6, 7.

11. E faapefea i se tasi ua faalogo i le upu ona ʻalofia le faatagaina o popolega ma ʻoa e fetinaʻiina ai le upu?

11 Ua faamatalaina isi na faalogo i le upu a ē ua latou faataga “le popole i faiga o mea a lenei lalolagi ma le malosi taufaasesē o le ʻoa,” ina ia oo atu i totonu o le loto ma fetinaʻiina ai le upu. (1 Timo. 6:9, 10) E faapefea la ona latou ʻalofia lenei tulaga? Ua tali mai le aposetolo o Paulo: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai o ia: ‘⁠Ou te lē tuua lava oe, ma ou te lē tuulafoaʻia lava oe.’ ”—Epe. 13:5.

12. Aiseā na eseese ai le aofaʻiga o fua na fua mai e i latou na faaāta mai e le eleele lelei?

12 O le manatu mulimuli, ua faapea mai Iesu o fatu na lūlūina i le eleele lelei, ‘⁠ua fua mai e tolu sefulu le tasi, e ono sefulu le isi, ma e selau le isi.’ E ui lava o nisi o i latou o ē tali mai i le upu, e lelei tulaga o o latou loto ma fua mai, ae o mea e mafai ona latou faia i le faalauiloaina o le tala lelei e eseese e tusa ai ma o latou tulaga. O se faaaʻoaʻoga, ona o le tulaga matua po o le aafia foʻi i se maʻi ua lē atoatoa ai le malosi o le tino, e ono tapulaa ai le sao o nisi i le galuega talaʻi. (Faatusatusa i le Mareko 12:43, 44.) O lea la, atonu e lē tele se iloa pe lē mafai foʻi e le tagata lūlū saito ona ia puleaina lenei tulaga, peitaʻi o loo ia olioli i le vaai atu ua faatupuina e Ieova le fatu na lūlūina.—Faitau le Salamo 126:5, 6.

Le Tagata Lūlū Fatu na Moe

13, 14. (a) Faamatala faapuupuu mai le talafaatusa a Iesu i le tagata lūlū fatu. (e) O ai o loo faaāta mai e le tagata lūlū fatu, ma o le ā le fatu?

13 I le Mareko 4:26-29, e tatou te faitau ai foʻi i le isi talafaatusa e faatatau i se tagata lūlū fatu: “Ua pei le malo o le Atua o le tagata na alu ma lūlū fatu i luga o le palapala, na moe o ia ma ina ua ala aʻe, ua tātupu ma ola le fatu ae na te leʻi iloa pe na faapefea ona tupu. Ua tuputupu mālie aʻe le fatu mai le palapala, ona matala lea o ona lau ma ua fuga mai, ma mulimuli ane ua iai saito matua. Ae ina ua matua le fua, ona tuu  atu ai lea o lana agaese, auā ua oo mai le taimi o le seleselega.”

14 O ai le tagata lūlū fatu? E manatu nisi tagata o lotu liliu ese ma le faa-Kerisiano moni, o loo faasino atu lenei manatu iā Iesu. Ae pe talafeagai pe a faapea atu sa moe Iesu ma na te lē silafia pe faapefea ona tupu aʻe le fatu? E mautinoa e silafia lelei e Iesu le auala e tupu aʻe ai le fatu! Nai lo lea, o lenei tagata lūlū fatu, e tutusa lava ma le tagata lea na taʻua i le amataga, o loo faaāta mai ai tagata talaʻi taʻitoʻatasi o le Malo, o ē o loo latou totōina le fatu o le Malo e ala i lo latou maelega i le galuega talaʻi. O le fatu o loo lūlū i le eleele, o le upu lea o loo latou talaʻia. *

15, 16. O le ā le mea moni e faatatau i le tuputupu aʻe faaletino ma le tuputupu aʻe faaleagaga, lea na taʻua e Iesu i lana talafaatusa i le tagata lūlū fatu?

15 Ua taʻua e Iesu e faapea ua ‘⁠moe le tagata lūlū fatu ma ala aʻe.’ E lē maʻalofia e tupu lenei tulaga i le tagata lūlū fatu. Ua faaāta mai ai le faasologa masani ua mulimuli i ai le toʻatele o tagata. Ua faaalia mai ai i le auala o loo faaupu ai lenei fuaiupu, o se faiga masani le galulue i le ao ae momoe i se taimi o le pō. Sa faamatala mai e Iesu le mea e tupu a o faagasolo lenā taimi. Ua ia faapea mai, “Ua tātupu ma ola le fatu.” Ona ia faaopoopo mai lea: “Ae na te leʻi iloa pe na faapefea ona tupu.” O loo faamamafa i inei le mea moni e faapea e “tuputupu mālie aʻe le fatu.” *

16 O le ā le manatu ua taʻu mai e Iesu i inei? Mātau foʻi, o loo faamamafa le auala e faasolosolo ona tuputupu aʻe ai le fatu. “Ua tuputupu mālie aʻe le fatu mai le palapala, ona matala lea o ona lau ma ua fuga mai, ma mulimuli ane ua iai saito matua.” (Mare. 4:28) O lenei tuputupu aʻe e faasolosolo i vaega eseese. E lē faamalosia pe faavavevave foʻi. E faapena foʻi le auala e tuputupu aʻe ai faaleagaga. E eseese vaega e tupu aʻe ai a o faataga e Ieova le upu moni, e tupu i le loto o le tagata ua saunia.—Galu. 13:48; Epe. 6:1.

17. O ai i latou o le a olioli pe a vāai atu ua fua mai le fatu o le upu moni?

17 E faapefea ona iai le vaega a le tagata lūlū fatu e fai i le taimi o le seleselega pe a oo “ina matua le fua”? Pe a oo ina faapogaia e Ieova le upu moni o le Malo e tupu i loto o soo fou, o le  a mulimuli ane uunaʻia i latou e lo latou alolofa i le Atua e tuuina atu o latou ola iā te ia. E faailogaina lo latou tuuina atu e ala i le papatisoga i le vai. O uso e faaauau pea ona agaʻigaʻi i luma i le taʻumatuaina, e faasolosolo mālie ona latou mauaina isi tiute tauave i le faapotopotoga. Ua seleseleina mai ai fua o le Malo e lē gata o lē na ia totōina fatu, ae faapea foʻi tagata talaʻi o le Malo o ē atonu e leʻi aofia totino ai i le totōina o le fatu lea ua avea ma soo. (Faitau le Ioane 4:36-38.) O lea la, ua “olioli faatasi lē e lūlū ma lē e selesele.”

Lesona mo i Tatou i Aso Nei

18, 19. (a) Ua faapefea e lenei iloiloga o talafaatusa a Iesu ona faalaeiauina ai oe lava ia? (e) O le ā o le a iloiloina i le mataupu o sosoo mai?

18 O le ā ua tatou aʻoaʻoina mai lo tatou talanoaina o nei talafaatusa e lua, o loo faamauina i le Mareko mataupu e 4? Ua tatou iloa manino ai, e iai se galuega e tatau ona tatou fai—o le lūlūina lea o le fatu. E lē tatau ona tatou faatagaina ni faamolemolega ma faafitauli e tulaʻi mai, e taofia ai i tatou mai le faia o lenei galuega. (Fai. 11:4) Ae i le taimi e tasi, ua tatou iloa ai o lo tatou faaeaga matagofie le avea ma ʻaufaigaluega faatasi ma le Atua. O Ieova na te faapogaia tagata e avea ma soo, ma faamanuia i a tatou taumafaiga ma taumafaiga a i latou e taliaina le feʻau. Ua tatou iloa e lē mafai ona tatou faamalosia se tasi e avea ma soo. Ua tatou aʻoaʻoina foʻi e lē tatau ona tatou loto vaivai pe afai ua tuai pe ua lē tupu aʻe foʻi le fatu. O se faamāfanafanaga le iloaina e faapea, e fua lo tatou taulau manuia i lo tatou faamaoni iā Ieova ma le faaeaga ua ia tuuina mai iā i tatou, ia talaʻi le “tala lelei o le malo . . . e fai ma molimau i nuu uma.”—Mata. 24:14.

19 O le ā se isi mea na aʻoaʻo mai e Iesu iā i tatou e faatatau i le tuputupu aʻe o soo fou ma le galuega o le Malo? E maua le tali o lenā fesili i isi talafaatusa ua faamauina i tala a Evagelia. O le a tatou iloiloina i le mataupu o sosoo mai, nisi o nei talafaatusa.

[Faaopoopoga i lalo]

^ pala. 8 Seʻi manatu i le faaaʻoaʻoga o le faiva a le uso o Georg Fjölnir Lindal i Iceland, e pei ona lipotia mai i le 2005 Yearbook of Jehovah’s Witnesses, itulau e 210-211, ma tala i mea na tutupu i auauna faamaoni o ē sa tumau ma le faamaoni i Aialani mo le tele o tausaga, e aunoa ma le iai o ni iʻuga lelei, e pei ona faamatalaina i le 1988 Yearbook of Jehovah’s Witnesses, itulau e 82-99.

^ pala. 14 I le taimi muamua, sa faamatala atu ai i lenei mekasini e faapea, o le fatu o loo faaāta ai uiga o le tagata lea e manaʻomia ona tuputupu aʻe i le taʻumatuaina, ona ua taaʻina i mea o loo siʻomia ai. Peitaʻi, e lelei ona mātau mai le talafaatusa a Iesu, e lē o suia le fatu e avea ma fatu leaga pe fua mai i ni fua leaga. O loo faapea mai ua tupu le fatu ma faasolosolo ina matua.—Tagaʻi i le Watchtower, o Iuni 15, 1980, itulau e 17-19.

^ pala. 15 E na o le pau le isi faaaogāina o le faaupuga lenei o loo maua i le Galuega 12:10, lea e taʻua ai se faitotoʻa uʻamea ‘⁠ua faafuaseʻi ona matala.’

Pe E te Manatua?

• O ā nisi o vala e tutusa ai le totōina o se fatu laau, ma le talaʻia o le feʻau o le Malo?

• E faapefea ona fua e Ieova le faamaoni o se tagata talaʻi o le Malo?

• O le ā le mea e tutusa ai le tuputupu aʻe faaletino ma le tuputupu aʻe faaleagaga, lea na faamamafa e Iesu?

• E faapefea ona “olioli faatasi lē e lūlū ma lē e selesele”?

[Fesili mo le Suʻesuʻega]

[Ata i le itulau 13]

Aiseā na faatusa ai e Iesu se tagata talaʻi o le Malo o le Atua i se tagata lūlū saito?

[Ata i le itulau 15]

O i latou o loo faaāta mai e le eleele lelei, o loo auai ma le loto atoa i le talaʻia o le Malo e tusa ai ma o latou tulaga

[Ata i le itulau 16]

O le Atua o ia lea na te faatupuina le fatu