Skip to content

Skip to table of contents

Ia Fai le Mea e Mafai Ona Fai, ma Olioli Ai

Ia Fai le Mea e Mafai Ona Fai, ma Olioli Ai

 Ia Fai le Mea e Mafai Ona Fai, ma Olioli Ai

“UA OU lē taulau foʻi.” E faafia ona e faia lea faaupuga ona ua lē mafai ona e faataunuuina se mea sa e fuafua e fai? Atonu e faailoa mai e se tinā Kerisiano na ituaiga o faalogona, ona ua lotovaivai i le tele o lona taimi e uaʻi atu ai i lana pepe faatoʻā fanau, ae ua lē fiafia i le leai o se taimi e uaʻi atu ai i manaʻoga faaleagaga. Atonu foʻi e manatu se uso Kerisiano ua lē mafai ona ia faia nisi o mea ona o le auala na ola aʻe ai a o laʻitiiti, ma manatu ai e itiiti mea e mafai ona ia faia i le faapotopotoga. E ono manatu foʻi se Molimau ua matua, ua tuulafoaʻiina o ia talu ai ua lē toe mafai ona fai sona sao atoatoa i le galuega faa-Kerisiano, lea sa ia fiafia e faatinoina a o maua lona malosi. “I nisi taimi, ou te tagi ai pe a faia le lauga e faalaeiau ai i le auaunaga faapaeonia,” o le faamatalaga lea a Christina, o lē e itiiti sona sao e fai i le auaunaga iā Ieova, ona o tulaga o lona aiga.

E faapefea ona tatou manumalo mai i na faalogona? O le ā le auala na mafai ai e nisi Kerisiano ona atiaʻe le vaaiga saʻo i o latou tulaga? O ā aogā o le faatalitalia o mea e mafai ona fai?

Ia Fetuutuunaʻi

Na tuuina mai e le aposetolo o Paulo iā i tatou le auala e faatumauina ai lo tatou olioli ina ua ia faapea mai: “Ia olioli e lē aunoa i le Alii. Ou te toe fai atu foʻi, Ia olioli! Ia iloa e tagata uma lo outou magafagafa.” (Fili. 4:4, 5) Ina ia maua le olioli ma le faamalieina i le auaunaga i le Atua, e manaʻomia ona tatou atiaʻe le fetuutuunaʻi i mea tatou te mafai ona fai e fua i o tatou tomai ma tulaga. Afai tatou te taumafai e faataunuu sini e lē o gafatia e o tatou tulaga o loo iai, o le a tatou lagona ai le popole vale. Ae i le isi itu, e lē tatau foʻi ona tatou soona faatuutuu iā i tatou lava, i le avea lea o o tatou tulaga, e fai ma faamolemolega e faaitiitia ai mea e tatau ona tatou faia i le auaunaga faa-Kerisiano.

Po o ā lava o tatou tulaga, ae e faatalitalia e Ieova tatou te avatu iā te ia le mea sili tatou te mafaia—o la tatou auaunaga e faia ma lo tatou malosi atoa ma le lotoatoa. (Kolo. 3:23, 24) Afai tatou te lē avatua iā Ieova le mea sili tatou te mafaia, e tatou te lē o ola la e tusa ai ma lo tatou tuuina atu. (Roma 12:1) E lē gata i lea, o le a tatou lē maua ai le faamalieina ma le olioli sili, faapea ma isi faamanuiaga e tele e maua mai le auaunaga e faia ma le loto atoa.—Faata. 10:22.

O le upu lenei o le “magafagafa” i le Tusi Paia, o loo faauiga atu i le fetuutuunaʻi. O lona uiga moni lava, o le lolo atu e fai se mea. (Iako. 3:17) E uiga atu foʻi lenei upu i le lē soona maumauaʻi e fai se mea. O lea la, afai tatou te fetuutuunaʻi, o le a mafai ai ona saʻo la tatou vaaiga i o tatou tulaga. Pe e faigatā ea ona fai lenei mea? E faigatā mo nisi, e ui lava e ono mafai ona latou manatu i isi ma le magafagafa. Mo se faataʻitaʻiga, pe afai ua amata ona tatou vaaia ni faailoga, e iloa ai ua vaivai sa tatou uō ona o le soona faia o le tele o mea i le taimi e tasi, pe tatou te lē mananaʻo ea e fesoasoani atu iā te ia  ina ia maua le poto e fetuutuunaʻi ai mea o loo fai i lona olaga? E faapena foʻi lo tatou tulaga, e ao ona tatou taumafai e iloa ni faailoga e taʻu mai ai ua sili atu mea ua tatou faia, i lo mea e gata mai ai lo tatou malosi.—Faata. 11:17.

O se luʻi le taumafai e fetuutuunaʻi i mea e gata mai ai lo tatou malosi, pe afai sa tausia aʻe i tatou e ni matua tagisā. O nisi sa manatu i le taimi a o laiti, e tatau ona latou faia mea e sili atu ina ia fiafia ai o latou matua. Afai o le tulaga lenā sa tatou iai, e ono iā i tatou la se manatu sesē e uiga i le silafaga a Ieova iā i tatou. E fiafia le finagalo o Ieova iā i tatou pe a tatou auauna atu iā te ia ma le lotoatoa. O loo faamautinoa mai e le Afioga a le Atua e “silafia lava e ia le mea na fai aʻi i tatou; ua manatu ia o le efuefu lava i tatou.” (Sala. 103:14) E na te silafia mea e gata ai lo tatou malosi ma e alofa iā i tatou pe a tatou auauna atu ma le maelega iā te ia, e ui lava i na tulaga. Afai tatou te manatuaina o lo tatou Atua e lē o se pule tagisā, o le a tatou lotomaulalo ai i mea ua mafai ona tatou faia, i le iloaina o mea e gata ai lo tatou mafai.—Mika 6:8.

Ae o loo faigatā pea ona atiaʻe e nisi se uiga paleni. Afai o lou tulaga lenā, aiseā e te lē saʻili ai i se fesoasoani a se uso Kerisiano e masani lelei iā te oe? (Faata. 27:9) Mo se faaaʻoaʻoga, o fia fai sau paeonia sauatoa? O se sini lelei tele lenā sini! Po o faafaigatā ona e ausia lenā sini? Atonu o loo e manaʻomia se fesoasoani ina ia faafaigofie ai lou olaga. Pe atonu e te lua talanoa ma sau uō Kerisiano maufaatuatuaina, ina ia vaai po o talafeagai pe lē talafeagai foʻi ona fai sau paeonia sauatoa ma fai pea le tele o au tiutefai i le aiga. E mafai ona ia fesoasoani atu ina ia e iloa po o mafai ona e faia le paeonia e faaopoopo atu i au galuega masani, ia po o ā foʻi nisi fetuutuunaʻiga e te faia ina ia faateleina ai lou taimi i le paeonia. O se gaoioiga lelei foʻi mo se tane le fesoasoani i lana avā ina ia maua se taimi lelei e faia ai sana paeonia. O se faataʻitaʻiga, e mafai ona fai le tane i lana avā e lelei pe a lava sana mālōlōga a o leʻi oo i le masina e amata ai lana paeonia. E aogā tele lenā tulaga ina ia maua ai e le avā le malosi, ma tumau ai pea ona fiafia i le talaʻiga.

Vaai Mea e Mafai Ona E Faia

E ono mafai e le soifua matua po o maʻi o le tino ona faaitiitia mea e mafai ona tatou faia i le auaunaga iā Ieova. Afai o oe o se matua, atonu e te manatu e lē tele ni aogā o maua mai i au suʻesuʻega totino ma sauniga faa-Kerisiano, ona o le tele o lou taimi ma le malosi o loo faaalu i le tausia o le fanau laiti. Peitaʻi, pe o le a avea ea le mafaufau tele i mea e gata mai ai lou mafai, ma mea e taofia ai oe i le iloa o mea e mafai ona e faia?

I le faitau afe tausaga ua mavae, na faailoa mai ai e se sā Levī se faanaunauga na lē mafai ona ia faatinoina. Na ia maua se faaeaga o le auauna lea i le malumalu mo vaiaso e lua i tausaga taʻitasi. Peitaʻi, na iā te ia se faanaunauga malosi o le fia nofo ai pea e latalata i le fata faitaulaga. (Sala. 84:1-3) O le ā sa fesoasoani i lenei tamāloa faamaoni ina ia lotomalie ai pea i  lana auaunaga? Ioe, sa ia iloa e tusa lava pe tasi se aso e auauna ai i lotoā o le malumalu, o se faaeaga tāua tele lea iā te ia. (Sala. 84:4, 5, 10) E faapena foʻi i tatou, nai lo le mafaufau tele faapea e gata mea e mafai ona tatou fai, e ao ona tatou taumafai ia iloa ma talisapaia mea o loo mafai ona tatou faia.

O se faaaʻoaʻoga, o Nela, o se tuafafine Kerisiano i Kanata. Sa feaveaʻi o ia i se nofoa faataavalevale ma manatu ai, ua itiiti mea e mafai ona ia faia i le auaunaga. Peitaʻi, na suia lona manatu e ala i le taumafai e avea le nofoaga e fai ai faatauga e latalata ane, ma ana oganuu e talaʻi ai. Na ia faapea mai: “Ou te nofonofo lava i loʻu nofoa faataavalevale i autafa o se laulau e mālōlō ai i totonu o le nofoaga e fai ai faatauga. Ma ou te fiafia lava e talaʻi i tagata e ō mai e mālōlō ai i inā mo sina taimi.” O le faia o se sao i lenei ituaiga o auaunaga tāua, na matuā faamalieina ai lava Nela.

Ia Fetuutuunaʻi pe a Manaʻomia

Atonu o se vaafailā o loo faimalaga saosaoa atu ona o loo uunaʻi e le savili ona lā. Ae pe a fesagaʻi le tagata folau o le vaafailā ma se afā malosi, e tatau ona fetuunaʻi lā o lona vaa. E lē mafai ona ia faatonutonuina le afā, ae e ala i le faia o ni fetuutuunaʻiga, e ono mafai ona ia faatonutonuina lona vaafailā. I se tulaga talitutusa, e masani foʻi ona lē mafai ona tatou faatonutonuina pe pulea ni faafitauli e pei o ni afā o loo tatou fesagaʻia i le olaga. Ae e mafai ona tatou pulea o tatou olaga i le mea sili tatou te mafai e ala i le fetuunaʻi o le auala o loo faaaogā ai lo tatou malosi, mafaufau ma faalogona. Pe a manatunatu ona ua pau lava o suiga fou ua tatou oo iai, o le a faatumauina ai pea lo tatou faamalieina ma le olioli i le auaunaga i le Atua.—Faata. 11:2.

Seʻi manatu i nisi o faaaʻoaʻoga. Afai ua lē lava lo tatou malosi, atonu e lelei pe a ʻalofia nisi o galuega mamafa i le taeao ina ia mafai ona maua so tatou malosi e auai ai i le sauniga faa-Kerisiano i le afiafi. O le faia faapea, o le a tatou maua ai le tele o aogā i faatasitasiga ma uso Kerisiano. Atonu foʻi o se tinā ua lē mafai ona auai i le talaʻiga ona ua maʻi lana tama, e lelei pe a ia valaaulia se tuafafine Kerisiano ina ia sau i lona fale e la te faia le talaʻiga e faaaogā ai le telefoni, pe a moe lana tama.

Ae faapefea pe afai ua lē mafai ona muaʻi fai ni au suʻesuʻega mo mataupu o le a talanoaina i sauniga a le faapotopotoga, ona o lou tulaga ua iai? E mafai ona e faia mea uma e te mafai ona faatinoina, ma ia faia i le lelei e te mafai ai. O le fetuunaʻi o mea tatou te sini i ai, e tumau  ai pea ona tatou tiotio ma olioli i le auaunaga.

O le fetuunaʻi o o tatou sini, e ono manaʻomia ai le maumauaʻi ma ni taumafaiga. O Seu ma Ake, o se ulugalii i Falani, sa la faia ni suiga tetele i a la fuafuaga. Na faapea mai Seu, “Ina ua ma iloa o loo faatalitalia e Ake le fanau mai o se pepe, sa lē taulau ai la ma sini na iai o le fia avea ma misionare.” Na faamatala mai e Seu, o se tamā o ni teine se toʻalua i le taimi nei, le auala sa la faatulaga ai o se ulugalii se sini fou. Na faapea mai Seu, “Nai lo le auauna i se isi atunuu mamao, sa ma filifili e ‘⁠misionare’ i lo ma atunuu. Na ma auai atu i se vaega e ese le gagana e tautatala ai.” Pe sa aogā ea lenei sini mo i laʻua? Na fai mai Seu: “Sa ma iloa lo ma aogā i le faapotopotoga.”

O Otila, o se tuafafine Kerisiano i Falani, ua silia i le 70 ona tausaga ma ua maua i le maʻi gugu, ma e lē umi se taimi e tū ai. Sa ia lotovaivai ona ua lē mafai ona alu i le talaʻiga mai lea fale i lea fale, talu ai lona maʻi. Ae peitaʻi, e leʻi faavaivai ai o ia. Sa ia toe fetuunaʻi ana mea e fai e ala i le talaʻi i le telefoni. Na ia faapea mai: “Sa faigofie atu lea ma e manaia atu nai lo le mea na ou manatu i ai.” Sa fesoasoani lenei auala e faatumau ai pea lona faanaunauga mo le auaunaga.

Fai Mea e Mafai Ona Fai e Aumaia ai Faamanuiaga

O le atiaʻe o se vaaiga saʻo i mea e mafai ona tatou faia, o le a puipuia ai i tatou mai le lē fiafia. O le faatulaga o sini e fetaui lelei ma o tatou tulaga, e tatou te lagona ai e mafai ona tatou faia se mea, e tusa lava pe tapulaa mea e mafai ona tatou fai. O le a tatou olioli ai pea ona o mea tatou te mafaia, e ui lava e itiiti mea e mafai ona tatou faatinoina.—Kala. 6:4.

Pe afai tatou te atiaʻe se vaaiga paleni i mea e mafai ona tatou faia, o le a atili ai ona tatou amanaʻia tulaga o uso Kerisiano. I le iloaina o mea e gata mai ai lo latou mafai, o le a tatou talisapaia ai pea mea o loo latou faia mo i tatou. E ala i le faaalia o le agaga faafetai mo so o se fesoasoani na ofo mai, e tatou te saosaolaumea uma ai i le agaga felagolagomaʻi ma le femalamalamaaʻi. (1 Pete. 3:8) Ia manatua, talu ai o ia o se Tamā alofa, e lē taitai faatalitalia e Ieova i tatou ina ia avatu iā te ia mea e sili atu i lo mea e mafai ona tatou faia. Ma pe a iā i tatou se vaaiga paleni i mea e mafai ona fai ma faatulaga sini e mafai ona ausia, o le a aumaia ai e le auaunaga faaleagaga le faamalieina ma le olioli.

[Faamatalaga faaopoopo i le itulau 29]

Ina ia maua le olioli ma le faamalieina i le auaunaga i le Atua, e manaʻomia ona tatou atiaʻe le fetuutuunaʻi i mea tatou te mafai ona fai e fua i o tatou tomai ma tulaga

[Ata i le itulau 30]

Na matuā olioli Nela i le faia o le mea na te mafai i le auaunaga

[Ata i le itulau 31]

Ia iloa ona “fetuunaʻi lā o le vaa”

[Ē Ana le Ata]

© Wave Royalty Free/age fotostock

[Ata i le itulau 32]

Na maua e Seu ma Ake aogā mai le faatulaga o sini fou