Skip to content

Skip to table of contents

Tausisi i le “Faapaiaina i le Mata‘u i le Atua”

Tausisi i le “Faapaiaina i le Mata‘u i le Atua”

 Tausisi i le “Faapaiaina i le Mataʻu i le Atua”

O LOO taʻua i le Tusi Paia le silisili ona paia o Ieova le Atua, e faapea: “E paia, e paia, e paia Ieova.” (Isa. 6:3; Faaa. 4:8) O le faaupuga Eperu ma le Eleni o le upu “faapaiaina,” o loo faauiga atu i se tulaga mamā po o le mamā tau tapuaʻiga, o le ʻalo ese mai lea i mea e lē mamā. O le tulaga paia o le Atua, e faasino atu i lona tulaga tau amio e saʻo atoatoa.

Po o faatalitalia ea e Ieova, o le Atua paia, i latou o loo tapuaʻi iā te ia ina ia paia, po o le mamā i le itu faaletino faapea foʻi i le tulaga tau amio ma le faaleagaga? O loo faailoa manino mai e le Tusi Paia, e finagalo Ieova ia paia ona tagata. E tatou te faitau i ai i le 1 Peteru 1:16 e faapea: “E tatau ona paia outou, auā o aʻu nei e paia lava.” Pe e mafai ona faataʻitaʻi tagata lē lelei atoatoa i le paia o Ieova? Ioe e mafai, e ui lava e lē atoatoa ona latou faia faapea. E mafai ona paia i tatou i le silafaga a Ieova pe afai tatou te tapuaʻi iā te ia i se tulaga mamā faaleagaga, ma ia mafuta vavalalata atu iā te ia.

E faapefea ona faaauau pea ona tatou mamā a o tatou ola i lenei lalolagi lē mamā? O ā mea e ao ona tatou ʻalofia? O ā suiga e manaʻomia ona tatou faia i upu e tautatala ai ma amioga? Seʻi o tatou talanoaina se lesona tāua mai le mea na manaʻomia e le Atua mai i tagata Iutaia, ina ua latou toe foʻi mai Papelonia i le 537 T.L.M.

‘E Iai Foʻi le Ala Sā’

Sa folafola mai e Ieova o le a ia toe faafoʻisia mai i o latou nuu, ia ona tagata lea na ave faapologa i Papelonia. Na aumaia i le valoaga o le toe faafoʻisiaga le faamautinoaga lenei: “E i ai foʻi le ala tanu, ma le ala, e taʻua foʻi o le ala sā.” (Isa. 35:8a) Na taʻu mai i na faaupuga e lē gata na tatala e Ieova le avanoa e toe foʻi ai tagata Iutaia i o latou aiga, ae na faamautinoa atu foʻi o le a ia puipuia i latou i le ala.

Na tatala e Ieova le “ala sā” mo ana auauna i aso nei i le lalolagi ina ia ʻalo ese mai ai iā Papelonia Tele, le emepaea o lotu sesē. I le 1919, na ia faasaʻoloto mai ai Kerisiano faauuina mai le faapologaina faaleagaga ona o aʻoaʻoga a lotu sesē, ma faasolosolo ai pea ona latou faamamāina la latou tapuaʻiga mai aʻoaʻoga sesē uma. I le avea ai ma tagata tapuaʻi a Ieova i aso nei, e tatou te olioli ai i se siʻomaga mamā ma saogalemu faaleagaga, lea e mafai ai ona tatou tapuaʻi iā Ieova ma maua se faiā filemu ma ia faatasi ai ma o tatou uso talitonu.

Ua filifili le “lafu mamoe itiiti” o Kerisiano faauuina ma le “motu o tagata e toʻatele” o “isi mamoe,” e savavali i le ala mamā ma ua latou valaaulia isi ina ia latou aufaatasi. (Luka  12:32; Faaa. 7:9; Ioa. 10:16) Ua mafai ona maua le “ala sā” e i latou uma o loo mananaʻo e “tuuina atu o [latou] tino o le taulaga ola, e paia, ma e mālie i le Atua.”—Roma 12:1.

“E Lē ui Atu ai Sē ua Leaga”

Sa tatau ona ausia e tagata Iutaia na toe foʻi ane i le 537 T.L.M., se mea e manaʻomia ma e tāua tele. E tusa ai ma i latou ua mafai ona savavali i le “ala sā,” o loo taʻua i le Isaia 35:8e: “E lē ui atu ai sē ua leaga, a e faia mo i latou lava; e ui ina valea se malaga e lē sesē ai lava.” E lē mafai ona nonofo ai i latou e manatu faapito, e lē faatāuaina mea paia, pe e lē mamā faaleagaga, talu ai o le fuafuaga mo le toe foʻi o tagata Iutaia i Ierusalema, o le toe atinaʻe lea o le tapuaʻiga mamā. Sa manaʻomia mo i latou na toe foʻi ane ona tausisi i tapulaa tau amio a Ieova. E manaʻomia foʻi ona usitaia e i latou o loo mananaʻo e faafiafia le Atua, lenā tulaga tāua i aso nei. E tatau ona latou tausisi i le “faapaiaina i le mataʻu i le Atua.” (2 Kori. 7:1) O ā la faiga lē mamā e ao ona tatou ʻalofia?

Na tusi le aposetolo o Paulo e faapea, “Ua faaalia galuega a le tino, o le faitaaga, amio lē mamā, amio matagā.” (Kala. 5:19) O le faitaaga le faia o so o se feusuaʻiga lē mamā, lea e aofia ai le faaaogā o totogasā a o leʻi faaipoipo. O amioga matagā e aofia ai “amioga tuufau; le lē pulea; amioga lē māsiasi; ma amioga lē taupulea.” E matuā feteenaʻi le faitaaga ma le amio matagā i le paia o Ieova. O lea la, o i latou uma o ē faia na amioga, e lē mafai ona avea i latou ma vaega o le faapotopotoga Kerisiano, po o le faateʻa ese mai le faapotopotoga. O le tulaga foʻi lenā e faia iā i latou e faia amioga lē mamā matuiā, o lona uiga o le faia o “amioga lē mamā uma ona o le manaʻo tele.”—Efe. 4:19.

O “amioga lē mamā,” o se faaupuga e aofia ai ituaiga agasala eseese. O le upu Eleni i lea faaupuga, e faasino atu i so o se ituaiga mea inosia lava—i amioga, i le tautala, ma i faauōga ma ē lē talitonu. E aofia ai amioga lē mamā ia e lē manaʻomia ona oo i luma o le komiti faafaamasinoga. * Ae faamata o paia amio a i latou o loo faia nei faiga lē mamā?

Seʻi faapea ua amata ona matamata faananā se Kerisiano i ata ma faamatalaga o faiga matagā faaleituaiga. A o faasolosolo mālie pea ona tutupu aʻe ona faanaunauga lē mamā, ua amata ona tau faalētonu lona tumau pea i le mamā i le silafaga a Ieova. Atonu e leʻi oo le leaga o lana amio i le tulaga lea ua taʻua o amioga lē mamā matuiā, ae ua lē o toe faaauau ona ia manatunatu i ‘⁠mea uma ua mamā, o mea uma ua taʻuleleia, o amioga lelei uma ma mea e viia ai se tasi.’ (Fili. 4:8) O ata ma faamatalaga i faiga matagā faaleituaiga, e lē mamā ma e mautinoa le lē lelei ai o le faiā a se tasi ma le Atua. E lē tatau ona taʻua so o se mea e lē mamā iā i tatou.—Efe. 5:3.

Seʻi manatu i se isi faaaʻoaʻoga. Seʻi faapea ua fai ma masani le taaloalo o se Kerisiano i ona totogasā, lona uiga o le faia ma le loto i ai ina ia faamalie ai ona faalogona tau i feusuaʻiga—atonu e māfua mai i ata ma faamatalaga  matagā faaleituaiga, pe leai foʻi. E ui lava e lē o iai i le Tusi Paia le faaupuga “taaloalo i totogasā,” ae pe faamata e moni o se mea e lē mamā lenā faiga? Po o le faaauau ea ona faia o lea faiga lē mamā, o le a faaleaga ai le faiā a se tasi ma Ieova, ma lē mamā ai o ia i le silafaga a le Atua? E ao ona tatou utagia le fautuaga a le aposetolo o Paulo e “faamamā ai iā i tatou mai i mea uma e faaleagaina ai le tino ma le agaga” ma “ia fasiotia tuʻinanauga i o [tatou] itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻonaʻo fua i mea a isi.”—2 Kori. 7:1; Kolo. 3:5.

O loo taliaina e lenei lalolagi lea o loo pulea e Satani, ia amioga lē mamā, ma e latou te fiafia i ai. Atonu o se luʻi mo i tatou le taumafai e teena tofotofoga e faia amioga lē mamā. Ae o Kerisiano moni e lē tatau ona latou “savavali e pei o tagata o le lalolagi o ē o loo savavali i le pōuliuli o o latou mafaufau.” (Efe. 4:17) Pe afai tatou te ʻalofia amioga lē mamā, pe i le taimi na o i tatou po o i le lautele, ua na o le pau lenā o le auala o le a faataga ai e Ieova i tatou ina faaauau ai ona savavali i le “ala sā.”

“E Lē Iai se Leona”

Atonu e manaʻomia ni suiga mataʻina i amioga ma upu e tautala ai ina ia fiafia mai le finagalo o Ieova, le Atua paia. O loo taʻua i le Isaia 35:9: “E lē i ai se leona, e lē alu aʻe ai foʻi se manu feʻai,” o lona uiga, i le “ala sā.” I se faaupuga faafaatusa, o loo faatusaina tagata e sauā ma vave ona ita i manu feʻai. E mautinoa lava le lē ola o i latou i le lalolagi fou amiotonu a le Atua. (Isa. 11:6; 65:25) O lea la e tāua tele mo i latou o loo mananaʻo e faafiafia le Atua, ona lafoaʻi uiga pei ni manu feʻai ae tausisi i le ala paia.

O loo fautua mai le Tusi Paia iā i tatou: “Ia tuu lo [tatou] ita umi, ma le itaitagofie, ma le lotoa, ma le soona ʻeʻē, ma upu masoā, atoa foʻi ma mea leaga uma.” (Efe. 4:31) O loo taʻua foʻi i le Kolose 3:8 e faapea: “Tuu ese mai iā te outou le toʻatamaʻi, le ita, le leaga, o upuleaga, ma e lē tatau ona sau se upu masoā mai i o outou gutu.” O le faaupuga “upuleaga” o loo faaaogā i nei mau, o loo faasino atu i upu faatigā, lē faaaloalo, ma taufaaleaga.

I aso nei, ua matuā taatele le tautala i upu faatigā, ma lē mafaufau, e oo lava i totonu o aiga. E lafo e ulugalii faaipoipo upu faatigā, matagā, ma lē faaaloalo e le tasi i le isi, ma i le fanau foʻi. E lē tatau ona iai i totonu o aiga Kerisiano nei ituaiga o faamatalaga sauā.—1 Kori. 5:11.

Tausisi i le “Faapaiaina i le Mataʻu i le Atua”—O se Faamanuiaga!

O se matuā faaeaga le auauna i le Atua paia o Ieova! (Iosua 24:19) E matuā tāua tele le parataiso faaleagaga lea ua aumai e Ieova iā i tatou. O le tumau pea ona tatou amio paia i luma o fofoga o Ieova, e mautinoa o le auala sili lea e ola ai.

O le a toeitiiti ona faataunuuina lea o le folafolaga a le Atua e faatatau i se lalolagi parataiso. (Isa. 35:1, 2, 5-7) O i latou e naunau i lenā parataiso ma tausisi pea i ala o le Atua, o le a faamanuiaina i latou e ala i le nonofo ai i inā. (Isa. 65:17, 21) O lea la, e tatau ona tatou faaauau pea ona tapuaʻi i le Atua i se tulaga mamā faaleagaga, ma tumau i se faiā māfana ma ia.

[Faaopoopoga i lalo]

^ pala. 12 Mo nisi faamatalaga i le mea e ese mai ai “amioga lē mamā . . . ona o le manaʻo tele” mai i “amioga lē mamā,” tagaʻi i Le Olomatamata, Iulai 15, 2006, i le itulau e 29-31.

[Ata i le itulau 26]

O le ā le mea sa manaʻomia mai i tagata Iutaia ina ia savavali ai i le “ala sā”?

[Ata i le itulau 27]

O le matamata i ata ma faamatalaga matagā, e leaga ai le faiā a se tasi ma Ieova

[Ata i le itulau 28]

“Ia tuu . . . le soona ʻeʻē, ma upu masoā, atoa foʻi ma mea leaga uma”