Skip to content

Skip to table of contents

Talavou e, Ia Manatua Lē na Faia Outou

Talavou e, Ia Manatua Lē na Faia Outou

 Talavou e, Ia Manatua Lē na Faia Outou

“O lenei, ia e manatua lē na faia oe i ona pō o lou tauleʻaleʻa.”—FAI. 12:1.

1. Ua faapefea ona faailoa mai e Ieova lona maufaatuatuaina o ona tagata tapuaʻi talavou?

E TĀUA i le silafaga a Ieova Kerisiano talavou ma e faafouina ai e pei o le sau o le vaveao. Na ia valoia mai e faapea, i ‘⁠aso o le malosi’ o lona Alo, o le a “fai taulaga ma le loto” tane ma fafine talavou i le auaunaga iā Keriso. (Sala. 110:3) Ua faataunuuina lenā valoaga i o tatou taimi a o toʻatele tagata e lē usitai i le Atua, o loo pupū i le saʻilia o tupe ma o latou lava lelei, ma lē fia faalogo. Peitaʻi, na silafia e Ieova o le a lē faapena talavou o ē tapuaʻi iā te ia. E mautinoa le maufaatuatuaina e Ieova o outou uso ma tuafāfine talavou!

2. O le ā e aofia ai i le manatuaina o Ieova?

2 Manatu i le olioli o le finagalo o le Atua pe a silasila mai i talavou o loo manatua o ia o Lē na Faia i latou. (Fai. 12:1) E mautinoa o le manatuaina o Ieova e tele mea e aofia ai nai lo o le tau ina mafaufau iā te ia. E mafai ona uiga i le faia o se gaoioiga—le faia o mea e finagalo malie i ai le Atua, ma ia taʻitaʻia e ana tulafono ma mataupu silisili o tatou olaga i aso taʻitasi. E uiga atu foʻi i le faatuatua iā Ieova, i le iloaina lea e matuā manatu mamafa mai o ia mo lo tatou lelei. (Sala. 37:3; Isa. 48:17, 18) Po o lou lagona lenā e faatatau i Lē na Faia oe?

“Ia e Faatuatua iā Ieova ma Lou Loto Atoa”

3, 4. Na faapefea ona faaalia e Iesu le faatuatua iā Ieova, ma aiseā e tāua ai i aso nei ona faatuatua iā Ieova?

3 O le faaaʻoaʻoga sili o se tasi na faatuatua i le Atua, o Iesu Keriso. Sa soifua o ia e tusa ai ma upu o le Faataoto 3:5, 6: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” E leʻi leva lava ona uma le papatisoga o Iesu, ae faalatalata atu loa Satani iā te ia, o lē na taumafai e tofotofo iā te ia ina ia talia le pule ma le mamalu faalelalolagi. (Luka 4:3-13) E leʻi faasesēina ai Iesu. Sa ia silafia o le ‘oloa, ma le viiga, ma le ola’ o le ‘taui lea o le faamaulalo ma le mataʻu iā Ieova.’—Faata. 22:4.

4 Ua pulea lenei lalolagi e tagata matapeʻapeʻa ma manatu faapito. I se siʻomaga faapea, e atamai tele mo i tatou ona faaaʻoaʻo i le faaaʻoaʻoga a Iesu. Ia manatua foʻi, o le a faia e Satani so o se mea e taaʻina ese ai auauna a Ieova mai le ala vaapiapi e tau atu i le ola. E manaʻo Satani ia ui tagata uma i le ala lautele lea e tau atu i le malaia. Ia aua lava neʻi faasesēina oe e Satani! Nai lo lea, seʻi maumauaʻi nei e manatua Lē na Faia oe. Ia faatuatua atoatoa iā te ia, ma ia taofimau i le “ola moni,” lea e mautinoa ma ua toeitiiti oo mai.—1 Timo. 6:19.

Talavou, ia Outou Atamamai!

5. O le ā sou manatu e faatatau i le lumanaʻi o lenei lalolagi?

5 O talavou e manatua Lē na Faia i latou, e sili atu ona atamamai nai lo o isi talavou e latou te tupulaga faatasi. (Faitau le Salamo 119:99, 100.) Talu ai ona ua latou iloa le finagalo o Ieova, o lea ua latou malamalama lelei ai, ua toe o se aga ona mou atu lea o lenei lalolagi. E ui i le puupuu o le taimi talu ona outou feola mai, ae e mautinoa lava ua outou mātauina le toʻatele o tagata ua matuā fefefe ma popole e faatatau i le lumanaʻi. Pe afai o loo e aʻoga, atonu o e faalogo i le faaleagaina o le ea, le tulaga vevela o le lalolagi, le tāina o le vaomatua, ma isi faafitauli faapena. O loo matuā manatu mamafa tagata i nei faiga, ae e na o Molimau a Ieova ua latou iloa lelei, o nei faiga, o vala ia o le faailoga o le iʻuga o le lalolagi a Satani.—Faaa. 11:18.

6. Ua faapefea ona faasesēina nisi talavou?

 6 Pagā le faanoanoa, ona ua iai nisi auauna talavou a le Atua ua lē o toe mataala, ma ua latou lē amanaʻia le mea moni, e lē o toe umi se taimi o totoe mo lenei lalolagi. (2 Pete. 3:3, 4) O isi ua aafia i le faia o agasala matuiā, ona o taaʻiga a aumea leaga ma ata ma faamatalaga o faiga matagā faaleituaiga. (Faata. 13:20) Pagā le faanoanoa pe a tatou lē maua le finagalo malie o le Atua i le taimi nei, a o tatou lata atu i le iʻuga! Nai lo lea, ia tatou aʻoaʻoina se lesona mai le mea na tupu i tagata Isaraelu i le 1473 T.L.M. a o latou tolauapi i Fanua Laugatasi o Moapi, ua toe lava ina a ulu atu i le Nuu o le Folafolaga. O le ā na tupu i inā?

Na Latou Lē Taulau a ua Toetoe Taunuu i lo Latou Sini

7, 8. (a) O le ā le togafiti na faaaogā e Satani i Fanua Laugatasi o Moapi? (e) O le ā le togafiti o loo faaaogā e Satani i aso nei?

7 I tuā i inā, e mautinoa sa manaʻo Satani e taofia tagata Isaraelu mai le mauaina o lo latou tofi na folafolaina mai. Ina ua ia lē taulau i le faaaogāina o le perofeta o Palaamo e fetuu ai i latou, ona faaaogā lea e Satani o se togafiti iloagatā; sa ia taumafai e faapogaia i latou ia latou lē maua le faamaoniga a Ieova. Sa ia faaaogā fafine faatosina o Moapi e faatosina ese ai i latou, ma na taulau le Tiapolo i le taimi lea. Na amata ona faitaaga tagata o le nuu ma fafine o Moapi, ma ifo atu iā Paalapeoro! E ui lava na latalata atu i lo latou tofi tautele, le Nuu Folafolaina, peitaʻi e tusa ma le 24,000 tagata Isaraelu na feoti ai. Pagā se mala mataʻutia!—Nu. 25:1-3, 9.

8 I aso nei, ua tatou tulata atu i se nuu folafolaina e sili mamao atu—le faiga fou o mea. Ua toe faaaogā foʻi e Satani feusuaʻiga lē mamā e faaleagaina ai tagata o le Atua. Ua matuā leaga lava tapulaa tau amio o lenei lalolagi, lea ua avea ai le faitaaga o se faiga masani ma ua manatu i le faaipoipo o le isi tane ma le isi tane o se filifiliga a le tagata lava ia. Na faapea mai se tasi tuafafine Kerisiano, “E na o lo matou fale lava ma le Maota mo Sauniga o loo aʻoaʻoina ai e laʻu fanau, e inosia e le Atua le tauatane ma le faia o feusuaʻiga ae leʻi faaipoipo.”

9. O le ā e ono tupu i le taimi ua “matua” ai po o le malaulau o le talavou, ma e mafai faapefea e talavou ona feagai ma lenei tulaga?

9 O talavou e manatuaina Lē na Faia i latou ua latou iloa, o feusuaʻiga faaleulugalii o se meaalofa mai le Atua e fesootaʻi atu i le ola ma le faia o ni fanau. Ua latou iloa la, e tatau ona faia feusuaʻiga e tusa ai o taʻiala a le Atua—e patino lava i ulugalii ua uma ona faaipoipo. (Epe. 13:4) Peitaʻi, e lē faigofie i se tasi ona tauivi e tausia lona tulaga mamā i le taimi ua “matua” ai po o le malaulau o le talavou—le taimi e malolosi ai faalogona tau i feusuaʻiga, ma e mafai ona faatauasoina ai le mafaufau o se tasi. (1 Kori. 7:36)  O le ā e te faia pe a oso aʻe ni manatu lē talafeagai i lou mafaufau? Ia tatalo faatauanau mo le fesoasoani a Ieova ina ia e taulaʻi i mea mamā. E faafofoga mai Ieova i taimi uma i ē ōle atu iā te ia. (Faitau le Luka 11:9-13.) E mafai foʻi ona fesoasoani le faia o ni talanoaga i mea e atiaʻe ai, ina ia toe faasaʻo ai le mafaufau.

Ia Filifiili ma le Atamai Ou Sini!

10. O le ā le manatu lē talafeagai e ao ona tatou ʻalofia, ma o ā fesili e tatou te fesili ifo ai iā i tatou lava?

10 O se tasi māfuaaga ua toʻatele ai talavou o le lalolagi ua lē pulea a latou amio ma ua ola mo tuʻinanauga leaga o le tino, ona o le leai o so latou “faaaliga”—pe e lē o iai se taʻitaʻiga a le Atua po o se faamoemoe mautinoa i le lumanaʻi. (Faata. 29:18) Ua pei i latou o tagata Isaraelu na fulitua i le taʻitaʻiga a le Atua i aso o Isaia, na pau lava la latou mea na fai, o le ola ‘⁠fiafia ma olioli, o loo aai tufaaga ma inu uaina.’ (Isa. 22:13) Nai lo o le matauʻa i na tagata, ia mafaufau i le faamoemoe matagofie ua saunia e Ieova mo tagata e faamaoni atu iā te ia. Pe afai o oe o se auauna talavou a le Atua, po o e tulimataʻi atu ma le naunautaʻi i le lalolagi fou? Po o e taumafai malosi e “ola ma le mafaufau lelei . . . a o [e] faatalitali i le faamoemoe fiafia,” lea ua tuu mai e Ieova mo oe? (Tito 2:12, 13) E mafai ona iai se aafiaga o lau tali i sini ma mea e te faamuamuaina i lou olaga.

11. Aiseā e ao ai i talavou Kerisiano o loo aʻoʻoga ona suʻesuʻe ma le filigā?

11 E uunaʻia e le lalolagi talavou ia faamuamua i o latou olaga sini faalelalolagi. O se tulaga talafeagai mo outou o loo aʻoaʻoga pea ona galulue malosi ina ia lelei aʻoaʻoga faavae. Aua neʻi galo, e lē gata e te manaʻo ia maua se galuega talafeagai, ae ia avea foʻi ma sē e mafai ona faaaogā, ma ia faalaeiau atu i le faapotopotoga, ma o se tagata talaʻi foʻi o le Malo e fua mai. Ina ia ausia lenā sini, e manaʻomia ona lelei ma manino lau fesootaʻi atu i isi, ia lelei lou mafaufau, ma ia feutagaʻi ma isi i se auala filemu ma faaaloalo. Ae ui i lea, o talavou o loo suʻesuʻeina le Tusi Paia ma taumafai malosi e faatatau ana mataupu silisili i o latou olaga, e latou te maua aʻoaʻoga sili ona lelei, ma atiaʻe ai se faavae lelei mo se lumanaʻi e taulau manuia ma tumau e faavavau.—Faitau le Salamo 1:1-3. *

12. O le ā le faaaʻoaʻoga e lelei mo aiga Kerisiano ona faaaʻoaʻo i ai?

12 I Isaraelu, sa tāua tele mo mātua ona aʻoaʻo a latou fanau. Sa aʻoaʻo e mātua a latou fanau toetoe lava o vala uma o le olaga, aemaise lava i mea faaleagaga. (Teu. 6:6, 7) O lona uiga, sa maua e talavou o Isaraelu o ē na faalogo i o latou mātua ma tagata matutua e matataʻu i le Atua, e lē gata o le poto ae atoa foʻi ma le atamai, o le malamalama, ma le tomai e mafaufau ai—o uiga e lē faigofie ona maua seʻi vaganā ua aʻoaʻo e faatatau i le Atua ma ana faatonuga. (Faata. 1:2-4; 2:1-5, 11-15) E ao foʻi i aiga Kerisiano i aso nei ona uaʻi atu faapena i aʻoaʻoga.

Ia Faalogo i Ē Alolofa iā te Outou

13. O ā fautuaga ua maua e nisi talavou, ma aiseā e ao ai ona latou faaeteete i ia tulaga?

13 E maua e talavou fautuaga mai tagata eseese—e aofia ai tagata faufautua i aʻoga, o ē e pau le mea latou te fautuaina ai tamaiti, o le saʻili lea o se tulaga manuia o lenei lalolagi. Faamolemole, ia tatalo mo le taʻitaʻiga a le Atua a o e iloiloina nā ituaiga fautuaga, faatasi ai ma le fesoasoani a le Afioga a le Atua ma lomiga faale-Tusi Paia ua saunia e le vasega o le pologa faamaoni ma le faautauta. Mai i lou suʻesuʻeina o le Tusi Paia, ua e iloa ai o loo taulaʻi atu osofaʻiga a Satani i ē laiti ma lē lava le poto masani. O se faaaʻoaʻoga, i le faatoʻaga i Etena, na lolo atu ai Eva e leai se  poto masani iā Satani, o se tasi e lē masani ai ma e aunoa ma se alofa mo ia. E mautinoa e ese le tulaga na semanū e iʻu i ai pe ana faalogo Eva iā Ieova, o lē na faaalia le alofa mo ia i le tele o auala!—Kene. 3:1-6.

14. Aiseā e ao ai ona tatou faalogo iā Ieova ma mātua talitonu?

14 E alofa foʻi Lē na Faia oe iā te oe, ma ua ia faia faapea i se auala e sili ona mamā. E finagalo o ia ia e fiafia e lē mo na o le taimi nei, ae ia fiafia e faavavau! O le mea lea, i le faaalia o le alofa faapelepele e pei o se matua e manatu mamafa moni, ua ia fetalai mai ai iā te oe ma i latou uma o ē tapuaʻi iā te ia: “O le ala lava lenei, ia outou savavali ai.” (Isa. 30:21) Pe afai o ou mātua o ni tagata e alolofa moni iā Ieova, o loo e maua la se isi faamanuiaga faaopoopo. Ia usitai ma faalogo lelei i a la fautuaga pe a faataatitia sini ma mea e faamuamua i le olaga. (Faata. 1:8, 9) Auā foʻi, e la te mananaʻo ia e maua le ola, o se mea e sili mamao atu ona tāua nai lo o ʻoa po o tulaga taualoa o lenei lalolagi.—Mata. 16:26.

15, 16. (a) O le ā ua tatou mautinoa e faatatau iā Ieova? (e) O le ā le lesona tāua tatou te aʻoaʻoina mai le mea na tupu iā Paruka?

15 O i latou e manatua Lē na Faia i latou, e taumafai e faafaigofie o latou olaga, ona latou te mautinoa o le a “lē tuua” i latou e Ieova, ma na te “lē tuulafoaʻia lava” i latou. (Faitau le Eperu 13:5.) Talu ai ona e feteenaʻi lenei uiga lelei ma mafaufauga o le lalolagi, e ao la ona tatou faaeteete ia lē taaʻina i tatou e le agaga o le lalolagi. (Efe. 2:2) E tusa ai o lenei tulaga, ia manatu i le faaaʻoaʻoga a Paruka, le failautusi a Ieremia, o lē sa ola i taimi faigatā o aso faaiʻuiʻu o Ierusalema e oo atu i le faaumatiaga o le aai i le 607 T.L.M.

16 Atonu sa manaʻo Paruka ia maua se olaga sologa lelei ma tamaoaiga. Sa silafia mai e Ieova lenei tulaga ma ia lapataʻia ma le agalelei Paruka ina ia aua neʻi saʻilia “mea tetele” mo ia lava. E faamaonia na lotomaulalo ma atamai Paruka, auā na usitai iā Ieova ma sao ai mai le faaumatiaga o Ierusalema. (Iere. 45:2-5) Ae i le isi itu, sa mananaʻo tagata na ola faatasi ma Paruka i “mea tetele” faaletino, e ala i le faatulaga lua o la latou tapuaʻiga iā Ieova, ma e leʻi umi ae faoa uma na mea e tagata Kaletaia (tagata Papelonia). E toʻatele foʻi i latou na maliliu. (2 No. 36:15-18) Ua fesoasoani iā i tatou le mea na tupu iā Paruka e iloa ai, e sili mamao atu ona tāua se faiā ma Ieova nai lo o ʻoa ma tulaga taualoa o lenei lalolagi.

Faaaʻoaʻo i Ē ua Fai ma Faaaʻoaʻoga Lelei

17. Aiseā ua avea ai Iesu, Paulo, ma Timoteo o ni faaaʻoaʻoga lelei mo auauna a Ieova i aso nei?

17 Ua fesoasoani mai le Afioga a le Atua iā i tatou ina ia savavali i le ala i le ola, e ala i le taʻua o le tele o faaaʻoaʻoga lelei. O se faaaʻoaʻoga, o Iesu, o ia o le tagata e sili ona atamai i ē uma na soifua mai, ae sa ia faaaogā lona malosi e faalauiloa ai le “tala lelei o le malo,” lea o le a fesoasoani i tagata e faavavau. (Luka 4:43) Ina ia mafai ona avatu iā Ieova le mea sili na te mafaia, sa tuua e le aposetolo o Paulo se galuega e lelei le totogi ae faaaogā lona taimi ma lona malosi e folafola ai le tala lelei. Sa faaaʻoaʻo Timoteo, “o  le atalii moni i le faatuatua,” i le faaaʻoaʻoga lelei a Paulo. (1 Timo. 1:2) Pe sa salamō Iesu, Paulo, ma Timoteo i na ituaiga olaga sa latou ola ai? E mautinoa lava e leai! O le mea moni, sa taʻua e Paulo o lona manatu i mea o i le lalolagi o “otaota,” pe a faatusatusa atu i le faaeaga o le auauna i le Atua.—Fili. 3:8-11.

18. O ā suiga tetele na faia e se tasi o uso talavou, ma aiseā e leʻi faanoanoa ai o ia?

18 E toʻatele talavou Kerisiano ua faaaʻoaʻo i le faatuatua o Iesu, Paulo, ma Timoteo. O se faaaʻoaʻoga, na tusi mai se tasi uso talavou sa iai sana galuega e lelei le totogi: “Ona o loʻu ola e tusa ai ma taʻiala o le Tusi Paia, e leʻi umi lava ae siitia loʻu tulaga i le galuega. E ui lava sa aogā i le tulaga tau tupe, ae na ou lagona o na mea o le ʻai o le matagi. Ina ua ou talanoa atu i le pule o le kamupani ma taʻu i ai loʻu faanaunauga e auai i le auaunaga faataimi atoa, sa vave lava ona latou ofo mai o le a siitia loʻu totogi, ma le manatu ia ou nofo ai. Peitaʻi sa fai lava le mea na ou manaʻo e fai. E toʻatele tagata e leʻi malamalama pe aiseā na ou tuua ai se galuega lelei ina ia auai i le auaunaga faataimi atoa. O laʻu tali, ona na ou manaʻo ina ia ou ola e tusa ai ma loʻu tuuina atu i le Atua. Talu ai ona o lea ua taulaʻi atu loʻu olaga i mea faaleagaga, ua sili atu nei la ona ou fiafia ma maua le faamalieina, lea e lē mafai e le tele o tupe ma tulaga taualoa ona aumai iā te aʻu.”

19. O le ā le filifiliga atamai ua faalaeiauina talavou e fai?

19 E faitau afe talavou i le lalolagi aoao ua faia foʻi ni filifiliga atamai faapea. O lea la, talavou e, ia manatua pea le aso o Ieova a o e mafaufau i lou lumanaʻi. (2 Pete. 3:11, 12) Aua neʻi matauʻa iā i latou o ē o loo ola i se olaga manuia mai lenei lalolagi. Nai lo o lea, ia faalogo atu iā i latou e alolofa moni iā te outou. O le faaputuina o “ʻoa i le lagi,” o le lumanaʻi sili lenā ona tumau e te faia, ma e na o le pau lea o le mea e te maua ai aogā tumau. (Mata. 6:19, 20; faitau le 1 Ioane 2:15-17.) Ioe, ia e manatua Lē na Faia oe. A o e faia faapea, o le a tauia oe e Ieova.

[Faaopoopoga i lalo]

^ pala. 11 E tusa ai ma aʻoaʻoga e maualuluga atu ma galuega, tagaʻi i Le Olomatamata, Oketopa 1, 2005, itulau e 26-31.

Pe E te Manatua?

• E faapefea ona faaalia lo tatou faatuatua i le Atua?

• O le ā le aʻoaʻoga sili ona lelei?

• O ā ni lesona tatou te aʻoaʻoina mai iā Paruka?

• O ai nisi ua fai ma faaaʻoaʻoga lelei, ma aiseā?

[Fesili mo le Suʻesuʻega]

[Ata i le itulau 13]

Ua saunia e Ieova aʻoaʻoga e sili ona aogā

[Ata i le itulau 15]

Sa usitai Paruka iā Ieova ma faasaoina ai i le faaumatiaga o Ierusalema. O le ā e te aʻoaʻoina mai lenei faaaʻoaʻoga?