Skip to content

Skip to table of contents

A‘oa‘oina se Lesona Mai Mea Sesē na Faia e Isaraelu

A‘oa‘oina se Lesona Mai Mea Sesē na Faia e Isaraelu

 Aʻoaʻoina se Lesona Mai Mea Sesē na Faia e Isaraelu

A O LEʻI ulu atu i le Nuu o le Folafolaga, na iloa lelei e Isaraelu le mea na manaʻo Ieova e latou te faia. Na fetalai atu le Atua e ala iā Mose e faapea: “Ona outou tulia ai lea o ē o nonofo i le nuu uma lava ai o outou luma, ia outou faaumatia a latou faatagata uma lava, ia faaumatia foʻi e outou a latou tupua uʻamea lava; o a latou mea maualuluga uma lava tou te matuā faaumatia.”—Nu. 33:52.

E lē tatau iā Isaraelu ona faia ni feagaiga ma tagata o nuu ese, ma e lē tatau foʻi ona latou faaipoipo atu iā i latou. (Teu. 7:2, 3) Ioe, sa lapataʻia e le Atua lona nuu ua filifilia: “Ia oe, neʻi e osi le feagaiga ma ē o nonofo i le nuu o le a e alu atu i ai, neʻi avea ai ma mailei iā te oe.”(Eso. 34:12) Ae peitaʻi, na lē faalogo Isaraelu i le Atua, ma na maileia ai i latou. Aiseā na latou lē usiusitai ai? O le ā se lesona e tatou te aʻoaʻoina mai le mea na tupu iā i latou?—1 Kori. 10:11.

O le Auaumea Faatasi e Iʻu i le Ifo i Tupua

Na faatoʻilalo e Isaraelu tagata o nuu ese ina ua latou ulu atu i le Nuu o le Folafolaga. Ae e leʻi usiusitai atoatoa le fanauga a Isaraelu i poloaʻiga a le Atua. E leʻi mafai ona latou faaumatia o latou fili uma. (Faama. 1:1–2:10) Ae nai lo le usitai i le mea na fetalai mai ai Ieova, sa auaumea faatasi tagata Isaraelu ma “nuu e fitu” sa siʻomiaina i latou, ma na māfua ai ona latou faauō i na tagata ona o le faatasitasi pea ma i latou. (Teu. 7:1) Na faapefea ona aafia Isaraelu i lenā tulaga? O loo taʻua i le Tusi Paia e faapea: “Ona latou fai avā lea i o latou afafine; ua latou avatu foʻi o latou afafine i o latou atalii, ma latou auauna atu i o latou atua. Ua amio leaga le fanauga a Isaraelu i luma o Ieova; ua latou faagalogalo foʻi iā Ieova lo latou Atua, a ua latou auauna atu iā Paala ma Asaira.” (Faama. 3:5-7) O le faatasitasi o tagata Isaraelu ma tagata o nuu ese, na iʻu ai ina latou faaipoipo atu iā i latou ma ifo i a latou tupua. Na amata ona manatu māmā Isaraelu i amioga faapaupau a na tagata ona ua latou faaipoipo atu iā i latou. Sa faaleagaina ai le tapuaʻiga moni, ma na latou tapuaʻi ai i atua sesē.

 Sa avea nuu ese ma lamatiaga sili i le itu faaleagaga o Isaraelu ona ua latou faauō iā i latou. Seʻi mātau le isi auala atonu na faaleagaina ai e lotu le tele o tagata.

Mai le Faifaatoʻaga i le Tapuaʻiga iā Paala

Ina ua ulu atu le fanauga a Isaraelu i le Nuu o le Folafolaga, na lē toe nonofo solo ae ua avea le toʻatele o i latou ma faifaatoʻaga. E taitutusa lava le auala na latou faaaogā e fai ai o latou faatoʻaga, ma le auala na faaaogā e tagata Kanana o ē sa nonofo muamua i le nuu. E foliga mai, na faataʻitaʻi pea Isaraelu i le auala na faaaogā e tagata Kanana e fai ai o latou faatoʻaga. Ae na avea foʻi lo latou faatasitasi ma tagata o le nuu, ma ala na faasesēina ai Isaraelu e taliaina a latou talitonuga e fesootaʻi atu i mea tau faatoʻaga.

E tele Paala na tapuaʻi i ai tagata o nuu ese, ona e latou te talitonu e faaleleia e na atua le eleele. E lē gata i le galueaʻiina o le fanua ma le seleseleina o fua o le faatoʻaga, na faatasi atu foʻi Isaraelu i le tapuaʻia o atua o tagata Kanana lea e foliga mai e aumaia ai mea e tele. E foliga mai na tapuaʻi le toʻatele o Isaraelu iā Ieova, ae o le mea moni, sa avea i latou ma tagata ua liliuese mai le tapuaʻiga moni.

O se Lapataʻiga Malosi i Aso Nei

Ina ua faatoʻā feiloaʻi tagata Isaraelu ma tagata o le Nuu o le Folafolaga, ailoga na iai so latou manatu e aafia i tapuaʻiga iā Paala, ma ana faiga matagā. Ae o lo latou faatasitasi pea ma na tagata, na māfua ai ona latou tapuaʻi iā Paala. Pe lē o le iʻuga foʻi lenā e oo i ai pe a tatou faatasitasi pea ma tagata e foliga mai e faaleuō ae e lē tapuaʻi i le Atua, e lē mulimuli i ana taʻiala, ma e lē lelei foʻi a latou amio? E moni e mafai ona tatou faatasi ma tagata lē talitonu i galuega, i aʻoga, ma atonu foʻi i aiga. Peitaʻi, ua tatou aʻoaʻoina mai i le mea na tupu iā Isaraelu e faapea o le faaauau pea ona faatasitasi ma i latou, o le a aumaia ai le tele o faafitauli. O loo taʻua i le Tusi Paia le mea moni e faapea: “O aumea leaga e faaleagaina ai mea lelei ua masani ai tagata.”—1 Kori. 15:33.

O loo tatou fesagaʻia le tele o tofotofoga e pei foʻi ona fesagaʻi ma tagata Isaraelu. Ua tele mea ua fai ma tupua o tagata i aso nei. E aofia ai tupe, o tagata lauiloa i mea faafiafia ma taaloga, o faiga faapolotiki, o taʻitaʻi faapitoa o lotu, e oo lava i totonu o aiga. E mafai lava ona tatou faamuamua na mea i o tatou olaga. O le atiina aʻe o ni faigāuō māfana ma ē e lē alolofa iā Ieova, e ono faavaivaia ai tatou i le itu faaleagaga.

O feusuaʻiga e lē mamā, o se vaega autū lea o le tapuaʻiga iā Paala lea na faasesēina ma faatosinaina ai le tele o tagata Isaraelu. O loo faaauau pea ona maileia tagata o le Atua i na faiga. O se faataʻitaʻiga, e faigofie lava ona ki le TV e te matamata ai. Ae pe afai e oso mai se ata e iai faiga lē mamā, ma o loo tatou matamata pea ae lē tapē le TV, e mafai ona faaleagaina ai o tatou lotofuatiaifo. O lea o se tulaga faanoanoa pe a maileia se Kerisiano e lē gata i lenā mea, ae o ata ma faiga matagā foʻi o loo faaalia i le Initaneti.

“Amuia i Latou o Ē Tausi i Ana Tulafono”

O le filifiliga e usitai pe e lē usitai foʻi iā Ieova e tusa o a tatou aumea, o la tatou lava filifiliga lenā. (Teu. 30:19, 20) Ae e ao ona tatou fesili ifo iā i tatou lava: ‘O ai o loo tatou aumea i ai i taimi o evaevaga? Pe e latou te faatāuaina taʻiala ma tapulaa o amioga tatau a Ieova? Pe e latou te tapuaʻi iā Ieova? Po o faalaeiauina aʻu ina ia avea ma Kerisiano lelei a o oʻu auaumea ma i latou?

Na pese le faisalamo: “Amuia ē ua sao lo latou ala, o ē savavali i le tulafono a Ieova. Amuia i latou o ē tausi i ana tulafono, o ē saʻiliʻili iā te ia ma le loto atoa.” (Sala. 119:1, 2) Ioe, “amuia i latou uma o ē matataʻu iā Ieova, o ē savavali i ona ala.” (Sala. 128:1) Pe a filifili po o ai e tatou te auaumea i ai, ia tatou aʻoaʻoina se lesona mai mea sesē na faia e Isaraelu, ma ia tatou usiusitai atoatoa iā Ieova.—Faata. 13:20.

[Ata i le itulau 26]

E mafai e le faatasitasi ma ē e lē alolofa iā Ieova, ona faasesēina i tatou i le ifo i tupua