Alu i mataupu o loo iai

Alu i le lisi o mataupu

O Ieova o lo Tatou Fesoasoani

O Ieova o lo Tatou Fesoasoani

O Ieova o lo Tatou Fesoasoani

‘O loʻu fesoasoani e mai iā Ieova lea, o lē na faia le lagi atoa ma le lalolagi.’—SALAMO 121:2.

1, 2. (a) Aiseā tatou te manaʻomia uma lava ai le fesoasoani i nisi taimi? (e) O le ā le ituaiga o Fesoasoani e iai Ieova?

O AI o i tatou e lē taitai ona manaʻomia se fesoasoani? O le mea moni, tatou te manaʻomia uma lava le fesoasoani e faafoe ai se faafitauli tugā, e onosaia ai le tigā ona o sē ua maliu, ma tumau ai i tofotofoga faigatā. E masani ona tāpā e se tasi se fesoasoani mai i se uō alofa. O le faamatala atu o lou faafitauli i se uō atonu o le a māmā ai. Ae peitaʻi, e tapulaa le fesoasoani e mafai ona fai e le tagata. E lē gata i lea, e ono lē mafai ona fesoasoani atu nisi iā te oe pe a e manaʻomia.

2 Ae peitaʻi, ua iai se Fesoasoani e lē gata mai lona malosi ma e ona mea uma lava. E lē gata i lea, ua ia faamautinoa mai o le a ia lē tuulafoaʻiina i tatou. O Ia lea na faailoa mai ma le mautinoa e le faisalamo: ‘O loʻu fesoasoani e mai iā Ieova lea.’ (Salamo 121:2) Aiseā na mautinoa ai e lenei faisalamo o le a fesoasoani Ieova iā te ia? Ina ia taliina lenā fesili, seʻi o tatou iloiloina le Salamo 121. O le faia faapea o le a mafai ai foʻi ona tatou saʻili ma le mautinoa iā Ieova o lo tatou Fesoasoani.

Le Puna e Lē Gata Mai o le Fesoasoani

3. O fea mauga ia atonu na faasaga aʻe i ai mata o le faisalamo, ma aiseā?

3 Na amata le faamatalaga a le faisalamo i lona faasino atu i le foafoaga a Ieova e fai ma faavae o lo tatou mautinoa: “E faasaga aʻe oʻu mata i mauga, e oo mai ai loʻu fesoasoani. O loʻu fesoasoani mai iā Ieova lea, o lē na faia le lagi atoa ma le lalolagi.” (Salamo 121:1, 2) E leʻi faasaga aʻe mata o le faisalamo i so o se mauga. Ina ua faamauina nei upu, sa iai le malumalu o Ieova i Ierusalema. Sa tū lenā aai i mauga maualuluga o Iuta, sa faaatagia ai le afioaga o Ieova. (Salamo 135:21) E lē taumatea na faasaga aʻe mata o le faisalamo i mauga o Ierusalema i le mea na fausia ai le malumalu o Ieova, ma saʻili atu ma le mautinoa iā Ieova mo se fesoasoani. Aiseā na mautinoa ai e le faisalamo e mafai ona fesoasoani Ieova iā te ia? Talu ai o Ia o lē na “faia le lagi atoa ma le lalolagi.” E pei ona faapea mai le faisalamo, ‘E mautinoa e leai se mea e mafai ona taofia Lē na Foafoaina Mea mai le fesoasoani iā te aʻu!’—Isaia 40:26.

4. Na faaalia faapefea e le faisalamo le amanaʻia e Ieova o manaʻoga o ona tagata, ma aiseā e faamāfanafanaloto ai lea manatu?

4 Na faamatalaina atili e le faisalamo le amanaʻia e Ieova o manaʻoga o ana auauna: “E lē tuuina mai e ia ia mapeva lou vae; o lou leoleo e lē tulemoe lava ia. Faauta, o lē leoleo iā Isaraelu, e lē tulemoe ia, e lē moe lava.” (Salamo 121:3, 4) E lē faatagaina e Ieova ē faatuatua iā te ia ina ia “mapeva” o latou vae pe paʻūʻū i se tulaga e lē mafai ona toe faaleleia ai. (Faataoto 24:16) Aiseā? Talu ai e pei Ieova o se leoleo mamoe mataala o loo puipuia ana mamoe. O se matuā faamāfanafanaloto lenā manatu. O le a lē taofia lona uaʻi mai i manaʻoga o ona tagata e tusa lava pe mo se taimi puupuu. E silasila mai pea o ia i le ao ma le pō iā i latou.

5. Aiseā ua faapea ai o Ieova o loo i le “itu taumatau”?

5 Na tusi le faisalamo i le mautinoa e leoleoina ma le faamaoni e Ieova ona tagata: “O Ieova, o lou leoleo ia; o Ieova, o lou paolo lea i lou itu taumatau. E lē taia oe e le lā i le ao, po o le masina i le pō.” (Salamo 121:5, 6) O le paolo o le a avatu ai i se tagata faimalaga e savali i Sasaʻe Tutotonu, le puipuiga mai le aasa o le lā. Ua pei Ieova o se paolo i ona tagata, e puipuia i latou mai mafatiaga ogaoga. Mātau, o Ieova o loo i lou “itu taumatau.” I taua i aso anamua, o le itu taumatau sa o se vaega e leʻi puipuia atoa e le talita, lea sa uu i le itu tauagavale. E ono saunia e se uō faamaoni se puipuiga e ala i le tū ma tau i le itu taumatau o le fitafita. Ua pei lenā uō o le tū faamaoni o Ieova i autafa o ona tagata tapuaʻi, ma sauni e fesoasoani iā i latou.

6, 7. (a) Ua faapefea ona faamautinoa mai e le faisalamo iā i tatou e lē taofia e Ieova le fesoasoani i ona tagata? (e) Aiseā e mafai ai ona tatou mautinoa e pei o le faisalamo?

6 Po o le a taofia ea e Ieova le fesoasoani i ona tagata? E lē taitai. Na faaiʻu mai le faisalamo: “E leoleo e Ieova iā te oe i mea leaga uma lava; e leoleo mai o ia i lou agaga. E leoleo Ieova i lou ulufafo ma lou ulufale, e amata mai nei lava, a e oo i le faavavau.” (Salamo 121:7, 8) Ina ua fai mai le faisalamo: “E leoleo e Ieova iā te oe,” ua faamautinoa ai i tagata tapuaʻi faamaoni e lē gata e fesoasoani Ieova iā i latou i le taimi nei ae faapena foʻi i le lumanaʻi. Po o fea lava latou te ō i ai, po o ā lava faigatā latou te fesagaʻi, e fesoasoani pea o ia iā i latou.—Faataoto 12:21.

7 Na mautinoa e le tusitala o le Salamo 121 o loo silasila mai ma le agalelei Lē na Foafoaina Mea o se leoleo alofa ma mataala e leoleoina ana auauna. Ua mafai ai foʻi ona tatou mautinoa e pei o le faisalamo, e lē liliu Ieova. (Malaki 3:6) Po o le uiga o lenei mea, o le a tatou maua le puipuiga faaletino i taimi uma? E leai, peitaʻi, pe a tatou saʻili atu iā te ia o lo tatou Fesoasoani, o le a ia leoleoina i tatou i mea uma lava e ono aumaia ai se lamatiaga faaleagaga. O le fesili la, ‘E faapefea ona fesoasoani Ieova iā i tatou?’ Seʻi o tatou iloiloina ni auala se fā e fesoasoani mai ai o ia. I lenei mataupu, o le a talanoaina ai le auala na ia fesoasoani ai i auauna i taimi o le Tusi Paia. I le isi mataupu e sosoo ai, o le a talanoaina ai le auala ua ia fesoasoani ai i ona tagata i aso nei.

Fesoasoani Mai i Agelu

8. Aiseā ua naunau ai agelu mo le lelei o auauna a le Atua i le lalolagi?

8 E avatu e Ieova ana faatonuga i le faitau miliona o agelu. (Tanielu 7:9, 10) E faataunuuina ma le faamaoni e nei atalii agaga lona finagalo. (Salamo 103:20) Latou te iloa lelei e matuā alofa Ieova i ona tagata tapuaʻi ma e finagalo o ia e fesoasoani iā i latou. E lētioa la, ona naunau agelu mo le lelei o auauna a le Atua i le lalolagi. (Luka 15:10) E mautinoa la, e olioli agelu ona o le faaaogāina o i latou e Ieova e fesoasoani i tagata. O ā auala na faaaogā ai e Ieova agelu e fesoasoani i ana auauna i aso anamua?

9. Ia aumai se faataʻitaʻiga i le auala ua faamalosia ai e le Atua agelu ina ia puipuia tagata faamaoni.

9 Na avatu e le Atua i agelu le malosi e puipuia ma faasaoina ai tagata faamaoni. E toʻalua agelu na fesoasoani iā Lota ma ona afafine ina ia sosola ese i le faaumatiaga o Sotoma ma Komoro. (Kenese 19:1, 15-17) Na fasi e se agelu ʻautau a Asuria e 185,000, o ē na nofo sauni e tau faasaga iā Ierusalema. (2 Tupu 19:35) Ina ua lafo Tanielu i se lua o leona, na auina atu e Ieova “lana agelu, ua punitia ai gutu o leona.” (Tanielu 6:21, 22) Na faasaʻolotoina e se agelu Peteru mai le falepuipui. (Galuega 12:6-11) Ua taʻua i le Tusi Paia le tele o isi faaaʻoaʻoga o le puipuiga a agelu, lea ua faamautinoa mai e le Salamo 34:7: “E to lauapi le agelu a Ieova e siʻosiʻomia ai ē o matataʻu iā te ia, e laveaʻi foʻi o ia iā te i latou.”

10. Na faapefea ona faaaogā e Ieova se agelu e faalaeiau iā Tanielu?

10 I nisi taimi, e faaaogā ai e Ieova agelu e faalaeiau ma faamalosiau i tagata faamaoni. O se faaaʻoaʻoga e faagaeetia ai o loo maua i le Tanielu mataupu e 10. I le taimi lenā, ua toeitiiti atoa le 100 tausaga o Tanielu. Na matuā lotovaivai le perofeta, atonu ona o le tulaga gaogao o Ierusalema ma le tuai ona toe fausia o le malumalu. Na popole foʻi ina ua ia vaaia se vaaiga e mataʻu ai. (Tanielu 10:2, 3, 8) Na auina mai ma le alofa e Ieova le agelu e faalaeiau iā te ia. E faalua ona faamanatu e le agelu iā Tanielu “ua alofateleina” o ia e le Atua. O le ā le iʻuga? Na faapea atu le perofeta matua i le agelu: “Ua e faamalosi mai iā te aʻu.”—Tanielu 10:11, 19.

11. O le ā se tasi o faaaʻoaʻoga i le auala na faaaogā ai agelu e faatonutonuina le talaʻiga o le tala lelei?

11 Na faaaogā foʻi e Ieova agelu e faatonutonuina le talaʻiga o le tala lelei. Na faatonuina e se agelu Filipo e talaʻi i se eunuka Aitiope e uiga i le Keriso, lea na iʻu ina papatisoina. (Galuega 8:26, 27, 36, 38) Mulimuli ane, na finagalo le Atua ia talaʻia le tala lelei i tagata o Nuu Ese lē peritomeina. E ala i se vaaiga na faaali ai se agelu iā Konelio, o se tagata o Nuu Ese e mataʻu i le Atua, ma faatonuina o ia e aami le aposetolo o Peteru. Ina ua maua e le ʻau avefeʻau Peteru, na latou faapea atu: “O Konelio . . . na poloaʻiina o ia mai le Atua e le agelu paia e aami iā te oe, e te alu i lona fale, ia faalogo o ia i upu ua iā te oe.” Na alu Peteru iā Konelio ma o ia o le uluaʻi tagata o Nuu Ese lē peritomeina na avea ma se tasi o le faapotopotoga Kerisiano. (Galuega 10:22, 44-48) Seʻi manatu i sou lagona e iai pe a fesoasoani se agelu iā te oe e fesootaʻi atu i se tasi e lotofaamaoni!

Fesoasoani e Ala i le Agaga Paia

12, 13. (a) Aiseā na talitonu ai aposetolo o Iesu e mafai ona fesoasoani le agaga paia iā i latou? (e) Na faapefea ona faamalosia e le agaga paia Kerisiano i le uluaʻi senituri?

12 A o lumanaʻi le maliu o Iesu, na ia faamautinoa atu i ona aposetolo o le a latou maua se fesoasoani. O le a auina atu e le Tamā iā i latou le “Fesoasoani, o le Agaga Paia lea.” (Ioane 14:26) Na iai faamaoniga e talitonu ai aposetolo e mafai ona fesoasoani le agaga paia iā i latou. Talu ai, ua tumu le Tusi Paia i faaaʻoaʻoga i le auala na faaaogā ai e Ieova le agaga paia, le mana e silisili ona malosi e fesoasoani ai i ona tagata.

13 I le tele o taimi, na faaaogā ai le agaga paia e faamalosia ai tagata ia faia le finagalo o Ieova. Na faamalosia e le agaga paia Faamasino e faasaoina Isaraelu. (Faamasino 3:9, 10; 6:34) O le agaga lava lenā na faamalosia Kerisiano i le uluaʻi senituri e faaauau le talaʻiga ma le lototele e ui i teteega. (Galuega 1:8; 4:31) O lo latou taulau manuia i le faataunuuina o la latou faiva ua aumaia ai se faamaoniga malosi o le galue o le agaga paia. Ua manino la, e na o le fesoasoani a le agaga paia na mafai ai ona faalauiloa atu le feʻau o le Malo e i latou e “leʻi aʻoaʻoina” i le lalolagi atoa.—Galuega 4:13; Kolose 1:23.

14. Ua faaaogā faapefea e le Atua lona agaga paia e faamalamalama ai ona tagata?

14 Na faaaogā foʻi e Ieova lona agaga paia e faamalamalama ai ona tagata. Na mafai e Iosefa ona faamatala le faalepō faavaloaga a Farao ona o le fesoasoani a le agaga o le Atua. (Kenese 41:16, 38, 39) Na faaaogā e Ieova lona agaga paia e faaalia ai ana fuafuaga i ē lotomaulalo ae natia mai i ē faamaualuluga. (Mataio 11:25) Na faapea mai Paulo e tusa ma mea ua avatu e Ieova i ē ‘e alolofa iā te ia’: “A ua faaalia mai ia mea e le Atua iā te i matou e lona Agaga.” (1 Korinito 2:7-10) E na o le fesoasoani lava a le agaga paia e mafai ai e se tasi ona malamalama moni i le finagalo o le Atua.

Fesoasoani Mai le Afioga a le Atua

15, 16. O le ā na faatonuina Iosua e fai ina ia gaoioi ai ma le atamai?

15 O le Afioga a le Atua “e aogā foʻi ia e aʻoaʻo ai,” ma e mafai ai e auauna a le Atua ona ‘atoatoa ona lelei ai, ia saunia lava ia i galuega lelei uma lava.’ (2 Timoteo 3:16, 17) E tele faaaʻoaʻoga ua i le Tusi Paia i le auala na maua ai e tagata o le Atua i aso anamua le fesoasoani mai i vaega o lana Afioga na iai i lea taimi.

16 Ua fesoasoani le Tusi Paia e saunia taʻiala aogā mo tagata tapuaʻi o le Atua. Ina ua tuuina atu iā Iosua le matafaioi o le taʻitaʻiina o Isaraelu, na faatonuina o ia: “E lē teʻa i lou gutu le tusi o lenei tulafono [lea na tusia e Mose], a ia mafaufau i ai i le ao atoa ma le pō, ina ia e anaana e fai e tusa ma mea uma ua tusia i ai; ona manuia ai lea iā te oe o lou ala, ona e manuia ai lea.” Mātau e leʻi folafola e le Atua iā Iosua o le a ia maua le atamai e aunoa ma ni taumafaiga. Na i lo lea, pe afai e faitau Iosua ma manatunatu loloto i le ‘tusi o le tulafono,’ ona ia gaoioi lea i se auala atamai ma manuia ai.—Iosua 1:8; Salamo 1:1-3.

17. Na faapefea ona fesoasoani vaega o le Tusi Paia sa iai i lea taimi iā Tanielu ma le tupu o Iosia?

17 Ua fesoasoani foʻi le Afioga tusia a le Atua e faaalia lona finagalo ma lana fuafuaga. O se faaaʻoaʻoga, na iloa e Tanielu mai tusitusiga a Ieremia le umi o le a faagaogaoina ai Ierusalema. (Ieremia 25:11; Tanielu 9:2) Seʻi mātau foʻi le mea na tupu i le nofoaiga a le tupu Iuta o Iosia. E oo ane i le taimi lenā ua liliu ese le nuu mai iā Ieova, ma sa lē faia e tupu se kopi o le Tulafono ma mulimuli ai. (Teuteronome 17:18-20) Ae peitaʻi ina ua toe fausia le malumalu, na maua ai le “tusi o le tulafono” lea na tusia e Mose. Atonu o le uluaʻi kopi lenei na māeʻa ona tusia i le 800 tausaga muamua atu. Ina ua māeʻa ona faitauina, na iloa ai e Iosia le matuā mamao ua liliu ese ai le nuu mai i le finagalo o Ieova, ona maumauaʻi ai lea o le tupu e faia mea na tusia i le tusi. (2 Tupu 22:8; 23:1-7) E mautinoa na maua e tagata o le Atua i aso anamua le fesoasoani mai i vaega o le Tusi Paia na latou maua i na ona pō.

Fesoasoani e Ala i Uso Talitonu

18. Aiseā e faapea atu ai o Ieova na pogai ai pe a fesoasoani le isi tagata tapuaʻi i le tasi?

18 O le fesoasoani e saunia e Ieova e masani ona auala mai i uso talitonu. O le mea moni, o le Atua o le puna o le fesoasoani, pe afai e fesoasoani le isi tagata tapuaʻi i le tasi. Aiseā ua tatou fai atu ai faapea? E lua ni māfuaaga. Muamua, o loo aofia ai le agaga paia o le Atua. E ati aʻe e le agaga fua e aofia ai le alofa ma le agalelei, iā i latou o ē saʻilia na uiga. (Kalatia 5:22, 23) O lea la, pe a fesoasoani le isi auauna a le Atua i le tasi, o le faamaoniga lea o loo galue le agaga o Ieova. O lona lua, na faia i tatou i le faatusa o le Atua. (Kenese 1:26) O lona uiga, e mafai ona tatou faaatagia atu ona uiga, e aofia ai le agalelei ma le alofa. O lea la, pe afai e faaalia atu le alofa o se auauna a Ieova i se tasi, o le Puna moni lava o lenā fesoasoani o lē e ona uiga o loo faaatagia atu.

19. E tusa ai o le faamatalaga a le Tusi Paia, na faapefea ona saunia e Ieova le fesoasoani e ala i uso talitonu?

19 I taimi o le Tusi Paia, na faapefea ona saunia e Ieova le fesoasoani e ala i uso talitonu? E masani ona faapogaia e Ieova se tasi o ana auauna e avatu se fautuaga i se isi, e pei o le taimi lea na avatua ai e Ieremia se fautuaga faasaoola iā Paruka. (Ieremia 45:1-5) I nisi taimi, e uunaʻia ai tagata tapuaʻi moni e saunia se fesoasoani faaletino i uso talitonu, e pei ona naunau Kerisiano i Maketonia ma Akaia e fesoasoani i o latou uso lē tagolima i Ierusalema. Na mātauina e le aposetolo o Paulo, na faatupu i lenā limafoaʻi le “faafetai i le Atua.”—2 Korinito 9:11.

20, 21. O ā tulaga na faamalosia ai Paulo e uso mai Roma?

20 E faapitoa lava ona pāʻia i tatou i tala i le auala na faia ai taumafaiga a auauna a Ieova ina ia faamalosia ma faalaeiau le tasi i le isi. Seʻi manatu i le faaaʻoaʻoga a le aposetolo o Paulo. A o malaga atu o ia o se pagota i Roma, na ui atu Paulo i le ala tele lea na taʻua o le auala o Apio Foro. Sa lē lelei le vaega mulimuli o le faigāmalaga, ona sa ui atu i taufusi, ma nofoaga maualalo. * Na iloa e uso i le faapotopotoga i Roma o loo malaga atu Paulo. O le ā na latou fai? Pe na latou faatalitali ea i o latou fale i le aai seʻia taunuu Paulo ona ō lea e faafeiloaʻi iā te ia?

21 Na taʻua e Luka, o lē na ō ma Paulo le mea na tupu: “Ua logona le tala iā i matou e le ʻau uso o i ai [i Roma], ona latou ō mai lea e faafetaiaʻi mai iā i matou, ua oo mai lava i Apio Foro, ma Fale Faatau e Tolu.” Pe e mafai ona faaata i lou mafaufau lea vaaiga? I le iloaina o loo malaga atu Paulo, na ō atu ai se vaega o le ʻauuso mai Roma e faafeiloaʻi iā te ia. O nisi o i latou na faatalitali i le maketi i Apio Foro, o se nofoaga lauiloa sa masani ona mālōlō ai faigāmalaga, pe tusa ma le 46 maila (74 kilomita) le mamao i tua atu o Roma. O le isi vaega o uso na faatalitali i Fale Faatau e Tolu, pe tusa ma le 36 maila (58 kilomita) i fafo atu o le aai. Na faapefea ona tali atu i ai Paulo? Ua lipoti mai e Luka: “Ua vaai atu Paulo iā te i latou, ona faafetai lea i le Atua, ma loto tele ai.” (Galuega 28:15) Seʻi mafaufau, na o le vaai atu lava i na uso na filigā e malaga atu i na auala o se puna lea o le malosi ma le faamāfanafana iā Paulo! O ai na faafetai i ai Paulo mo lenā lagolagosua? Na ia faafetai i lē na māfua ai, o Ieova le Atua.

22. O le ā la tatou mau o le tausaga o le 2005, ma o le ā o le a iloiloina i le mataupu o sosoo mai?

22 Ua faaalia i feutagaʻiga a le Atua ua faamauina i le Tusi Paia, o ia o le Fesoasoani e lē mafaatusalia. Ua talafeagai la, i Molimau a Ieova ona avea le Salamo 121:2 ma mau o le tausaga o le 2005: ‘O loʻu fesoasoani e mai iā Ieova lea.’ Peitaʻi, e faapefea ona fesoasoani Ieova iā i tatou i aso nei? O le a talanoaina i le isi mataupu o sosoo mai.

[Faamatalaga pito i lalo]

^ pala. 20 Na taʻua e le fatu solo Roma o Horace (65—8 T.L.M.), o lē na faimalaga foʻi i le ala lea, ia vaega lē lelei o lana faigāmalaga. Na ia faamatalaina le maketi o Apio Foro e “tumu i ʻauvaa ma tagata faatau lima vale.” Na ia faitio e faatatau i “le fiu i namu ma rane” ma vai “namu leaga.”

Pe E te Manatua?

O ā auala na saunia ai e Ieova le fesoasoani—

• e ala i agelu?

• e ala i lona agaga paia?

• i lana Afioga?

• e ala i uso talitonu?

[Fesili mo le Suʻesuʻega]

[Faamatalaga faaopoopo i le itulau 15]

O le mau o le tausaga o le 2005: ‘O loʻu fesoasoani e mai iā Ieova lea.’—Salamo 121:2.

[Ata i le itulau 16]

Na faafetai Paulo i le Atua ona o le fesoasoani na ia maua mai uso i Roma