Alu i mataupu o loo iai

Alu i le lisi o mataupu

Le Tauiviga a Casiodoro de Reina mo se Tusi Paia Faa-Sepania

Le Tauiviga a Casiodoro de Reina mo se Tusi Paia Faa-Sepania

Le Tauiviga a Casiodoro de Reina mo se Tusi Paia Faa-Sepania

I LONA sefuluono o senituri, na avea ai Sepania o se nofoaga matautia mo le faitauina o le Tusi Paia. Na faatonuina e le Lotu Katoliko le Inikuisisi (le Faamasinoga Sauā a le Lotu Katoliko i Ē na Tetee) ina ia faatamaʻia so o sina faailoga lava o se aʻoaʻoga e feteenai ma aʻoaʻoga a le lotu. Ae na iai se tamaloa talavou i Sepania i saute o lē sa lē gata ina faitau i le Tusi Paia, ae sa ia tauto foi na te faaliliuina le Tusi Paia i le gagana taatele ina ia mafai ai e so o se tagata e tautala i le gagana Sepania ona faitau i ai. O lona igoa, o Casiodoro de Reina.

Na faaosofia le naunau o Reina i le Tusi Paia i vaitausaga na iai o ia i le monaseri o San Isidro del Campo, i le faatausiusiuga o Seville, i Sepania. I tausaga o le 1550, na faaalu ai e le toatele o monike i lenei monaseri uigaese le tele atu o itula e faitau ai le Tusi Paia, nai lo le faia o o latou tiute na tofia atu e le monaseri. Ma na suia ai e le feau a le Tusi Paia o latou mafaufauga. Na latou teena ai le aʻoaʻoga faa-Katoliko e uiga i le faaaogaina o faatusa ma le talitonuga i pulekatolio. Ma le lē maalofia, na oo ai ina iloa o latou manatu i lena vaipanoa, ma i le fefefe ina neʻi taofia e le Inikuisisi a Sepania, na latou filifili ai e sosola ese atu i se isi atunuu. Sa iai Reina i le toʻa 12 lea na taulau i lo latou sosola atu i Sineva, i Suiselani.

Ina ua taulau manuia mai lena solaaga lamatia, na ia faimalaga atu ai loa mai lea aai i lea aai o Europa, i se tulaga, na mafai ai ona ia sao mai ē na lamalama ia te ia. I le 1562, na susunu ai e tagata feita o le inikuisisi lona faatusa i Seville, ae e oo lava i lena faamataʻuga sauā, e lei solomuli ai Reina mai lana galuega mamafa o le faaliliuina o le Tusi Paia. E ui sa ofoina atu se taui mo se tasi e mafai ona puʻeina o ia, ma ola ai ma le matuā mataʻu ina neʻi maua o ia, ae sa galue punouai pea o ia i lana faaliliuga faa-Sepania. Na ia faamatala mai e faapea: “Ou te lei mapu lava mai laʻu galuega, . . . seʻi vaganā lava le taimi na ou maʻi pe na ou faimalaga ai.”

I totonu o le sefulu tausaga, na faaumaina ai e Reina lana galuega. I le 1569, na lomia ma faasalalauina ai i Basel i Suisilani lana faaliliuga o le Tusi Paia atoa. O lenei galuega mataina, o le uluai tusi atoa lea ua faaliliuina i le faa-Sepania mai uluai gagana. Mo le tele o senituri, na maua ai Tusi Paia i le gagana Latina, ae o le faa-Latina, o le gagana lea a se vaega toaitiiti maualuluga. Sa talitonu Reina e faapea, e tatau ona malamalama tagata uma i le Tusi Paia, ma na ia tuuina ai lona ola i se tulaga lamatia ona o le fia faalauteleina atili o lena sini.

I le faatomuaga o lana faaliliuga, na ia faamatalaina ai ana mafuaaga. “O le faasaina o le Tusi Paia mai le faaliliuina i le gagana a tagata lautele, e mautinoa ua faalumaina ai le Atua ma afaina ai le lelei o tagata lautele. O lenei faasasaaga, o le gaoioiga vaaia lea a Satani ma i latou o loo ia pulea. . . . I le iloa e faapea na tuuina mai e le Atua lana Afioga i tagata, ma i le faanaunau ina ia malamalama i ai ma faatatauina i olaga o tagata uma, e so o se tagata la na te faasaina le faaliliuina o le Tusi Paia i so o se gagana, e leai lava se faanaunauga lelei o ia te ia.”

O se faamatalaga lototele lenei, talu ai na faia ina ua faatoʻā mavae le 18 tausaga talu ona faasaina faapitoa le Tusi Paia i le Lisi o mea na faasaina e le Inikuisisi a Sepania mai le faaliliuina “i le gagana Sepania po o se isi lava gagana lautele.” E manino lava la, e lei faatagaina e Reina le fefe i tagata e taofia ai lona naunau mo le upu moni.

E ese ai mai le naunau ina ia maua e tagata uma e tāutala i le gagana Sepania le Tusi Paia, na manao foi Reina ina ia saunia se faaliliuga e sili ona saʻo. I lana faatomuaga, na ia faamatalaina ai le aogā o le faaliliu saʻo mai uluai gagana. Na faamatala e Reina e faapea, sa iai ni mea sese na ofi atu i tusitusiga Latina o le Vulgate. O le mea sese na matuā iloga o nei mea, o le aveesea lea o le suafa o le Atua.

Le Suafa o le Atua i Faaliliuga Faa-Sepania

Na iloa e Reina, o le suafa o le Atua, o Ieova, e tatau ona aliaʻi mai i so o se faaliliuga saʻo o le Tusi Paia, e pei ona faia ai i uluai tusitusiga. Sa lē fia mulimuli o ia i le faiga lea o le suia o le suafa o le Atua i taʻu e pei o le “Atua” po o le “Alii.” I upu faatonu e uiga i lana faaliliuga, na ia faamatala tuusaʻo mai ai lava ana mafuaaga.

“Ua matou faasaoina le suafa (Iehoua) po o Ieova, ona o ni mafuaaga matuā tāua. Muamua, auā e so o se mea lava e mafai ona maua ai le suafa i a tatou Tusi Paia faa-Sepania, ua faapena foi ona maua ai i tusitusiga Eperu, ma e foliga mai ia i matou, e lē mafai ona tatou tapēina pe suia foi e aunoa ma le faia ai o se gaoioiga lē faamaoni, atoa ma le lē faapaiaina ai o le tulafono a le Atua, lea o loo poloai mai e aua neʻi aveesea pe faaopoopo i ai se mea. . . . O le tu [o le aveesea o le suafa], na faia e le Tiapolo, na mapuna mai i faiga faataulaitu a rapi i ona po nei o ē, e ui lava ina faapea mai e faaaloalo i lona suafa, ae o le mea moni ua tanumia ai Lona suafa paia, ma galo ai i tagata o le Atua, o le suafa lena sa finagalo o ia ina ia faaesea ai o ia mai isi atua . . . uma lava.”

O le faanaunauga maualuga o Reina ina ia faalauiloa atu le suafa o le Atua, ua matuā sili mamao atu ni iuga lelei ua oo i ai. Seia oo mai i o tatou aso, e anoanoai faaliliuga faa-Sepania—a le Katoliko ma le Porotesano—ua mulimuli i lenei uluai faaliliuga i le faaaogaina o le suafa o le Atua i le Tusi Paia atoa. E matuā faafetai tele ai ia Reina, ona ua iloa e so o se tagata e faitau i faaliliuga faa-Sepania o le Tusi Paia, e iai se suafa totino o le Atua e faaesea ai o ia mai le tele o isi atua.

E lelei ona mātauina le mea moni e faapea, o loo aliaʻi manino mai lava le suafa o Ieova i le gagana Eperu i le itulau muamua o le Tusi Paia a Reina. Na tuutoina le ola o Reina i le pogai tāua na faasaoina ai le Afioga a le Atua, ina ia mafai ona mauaina i se gagana e mafaia e le faitau miliona o tagata ona faitau i ai.