Skip to content

Skip to table of contents

Ia Faaalia le Faatuatua—Ia Filifili ma le Atamai!

Ia Faaalia le Faatuatua—Ia Filifili ma le Atamai!

“Ia ōle atu pea iā te ia i le faatuatua ae aua le masalosalo.”IAKO. 1:6.

PESE: 81, 70

1. Aiseā na faia ai e Kaino se filifiliga lē sa‘o, ma o le ā le i‘uga?

SA IAI se filifiliga na tatau ona faia e Kaino: A lē o le pulea o ona faalogona agasala, po o le faataga o ona faalogona e pulea ai ana gaoioiga. Po o le ā lava le filifiliga e na te faia, o le a iai āuga o lana filifiliga e aafia ai lona olaga atoa. Ua e iloa le filifiliga na faia e Kaino, e na te le‘i faia se filifiliga sa‘o. O lana filifiliga na i‘u ai ina fasiotia lona uso faamaoni o Apelu, ma aafia ai le la faiā ma Lē na faia o ia.Kene. 4:3-16.

2. Aiseā e tāua ai le faia o filifiliga lelei?

2 E iai fo‘i filifiliga ma faai‘uga e tatau ona tatou faia. E lē o filifiliga uma e tatou te faia e faigatā ma ono aafia ai o tatou ola. Peita‘i, o le tele o a tatou filifiliga e mafai ona iai ni aafiaga tumau iā i tatou. O lea, o le tomai e faia ai ni filifiliga lelei e fesoasoani iā i tatou e ola ai i ni olaga sologa lelei ma filemu, nai lo o ni olaga e tumu i faafitauli, vevesi, ma le faanoanoa.Faata. 14:8.

3. (a) Ina ia faia ni filifiliga atamai, o le ā e tatau ona tatou faatuatua i ai? (e) O ā fesili o le a tatou iloiloina?

3 O le ā e fesoasoani iā i tatou ina ia faia ni filifiliga atamai? E mautinoa e mana‘omia ona tatou faatuatua i le Atua, ma lē masalosalo i lona tomai ma lona faanaunauga e fesoasoani mai ina  ia tatou atamamai. E mana‘omia fo‘i ona tatou faatuatua i le Afioga a Ieova ma lana auala e faia ai mea, ma maufaatuatuaina ana fautuaga. (Faitau le Iakopo 1:5-8.) A o tatou faalatalata atu iā te ia ma faateleina lo tatou naunau i lana Afioga, o le a i‘u ai ina tatou maufaatuatuaina ana faai‘uga. O le faia faapea o le a tatou atia‘e ai se masaniga o le sa‘ili muamua i le Afioga a le Atua a o le‘i faia ni filifiliga. Peita‘i, e faapefea ona faaleleia lo tatou tomai e faia ai filifiliga? Po o lona uiga afai ua tatou faia ni filifiliga, ua lē mafai la ona toe suia na filifiliga? O le a taliina nei fesili i lenei mataupu.

E MANA‘OMIA ONA FAIA NI FILIFILIGA I LE OLAGA

4. O le ā le filifiliga na tatau ona faia e Atamu, ma o ā āuga o lana filifiliga?

4 Talu mai lava le amataga, na tatau ona faia e tagata ni filifiliga tāua. Na tatau ona filifili Atamu pe faalogo i Lē na faia o ia, pe faalogo iā Eva. Na lotomalie Atamu e faia se filifiliga. Ae o le ā sou manatu i le filifiliga na ia faia? Na taa‘ina o ia e lana avā lea na faasesēina, ina ia faia se filifiliga e matuā leaga ma ia melea ai le ola i se Parataiso ma i‘u ai ina oti. E na o le amataga lenā o āuga o lana filifiliga na fai. O loo faaauau ona tatou mafatia i āuga o le filifiliga sesē a Atamu.

5. O le ā la tatou vaaiga e tatau ona iai i le faia o filifiliga?

5 E ono manatu nisi e fiafia le olaga pe ana lē mana‘omia ona tatou faia ni filifiliga. Po o lou manatu lenā? Ia manatua, e le‘i faia e Ieova tagata e pei o ni masini e lē mafai ona mafaufau ma faia ni filifiliga. O le mea moni, o loo a‘oa‘oina i tatou i le Tusi Paia i le auala e faia ai filifiliga atamai. E finagalo Ieova ia tatou faia filifiliga, ma e tele aogā e tatou te maua mai ai. Se‘i manatu i nisi o faamaoniga.

6, 7. O le ā le filifiliga na tatau ona faia e tagata Isaraelu, ma aiseā na faigatā ai ona latou faia se filifiliga atamai? (Taga‘i i le ata i luga a‘e o le matua.)

6 Ina ua nofoia e tagata Isaraelu le Nuu Folafolaina, na iai se filifiliga matuā tāua na tatau ona latou faia: Ia tapua‘i iā Ieova, pe auauna i isi atua. (Faitau le Iosua 24:15.) E foliga mai o se filifiliga faigofie. Peita‘i, o la latou filifiliga na faalagolago i ai le ola po o le oti. I taimi o Faamasino, na faaauau ona faia e tagata Isaraelu ni filifiliga e lē atamai. Na latou fulitua iā Ieova ae tapua‘i atu i atua sesē. (Faama. 2:3, 11-23) Se‘i manatu fo‘i i se taimi mulimuli ane o le talafaasolopito o tagata o le Atua, ina ua mana‘omia ona latou faia se filifiliga. Na faailoa manino atu e le perofeta o Elia filifiliga e tatau ona latou faia: Ia auauna iā Ieova, pe auauna i le atua sesē o Paala. (1 Tu. 18:21) Na ta‘usalaina e Elia tagata ona o lo latou faalotolotolua. E te ono manatu o se filifiliga faigofie, ona o le auauna iā Ieova o se gaoioiga e atamai ma aogā. E leai fo‘i se tagata atamai e tosina atu pe fia auauna iā Paala. Peita‘i, o na tagata Isaraelu na ‘faalētonu i manatu eseese e lua.’ Na uuna‘ia ma le atamai i latou e Elia ia filifili le auala sili e tapua‘i ai, o le tapua‘i lea iā Ieova.

7 Aiseā atonu na faigatā ai i na tagata Isaraelu ona faia se filifiliga atamai? Muamua, na mou ese atu lo latou faatuatua iā Ieova ma e le‘i fia faalogo i lona si‘ufofoga. E le‘i faateleina lo latou iloa o le poto sa‘o po o le atamai mai i le Atua, ma e latou te le‘i maufaatuatuaina fo‘i Ieova. Pe ana latou gaoioi e tusa ai ma le poto sa‘o, semanū e latou te faia ni filifiliga atamai. (Sala. 25:12) Lona lua, na latou faataga isi ina ia taa‘ina i latou pe faia filifiliga mo i latou. Na taa‘ina mafaufauga o tagata Isaraelu e tagata ese e lē tapua‘i iā Ieova, ma i‘u ai ina  latou mulimuli i na tagata faapaupau. Peita‘i, ua loa ona lapata‘ia e Ieova o le mea lenā e ono tupu.—Eso. 23:2.

PE E TATAU ONA FAIA E ISI A TATOU FILIFILIGA?

8. O le ā le lesona tāua e tatou te a‘oa‘oina mai i tagata Isaraelu e faatatau i le faia o filifiliga?

8 O le faaa‘oa‘oga i tagata Isaraelu, ua faailoa mai ai iā i tatou se lesona manino. E faia e le tagata lava ia ana filifiliga, ma o filifiliga atamai ma sa‘o e faavae mai i le poto sa‘o faale-Tusi Paia. Ua faamanatu mai i le Kalatia 6:5: “E tauave e le tagata lava ia lana avega.” E lē tatau ona tatou tuuina atu i isi le tiute tauave o le faia o filifiliga mo i tatou. Nai lo o lea, e tatau i le tagata lava ia ona a‘oa‘oina po o le ā le mea e sa‘o i le silafaga a le Atua, ona filifili lea e fai.

9. Aiseā o se lamatiaga ai le tuu atu i isi e faia a tatou filifiliga?

9 E faapefea ona tatou aafia i le lamatiaga o le tuu atu i isi e faia a tatou filifiliga? O omiga mai i isi e ono taa‘ina ai i tatou ina ia faia se filifiliga sesē. (Faata. 1:10, 15) Peita‘i, po o ā lava omiga mai i isi, o lo tatou tiute tauave le mulimuli i o tatou lotofuatiaifo ua a‘oa‘oina i le Tusi Paia. O le tele o taimi, pe a tuu atu i isi e faia a tatou filifiliga, o le mea moni ua tatou filifili e mulimuli iā i latou. O lenā la ua fai la tatou filifiliga, ae e ono i‘u ai i ni āuga leaga.

10. O le ā le lapata‘iga na tuu atu e Paulo i Kerisiano i Kalatia?

10 Na lapata‘ia ma le manino e le aposetolo o Paulo Kerisiano i Kalatia, i le lamatiaga o le tuu atu i isi e faia a latou filifiliga. (Faitau le Kalatia 4:17.) O nisi uso i le faapotopotoga na manana‘o e faia filifiliga mo isi ina ia vavaeese ai i latou mai i le ‘auaposetolo. Aiseā? Talu ai na manana‘o na uso manatu faapito i ni tulaga aloa‘ia. Na latou sopotapulaa i le mea na tatau ona iai, ma lē amana‘ia ai le tiute tauave a o latou uso Kerisiano, o le faia lea e i latou lava o a latou filifiliga.

11. E faapefea ona tatou fesoasoani i isi a o faia a latou lava filifiliga?

11 Na faataatia e Paulo se faaa‘oa‘oga lelei, o le amana‘ia lea o le aiā a ona uso e faia ai a latou lava filifiliga. (Faitau le 2 Korinito 1:24.) E tatau fo‘i i toeaina i  aso nei ona mulimuli i lenā faaa‘oa‘oga, pe a tuuina atu ni fautuaga e faatatau i mataupu e faia ai e le tagata lana ia lava filifiliga. E latou te fiafia e faasoa atu i uso ma tuafāfine ni faamatalaga e faavae mai i le Tusi Paia. Peita‘i, e faaeteete toeaina ia tuu atu pea i uso ma tuafāfine e fai e le tagata lana ia lava filifiliga. E atamai le faia faapea ona e selesele e le tagata lava ia mea e na te lūlūina. O le lesona tāua lenei: E mafai ona tatou fesoasoani i isi ma faamanatu i ai mataupu silisili po o fautuaga mai i le Tusi Paia. Peita‘i, o loo iā i latou le aiā ma le tiute tauave e faia ai a latou lava filifiliga. Pe a latou filifili ma le atamai, o le a latou maua aogā. E manino mai, e tatau ona tatou ‘alofia le manatu e faapea, o loo iā i tatou le pule e faia ai filifiliga mo isi uso ma tuafāfine.

O toeaina alolofa e fesoasoani i isi ina ia fai a latou lava filifiliga (Taga‘i i le palakalafa e 11)

AUA LE FAIA AU FILIFILIGA E FUA I OU FAALOGONA

12, 13. Aiseā o se lamatiaga ai le faia o ni filifiliga a o tatou feita pe lotovaivai?

12 I aso nei, ua taatele le manatu e faapea: Ia mulimuli i lou loto. Peita‘i, o se lamatiaga le faia faapea, ma e lē o se manatu e faavae mai i le Tusi Paia. Ua lapata‘i mai le Tusi Paia ia aua ne‘i faia a tatou filifiliga e fua i o tatou loto lē lelei atoatoa po o faalogona ootia. (Faata. 28:26) E tele tala o loo i le Tusi Paia e faaalia ai i‘uga faanoanoa o le mulimuli o se tasi i lona loto. O le faafitauli autū, ona o i tatou o tagata e lē lelei atoatoa, ma “e sili ona faa‘ole‘ole le loto nai lo o mea uma, ma e matuā leaga lava.” (Iere. 3:17; 13:10; 17:9; 1 Tu. 11:9) O lea, o le ā e tupu pe a tatou mulimuli i o tatou loto?

13 E tāua le loto o se Kerisiano, auā ua poloa‘ia i tatou ia alolofa iā Ieova ma o tatou lotoatoa, ma ia alolofa i o tatou tuaoi e pei o i tatou lava. (Mata. 22:37-39) Peita‘i, ua faamatilatila mai i mau na ta‘ua i le palakalafa ua mavae, le lamatiaga o le faavae o o tatou manatu ma gaoioiga i o tatou faalogona. O se faaa‘oa‘oga, o le ā e ono tupu pe a tatou faia ni filifiliga a o feita? E manino le tali pe afai na tupu lenei tulaga iā i tatou i se taimi ua te‘a. (Faata. 14:17; 29:22) Po o le a mafai ona tatou faia ni filifiliga lelei pe afai o loo tatou lotovaivai? (Nu. 32:6-12; Faata. 24:10) Ia manatua, ua ta‘ua i le Afioga a le Atua le atamai o le avea ma “pologa i le tulafono a le Atua.” (Roma 7:25) E manino mai, e faigofie ona faasesēina i tatou e o tatou lava faalogona, pe afai e fai a tatou faai‘uga tāua e fua i o tatou faalogona.

O TAIMI E AO ONA SUI AI A TATOU FILIFILIGA

14. E faapefea ona tatou iloa e talafeagai ona toe suia ni filifiliga a se tasi?

14 E mana‘omia ona tatou faia ni filifiliga atamai. Peita‘i, e lē uiga ai e faapea e tatau ona tatou ‘alofia le suia o se filifiliga ua uma ona tatou faia. E iai taimi e lelei ai ona toe iloilo a tatou filifiliga ma atonu e mana‘omia ona sui. Se‘i mātau le faaa‘oa‘oga a Ieova e tusa ai o tagata Nineva i aso o Iona. “Ua silafia e le Atua moni a latou galuega ina ua liliuese i latou mai i o latou ala leaga; ona suia lea o le filifiliga a le Atua moni e tusa ma le malaia na ia fetalai ai e faaoo iā i latou; ma e le‘i faaooina i ai le malaia.” (Iona 3:10) Ina ua silasila mai Ieova ua salamō tagata Nineva ma suia o latou uiga, sa suia lana faai‘uga. O le faia faapea na ia faaalia ai le fetuutuuna‘i, lotomaulalo, ma le alofa mutimutivale. I le lē pei o le to‘atele o tagata, e lē faia e Ieova ni filifiliga e aunoa ma le mafaufau lelei, e oo lava fo‘i i taimi e to‘asā ai.

15. O ā ni māfuaaga e ono mana‘omia ai ona sui sa tatou filifiliga?

15 E iai taimi atonu e lelei ai ona toe iloilo  sa tatou faai‘uga po o se filifiliga, e pei o taimi ua suia ai le tulaga o mea. Sa iai taimi na suia ai e Ieova ana faai‘uga ina ua suia le tulaga o mea. (1 Tu. 21:20, 21, 27-29; 2 Tu. 20:1-5) Atonu fo‘i ua talafeagai ona toe sui sa tatou filifiliga ona o ni faamatalaga fou ua tatou maua. E le‘i sa‘o faamatalaga na ta‘u atu i le tupu o Tavita e faatatau iā Mefiposeta, le atalii o le atalii o Saulo. Ina ua maua e Tavita mulimuli ane faamatalaga sa‘o, sa toe sui lana filifiliga. (2 Samu. 16:3, 4; 19:24-29) O nisi taimi atonu e atamai fo‘i lo tatou faia faapea.

16. (a) O ā nisi o fautuaga e fesoasoani i le faia o ni filifiliga atamai? (e) Aiseā e tatau ai ona tatou toe iloilo ni filifiliga ua uma ona fai, ma e faapefea ona tatou faia faapea?

16 Ua fautuaina i tatou i le Afioga a le Atua ia aua ne‘i vavevave pe afai ua mana‘omia ona faia se filifiliga tāua. (Faata. 21:5) Pe a tatou faaalu se taimi e iloilo lelei ai vala ma faamatalaga uma e fesoota‘i i se filifiliga, o le a mafai la ona tatou faia se filifiliga atamai. (1 Tesa. 5:21) A o le‘i faia e ulu o aiga ni faai‘uga, e ao ona latou faaalu se taimi e faia ai ni sa‘ili‘iliga i le Tusi Paia ma lomiga faa-Kerisiano, ma iloilo manatu o isi sui o le aiga. Ia manatua, na faalaeiau e le Atua Aperaamo ia faalogo i lana avā. (Kene. 21:9-12) E tatau fo‘i i toeaina ona faaalu se taimi e fai ai ni a latou sa‘ili‘iliga. Pe afai o i latou o ni uso e fetuutuuna‘i ma faamaulalo, e lē popole la ina ne‘i lē faaaloalogia i latou e isi, pe afai ua mana‘omia ona toe sui se filifiliga ua uma ona latou faia, ona ua maua ni faamatalaga fou. E tatau ona latou nofosauni e fetuuna‘i o latou mafaufauga ma filifiliga pe a mana‘omia, ma e ao iā i tatou uma ona mulimuli i lenā faaa‘oa‘oga. O le faia faapea o le a tumau ai ona autasi ma maopoopo le faapotopotoga.Galu. 6:1-4.

IA FAI LE MEA UA E FILIFILI E FAI

17. E faapefea ona tatou taulau i le faia o filifiliga?

17 O isi filifiliga e sili atu ona faigatā nai lo o isi. Pe a faigatā se filifiliga, e mana‘omia ona mafaufau lelei i ai ma iloilo faatasi ma le tatalo, ma e ono tele se taimi e alu ai. O nisi Kerisiano e mana‘omia ona filifili pe faaipoipo ma po o ai e faaipoipo i ai. O se isi filifiliga tāua e mafai ona maua ai le tele o faamanuiaga, o le filifili lea pe faapefea ma po o le ā le taimi e auai ai i le faiva faataimi atoa. I nei tulaga, e tāua ona maufaatuatuaina atoatoa e mafai ma e saunia mai e Ieova ni ta‘iala atamai. (Faata. 1:5) O lea, e tāua ona sa‘ili i le Tusi Paia o le puna sili lea o fautuaga, ma ia sa‘ili i le ta‘ita‘iga a Ieova e ala i le tatalo. Ia manatua, e mafai e Ieova ona tuuina mai iā i tatou uiga e mana‘omia, ina ia tatou faia ai filifiliga e ōgatusa ma lona finagalo. A o tatou le‘i faia ni filifiliga tāua, ia fai ma masani le fesili ifo: ‘Po o le a faamaonia atu i lenei filifiliga ou te alofa iā Ieova? Po o le a maua ai e lo‘u aiga le fiafia ma le filemu? Po o le a faaalia atu ai fo‘i ou te onosa‘i ma agalelei?’

18. Aiseā e faatalitalia ai e Ieova i tatou ia fai a tatou lava filifiliga?

18 E lē faamalosia e Ieova i tatou ia alolofa ma auauna atu iā te ia. O le filifiliga lenā a i tatou e fai. Ina ia ōgatusa ma le sa‘olotoga e filifili ai lea ua ia tuuina mai, e na te amana‘ia la tatou tiute tauave ma le aiā e fai ai la tatou lava filifiliga pe auauna iā te ia. (Iosua 24:15; Fai. 5:4) Peita‘i, e na te faatalitalia i tatou ia fai le mea ua tatou filifili e fai e faavae mai i lana Afioga. Pe a tatou faatuatua i le auala a Ieova e fai ai mea, ma mataupu silisili ua ia saunia mai ma le agalelei, o le a tatou faia ni filifiliga atamai ma faamaonia atu ai e tumau o tatou ala uma.Iako. 1:5-8; 4:8.