Na faalaeiau e Ieova tagata Isaraelu e tatau ona paia. Ina ia faia faapea, na ia fetalai atu iā i latou: “Aua e te fealuaʻi solo i lou nuu e faia ai ni tala taufaaleaga. Aua neʻi e lamalama i se mea e aveesea ai le ola o lou uso a tagata. O aʻu o Ieova.”​—Levi. 19:2, 16.

O le faaupuga “aua neʻi e lamalama,” ua fetaui lelei ma le uluaʻi gagana Eperu na tusia ai. Ae o le ā lona uiga? Ua taʻua i se tusi a tagata Iutaia e faatatau i le tusi o Levitiko e faapea: “O le vaega lenei o le fuaiupu e faigatā ona malamalama i ai, ona e faigatā ona tatou faamatalaina le uiga o le faaupuga Eperu. I se tulaga moni, e mafai ona uiga atu i le ʻtu i luga o se isi, tu i autafa po o le tu latalata ane.’”

Ua faafesootaʻi e nisi tagata atamai lenei faaupuga i le fuaiupu e 15 lea o loo faapea mai: “Aua tou te faia faamasinoga lē tonu. Aua e te faaʻauʻau atu i lē ua faatauvaa, ma aua e te faasili le tagata mauʻoa. E ao ona e faamasino ma le tonu lou tuaoi.” (Levi. 19:15) I lenā tulaga, o le faatonuga o loo i le fuaiupu e 16 “aua neʻi e lamalama” i se tasi, e uiga atu i le lē tatau i tagata o le Atua ona faia se mea e faaleaga ai se isi uso a tagata, i le faamasinoga, mataupu faapisinisi, mataupu faaleaiga ma aua neʻi faia ni faiga piʻopiʻo mo lona lava lelei. E moni e lē tatau ona tatou faia na mea, ae e iai se auala e sili atu e tatou te malamalama ai i lenei faaupuga o loo i le fuaiupu e 16.

Seʻi mātau upu amata o le fuaiupu e 16. Na faatonuina ai e le Atua ona tagata e aua le feoaʻi solo e faasalalau atu tala taufaaleaga. Mātau o le faia o tala taufaaleaga e sili atu mea e aofia nai lo le faitala, e ui o le faitala e mafai foʻi ona tutupu ai faafitauli. (Faata. 10:19; Fai. 10:12-14; 1 Timo. 5:11-15; Iako. 3:6) O se tagata taufaaleaga, e masani ona ia faia ma le iloa ni faamatalaga pepelo, e faaleaga ai le talaaga o se tasi. Atonu e faia foʻi e se tagata taufaaleaga se molimau pepelo e faasaga i se tasi, e tusa lava pe oo ai le oti i lenā tagata. Manatua na faia e ni tamāloloa taufaaleaga ni molimau pepelo e faasaga iā Napota, lea na iʻu ai ina fetogia o ia i maa. (1 Tu. 21:8-13) Ioe, o le tagata taufaaleaga e mafai ona ia tu atu e lamalama le ola o le isi tagata, e pei ona taʻua i le vaega lona lua o le Levitiko 19:16.

E lē gata i lea, o le tagata taufaaleaga e ʻinoʻino i le isi tagata. Ua faapea mai le 1 Ioane 3:15: “O lē e ʻinoʻino i lona uso o le fasioti tagata o ia, ma ua outou iloa e leai se fasioti tagata e tumau iā te ia le ola e faavavau.” E tāua lo tatou iloaina o upu a le Atua o loo sosoo mai ai: “Aua e te ʻinoʻino i lou uso i lou loto.”​—Levi. 19:17.

O lea la, o le faaupuga o loo tusia i le Levitiko 19:16, ua aumaia ai se fautuaga malosi mo Kerisiano. E tatau ona tatou teena mafaufauga leaga, ma le faia o tala taufaaleaga i le isi tagata. Pe afai e tatou te “lamalama” i se tasi e ala i le faaalia o le lē fiafia ma le mataʻua, o le a uunaʻia ai i tatou e faia tala taufaaleaga e faatatau iā te ia, ma e ono iʻu ai i lo tatou ʻinoʻino i lenā tagata. E tatau i Kerisiano ona matuā ʻalofia lenā uiga.​—Mata. 12:36, 37.