Skip to content

Skip to table of contents

 SUʻESUʻEGA 37

Ia Lotomalie e Gauaʻi iā Ieova​—Aiseā ma e Faapefea?

Ia Lotomalie e Gauaʻi iā Ieova​—Aiseā ma e Faapefea?

“Pe e lē sili ea ona tatou gauaʻi atu i le Tamā?”​—EPE. 12:9.

PESE 9 O Ieova lo Tatou Tupu!

AOTELEGA *

1. Aiseā e tatau ai ona tatou gauaʻi iā Ieova?

E TATAU ona tatou gauaʻi * iā Ieova auā na Ia foafoaina i tatou. O le māfuaaga lenā e iā Ieova ai le aiā e faataatitia ai tapulaa mo ana foafoaga. (Faaa. 4:11) Ae e i ai se isi māfuaaga tatau e tatou te usiusitaʻi ai iā te ia, ona e lelei atoatoa le auala e pule ai. I le talafaasolopito, na iai i taʻitaʻi o malo se malosiaga ma le pule e pulea ai tagata. Ae pe a tatou faatusatusa pulega a tagata ma le pule a Ieova, e sili atu ona atamai Ieova, e matuā tele lona alofa, e alofa mutimutivale, ma o se Pule e alofa fua.​—Eso. 34:6; Roma 16:27; 1 Ioa. 4:8.

2. O ā māfuaaga o loo taʻua i le Eperu 12:9-11 e tatou te gauaʻi ai iā Ieova?

2 E finagalo Ieova e tatou te usiusitaʻi iā te ia, ona e lē gata e tatou te matataʻu, ae e tatou te alolofa foʻi iā te ia, ma o ia o lo tatou Tamā alofa. Na faamatala e Paulo i lana tusi i Kerisiano Eperu, e tatau ona tatou “gauaʻi atu i le Tamā” ona o loo ia toleniina i tatou “mo lo tatou lelei.”​—Faitau le Eperu 12:9-11.

3. (a) E faapefea ona faaalia lo tatou gauaʻi iā Ieova? (e) O ā fesili o le a tatou taliina?

3 E tatou te gauaʻi iā Ieova e ala i lo tatou faia o le mea sili e usitaʻi ai iā te ia i mea uma, ma tetee atu i le faanaunauga o le faalagolago i lo tatou lava malamalama. (Faata. 3:5) O le a faigofie ona tatou gauaʻi iā Ieova a o tatou aʻoaʻoina ona uiga matagofie. Aiseā? Talu ai o nei uiga ua atagia mai i mea uma  na ia faia. (Sala. 145:9) O le tele o lo tatou aʻoaʻoina e faatatau i uiga o Ieova, o le tele foʻi lenā o lo tatou alofa mo ia. Ma pe a tatou alolofa iā Ieova, e tatou te lē tau manaʻomia se lisi umī o tulafono o mea e fai ma mea e lē faia. E tatou te taumafai ina ia faaōgatusa o tatou manatu ma faalogona, ma le finagalo o Ieova, ma ia ʻalofia mea leaga. (Sala. 97:10) Ae e iai taimi e ono faigatā ai ona usitaʻi iā Ieova. Aiseā? O le ā e aʻoaʻoina e toeaina, tamā ma tinā mai i faaaʻoaʻoga a le kovana o Neemia, le tupu o Tavita ma Maria le tinā o Iesu? O le a talanoaina i lenei mataupu tali o na fesili.

LE MĀFUAAGA E FAIGATĀ AI ONA GAUAʻI IĀ IEOVA

4-5. E tusa ai o le Roma 7:21-23, aiseā e faigatā ai ona tatou gauaʻi iā Ieova?

4 O se tasi o māfuaaga e ono faigatā ai le gauaʻi iā Ieova, ona o le agasala tuufaasolo ma e tatou te lē lelei atoatoa. E iai la o tatou uiga fouvale. Ina ua fouvale Atamu ma Eva i le Atua ma ʻai le fua o le laau na faasā, na la faataatia ai a laʻua lava tapulaa. (Kene. 3:22) E oo mai i aso nei, o le toʻatele o tagata e latou te lē amanaʻia tapulaa a Ieova, ma ua filifili lava e i latou le mea saʻo ma le mea sesē.

5 E oo foʻi i tagata e alolofa ma iloa Ieova, e ono faigatā ona latou gauaʻi atoatoa iā te ia. Na fesagaʻia e le aposetolo o Paulo lenei luʻi. (Faitau le Roma 7:21-23.) E pei o Paulo, e tatou te mananaʻo uma e fai le mea saʻo i le silafaga a Ieova. Ae e manaʻomia pea ona tatou tauivi e teena le faanaunauga e faia mea sesē.

6-7. O le ā le isi māfuaaga e faigatā ai ona gauaʻi iā Ieova? Aumai se faataʻitaʻiga.

6 O le isi māfuaaga e faigatā ai ona gauaʻi iā Ieova, ona ua tatou taaʻina i tu ma aganuu na ola aʻe ai. E tele manatu faaletagata e feteenaʻi ma le finagalo o Ieova, ma o se luʻi i taimi uma le taumafai e saʻoloto mai i na manatu. Seʻi o tatou iloilo se faaaʻoaʻoga se tasi.

7 O se mea masani i nisi o vaipanoa, le unaʻi o talavou e faaaogā o latou olaga e suʻe ai le tele o tupe. Na fesagaʻia e se tuafafine e igoa iā Mary * lenā luʻi. Na auai le tuafafine i se tasi o Iunivesite taʻutaʻua i lona atunuu, a o leʻi aʻoaʻoina o ia e faatatau iā Ieova. Na ia fesagaʻia omiga mai i lona aiga ia maua se galuega taualoa e telē le totogi, ma na manaʻo ai foʻi Mary. Ae ina ua ia aʻoaʻoina e faatatau iā Ieova ma alofa iā te ia, na suia ai ona sini. E ui i lea, sa ia faapea mai: “E iai taimi ou te maua ai avanoa faapisinisi e mafai ai ona maua le tele o tupe, ae e faalavelave i laʻu faasologa faaleagaga. Talu ai o le auala na ou ola aʻe ai, e faigatā lava ona ou fai atu e leai i na avanoa faapisinisi. Na ou ʻaiʻoi atu iā Ieova, e fesoasoani mai e teena le faaosoosoga o le talia o galuega, e taofia ai laʻu auaunaga iā te ia.”​—Mata. 6:24.

8. O le ā o le a tatou iloiloina?

8 E tatou te maua aogā pe a tatou gauaʻi iā Ieova. Peitaʻi, o i latou ua tuuina atu i ai se pule, e pei o toeaina, tamā, ma tinā, e i ai se isi māfuaaga e latou te mulimuli ai i taʻitaʻiga a le Atua, o le fesoasoani lea i isi e maua aogā. Seʻi o tatou iloiloina ni faaaʻoaʻoga mai i le Tusi Paia, e tatou te aʻoaʻoina ai auala e faaaogā ai le pule ina ia faafiafia ai Ieova.

O MEA E AʻOAʻOINA E TOEAINA MAI IĀ NEEMIA

E faia se sao a toeaina i galuega i le Maota mo Sauniga, e pei lava ona auai Neemia i le toe fausiaina o Ierusalema (Tagaʻi i palakalafa 9-11) *

9. O ā luʻi na feagai ma Neemia?

9 Ua tuuina mai e Ieova i toeaina le matafaioi tāua o le leoleoina o ona tagata. (1 Pete. 5:2) E tele mea e aʻoaʻoina e toeaina mai i le  iloiloina o le auala na feagai ai Neemia ma tagata o Ieova. Na iā Neemia se pule tele, a o avea ma kovana o Iuta. (Nee. 1:11; 2:7, 8; 5:14) Seʻi mafaufau i nisi o luʻi na feagai ma Neemia. Na ia iloa na faaleagaina e tagata le malumalu, ma latou te leʻi avatua foaʻi tau tupe i le ʻau sā Levī e pei ona faatonuina e le Tulafono. Na solia e tagata Iutaia le tulafono o le sapati, ma o nisi tamāloloa na faaipoipo i fafine o nuu ese. Na taulima e le kovana o Neemia lenei tulaga faigatā.​—Nee. 13:4-30.

10. O le ā le auala na feutagaʻi ai Neemia ma tagata o Ieova?

10 E leʻi faaaogāsesē e Neemia lana pule, e faamalosi ai tagata o le Atua e mulimuli i ona manatu. Nai lo o lea, na ia saʻili mo le taʻitaʻiga a Ieova e ala i lona tatalo faatauanau, ma ia aʻoaʻo atu le tulafono a Ieova i tagata. (Nee. 1:4-10; 13:1-3) Na lotomaulalo foʻi Neemia e galulue faatasi ma ona uso, ma fesoasoani i le toe fausiaina o pā o Ierusalema.​—Nee. 4:15.

11. E pei ona taʻua i le 1 Tesalonia 2:7, 8, o le ā le auala e feutagaʻi ai toeaina ma le faapotopotoga?

11 Atonu e lē o fesagaʻia e toeaina faafitauli na feagai ma Neemia, ae e tele auala e mafai ona latou faaaʻoaʻo ai iā te ia. O se faaaʻoaʻoga, e latou te galulue mamafa mo le lelei o o latou uso ma tuafāfine. Ma e lē avea le pule ua iā i latou ma itu e latou te faamaualuluga ai. Nai lo o lea, e latou te tausi faapelepele le faapotopotoga. (Faitau le 1 Tesalonia 2:7, 8.) O lo latou alofa moni ma uiga lotomaulalo, e latou te talanoa ai i isi i se auala agalelei. Na faapea mai Andrew, o se toeaina ua i ai le poto masani: “Ua ou iloa e tali lelei mai uso ma tuafāfine i se toeaina e agalelei ma faaleuō. O nei uiga e uunaʻia ai le faapotopotoga e galulue faatasi ma toeaina.” Ua taʻua foʻi e Tony o se uso ua leva na avea ma toeaina: “Ou te taumafai e faatatau le fautuaga o loo i le Filipi 2:3, ma ou galue pea i le manatu, e sili atu isi nai lo o aʻu. E fesoasoani lea iā te aʻu e ʻalofia ai le avea ma sē e fia pule.”

12. Aiseā e tāua ai mo toeaina ona lotomaulalo?

 12 E tatau ona lotomaulalo toeaina e pei o Ieova. E ui o Ieova o le Pule Silisili Ese o le aoao o mea, ae e ʻfaamaulalo’ mai e “faatūina le tagata faatauvaa mai i le pefu.” (Sala. 18:35; 113:6, 7) O le mea moni, e inosia e Ieova tagata faamaualuga ma faasausili.​—Faata. 16:5.

13. Aiseā e ao ai i se toeaina ona “pulea lona laulaufaiva”?

13 O se toeaina e gauaʻi iā Ieova, e manaʻomia ona “pulea lona laulaufaiva.” A lē faia faapea, e ono tautala atu ai i se auala lē logolelei i se isi pe a lē faaaloalo atu iā te ia. (Iako. 1:26; Kala. 5:14, 15) Ua faapea mai Andrew lea na taʻua muamua: “E iai taimi ou te fia fai atu ai se faamatalaga lē logolelei, i se uso po o se tuafafine e lē faaaloalo mai iā te aʻu. Peitaʻi, na ou mafaufau loloto i faaaʻoaʻoga a tane faamaoni o loo i le Tusi Paia, ma ua fesoasoani iā te aʻu e iloa ai le tāua o le lotomaulalo ma le agamalu.” E faaalia e toeaina lo latou gauaʻi iā Ieova, pe a talanoa atu i le faapotopotoga ma uso toeaina i se auala alofa ma logolelei.​—Kolo. 4:6.

O MEA E AʻOAʻOINA E TAMĀ MAI I LE TUPU O TAVITA

14. O le ā le tiute tauave ua tofia e Ieova i tamā, ma o le ā e na te faatalitalia mai iā i latou?

14 Ua tofia e Ieova le tamā e avea ma ulu o le aiga, ma e faatalitalia o ia e le Atua e toleni ma aʻoaʻi lana fanau. (1 Kori. 11:3; Efe. 6:4) Ae e faatapulaa le pule a le tamā, e tatau la ona tali atu iā Ieova, o lē na maua ai e aiga o latou igoa. (Efe. 3:14, 15) E faaalia e tamā lo latou gauaʻi iā Ieova, e ala i le faaaogā o la latou pule i se auala e faafiafia ai le Atua. E latou te aʻoaʻoina mai le tele o mea i le suʻesuʻeina o le olaga o le tupu o Tavita.

E tatau i tatalo a se tamā Kerisiano ona atagia atu ai lona lotomaulalo (Tagaʻi i palakalafa 15-16) *

15. Aiseā e avea ai le tupu o Tavita o se faaaʻoaʻoga lelei mo tamā?

15 Na tofia e Ieova Tavita e avea ma ulu o lona aiga, ae ia pule foʻi i le malo atoa o Isaraelu. A o avea Tavita ma tupu na tele se pule na iā te ia. E iai taimi na ia faaaogāsesē ai lenā pule, ma ia faia ai agasala matuiā. (2 Samu. 11:14, 15) Peitaʻi, na faaalia lona gauaʻi iā Ieova e ala i le talia o aʻoaʻiga. Na faailoa atu e Tavita mea o loo i lona loto iā Ieova, e ala i le tatalo. Ma ia taumafai malosi e usitaʻi i aʻoaʻiga a Ieova. (Sala. 51:1-4) E lē gata i lea, na lotomaulalo Tavita e talia fautuaga lelei mai i tane ma fafine. (1 Samu. 19:11, 12; 25:32, 33) Na aʻoaʻo e Tavita ni lesona mai i ana mea sesē, ma ia faamuamua i lona olaga lana auaunaga iā Ieova.

16. O ā lesona e mafai ona aʻoaʻoina e tamā mai iā Tavita?

 16 Mātau nisi o lesona e aʻoaʻoina e tamā mai i le tupu o Tavita. Aua le faaaogāsesē le pule ua tuuina atu e Ieova iā te oe. Ia taʻutino au mea sesē, ma talia aʻoaʻiga e faavae i le Tusi Paia mai i isi. Pe a e faia faapea, o le a faaaloalogia oe e lou aiga ona o lou lotomaulalo. Pe a tatalo faatasi ma lou aiga, ia sasaa atu mea o loo i lou loto iā Ieova, ina ia latou iloa ai o loo e faalagolago atoatoa iā te ia. Ae sili atu i lenā, ia faamuamua i lou olaga lau auaunaga iā Ieova. (Teu. 6:6-9) O lau faaaʻoaʻoga lelei, o se tasi o meaalofa sili e mafai ona e avatu i lou aiga.

O MEA E AʻOAʻOINA E TINĀ MAI IĀ MARIA

17. O le ā le tiute tauave ua tuu atu e Ieova i tinā?

17 Ua tuu atu e Ieova i le tinā se tiute tauave tāua i le aiga, o le avatu lea iā te ia o se pule e aʻoaʻo ai le fanau. (Faata. 6:20) O le mea moni, o faaaʻoaʻoga a se tinā, e i ai ni aafiaga lelei i le olaga atoa o le fanau. (Faata. 22:6) Ia mātau mea e mafai ona aʻoaʻoina e tinā mai iā Maria le tinā o Iesu.

18-19. O le ā e mafai ona aʻoaʻoina mai e tinā i le faaaʻoaʻoga a Maria?

18 Na masani lelei Maria i Tusitusiga Paia. Na ia atiaʻe le faaaloalo loloto mo Ieova, ma se la faiā māfana. Sa lotomalie o ia e gauaʻi i le taʻitaʻiga a Ieova, e ui lava na suia ai mea uma i lona olaga.​—Luka 1:35-38, 46-55.

Pe a lēlavā se tinā pe lagona le ita, e ono manaʻomia ona ia fai taumafaiga malolosi e faaali atu ai le alofa mo lona aiga (Tagaʻi i le palakalafa 19) *

19 Tinā, e tele auala e mafai ona e faaaʻoaʻo ai iā Maria. E faapefea? Muamua, ia faatumauina lau lava faiā ma Ieova, e ala i au suʻesuʻega o le Tusi Paia ma au tatalo. Lua, ia lotomalie e fai suiga i lou olaga e faafiafia ai Ieova. O se faaaʻoaʻoga, atonu na tausia oe e ni mātua e itaitagofie ma inainā i a latou fanau. Atonu la na e ola aʻe ma le manatu o le auala saʻo lea e tausia ai se aiga. E ui ua e aʻoaʻoina tapulaa a Ieova, ae atonu o se luʻi iā te oe ona toʻafilemu ma onosaʻi i lau fanau, aemaise lava pe a faalogogatā mai a o e lēlavā. (Efe. 4:31) I na taimi, e matuā tāua lou tatalo iā Ieova e fesoasoani mai. Na faapea mai se tuafafine e igoa iā Lydia: “O nisi taimi, ou te tatalo faatauanau ai iā Ieova, ina ia ou lē inainā atu i laʻu tama pe a lē usitaʻi. E i ai foʻi taimi e taofi ai saʻu tala o fai atu, ae tatalo lē leoa mo le fesoasoani a Ieova. O le tatalo e faatoʻafilemu ai aʻu.”​—Sala. 37:5.

20. O le ā le faafitauli o loo feagai ma nisi o tinā, ma e faapefea ona foʻia?

20 E iai nisi tinā e feagai ma se isi faafitauli, e faigatā ona faaali atu lo latou alofa i a latou fanau. (Tito 2:3, 4) O nisi fafine, na tausi aʻe i se aiga e lē māfana faiā a mātua ma fanau. Afai o le siʻomaga lea na e ola aʻe ai, e lē manaʻomia ona e faaaʻoaʻo i mea sesē a ou  mātua. O se tinā e gauaʻi i le finagalo o Ieova, atonu e tatau ona ia aʻoaʻoina le auala e faaalia ai lona alofa i lana fanau. E ono faigatā mo ia ona suia le auala e mafaufau ai, pulea ai ona faalogona, ma ana gaoioiga. Ae e mafai ona fai, ma o na suiga o le a aogā iā te ia ma lona aiga.

IA GAUAʻI PEA IĀ IEOVA

21-22. I le Isaia 65:13, 14, o ā aogā e tatou te maua pe a tatou gauaʻi iā Ieova?

21 Na iloa e le tupu o Tavita aogā o le gauaʻi iā Ieova. Na ia tusi: “E tonu faatonuga mai iā Ieova, e olioli ai le loto; e mamā le poloaʻiga a Ieova, e malamalama ai mata. Ma ua lapataʻia ai lau auauna; e tele foʻi le taui pe a tausi i ai.” (Sala. 19:8, 11) I aso nei, ua tatou iloa le eseesega o ē e gauaʻi iā Ieova, ma i latou e teena lana aʻoaʻiga alofa. O i latou e gauaʻi iā Ieova e “alalaga . . . fiafia ona o le lelei o o latou loto.”​—Faitau le Isaia 65:13, 14.

22 Pe a lotomalie toeaina, tamā, ma tinā e gauaʻi iā Ieova, o le a faaleleia o latou olaga, fiafia o latou aiga, ma o le a atili autasi ai le faapotopotoga. Ae o le mea e sili ona tāua, ua latou faafiafiaina le finagalo o Ieova. (Faata. 27:11) O le ā la se isi taui e sili atu?

PESE 123 Gauaʻi Faamaoni i Faatonuga Faatiokarate

^ pala. 5 O le a talanoaina i lenei mataupu māfuaaga e tatau ai ona tatou gauaʻi iā Ieova. O le a iloiloina ai foʻi mea e mafai ona aʻoaʻoina e toeaina, tamā ma tinā, o ē uma ua tuu atu i ai se pule, mai i faaaʻoaʻoga a le kovana o Neemia, le tupu o Tavita, ma Maria le tinā o Iesu.

^ pala. 1 UIGA O FAAUPUGA: E lē faamalosia e le Atua ona tagata e gauaʻi atu iā te Ia. O lea ua latou filifili e usiusitaʻi iā te ia, ma ua latou lotomalilie e gauaʻi i le Atua.

^ pala. 7 Ua suia nisi igoa i lenei mataupu.

^ pala. 62 FAAMATALAGA O ATA: O se toeaina o loo galulue faatasi ma lona atalii i le faaleleia o le Maota o le Malo, e pei o Neemia na fesoasoani i le toe fausia o pā o Ierusalema.

^ pala. 64 FAAMATALAGA O ATA: O loo tatalo faatauanau iā Ieova se tamā ma lona aiga.

^ pala. 66 FAAMATALAGA O ATA: Na umi se taimi na taalo ai se tamaitiiti i taaloga vitiō, e leʻi uma ana feʻau i le fale ma ana meaaʻoga. Ua aʻoaʻi e lona tinā e ui ina lēlavā mai i galuega, ae e lē o inainā ma ita pe faaaogā foʻi ni faaupuga malolosi.