Alu i mataupu o loo iai

Alu i le lisi o mataupu

 SUʻESUʻEGA 13

Ia Matuā Alofa le Tasi i le Isi

Ia Matuā Alofa le Tasi i le Isi

“Ia matuā alofa le tasi i le isi mai i le loto.”​—1 PETE. 1:22.

PESE 109 Ia Matuā Alofa Mai le Loto

AOTELEGA *

I le pō mulimuli a Iesu ma ona aposetolo, na ia faamamafa ai le alofa (Tagaʻi i palakalafa e 1-2)

1. O le ā le faatonuga manino na tuu atu e Iesu i ona soo? (Tagaʻi i le ata i le faavaa.)

I LE pō a o leʻi maliu Iesu, na ia tuu atu i ona soo se faatonuga manino. Na ia faapea atu: “E pei ona ou alofa atu iā te outou, ia outou alolofa foʻi o le tasi i le isi.” Na ia toe faapea atili atu: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.”​—Ioa. 13:34, 35.

2. Aiseā e tāua ai le faaalia o le alofa o le tasi i le isi?

2 Na taʻua e Iesu e iloagofie ona soo moni pe a latou faaalia le alofa lea na ia faaalia. I le uluaʻi senituri, na iloagofie soo moni o Iesu i lenei alofa ma e faapena foʻi i aso nei. Maʻeu la le tāua o lo tatou taumafai e foʻia so o se faafitauli ma ia alofa le tasi i le isi!

3. O le ā o le a tatou iloiloina i lenei suʻesuʻega?

3 Ona e tatou te lē lelei atoatoa, e faigatā ai ona faaalia le matuā alofa o le tasi i le isi. E ui i lea, e tatau ona tatou taumafai e faaaʻoaʻo i le Keriso. O le a tatou iloiloina i lenei suʻesuʻega, le auala e fesoasoani ai le alofa iā i tatou e tausia le filemu, ia lē faailoga tagata, ma ia faaalia le agaga talimālō. A o e suʻesuʻeina lenei mataupu, ia fesili ifo: ʻO le ā e tatou te aʻoaʻoina mai i uso ma tuafāfine o ē na faaalia pea le alofa o le tasi i le isi e ui i faafitauli?’

IA TAUSIA LE FILEMU

4. E tusa ai ma le Mataio 5:23, 24, aiseā e tatau ai ona tatou tausia le filemu ma se uso e iai se mea e lē malie ai iā i tatou?

4 Na aʻoaʻo i tatou e Iesu i le tāua o le faia o se faaleleiga ma  se uso e iai se mea e lē malie ai iā i tatou. (Faitau le Mataio 5:23, 24.) Na faamamafa e Iesu le tāua o lo tatou faatumauina o faiā lelei ma isi, pe a tatou mananaʻo e faafiafia le Atua. E faafiafiaina Ieova pe a tatou faia le mea sili e tausia ai le filemu ma o tatou uso. E na te lē taliaina la tatou tapuaʻiga pe afai e tatou te teulotoina le ita, ma mumusu e fai taumafaiga ina ia tausia ai le filemu.​—1 Ioa. 4:20.

5. O le ā na faigatā ai mo Mark ona tausia le filemu?

5 E ono faigatā ona tatou tausia le filemu. Aiseā? Seʻi mātau le mea na tupu iā Mark. * Na tigā ona faalogona ina ua faitioina o ia e se uso ma na faia e lenei uso ona tala i isi i le faapotopotoga. O le ā le auala na tali atu ai Mark? Na ia faapea mai, “Na ou matuā ita lava ma iʻu ai ina ou lafo atu i le uso ni tala lē mafaufau.” Ae mulimuli ane, na toe salamō Mark i ona uiga na faaalia, ma taumafai e faatoese atu i le uso ma toe faalelei. Peitaʻi na teena e le uso taumafaiga a Mark. Muamua, na manatu Mark, ʻAiseā ou te taumafai ai pea e fai se faaleleiga ma lenei uso ae e lē o manaʻo ai?’ Peitaʻi, na faalaeiau e le ovasia o le matagaluega Mark ina ia aua neʻi fiu. O le ā na faia e Mark?

6. (a) Na faapefea ona taumafai malosi Mark e fai se faaleleiga? (e) Na faapefea ona faatatau e Mark le Kolose 3:13, 14?

6 Ina ua iloilo e Mark ona uiga, na ia iloa ai e lē o ia o se tagata lotomaulalo ma e iai taimi e mafaufau ai e sili o ia nai lo o isi. Na ia iloa e manaʻomia ona sui ona uiga. (Kolo. 3:8, 9, 12) Na lotomaulalo Mark e toe alu i le uso ma faatoese i ai i ona uiga faaalia. Na fai foʻi e Mark ni tusi i le uso, ma faatoese i ai ma taʻu atu i le uso lona naunau ia toe faalelei. Na ave foʻi e Mark ni meaalofa lāiti na mafaufau e fiafia i ai le uso. Ae e faanoanoa ona na teuloto pea e le uso le ita. E ui i lea, ae na usitaʻi pea Mark i le faatonuga a Iesu ia alofa i lona  uso ma ia faamagalo atu. (Faitau le Kolose 3:13, 14.) E tusa pe e lē talilelei mai isi i a tatou taumafaiga ina ia faalelei, ae o le alofa moni faa-Kerisiano e fesoasoani iā i tatou e faamagalo atu ai pea, ma tatalo mo ni iʻuga lelei.​—Mata. 18:21, 22; Kala. 6:9.

E tele taumafaiga e ono fai ina ia fai ai se faaleleiga ma se isi (Tagaʻi i palakalafa e 7-8) *

7. (a) O le ā na faalaeiauina i tatou e Iesu e fai? (e) O le ā le faafitauli na feagai ma Lara?

7 Na faalaeiau i tatou e Iesu e faaauau ona feagai ma isi i le auala e tatou te mananaʻo e latou te feagai ai ma i tatou. Na ia faapea atili mai e lē tatau ona tatou alolofa tau lava o ē e alolofa mai iā i tatou. (Luka 6:31-33) E ui e seāseā tupu, ae a pe a iai se isi i le faapotopotoga e ʻalofia oe ma musu e faafeiloaʻi oe? O le mea lenā sa tupu iā Lara. Na ia faamatala mai: “E iai se tuafafine e leʻi fia talanoa mai iā te aʻu, ae ou te lē iloa le māfuaaga. Na matuā lē lelei ai oʻu faalogona ma leai ai soʻu fiafia pe a ou alu i sauniga.” Muamua, na manatu Lara: ʻE leai saʻu mea sesē na fai. Ia ae e iai foʻi isi i le faapotopotoga e manatu e ese a amio a lea tuafafine.’

8. O le ā na faia e Lara ina ia faia ai se faaleleiga, ma o le ā e tatou te aʻoaʻoina mai i le mea na tupu iā te ia?

8 Na fai e Lara ni taumafaiga ina ia fai ai se faaleleiga. Na ia tatalo atu iā Ieova ma talanoa i le tuafafine. Na la talanoa e faatatau i le faafitauli, na opo atu e le tasi le isi, ma toe faalelei. E foliga na lelei mea uma. Ae na toe faapea mai Lara: “Mulimuli ane, na toe faaali mai foʻi uiga lē lelei o le tuafafine. Na matuā ou lotovaivai lava.” O lea, na mafaufau Lara e pau le auala e na te maua ai le fiafia o le sui o uiga o le tuafafine. Ae na iloa e Lara o le mea sili e na te faia, o le faaalia pea o le alofa i le tuafafine ma “fefaamagaloaʻi ma le lotoatoa.” (Efe. 4:32–5:2) Na manatua e Lara o le alofa faa-Kerisiano “e lē faitauina mea leaga e fai atu iā te ia, e onosaʻi i mea uma, e talitonu i mea uma, e faamoemoe i mea uma, e tumau i mea uma.” (1 Kori. 13:5, 7) Na toe maua e Lara le filemu o le mafaufau. Na iʻu ina māfana atu le tuafafine iā te ia. Pe a e tausia le filemu ma ou uso ma tuafāfine ma faaauau pea ona alofa iā i latou, e mautinoa o le  a faatasi atu iā te oe le Atua o le alofa ma le filemu.​—2 Kori. 13:11.

AUA LE FAAILOGA TAGATA

9. E tusa ai o le Galuega 10:34, 35, aiseā e lē tatau ai ona tatou faailoga tagata?

9 E lē faailoga tagata Ieova. (Faitau le Galuega 10:34, 35.) E faamaonia o i tatou o le fanau a Ieova pe a tatou lē faailoga tagata. E tatou te usiusitaʻi i le faatonuga ia alolofa i tuaoi e pei ona tatou alolofa iā i tatou lava, ma faatumau le filemu o lo tatou aiga faaleagaga.​—Roma 12:9, 10; Iako. 2:8, 9.

10-11. Na faapefea ona liaʻieseina e Ruth ona manatu sesē?

10 E ono faigatā pea i isi ona teena uiga faailoga tagata. Seʻi mātau le mea na tupu i se tuafafine e igoa iā Ruth. A o talavou, na faia e se tagata na sau mai i se isi atunuu se mea matuiā i lo latou aiga. Na faapefea ona aafia ai Ruth? Na taʻutino mai o ia: “Na ou matuā inoino i mea uma e faatatau i lenā atunuu. Na ou manatu e tutusa tagata uma o lenā atunuu e oo lava i uso ma tuafāfine.” Na faapefea ona manumalo Ruth mai i na manatu sesē?

11 Na iloa e Ruth e tatau ona ia taumafai malosi e liaʻiese nei manatu sesē. Sa ia faitau i mea na tutupu ma lipoti o loo i le Yearbook e faatatau i lenā atunuu. Na ia faapea mai: “Na ou faia taumafaiga ina ia saʻo ai laʻu vaai i tagata o lenā atunuu. Na faatoʻā ou mātauina ai le maelega o uso ma tuafāfine mo Ieova. Na manino mai ai iā te aʻu, o i latou foʻi o se vaega o lo tatou ʻauuso i le lalolagi aoao.” Na iloa ai e Ruth e manaʻomia ona fai nisi ana gaoioiga. Na ia faamatala mai: “O taimi uma e matou te fetaui ai ma uso ma tuafāfine o lenā atunuu, ou te taumafai malosi e faauō atu iā i latou. Na ou talanoa i ai ma ou iloa lelei ai i latou.” O le ā na iʻu i ai? Na faapea mai Ruth: “Na iʻu ina mou ese ai oʻu manatu sesē e faatatau iā i latou.”

Pe a tatou matuā “alolofa i le ʻauuso atoa,” o le a tatou teena le faailoga tagata (Tagaʻi i palakalafa e 12-13) *

12. O le ā le faafitauli na aafia ai Sarah?

12 O isi atonu e faailoga tagata e aunoa ma lo latou iloaina. O se faaaʻoaʻoga, na manatu Sarah e lē o ia o sē e faailoga tagata auā e na te lē faamasinoina tagata i o latou lanu, tulaga tau tamaoaiga, po o latou faaeaga i le faalapotopotoga. Ae na ia taʻutino mai: “Na faatoʻā ou iloa ane ou te faailoga tagata saʻo lava.” I le ā le itu? E sau Sarah i se aiga e lelei le tulaga tauaʻoaʻoga, ma e fiafia e faifaimea faatasi ma ē e tutusa o latou tulaga. Na iai le taimi na fai ai Sarah i sana uō: “Ou te fiafia e faifaimea faatasi ma uso ma tuafāfine e lelei aʻoaʻoga. Ae ou te lē fia faauō iā i latou e lē tutusa o matou tulaga.” Na manino mai, na manaʻomia ona suia uiga o Sarah. E faapefea?

13. O le ā e mafai ona tatou aʻoaʻoina mai i le auala na suia ai uiga o Sarah?

13 Na fesoasoani se ovasia matagaluega iā Sarah e iloilo ona uiga. Na faapea mai Sarah: “Na faamālō mai le ovasia i laʻu auaunaga faamaoni, o aʻu tali i sauniga ma loʻu iloa o le Tusi Paia. Ona ia faapea mai lea, a o faateleina lo tatou iloa o le Tusi Paia, e manaʻomia foʻi ona tatou atiaʻe uiga faa-Kerisiano e pei o le lotomaulalo, iloa o mea e gata ai le mafai, ma le alofa mutimutivale.” Na faatatau e Sarah fautuaga a le ovasia. Na ia faapea mai: “Na ou iloa o le mea e sili ona tāua o lo tatou faaalia o le agalelei ma le alofa.” O le iʻuga, ua sui le vaai a Sarah i ona uso ma tuafāfine. Na ia taʻua atili: Na ou taumafai e malamalama i uiga e pele ai i latou iā Ieova.” Ae a i tatou? E lē tatau ona tatou mafaufau e sili atu i tatou nai lo o isi ona e lelei o tatou tulaga tauaʻoaʻoga. Pe a tatou matuā “alolofa i le ʻauuso atoa,” o le a tatou teena la le faailoga tagata.—1 Pete. 2:17.

 IA FAAALIA LE AGAGA TALIMĀLŌ

14. E tusa ai ma le Eperu 13:16, o ā faalogona o Ieova pe a tatou faaalia le agaga talimālō i isi?

14 E matuā tāua iā Ieova le agaga talimālō. (Faitau le Eperu 13:16.) E na te silasila i ai o se vaega o la tatou tapuaʻiga, aemaise lava pe a tatou fesoasoani iā i latou e lē tagolima. (Iako. 1:27; 2:14-17) O lea la, ua faalaeiau i tatou e le Tusi Paia ina “ia faaalia le agaga talimālō.” (Roma 12:13) E tatou te faaalia atu le naunau moni, faalogona māfana ma faaleuō pe a tatou talimālō. E fiafia le finagalo o Ieova pe a tatou tufa atu i isi se meaʻai māmā, se vaiinu, se meaʻai mamafa pe e uaʻi atu ma faaalu lo tatou taimi ma i latou. (1 Pete. 4:8-10) Peitaʻi, e ono iai ni māfuaaga e faigatā ai ona tatou faaalia le agaga talimālō.

“I taimi ua mavae, e leʻi masani ona ou faaalia le agaga talimālō, ae ua ou faia nei suiga ma ua ou fiafia tele ai” (Tagaʻi i le palakalafa e 16) *

15-16. (a) Aiseā e faatalatū ai nisi e faaalia le agaga talimālō? (e) Na mafai faapefea e Edit ona foʻia lona faatalatū e faaalia le agaga talimālō?

15 Atonu e tatou te faatalatū e faaalia le agaga talimālō ona o o tatou tulaga. Seʻi mātau le faaaʻoaʻoga a se fafine ua oti lana tane e igoa iā Edit. A o leʻi avea o ia ma Molimau, na sili atu iā te ia le faifaimea faatasi ma ni nai tagata. Na ia manatu e talafeagai ona talimālō isi nai lo o ia ona e lē fetaui ma lona tulaga.

16 Ina ua avea Edit ma Molimau, na sui le auala na ia mafaufau ai. Na ia faia ni taumafaiga ina ia mafai ai ona talimālō. Na ia faapea mai: “Ina ua fausia lo matou Maota mo Sauniga, na talosaga mai se toeaina, pe e mafai ona ou talimālō mo le lua vaiaso i se ulugalii o loo ō mai e fesoasoani i le galuega. Na ou manatua le fafine Sarefata ua oti lana tane na faamanuia e Ieova.” (1 Tu. 17:12-16) Na fiafia Edit e talimālō i lenei ulugalii. Pe na faamanuiaina o ia? Na ia taʻua: “E uma ane le lua vaiaso ua lua masina. Na matou atiaʻe se faauōga māfana i le taimi na matou nonofo ai.” Na faamanuiaina foʻi Edit i le iai o ni ana uō i le faapotopotoga. Ua avea nei o ia ma paeonia, ma e fiafia e valaaulia i lona fale mo se iputī ē e latou te galulue faatasi i le talaʻiga. Na ia faapea mai: “Maʻeu loʻu fiafia pe a ou  faaalia le agaga talimālō! O le mea moni, ua tauia aʻu i le tele o faamanuiaga.”​—Epe. 13:1, 2.

17. O le ā na iloa mulimuli ane e Luke ma lana ava?

17 Atonu o loo tatou faaalia le agaga talimālō, ae pe e mafai ona faaleleia? O se faaaʻoaʻoga, o Luke ma lana avā o se ulugalii e talimālō. O le la masaniga o le valaaulia o o la mātua, tauaiga, uō vavalalata, ma le ovasia matagaluega ma lana avā. Peitaʻi, na faapea mai Luke, “Na ou iloa mulimuli ane e na o ē e matou te māfana i ai na ma valaauliaina.” Na faapefea ona faaleleia e Luke ma lana avā le faaalia o le agaga talimālō?

18. Na faapefea ona faaleleia le agaga talimālō o Luke ma lana avā?

18 Na suia le mafaufau o Luke ma lana avā ina ua la manatunatu i upu nei a Iesu: “Auā o le ā se taui tou te maua pe afai tou te alolofa atu i ē o alolofa mai iā te outou?” (Mata. 5:45-47) Na la iloa ane e manaʻomia ona la faaaʻoaʻo iā Ieova, o Lē e aaofoaʻi i tagata uma. O lea, na la filifili ai loa e valaaulia uso ma tuafāfine e la te leʻi valaauliaina muamua. Na faapea mai Luke: “E matou te matuā fiafia uma i nei faatasitasiga. E matou te maua uma ai faalaeiauga ma atiaʻe ai.”

19. E faapefea ona tatou faamaonia atu o i tatou o soo o Iesu, ma o le ā ua e maumauaʻi e fai?

19 Ua tatou talanoaina o le matuā alofa o le tasi i le isi, e fesoasoani iā i tatou e avea ai ma ni ē e tausia le filemu, e lē faailoga tagata, ma e faaalia le agaga talimālō. E tatau ona tatou faatoʻilaloina so o se faalogona sesē, ma ia matuā alolofa i o tatou uso ma tuafāfine mai i le loto. O le faia faapea, o le a tatou maua ai le fiafia ma o le a faamaonia atu ai foʻi o i tatou moni o soo o Iesu.​—Ioa. 13:17, 35.

PESE 88 Ia Faailoa Mai iā te Aʻu Ou Ala

^ pala. 5 Na fetalai Iesu o le alofa o le faailoga lea e mātaulia ai Kerisiano moni. O lo tatou alofa mo o tatou uso ma tuafāfine, e uunaʻia ai i tatou e avea ma ni ē e tausia le filemu, e lē faailoga tagata, ma e faaalia le agaga talimālō. Atonu e lē faigofie i taimi uma. Ua saunia mai e lenei suʻesuʻega fautuaga aogā i le auala e faaauau ai ona matuā alofa le tasi i le isi mai i le loto.

^ pala. 5 Ua suia nisi igoa i lenei mataupu.

^ pala. 57 FAAMATALAGA O ATA: E leʻi taulau se taumafaiga muamua a se tuafafine e foʻia se faafitauli, peitaʻi e leʻi fiu ai o ia. O ana taumafaiga faifai pea e faaalia le alofa na maua ai iʻuga lelei.

^ pala. 59 FAAMATALAGA O ATA: O se uso matua o loo ia lagona le faaesea o ia e isi i le faapotopotoga.

^ pala. 61 FAAMATALAGA O ATA: O se tuafafine na faatalatū e faaalia le agaga talimālō ae ua suia lona mafaufau ma iʻu ai i le mauaina o le fiafia.