Alu i mataupu o loo iai

Alu i le lisi o mataupu

 SUʻESUʻEGA 10

Le Alofa ma le Lototalisapaia mo Ieova e Uunaʻia ai e Papatiso

Le Alofa ma le Lototalisapaia mo Ieova e Uunaʻia ai e Papatiso

“O le ā se mea e taofia ai aʻu mai i le papatisoina?”​—GALU. 8:36.

PESE 37 Auauna iā Ieova ma le Lotoatoa

AOTELEGA *

1-2. E pei ona faaalia i le Galuega 8:27-31, 35-38, o le ā na uunaʻia ai le eunuka Aitiope e papatiso?

PE E te manaʻo e papatiso ma avea ma soo o Keriso? O le alofa ma le lototalisapaia na uunaʻia ai le toʻatele e fai lenā filifiliga. Seʻi mātau le faaaʻoaʻoga a se tagata maualuga mai i Aitiope na auauna i le masiofo o lenā atunuu.

2 Na vave ona faatatau e le tagata Aitiope mea na ia aʻoaʻoina mai i Tusitusiga Paia. (Faitau le Galuega 8:27-31, 35-38.) O le ā na uunaʻia ai o ia? E manino mai na ia talisapaia Afioga a le Atua. Na ia faitauina se vaega o le tusi o Isaia a o ia faimalaga i lana kariota. Ina ua talanoa atu Filipo iā te ia, na talisapaia e lenei tamāloa mea na faia e Iesu mo ia. Ae aiseā na faimalaga ai lenei tagata maualuga i Ierusalema? Ona na ia atiaʻe le alofa mo Ieova. E faapefea ona tatou iloa? Talu ai o lea faatoʻā foʻi mai na tapuaʻi iā Ieova i Ierusalema. Na tuua e lenei tamāloa le lotu na ola aʻe ai, ae faatasi atu i le nuu e tasi na tuuina atu i le Atua moni. O lenā alofa mo Ieova na uunaʻia ai o ia e uia se isi laasaga tāua, o le papatisoina ma avea ma soo o Keriso.​—Mata. 28:19.

3. O le ā e ono taofia ai se tasi mai i le papatisoina? (Tagaʻi i le pusa “ O ā Mea o Loo i Lou Loto?”)

3 O le alofa mo Ieova e uunaʻia ai oe e papatiso. Ae o le alofa foʻi e ono taofia ai oe mai i le papatisoina. E faapefea? Seʻi mātau nisi o faaaʻoaʻoga. Atonu e te alofa tele i ou tauaiga ma uō lē talitonu, ma e te ono popole o le a latou inosia oe pe a  e papatiso. (Mata. 10:37) Pe atonu e te fiafia i masaniga e te iloa e inosia e le Atua, ma e ono faigatā ona e tuua na masaniga. (Sala. 97:10) Pe na e ola aʻe foʻi ua e masani i le faamanatuina o aso faamanatu a lotu sesē. Atonu e lē galo iā te oe mea mananaia na e fiafia ai i na aso faamanatu. O le māfuaaga lenā atonu e faigatā ai iā te oe ona taofia le faamanatuina o aso faamanatu e lē fiafia i ai Ieova. (1 Kori. 10:20, 21) O lea ua e fesagaʻia ai lenei fesili, “O le ā le mea e sili ona ou fiafia i ai ma o ai e sili ona ou alofa i ai?”

LE ALOFA E SILI ONA TĀUA

4. O le ā le uunaʻiga autū e te papatiso ai?

4 E tele mea lelei e te fiafia i ai ma e talisapaia. O se faataʻitaʻiga, atonu na e atiaʻe se talisapaia loloto mo le Tusi Paia ae e te leʻi suʻesuʻe ma Molimau a Ieova. Atonu foʻi na e atiaʻe le alofa mo Iesu. O lea ua e iloa Molimau a Ieova, atonu la o loo e fiafia e faatasitasi ma i latou. Ae o le fiafia i na mea, e lē faapea ai ua e manaʻo e tuuina atu oe mo Ieova ma papatisoina. O le uunaʻiga autū e te papatiso ai ona o lou alofa mo Ieova. Pe a sili atu lou alofa iā Ieova nai lo o se tagata po o se isi lava mea, o le a leai la se mea po o se isi e mafai ona taofia oe mai i le auauna atu iā te ia. O lou alofa mo Ieova o le a uunaʻia ai oe e papatiso, ma o le a fesoasoani foʻi iā te oe e tumau faamaoni ai iā Ieova pe a māeʻa ona e papatiso.

5. O le ā o le a tatou talanoaina i lenei mataupu?

5 Na faapea mai Iesu e tatau ona tatou alolofa iā Ieova ma o tatou lotoatoa, ola atoa, mafaufau atoa ma le malosi atoa. (Mare. 12:30) E faapefea ona faalolotoina lo tatou alofa ma lo tatou faaaloalo mo Ieova? O le mafaufau loloto i le alofa tele o Ieova mo i tatou, o le a uunaʻia ai i tatou e alolofa iā te ia. (1 Ioa. 4:19) O ā uiga ma gaoioiga e faigofie ona e maua pe a e atiaʻe lenā alofa e sili ona tāua? *

6. E tusa ai ma le Roma 1:20, o le ā se tasi o auala e te aʻoaʻoina ai e faatatau iā Ieova?

6 Ia aʻoaʻoina oe e faatatau iā Ieova e ala i ana foafoaga. (Faitau le Roma 1:20; Faaa. 4:11) Ia mafaufau loloto i le atamai o Ieova o loo faaalia i le auala na foafoaina ai manu ma laau. Ia iai sina malamalamaaga i le auala mataʻina na foafoaina ai o tatou tino. (Sala. 139:14) Ia mafaufau foʻi i le malosiaga na tuu e Ieova i le lā, ma ia iloa o le lā o se tasi o fetu mai i le faitau piliona o fetu. * (Isa. 40:26) Pe a e faia faapea, o le a faalolotoina ai lou faaaloalo mo Ieova. Peitaʻi, o lou iloa o le atamai ma le malosi o Ieova ua na o se vaega o le faavae o lau faiā ma ia. Ina ia faamalosia lou alofa mo Ieova, e tatau ona e iloa isi mea e uiga iā te ia.

7. Ina ia faalolotoina lou alofa mo Ieova, o le ā e tatau ona e mautinoa i ai?

7 E tatau ona e mautinoa e manatu mamafa mai Ieova iā te oe. Pe e faigatā ona e talitonu e silafia oe e Lē na foafoaina le lagi ma le lalolagi ma e manatu mamafa mai iā te oe? Pe afai o lea, ia e manatua “e lē o mamao o ia [Ieova] mai iā i tatou taʻitoʻatasi.” (Galu. 17:26-28) E “suʻesuʻe e Ieova loto uma lava,” ma ua ia folafola mai iā te oe lenā mea e pei ona taʻu atu e Tavita iā Solomona, “afai e te saʻili iā te ia, ona e maua lea o ia.” (1 No. 28:9) O le mea moni, o le māfuaaga o loo e suʻesuʻeina ai le Tusi Paia ona ua faapea mai Ieova, ʻna ou tosina mai oe.’ (Iere. 31:3) O le tele o lou talisapaia o mea uma na faia e  Ieova mo oe, o le loloto foʻi lenā o lou alofa mo ia.

8. E faapefea ona e tali atu i le alofa o Ieova?

8 O se tasi o auala e te tali atu ai i le alofa o Ieova, o lou talanoa lea iā te ia i le tatalo. O le a tuputupu aʻe lou alofa i le Atua a o e taʻu atu iā te ia ou popolega, ma faafetai atu iā te ia i mea uma ua ia faia mo oe. O le a faamalosia la oulua faauōga ma Ieova a o e mātauina le auala e tali mai ai i au tatalo. (Sala. 116:1) O le a mafai ona e mautinoa ai e malamalama o ia iā te oe. Ae ina ia e vavalalata atu iā Ieova, e manaʻomia ona e malamalama i le auala e mafaufau ai Ieova. E manaʻomia foʻi ona e iloa mea o loo ia faafinagaloina mai iā te oe. E na o le pau le auala e te iloa ai le mafaufau o Ieova ma lona finagalo, o le suʻesuʻeina lea o lana Afioga le Tusi Paia.

O le auala sili e tatou te vavalalata atu ai i le Atua ma iloa mea e na te faafinagaloina mai iā i tatou, o le suʻesuʻeina o le Tusi Paia (Tagaʻi i le palakalafa e 9) *

9. E faapefea ona e faaalia e te talisapaia le Tusi Paia?

9 Ia aʻoaʻoina oe e talisapaia le Afioga a le Atua le Tusi Paia. E na o le Tusi Paia o loo iai le upu moni e faatatau iā Ieova ma ana fuafuaga mo oe. E faaalia lou talisapaia o le Tusi Paia e ala i le faitau i ai i aso taʻitasi, sauniuni lelei mo lau suʻesuʻega faale-Tusi Paia, ma faatatau mea ua e aʻoaʻoina. (Sala. 119:97, 99; Ioa. 17:17) Pe e iai sau faasologa o le faitauga Tusi Paia? Po o e faamautinoa o loo e faitauina le Tusi Paia i aso taʻitasi?

10. O le ā se vala e tutasi ai le Tusi Paia?

10 O se tasi o vala e tutasi ai le Tusi Paia, ona o loo iai faamatalaga a i latou na vaaitino iā Iesu. E na o le pau na o faamaumauga saʻo aʻiaʻi o loo faamatalaina ai mea na faia e Iesu mo oe. A o e aʻoaʻoina faamatalaga ma mea na faia e Iesu, e ono uunaʻia ai oe e atiaʻe se faauōga ma ia.

11. E faapefea ona aʻoaʻoina oe ia alofa iā Ieova?

11 Ia aʻoaʻoina oe e alofa iā Iesu. Pe a e alofa iā Iesu o le a faateleina ai lou alofa mo Ieova. Aiseā? Talu ai o loo faaatagia mai e Iesu uiga lelei atoatoa o lona Tamā. (Ioa. 14:9) O lea, o le tele e te aʻoaʻoina ai mea e faatatau iā Iesu, o le tele foʻi lenā o lou malamalama ma lou talisapaia o Ieova. Seʻi mafaufau i le alofa mutimutivale na faaalia e Iesu iā i latou na inosia  e isi ona e matitiva, mamaʻi ma vaivai. Ia mafaufau foʻi i fautuaga aogā ua ia avatu iā te oe ma le auala e faaleleia ai lou olaga pe a e faalogo iā te ia.​—Mata. 5:1-11; 7:24-27.

12. O le ā e ono uunaʻia oe e fai a o e aʻoaʻoina e faatatau iā Iesu?

12 O le a matuā faamalosia lo tatou alofa mo Iesu pe a mafaufau loloto i le taulaga na ia faia ina ia faamagaloina ai a tatou agasala. (Mata. 20:28) Pe a e malamalama na lotomalie Iesu e maliu mo oe, e ono uunaʻia ai oe e faaalia le salamō ma saʻili le faamagaloga a Ieova. (Galu. 3:19, 20; 1 Ioa. 1:9) O le tele e te alofa ai iā Ieova ma Iesu, o le tele foʻi lenā o lou manaʻo e faatasitasi ma i latou e alolofa iā i laʻua.

13. O le ā ua saunia e Ieova mo oe?

13 Ia aʻoaʻoina oe e alofa i le aiga o Ieova. Atonu e lē malamalama lou aiga lē talitonu ma au uō na iai, i le māfuaaga ua e manaʻo ai e tuuina atu oe mo Ieova. Atonu e latou te tetee atu iā te oe, ae ua saunia e Ieova se aiga faaleagaga e fesoasoani iā te oe. Pe afai e te vavalalata atu i lenā aiga faaleagaga, o le a e maua la le alofa ma le fesoasoani o loo e manaʻomia. (Mare. 10:29, 30; Epe. 10:24, 25) Atonu e iai se taimi, o le a faatasi mai ai ou tauaiga e auauna iā Ieova ma ola e tusa ai ma ana tapulaa.​—1 Pete. 2:12.

14. E pei ona taʻua i le 1 Ioane 5:3, o le ā ua e iloa e faatatau i tapulaa a Ieova?

14 Ia aʻoaʻoina oe e talisapaia ma faatatau tapulaa a Ieova. Ae e te leʻi iloaina Ieova, atonu na iai au lava tapulaa, ae o lea ua e iloa nei e sili atu ona lelei tapulaa a Ieova. (Sala. 1:1-3; faitau le 1 Ioane 5:3.) Seʻi manatu i fautuaga a le Tusi Paia i tane, avā, mātua ma fanau. (Efe. 5:22–6:4) Pe na e mātauina le faaleleia o le siʻomaga o lou aiga ona o lou faatatauina o na tapulaa? Po ua faaleleia au masaniga, ona o lou usitaʻia o taʻiala a Ieova i le auala e filifili ai ma le atamai aumea? Po o faateleina lou fiafia? (Faata. 13:20; 1 Kori. 15:33) E lē taumatea o le tali o na fesili o le ioe.

15. O le ā e mafai ona e faia pe a e manaʻomia le fesoasoani e faatatauina ai mataupu silisili o le Tusi Paia?

15 Atonu e iai taimi e faigatā ai ona e iloa le auala e faatatau ai mataupu silisili o le Tusi Paia o loo e aʻoaʻoina. O le māfuaaga lea e faaaogā ai e Ieova lana faalapotopotoga e saunia mataupu faale-Tusi Paia, e fesoasoani iā te oe e iloa le mea saʻo ma le mea sesē. (Epe. 5:13, 14) Pe a e faitau ma suʻesuʻe i nei mataupu faale-Tusi Paia, o le a e iloa ai le aogā ma le tāua o nei mataupu, ma atonu o le a e tosina atu ai i le faalapotopotoga a Ieova.

16. Ua faapefea ona faamaopoopo e Ieova ona tagata?

16 Ia aʻoaʻoina oe ia alofa ma lagolagosua i le faalapotopotoga a Ieova. Ua faamaopoopo e Ieova ona tagata i ni faapotopotoga; ma o lona Alo o Iesu o le ulu lea o faapotopotoga uma. (Efe. 1:22; 5:23) Ua tofia e Iesu se vaega toʻaitiiti o tane faauuina e taʻimua i le faamaopoopoina o le galuega o loo ia finagalo e fai i aso nei. Na taʻua e Iesu lenei vaega o tane, o “le pologa faamaoni ma le faautauta” ma e latou te matuā faatāua la latou matafaioi o le fafaga ma puipuia o oe faaleagaga. (Mata. 24:45-47) O se tasi o auala e fesoasoani mai ai iā te oe le pologa faamaoni, o le faamautinoa lea ua tofia toeaina agavaa e leoleoina oe. (Isa. 32:1, 2; Epe. 13:17; 1 Pete. 5:2, 3) E lotomalilie toeaina e fai so o se mea e faamāfanafana atu ai iā te oe ma fesoasoani ia e vavalalata atu pea iā Ieova. Ae o se tasi o mea e sili ona tāua e latou te faia, o le fesoasoani atu lea ia e aʻoaʻoina isi e faatatau iā Ieova.​—Efe. 4:11-13.

17. E tusa ai ma le Roma 10:10, 13, 14, aiseā e tatau ai ona tatou talanoa atu i isi e faatatau iā Ieova?

 17 Ia aʻoaʻoina isi ia alolofa iā Ieova. Na faatonuina e Iesu ona soo e aʻoaʻo isi e uiga iā Ieova. (Mata. 28:19, 20) E faigofie ona tatou usitaʻia lenā faatonuga ona o se tiute e tatau ona tatou faia. Ae pe a tuputupu aʻe lou alofa mo Ieova, o le a tutusa ou faalogona ma faalogona o aposetolo o Peteru ma Ioane o ē na faapea mai: “E lē mafai ona ma lē taʻu atu mea ua ma vāai ma faalogo i ai.” (Galu. 4:20) O le a e matuā fiafia lava pe a e aʻoaʻoina se tasi ia alofa iā Ieova. Seʻi faaata le olioli tele o le faievagelia o Filipo, ina ua ia fesoasoani i le tagata Aitiope e aʻoaʻoina le upu moni o loo i Tusitusiga Paia ma papatisoina. Pe a e faaaʻoaʻo iā Filipo ma usitaʻia le faatonuga a Iesu ia talaʻi, ua faamaonia atu ai o loo e manaʻo e avea oe ma Molimau a Ieova. (Faitau le Roma 10:10, 13, 14.) I lenā taimi atonu o le a e fesili e pei o le tagata Aitiope: “O le ā se mea e taofia ai aʻu mai i le papatisoina?”​—Galu. 8:36.

18. O le ā o le a tatou talanoaina i le mataupu e sosoo mai?

18 O le a e faia le filifiliga e sili ona tāua i lou olaga pe a e filifili e te papatiso. Ona o se filifiliga e sili ona tāua, e manaʻomia la ona e iloilo ma le faaeteete mea e aofia ai. O le ā e manaʻomia ona e iloa e faatatau i le papatisoga? O le ā e manaʻomia ona e faia ae e te leʻi papatiso ma pe a uma foʻi ona e papatiso? O le a taliina i le mataupu e sosoo mai na fesili.

PESE 2 O Ieova o Lou Suafa Lea

^ pala. 5 O nisi e alolofa iā Ieova ae e lē o mautinoa po ua sauni e papatiso ina ia avea ma se tasi o ana Molimau. Pe afai o ou lagona na, o le a fesoasoani lenei suʻesuʻega iā te oe e iloilo ai auala aogā e te faia e uunaʻia ai oe e papatiso.

^ pala. 5 E eseese tagata, o nisi atonu e ese le auala e latou te faatulaga ai le faatatauina o fautuaga o loo i lenei mataupu mai i le auala o loo faatulaga atu ai i inei.

^ pala. 6 Mo nisi faaaʻoaʻoga, tagaʻi i polosiua Was Life Created? ma le The Origin of Life—Five Questions Worth Asking.

^ pala. 61 FAAMATALAGA O ATA: O se tuafafine o loo avatu se sāvali i se teine talavou o loo feiloaʻi i ai a o fai lana faatau.