Alu i mataupu o loo iai

Alu i le lisi o mataupu

 SUʻESUʻEGA 26

“Ia Foʻi Mai iā te Aʻu”

“Ia Foʻi Mai iā te Aʻu”

“Ia foʻi mai iā te aʻu ona ou foʻi atu lea iā te outou.”​—MALA. 3:7.

PESE 102 ʻFesoasoani i Ē ua Vaivai’

AOTELEGA *

1. O ā faalogona o Ieova pe a laveaʻiina sana mamoe na sē ese?

E PEI ona talanoaina i le mataupu ua mavae, na faatusaina e Ieova o ia lava i se leoleo mamoe lelei e alofa faapelepele i ana mamoe taʻitoʻatasi. E na te saʻilia foʻi so o se tasi ua sē ese mai i le lafu. Na fetalai Ieova i tagata Isaraelu na tuua o ia: “Ia foʻi mai iā te aʻu ona ou foʻi atu lea iā te outou.” E tatou te iloa o faalogona foʻi na o Ieova i aso nei, auā na ia fetalai: “Ou te lē liliu lava.” (Mala. 3:6, 7) Na fetalai Iesu e matuā olioli Ieova ma agelu, pe a toe foʻi mai iā Ieova sana auauna na sē ese.​—Luka 15:10, 32.

2. O le ā o le a iloiloina i lenei mataupu?

2 Seʻi o tatou iloilo ni talafaatusa se tolu a Iesu o loo uaʻi atu i le fesoasoani i ē ua sē ese mai iā Ieova. O le a tatou talanoa foʻi uiga patino e tatou te manaʻomia, ina ia mafai ai ona fesoasoani i se mamoe ua sē ese ina ia toe foʻi mai. O le a tatou iloa ai foʻi le tele o le olioli e maua pe a tatou fesoasoani i ē ua vaivai.

SAʻILIA SE TUPE SILIVA NA LEILOA

3-4. Aiseā na suʻe māeʻaeʻa ai e le fafine o loo faamauina i le Luka 15:8-10, lana tupe siliva na leiloa?

3 E manaʻomia tatou taumafaiga malolosi ina ia saʻilia ai i latou ua mananaʻo e toe foʻi mai iā Ieova. I le talafaatusa o loo faamauina i le Evagelia a Luka, na faamatala ai e Iesu le auala na suʻe ai e se fafine se mea tautele na leiloa, o le tupe siliva e taʻua o le tarakama. O loo uaʻi atu lenei talafaatusa i taumafaiga malolosi a le fafine e suʻe le tupe siliva.​—Faitau le Luka 15:8-10.

4 Na faamatala e Iesu faalogona o le fafine ina ua maua lana tupe siliva tautele na leiloa. I aso o Iesu, e foliga mai na avatu e se tinā Iutaia i sana tama teine, ni tupe siliva se sefulu o le tarakama i le aso e faaipoipo ai. Atonu la o se tupe siliva faapena lea ua leiloa a lenei fafine. Na manatu le fafine na paʻū le tupe i totonu o lona fale, o lea ua ia tutu ai lana molī ma taumafai  e suʻe. Ae e na te leʻi mauaina le tupe siliva, ona atonu e leʻi malamalama lelei lana molī e iloa atu ai. Mulimuli ane, ua ia salu le fale atoa ma ua ia vaaia ai i se faaputuga o pefu le iila mai o lana tupe siliva, ina ua suluia i le malamalama o le molī. Maʻeu le fiafia o le fafine! Ua ia valaau atu i ana uō ma tuaoi ma faamatala atu i ai le tala fiafia.

5. Aiseā e ono faigatā ai ona maua i latou ua tuua le faapotopotoga?

5 E pei ona mātauina i le talafaatusa a Iesu, e manaʻomia ni taumafaiga malolosi ina ia saʻilia ai se mea ua leiloa. I se tulaga taitutusa, e manaʻomia ni a tatou taumafaiga malolosi ina ia saʻilia ai i latou ua tuua le faapotopotoga. Atonu ua tele tausaga talu ona latou lē toe aufaatasi ma i tatou, pe ua siitia foʻi i se isi vaipanoa ma e lē iloa i latou e uso o loo iai i inā. Ae o le taimi lea, atonu ua matuā naunau nisi o i latou e toe fia foʻi mai iā Ieova. E latou te mananaʻo e auauna iā Ieova faatasi ma ona tagata tapuaʻi moni, ae e latou te manaʻomia la tatou fesoasoani.

6. E faapefea ona fesoasoani tagata uma o le faapotopotoga ina ia saʻilia ē ua lē o toe talaʻi?

6 O ai e mafai ona fesoasoani i le saʻilia o i latou ua lē o toe talaʻi? E mafai e tagata uma o le faapotopotoga ona fesoasoani, e aofia ai toeaina, paeonia, tauaiga ma tagata talaʻi o le faapotopotoga. Pe e iai sau uō po o sou tauaiga ua lē o toe talaʻi? Pe na e feiloaʻi i se tasi ua lē o toe talaʻi, a o e talaʻi mai i lea fale i lea fale pe i nofoaga faitele? Ia faamatala i le tagata pe a manaʻo e asiasi atu se tasi iā te ia, o le a e fiafia e avatu i toeaina o le faapotopotoga lona tuatusi ma le numera o lana telefoni.

7. O le ā e te aʻoaʻoina mai i le faamatalaga a le uso toeaina o Thomas?

7 Ua iai i toeaina le tiute tauave autū o le saʻilia o i latou ua lē o toe talaʻi, ua mananaʻo e toe foʻi iā Ieova. E faapefea ona latou faia faapea? Seʻi mātau le faamatalaga a Thomas, * o se toeaina mai i Sepania na fesoasoani i Molimau e silia ma le toʻa 40, ina ia toe foʻi mai i le faapotopotoga. Ua faapea mai o ia: “Muamua, ou te fesili i uso ma tuafāfine pe e latou te iloa le mea e nofo ai se tasi ua lē o toe talaʻi. Po ou te fesili foʻi i tagata talaʻi pe e latou te iloa se tasi ua lē o toe auai mai i sauniga. O le toʻatele i le faapotopotoga e tali fiafia mai ma e mananaʻo e fesoasoani mai. Mulimuli ane pe a ou asiasi i le uso po o le tuafafine ua lē o toe talaʻi, ou te fesili i ai e faatatau i lana fanau ma isi ona tauaiga. O nisi ua lē o toe talaʻi, sa masani ona aumai a latou fanau i sauniga, ma atonu na iai se taimi na avea ai nei tamaiti ma tagata talaʻi. E manaʻomia foʻi ona fesoasoani iā i latou ia toe foʻi mai iā Ieova.”

IA TOE FAAFOʻI MAI ATALII MA AFAFINE O IEOVA UA LEILOLOA

8. I le talafaatusa i le atalii na leiloa o loo i le Luka 15:17-24, na faapefea ona feutagaʻi le tamā ma lona atalii ua salamō?

8 O ā uiga e tatau ona iā i tatou ina ia fesoasoani ai i ē ua mananaʻo e toe foʻi mai iā Ieova? Ia mātau nisi o lesona mai i le talafaatusa a Iesu i le atalii na tuua lona aiga. (Faitau le Luka 15:17-24.) Na faamatala e Iesu, na mulimuli ane toe sagatonu le mafaufau o le atalii ma filifili e toe foʻi i lona aiga. Na tamoʻe atu le tamā e faafeiloaʻi lona atalii ma fusi iā te ia, ma faamautinoa atu i ai lona alofa. Na ōia le lotofuatiaifo o le atalii ma manatu e lē aogā ona toe taʻua o ia o se atalii. Na tigā alofa le tamā i lona atalii a o faailoa atu ona faalogona. Na faia loa e le tamā ni gaoioiga, e faamautinoa atu ai i lona atalii lona fiafia ua toe foʻi mai i lo latou aiga o se atalii  e pele iā te ia, ae e lē o se tagata faigaluega. Ina ia faamaonia atu lona alofa i lona atalii, na ia faia ai se faigaʻai ma avatu i lona atalii ua salamō ni ofu e sili ona lelei.

9. O ā uiga e ao ona iā i tatou ina ia fesoasoani ai i ē ua lē o toe talaʻi, ina ia toe foʻi mai iā Ieova? (Tagaʻi i le pusa “ Auala e Fesoasoani ai i Ē ua Toe Fia Foʻi iā Ieova.”)

9 E pei Ieova o le tamā i lenā talafaatusa. E alofa o ia i o tatou uso ma tuafāfine ua lē o toe talaʻi, ma e finagalo ia latou toe foʻi mai iā te ia. E mafai ona tatou fesoasoani iā i latou e toe foʻi mai, e ala i le faaaʻoaʻo iā Ieova. E manaʻomia ai lo tatou alofa, onosaʻi, ma le tigā alofa. Aiseā e ao ai ona tatou faaalia na uiga, ma e faapefea ona tatou faia faapea?

10. Aiseā e tāua ai le onosaʻi a o fesoasoani i se tasi ia toe malosi faaleagaga?

10 E tatou te manaʻomia le onosaʻi ona e umi se taimi faatoʻā toe malosi faaleagaga se tasi. Ua taʻutino mai le toʻatele o ē sa lē toe talaʻi, na faatoʻā amata ona latou toe auauna iā Ieova ina ua mavae le tele o taimi na asiasi atu ai toeaina ma isi o le faapotopotoga. Na tusi mai Nancy o se tuafafine mai i Asia e faapea: “Na fesoasoani tele iā te aʻu se tasi o aʻu uō lelei i le faapotopotoga. Sa alofa iā te aʻu e pei lava o soʻu uso matua. Na ia faamanatu mai taimi sa ma fiafia faatasi ai, faalogologo mai ma le onosaʻi a o faaleo atu oʻu faalogona, ma e leʻi faatalatū e aumai ni fautuaga. Na avea o ia o se uō moni na nofosauni e fesoasoani mai i so o se taimi.”

11. Aiseā e tatou te manaʻomia ai le tigā alofa ina ia faatoʻafilemu ai faalogona tigā?

11 O le tigā alofa o se vaifofō aogā e fesoasoani e faatoʻafilemu ai faalogona tigā. O nisi ua lē o toe talaʻi, ua tele tausaga o tauivi ma faalogona tigā i se tasi o le faapotopotoga. O na  faalogona ua faigatā ai ona toe foʻi iā Ieova. E ono manatu nisi e lē tonu le auala na feutagaʻi ai isi ma i latou. E latou te ono manaʻomia se tasi e faalogologo atu iā i latou ma malamalama i o latou faalogona. (Iako. 1:19) Ua faapea mai María lea sa iai se taimi na lē toe talaʻi ai: “Na ou manaʻomia se tasi e faalogologo mai iā te aʻu, faamāfanafana mai ma aumai ni fautuaga e fesoasoani iā te aʻu.”

12. Ia faataʻitaʻi le auala e tosina mai ai e le alofa o Ieova ē ua lē toe talaʻi ina ia toe aufaatasi ma ona tagata.

12 Ua faamatalaina i le Tusi Paia le alofa o Ieova mo ona tagata, e pei o se maea. I le ā le itu? Ia mātau le faataʻitaʻiga lenei: Seʻi faapea ua e tau malemo i le sami sousou ma ua togi atu e se tasi se ofu faaola iā te oe. E mautinoa e te talisapaia le fesoasoani auā ua faigofie ai ona e faaopeopea. Ae e lē lava le ofu faaola ina ia faasaoina ai lou ola, auā o loo mālūlū le vai ma e faatoʻā faasaoina oe pe a e iai i se vaa faaola. E te manaʻomia se tasi e na te togiina atu se maea e toso mai ai oe i le vaa. Na fetalai Ieova e faatatau i tagata Isaraelu na sē ese: “Na ou tosina mai pea i latou i maea . . . o le alofa.” (Ho. 11:4) E faapena faalogona o le Atua i aso nei e faatatau i ē ua lē o toe auauna iā te ia, ma ua lofitūina i faafitauli ma popolega. E finagalo Ieova ina ia latou iloa e alofa tele iā i latou, ma ia latou tosina atu iā te ia. E mafai foʻi ona faaaogā oe e Ieova ina ia faaalia atu lenā alofa.

13. Ia faamatala se mea na tupu e iloa ai le tāua o le alofa faaleuso.

13 E tāua le faamautinoa atu i ē ua lē o toe talaʻi, e alofa Ieova iā i latou ma e tatou te alolofa foʻi iā i latou. Ua faapea mai Pablo lea na taʻua i le mataupu na muamua atu, na lē toe talaʻi i le silia ma le 30 tausaga: “A o ou  alu ese mai i loʻu fale i se tasi taeao, na sau se tuafafine matua agalelei ma talanoa mai i se auala alofa. Na amata ona ou tagi e pei o se tamaitiiti ma ou fai atu iā te ia, e pei na auina mai o ia e Ieova e talanoa mai iā te aʻu. O le taimi lava lenā na ou filifili ai e toe foʻi iā Ieova.”

FESOASOANI MA LE ALOFA I Ē UA VAIVAI

14. I le talafaatusa o loo i le Luka 15:4, 5, o le ā le mea na faia e le leoleo mamoe ina ua maua lana mamoe?

14 E manaʻomia ona tatou fesoasoani pea ma faalaeiau i ē ua lē o toe talaʻi. E pei o le atalii i le talafaatusa a Iesu, atonu o loo latou matuā mafatia i le itu tau faalogona. Atonu foʻi ua latou vaivai faaleagaga ona o ni mea na tutupu a o latou iai i le lalolagi a Satani. E manaʻomia ona tatou fesoasoani iā i latou ina ia toe faamalosia lo latou faatuatua iā Ieova. I le talafaatusa i le mamoe na leiloa, na faamatala ai e Iesu le faafuata e le leoleo mamoe o lana mamoe i lona tauau, ma ave o ia i le mea o loo iai le lafu. E ui na alu le taimi ma le malosi o le leoleo mamoe e suʻe ai lana mamoe na leiloa, ae na ia iloa e manaʻomia ona ia siiina le mamoe, ona ua leai sona malosi e savali ai i le mea o loo iai le lafu.​—Faitau le Luka 15:4, 5.

15. E faapefea ona tatou fesoasoani i ē ua vaivai ae ua toe fia foʻi mai iā Ieova? (Tagaʻi i le pusa “ Se Meafaigaluega Matuā Aogā.”)

15 E ono manaʻomia ona faaalu lo tatou taimi ma le malosi e fesoasoani ai i ē ua lē o toe talaʻi, ina ia manumalo mai i o latou vaivaiga. E mafai ona tatou fesoasoani iā i latou ina ia toe malolosi faaleagaga, e ala i le agaga o Ieova, o lana Afioga, ma lomiga ua saunia mai e le faalapotopotoga. (Roma 15:1) E faapefea ona tatou faia faapea? Ua faapea mai se tasi toeaina e iai le poto masani, “O le  toʻatele o ē ua lē o toe talaʻi, e mananaʻo e toe faia ni a latou suʻesuʻega faale-Tusi Paia pe afai ua filifili ua toe fia foʻi moni mai iā Ieova.” * O lea, afai e talosagaina oe e suʻesuʻe ma se tasi ua lē o toe talaʻi, ia talia fiafia lenā faaeaga. Ua faapea atili mai le toeaina, “O lē e toe suʻesuʻe ma se tasi ua lē o toe talaʻi, e manaʻomia ona avea o se uō moni ma o se tasi e saʻoloto i ai le talanoa a lē ua lē o toe talaʻi.”

OLIOLI I LE LAGI MA LE LALOLAGI

16. E faapefea ona tatou iloa e fesoasoani mai agelu iā i tatou?

16 E tele mea ua tutupu e tatou te iloa ai o loo tatou galulue faatasi ma agelu, i le saʻilia o i latou ua lē o toe talaʻi ae ua toe fia foʻi mai iā Ieova. (Faaa. 14:6) O se faataʻitaʻiga, na tatalo faatauanau Silvio mai Ekutoa, mo se tasi e fesoasoani iā te ia ina ia toe foʻi mai i le faapotopotoga. A o tatalo o ia, ae taunuu ane loa ni toeaina se toʻalua i lona fale. Na amata mai i lenā asiasiga ona la fiafia e saunia se fesoasoani mo Silvio.

17. O le ā le taui e tatou te maua mai i le fesoasoani i ē ua vaivai faaleagaga?

17 O le a tatou maua le olioli mai i le fesoasoani i ē ua vaivai faaleagaga e toe foʻi iā Ieova. Ia mātau le faamatalaga a Salvador, o se paeonia o lē e faia ni ana taumafaiga faapitoa e fesoasoani ai i ē ua lē toe talaʻi. Ua faapea mai o ia: “O nisi taimi e faigatā ona tatali oʻu loimata ona o loʻu fiafia. E ese le faamalieina o aʻu pe a ou mafaufau ua laveaʻiina e Ieova se tasi o ana mamoe pele mai i le lalolagi a Satani, ma ua ou toe maua le faaeaga e galulue ai ma Ieova i lea galuega.”​—Galu. 20:35.

18. Pe afai ua e lē toe talaʻi, o le ā e te mautinoa i ai?

18 Pe afai e te lē o toe aufaatasi ma tagata o Ieova, ia e mautinoa o loo alofa pea Ieova iā te oe. E finagalo o ia ina ia e toe foʻi mai iā te ia. E iai gaoioiga e manaʻomia ona e faia ina ia toe foʻi ai iā Ieova. E pei o le tamā i le talafaatusa a Iesu, o loo faatalitali ma le naunautaʻi Ieova i lou toe foʻi mai, ma o le a ia talia fiafia oe i lona aiga.

PESE 103 O Leoleo Mamoe​—O Meaalofa i Tagata

^ pala. 5 E finagalo Ieova ia toe foʻi mai iā te ia i latou e lē o toe auaufaatasi ma le faapotopotoga. E tele mea e mafai ona tatou faia ina ia faalaeiau ai i ē e mananaʻo e talia le valaaulia a Ieova: “Ia foʻi mai iā te aʻu.” I lenei mataupu, o le a talanoaina ai auala e tatou te fesoasoani ai iā i latou e faia faapea.

^ pala. 7 Ua suia nisi igoa.

^ pala. 15 E mafai ona fesoasoani i nisi ua lē o toe talaʻi e ala i le suʻesuʻe i nisi o vaega o le tusi Auala e Tumau ai i le Alofa o le Atua. O isi foʻi ua latou maua aogā mai i le toe iloiloina o mataupu o le tusi Faalatalata Atu iā Ieova. E filifili e le Komiti o le Auaunaga a le Faapotopotoga se tasi e sili ona agavaa e toe suʻesuʻe ma se tasi ua lē o toe talaʻi.

^ pala. 68 FAAMATALAGA O ATA: O loo saunia e ni uso eseese se toʻatolu se fesoasoani mo se uso ua fia foʻi mai iā Ieova. E latou te faia faapea e ala i le fesootaʻi pea ma le uso, faamautinoa atu i ai e alofagia o ia, ma faalogologo atu ma malamalama i ona faalogona.