Alu i mataupu o loo iai

Alu i le lisi o mataupu

 SUʻESUʻEGA 23

“Ia Faapaiaina Lou Suafa”

“Ia Faapaiaina Lou Suafa”

“Ieova e, e faavavau lava lou suafa.”​—SALA. 135:13.

PESE 10 Ia Viia Ieova lo Tatou Atua!

AOTELEGA *

1-2. O ā mataupu e sili ona tāua i Molimau a Ieova?

O LOO tatou feagai ma mataupu e sili ona tāua i aso nei, o le pule silisili ese a le Atua ma le faapaiaina o lona suafa. I le avea ai ma Molimau a Ieova, e tatou te fiafia e talanoa e faatatau i na mataupu. Peitaʻi, e lē faapea ai e tatou te faaeseeseina le pule silisili ese a le Atua ma le faapaiaina o lona suafa, e pei o ni mea e eseese.

2 Ua tatou iloa uma e tatau ona faapaiaina le suafa o le Atua. Ua tatou aʻoaʻoina foʻi e tatau ona faamaonia atu, e sili le pule silisili ese a Ieova po o lana auala e pule ai. O lea la, e tāua uma nei mataupu.

3. O le ā e aofia ai i le suafa o Ieova?

3 O le suafa o Ieova, e aofia ai mea uma e faatatau i lo tatou Atua, ma e aofia ai foʻi le auala e pule ai. Pe a tatou faapea atu o le mataupu e sili ona tāua, o le taʻumamāina lea o le suafa o Ieova mai i tuuaʻiga sesē uma, ua tatou ioe foʻi la e tatau ona faamaonia atu e sili le auala e pule ai Ieova. E fesootaʻi lelei le suafa o Ieova, ma le auala e pule ai o ia o Sē e Pule Silisili Ese i le aoao o mea.​—Tagaʻi i le pusa “ Vala o se Mataupu e Sili Ona Tāua.”

4. O le ā o loo taʻua i le Salamo 135:13 e faatatau i le suafa o le Atua, ma o ā fesili o le a talanoaina?

4 E tutasi le suafa o Ieova. (Faitau le Salamo 135:13.) Aiseā e tāua tele ai le suafa o le Atua? Na faapefea ona taʻuleagaina lenā suafa i le amataga? E faapefea ona faapaiaina e le Atua lona suafa? E faapefea ona tatou fesoasoani e puipuia lona suafa? Seʻi o tatou talanoaina nei fesili.

LE TĀUA O SE IGOA

5. O le ā e ono taumānatu ai nisi pe a faalogo e tatau ona faapaiaina le suafa o le Atua?

5 “Ia faapaiaina lou suafa.” (Mata. 6:9) Na taʻua e Iesu o se tasi lenei o mea e sili ona tāua e ao ona tatou tatalo ai. Ae o le  ā na uiga i ai fetalaiga a Iesu? Pe a faapaiaina se mea, e uiga atu i le faia o se mea ina ia mamā pe e lē ponā. Peitaʻi, e ono taumānatu nisi, ʻPe afai e paia, mamā ma lē ponā le suafa o Ieova, aiseā la e manaʻomia ai ona faapaiaina?’ Ina ia tali lenā fesili, e manaʻomia ona tatou mafaufau muamua po o le ā e aofia ai i se igoa.

6. Aiseā e tāua ai se igoa?

6 E tele mea e aofia ai i se igoa, nai lo na o ni mataʻitusi e tusia i se pepa pe e faaleoina atu. Ia mātau le faamatalaga a le Tusi Paia: “E sili le manaʻo i le igoa lelei nai lo o le tele o le tamaoaiga.” (Faata. 22:1; Fai. 7:1) Aiseā e tāua ai se igoa? Talu ai o le igoa o se tagata, e aofia ai lona talaaga po o le mafaufau o isi i lē e ona le igoa. O lea la, o le auala e tusia ai se igoa pe e faaleoina ai, e lē o le mea sili lenā ona tāua. E sili atu ona tāua le auala e mafaufau ai tagata, pe a vāai ma faalogo i lenā igoa.

7. Ua faapefea ona faaleagaina e tagata le suafa o le Atua?

7 Pe a faia e tagata ni tala pepelo e faatatau iā Ieova, ua latou faaleagaina lona talaaga. Pe a latou faaleagaina lona talaaga, ua latou taumafai e faaleaga lona suafa. O le faatoʻaga o Etena na muamua faia ai e se tasi ni tala taufaaleaga e faatatau i le suafa ma le talaaga o le Atua. Ia mātau po o le ā e tatou te aʻoaʻoina mai i lenei mea.

LE AUALA NA MUAʻI TAʻULEAGAINA AI LE SUAFA O LE ATUA

8. O ā mea na iloa e Atamu ma Eva, ma o ā fesili ua lāgā ai?

8 Na iloa e Atamu ma Eva le suafa o Ieova, ma le tele o upu moni tāua e faatatau i Lē e ona lenā suafa. Na la iloa o ia o Lē na foafoaina mea uma, o Lē na foaʻiina iā i laʻua le ola, le Parataiso matagofie e nonofo ai, ma se paaga lelei atoatoa. (Kene. 1:26-28; 2:18) Ae e ui i lea, pe na faaauau ona la faaaogā o la mafaufau lelei atoatoa, e manatunatu ai i mea uma na faia e Ieova mo i laʻua? Pe na faaauau ona faalolotoina lo la alofa ma le lototalisapaia mo Ieova? Na manino le tali o lenā fesili ina ua tofotofoina i laʻua e le fili o le Atua.

9. E tusa ai o le Kenese 2:16, 17 ma le 3:1-5, o le ā na fetalai atu ai le Atua i le uluaʻi ulugalii, ma na faapefea ona faauigasesē e Satani le mea moni?

9 Faitau le Kenese 2:16, 17 ma le 3:1-5. Na faapogaia e Satani se gata e fesili atu iā Eva:  “E moni ea na fetalai mai le Atua, e aua neʻi lua aai mai i fua o laau uma o le faatoʻaga?” O lenā fesili na afīfī mai ai se pepelo iloagatā e faatatau i le Atua, ma na amata ai ona sesē le manatu o Eva e faatatau iā Ieova. O le fetalaiga moni a le Atua iā Atamu ma Eva, e mafai ona la aai mai i laau uma seʻi vaganā ai se laau e tasi. Seʻi manatu i le anoanoaʻi o laau eseese na mafai ona aai ai Atamu ma Eva. (Kene. 2:9) Ioe, o le mea moni e aaofoaʻi Ieova. Peitaʻi, na fetalai atu le Atua iā Atamu ma Eva e tasi lava le laau e faasā ona la aai ai. O lea, o le fesili a Satani na faauigasesē ai le mea moni ma foliga mai ai e lē aaofoaʻi le Atua. Atonu na taumānatu Eva, ʻPo o taofia e le Atua se mea lelei mai iā te aʻu?’

10. Na faapefea ona taʻuleagaina tuusaʻo e Satani le suafa o le Atua, ma o le ā na iʻu i ai?

10 Na usitaʻi pea Eva iā Ieova o le Pule ina ua fesiligia o ia e Satani. Na ia tali atu iā Satani e ala i le taʻu manino atu iā te ia o le faatonuga a le Atua. Na taʻu atu foʻi e Eva e lē tatau ona la papaʻi i le laau. Na iloa e Eva le fetalaiga a le Atua, e la te feoti pe a lē usiusitaʻi. Ae na tali atu Satani: “E lua te lē oti lava.” (Kene. 3:2-4) E leʻi toe faaaogāina e Satani ni pepelo iloagatā, ae o lea ua ia taʻuleagaina tuusaʻo le suafa o le Atua, e ala i lona fai atu iā Eva e pepelo Ieova. O lea, na avea ai Satani ma tiapolo po o lē e taufaaleaga. Na matuā ʻolegia lava Eva; na ia talitonuina Satani. (1 Timo. 2:14) Na sili atu ona ia talitonuina Satani nai lo o Ieova, ma na faigofie ai ona ia faia le filifiliga sesē. Na ia filifili e lē usitaʻi iā Ieova. Na ia ʻai le fua o le laau na faasā e le Atua. Mulimuli ane, na ia avatu iā Atamu.​—Kene. 3:6.

11. O le ā sa tatau ona faia e o tatou uluaʻi mātua, ae o le ā na la lē faia?

11 Seʻi mafaufau i ai i le tali na tatau ona avatu e Eva iā Satani. Seʻi faaāta pe ana faapea na ia tali atu: “Ou te lē iloa oe, e na o Ieova loʻu Tamā ou te iloaina, ma ou te alofa ma talitonu iā te ia. Na Ia foaʻi mai iā i maʻua ma Atamu mea uma lava. E faapefea ona e faia na tala leaga e faatatau iā te ia? Alu ese!” E mautinoa le matuā faafiafiaina o Ieova i lona faafofoga atu i na tala faamaoni a lona afafine peleina! (Faata. 27:11.) Ae pagā lea, e leʻi alofa faamaoni Eva iā Ieova, ma na faapena foʻi Atamu. O lo la lē alolofa i lo la Tamā, na la lē taulau ai i le puipuia o lona suafa mai i le taufaaleaga a Satani.

12. Na faapefea ona faatupu e Satani le masalosalo i le mafaufau o Eva, ma o le ā e leʻi faia e Atamu ma Eva?

12 E pei ona tatou talanoaina, na muamua faatupu e Satani i le mafaufau o Eva le masalosalo, e ala i lona taumafai ia fesiligia e Eva le ituaiga tamā e iai Ieova, po o ia o se Tamā lelei. E leʻi puipuia e Atamu ma Eva le suafa o Ieova mai i pepelo a Satani. Na la faataga manatu o Satani e faasesē ai i laʻua ma fouvale ai i lo la Tamā. O loo faaaogāina lava e Satani na togafiti i aso nei. O loo ia faaleagaina le suafa o Ieova e ala i lona taʻuleagaina. O tagata e talitonu i pepelo a Satani,  e faigofie lava ona latou teena le pule amiotonu a Ieova.

FAAPAIAINA E IEOVA LONA SUAFA

13. Ua faapefea ona faamatilatila mai i le Esekielu 36:23 le feʻau autū o le Tusi Paia?

13 Pe e onosaia e Ieova na tala taufaaleaga e aunoa ma sana gaoioiga e faia i ai? E leai! O loo taʻua i le Tusi Paia atoa mea na faia e Ieova e faamaonia ai le pepelo o tala taufaaleaga na fai e faatatau iā te ia, i le faatoʻaga o Etena. (Kene. 3:15) O le mea moni, e mafai ona tatou taaofaʻi le feʻau autū o le Tusi Paia e faapea: E faapaiaina e Ieova lona suafa, e ala i le Malo o loo puleaina e lona Alo lea o le a faafoʻisiaina le amiotonu ma le filemu i le lalolagi. O loo i le Tusi Paia faamatalaga e fesoasoani iā i tatou, e malamalama ai i le auala e faataunuu ai e Ieova le faapaiaina o lona suafa.​—Faitau le Esekielu 36:23.

14. Na faapefea i le tali atu a Ieova i le fouvalega i Etena ona faapaiaina ai lona suafa?

14 O loo taumafai malosi Satani i le mea e gata ai lona mafai, e taofia Ieova mai i le faataunuuina o Lona finagalo. Ae e lē o taulau lava Satani i le faia o lenā mea. O loo taʻua i le Tusi Paia auala na gaoioi ai Ieova, ma e faamaonia ai e leai lava se tasi e tusa ma Ieova le Atua. O le mea moni, na matuā tigā Ieova ona o le fouvalega a Satani ma i latou o loo i lana itu. (Sala. 78:40) Ae e ui i lea, na ia taulimaina lenei faafitauli ma le atamai, onosaʻi ma le faamasinotonu. Na ia faaalia foʻi lona malosi uma lava i le tele o auala. Ae sili atu i lenā, e atagia atu lona alofa i mea uma e na te faia. (1 Ioa. 4:8) E faaauau pea ona faapaiaina e Ieova lona suafa.

Na pepelo Satani iā Eva e faatatau iā Ieova, ma i le tele o senituri, na faia pea e le Tiapolo tala taufaaleaga e uiga i le Atua (Tagaʻi i palakalafa e 9-10, 15) *

15. O ā auala o loo taʻuleagaina ai e Satani le suafa o le Atua i aso nei, ma o le ā le iʻuga?

15 O loo faaauau pea ona taʻuleagaina e Satani le suafa o le Atua i aso nei. Ua ia taumafai ia masalosalo tagata i le malosi, amiotonu, atamai ma le alofa o le Atua. O se faataʻitaʻiga, e taumafai Satani e faatalitonu tagata, e lē o Ieova na foafoaina mea. Pe afai foʻi e talitonu tagata e iai moni lava le Atua, e na te taumafai e faatalitonu i latou, e lē tonu ma e faasāsā naʻuā le Atua ma Ana tapulaa. E na te aʻoaʻoina foʻi tagata, o Ieova o se  Atua e lē alofa ma faasauā e susunuina tagata i le afi i seoli. Pe a talitonu tagata i na tala taufaaleaga, o le a faigofie lava ona latou teena le pule amiotonu a Ieova. A o leʻi faaumatiaina atoatoa Satani, o le a faaauau pea ona ia taʻuleagaina le suafa o Ieova, ma o le a ia taumafai ia e liliuese mai iā Ieova. Po o le a taulau Satani?

LAU MATAFAIOI I LENEI MATAUPU E SILI ONA TĀUA

16. O le ā e mafai ona e faia, lea e leʻi faia e Atamu ma Eva?

16 Ua faataga e Ieova tagata lē lelei atoatoa e fai sa latou vaega i le faapaiaina o lona suafa. O lea la, e mafai ona e faia le mea na leʻi faia e Atamu ma Eva. E ui o loo tatou iai i se lalolagi e tumu i tagata o loo taʻuleagaina ma upuleaga i le suafa o Ieova, ae e iai le avanoa iā te oe e puipuia ai le suafa o Ieova ma taʻu atu i tagata le mea moni, o Ieova e paia, amiotonu, lelei ma e alofa. (Isa. 29:23) E mafai ona e lagolagoina lana pule. E mafai ona e fesoasoani i tagata e iloa e na o le pulega a Ieova e tonu atoatoa, ma e mafai ona aumaia le filemu ma le fiafia i foafoaga uma.​—Sala. 37:9, 37; 146:5, 6, 10.

17. E tusa ai o le Ioane 17:26, na faapefea ona faailoa atu e Iesu le suafa o lona Tamā?

17 E tatou te mulimuli i le faaaʻoaʻoga a Iesu Keriso pe afai e tatou te puipuia le suafa o Ieova. (Ioa. 17:26.) Na faailoa atu e Iesu le suafa o lona Tamā, e lē gata i lona faaaogāina o le suafa o Ieova ae na ia taʻu atu foʻi i tagata le ituaiga Atua moni e iai o Ia. O se faataʻitaʻiga, na ia taʻusalaina le ʻau Faresaio o ē na tuuaʻia Ieova o sē e sauā, e tagisā, e lē māfana, ma e lē alofa. Na fesoasoani Iesu i tagata ia vaai i lona Tamā o sē e magafagafa, onosaʻi, e alofa ma e lotofaamagalo. Na ia fesoasoani foʻi i tagata ia iloa Ieova, e ala i lona faaalia atoatoa o uiga o lona Tamā i aso uma.​—Ioa. 14:9.

18. E faapefea ona tatou faalēaogāina pepelo ma tala taufaaleaga faasaga iā Ieova?

18 I le pei o Iesu, e mafai ona tatou taʻu atu i tagata mea ua tatou iloa e faatatau iā Ieova. O le iʻuga, o le a iloa ma faaaloalogia ai e tagata le suafa paia o Ieova. E mafai foʻi ona tatou aʻoaʻo i latou i le ituaiga Atua alofa ma agalelei e iai o Ia. O le faia faapea, ua tatou faalēaogāina ai pepelo ma tala taufaaleaga faasaga iā Ieova. E mafai foʻi ona tatou faaaʻoaʻo iā  Ieova. E mafai telē ona tatou faia faapea e ui i lo tatou tulaga lē lelei atoatoa. (Efe. 5:1, 2) E tatou te faapaiaina lona suafa, pe a atagia atu i a tatou upu ma gaoioiga le ituaiga Atua moni e iai Ieova. E tatou te faasilisilia lona suafa e ala i le fesoasoani i tagata e iloa le mea moni e faatatau iā te ia. * E tatou te faamaonia atu foʻi, e mafai e tagata lē lelei atoatoa ona tumau faamaoni i le Atua.​—Iopu 27:5.

E tatou te mananaʻo e fesoasoani i a tatou tagata aʻoga e iloa e agalelei ma alofa Ieova (Tagaʻi i palakalafa e 18-19) *

19. E faapefea i le Isaia 63:7 ona fesoasoani iā i tatou e iloa ai lo tatou sini autū pe a aʻoaʻo atu?

19 E iai foʻi se isi mea e mafai ona tatou faia e faapaiaina ai le suafa o Ieova. Pe a tatou aʻoaʻoina isi i upu moni o le Tusi Paia, e masani ona tatou faamatilatila atu le pule silisili ese a le Atua, ma e iā Ieova le aiā e pule ai i le lalolagi atoa. E moni lenā manatu. Peitaʻi, e ui e tāua lo tatou aʻoaʻoina o i latou i tulafono a le Atua, ae o lo tatou sini autū o le fesoasoani i isi e alolofa iā Ieova lo tatou Tamā ma faamaoni iā te ia. E tāua ai la ona tatou faamatilatila atu uiga matagofie o Ieova, ma le ituaiga Atua e iai o ia. (Faitau le Isaia 63:7.) Pe a tatou aʻoaʻoina i latou i lenā auala, o le a fesoasoani ai iā i latou e alolofa iā Ieova ma usiusitaʻi iā te ia, ona e latou te mananaʻo e faamaoni iā te ia.

20. O le ā o le a talanoaina i le mataupu o loo sosoʻo mai?

20 E faapefea la ona tatou faamautinoa, e iai se aafiaga lelei o a tatou amioga ma aʻoaʻoga i le suafa o Ieova, ma tosina atu ai isi iā te ia? O le mataupu o loo sosoʻo mai o le a taliina ai lenā fesili.

PESE 2 O Ieova o Lou Suafa Lea

^ pala. 5 O le ā le mataupu e sili ona tāua i tagata ma agelu? Aiseā e matuā tāua ai lenā mataupu, ma e faapefea ona aofia ai i tatou? O le malamalama i tali o na fesili o le a fesoasoani e faamalosia ai la tatou faiā ma Ieova.

^ pala. 18 E iai taimi e taʻua ai i a tatou lomiga, e lē tatau ona faapea atu “E manaʻomia ona faasilisilia le suafa o Ieova.” Aiseā? Talu ai e leʻi iai lava se isi na faapea mai e leai se aiā a le Atua e faaaogā ai le suafa Ieova. Peitaʻi, na faamanino atili mai lenei malamalamaga i le fono faaletausaga 2017. Na faapea mai le taʻitaʻifono: “Pe a faafaigofie, e le sesē pe a tatalo ina ia faasilisilia le suafa o Ieova, ona o lona talaaga e manaʻomia ona faasilisilia.”​—Tagaʻi i le polokalame o Ianuari 2018 i le jw.org®. Tagaʻi i le vaega LOMIGA MA ISI MEA > TV I LE INITANETI®.

^ pala. 62 FAAMATALAGA O ATA: Na taʻuleagaina e le Tiapolo le Atua e ala i le fai atu iā Eva e pepelo le Atua. I le tele o senituri, na faaauiluma ai e Satani aʻoaʻoga sesē e pei o le aʻoaʻoga e sauā le Atua ma e na te leʻi foafoaina tagata.

^ pala. 64 FAAMATALAGA O ATA: A o faia e se uso se suʻesuʻega faale-Tusi Paia, na ia faamatilatila atu uiga o le Atua.