Alu i mataupu o loo iai

Alu i le lisi o mataupu

Amio Pulea​—E Tāua i le Faafiafiaina o Ieova

Amio Pulea​—E Tāua i le Faafiafiaina o Ieova

“Ina ua ma fufusu ma loʻu tausoga, na ou tago atu i lona ua ma titina o ia. Na ou manaʻo e fasioti o ia.”​—Paul.

“I le fale, e vave ona oso loʻu ita e aunoa ma se māfuaaga tatau. Ou te faaleagaina meafale, meataalo a laʻu fanau, ma so o se mea lava ou te tau atu ai.”​—Marco.

O le toʻatele o i tatou atonu e lē sauā e pei o Paul ma Marco. Ae o i tatou uma lava, e iai taimi e faigatā ai ona pulea i tatou. O le māfuaaga autū lava ona ua tuufaasolo mai iā i tatou le agasala mai i le uluaʻi tagata o Atamu. (Roma 5:12) E iai isi e pei o Paul ma Marco, e faigatā ona pulea lo latou ita. A o isi e ono faigatā ona pulea o latou mafaufauga. O se faataʻitaʻiga, e latou te mafaufau i mea e faavaivaia ai i latou. Ae o isi foʻi, e ono faigatā iā i latou ona teena le faia o feusuaʻiga lē mamā, ma le faaaogā sesē o le ʻava malosi ma fualaau faasāina.

O i latou e pulea e o latou mafaufauga, faanaunauga, ma gaoioiga, e mafai ona faaleagaina o latou olaga. Ae e mafai ona tatou ʻalofia le oo i lenā tulaga. E faapefea? E ala i le atiaʻe o le amio pulea. Ina ia fesoasoani iā i tatou e atiaʻe lenā uiga, seʻi o tatou iloilo fesili nei e tolu: (1) O le ā le amio pulea? (2) Aiseā e tāua ai? (3) E faapefea ona tatou atiaʻe lenei uiga, o se tasi o vala “o le fua o le agaga”? (Kala. 5:22, 23) O le a tatou iloiloina foʻi po o le ā e mafai ona fai e i tatou taʻitoʻatasi, i taimi e mou atu ai le amio pulea.

O LE Ā LE AMIO PULEA?

O se tasi e amio pulea e lē vave ona tali atu i so o se tulaga e tulaʻi mai. Nai lo o lea, e na te lē faia ni faamatalaga po o ni gaoioiga e lē faafiafiaina ai le Atua.

Na faaalia moni e Iesu le amio pulea

Na faailoa mai e Iesu mea e aofia ai i le amio pulea. O loo taʻua i le Tusi Paia: “Ina ua upuleagaina o ia, e leʻi toe fai atu e ia ni upuleaga. Ina ua puapuagatia o ia, e leʻi faamataʻu atu, ae na ia tuuina atu pea o ia lava i lē e faamasinotonu.” (1 Pete. 2:23) Na faaalia e Iesu lenā uiga ina ua tauemua o ia e tagata tetee, a o faatautauina o ia i le laau e faapuapuagatia ai. (Mata. 27:39-44) Muamua atu, e mataʻina le auala na ia faaalia ai le amio pulea ina ua tuʻifesili e taʻitaʻi lotu ina ia maileia ai o ia e faia se tala sesē. (Mata. 22:15-22) Na faataatia foʻi e Iesu se faaaʻoaʻoga lelei o le amio pulea, ina ua tauʻaia o ia e tagata Iutaia i maa. Nai lo o le toe taui atu o le leaga iā i latou, na “lafi Iesu ma maliu ese mai i le malumalu.”​—Ioa. 8:57-59.

Pe e mafai ona tatou faaaʻoaʻo iā Iesu? E mafai, e ui e lē i se tulaga atoatoa. Na tusi le aposetolo o Peteru: ʻNa puapuagatia Keriso mo outou, ua ia tuuina mai ai le faaaʻoaʻoga mo outou ina ia outou mulimulituʻi ai i ona tulaga aao.’ (1 Pete. 2:21) E ui lava la e tatou te lē lelei atoatoa, ae e mafai ona tatou mulimulituʻi i le faaaʻoaʻoga a Iesu i le faaalia o le amio pulea. Aiseā e tāua ai mo i tatou le faia faapea?

 AISEĀ E TĀUA AI LE AMIO PULEA?

Ina ia faafiafiaina Ieova, e manaʻomia ona tatou faaalia le amio pulea. E tusa lava po ua tele tausaga o tatou auauna ma le faamaoni iā Ieova, ae e mafai lava ona faaleagaina la tatou faauōga ma ia, pe a lē pulea a tatou faamatalaga ma gaoioiga.

Seʻi manatu iā Mose “o le tagata e sili ona agamalu i tagata uma ua i luga o le fogāeleele” i lenā vaitaimi. (Nu. 12:3) E tele tausaga o onosaʻi pea Mose i muimuiga a tagata Isaraelu, ae na iai se aso na lē pulea ai o ia lava. Na ita Mose ina ua toe muimui tagata Isaraelu i le leai o se vai. Na ʻinaʻinā o ia i tagata ma faapea atu: “O outou tagata fouvale, faalogo mai ia! Pe e ma te aumaia ea mai i lenei papa se vai mo outou?”​—Nu. 20:2-11.

E leʻi taulau Mose i le puleaina o ia lava. E na te leʻi avatu le viiga iā Ieova, o Lē na saunia faavavega le vai. (Sala. 106:32, 33) O le iʻuga, e leʻi faatagaina o ia e Ieova e ulu atu i le Nuu Folafolaina. (Nu. 20:12) Atonu na salamō Mose i lona olaga atoa ona o le lē puleaina o lona ita.​—Teu. 3:23-27.

O le ā le lesona mo i tatou? E tusa po ua leva ona tatou iai i le upu moni, e lē tatau lava ona tatou faia ni faaupuga lē faaaloalo iā i latou e faatigā mai, po o se tasi foʻi e manaʻomia ona faasaʻo. (Efe. 4:32; Kolo. 3:12) O le mea moni, o le faasolo lava ina tatou matutua, o le ono faaitiitia foʻi lenā o lo tatou onosaʻi. Ae ia manatua Mose. E tatou te lē mananaʻo e faaleagaina lo tatou talaaga o le auauna faamaoni iā Ieova, ona o le lē faaalia o le amio pulea. O le ā e mafai ona tatou faia e atiaʻe ai lenei uiga tāua?

AUALA E ATIAʻE AI LE AMIO PULEA

Tatalo mo le agaga paia. Aiseā? Talu ai o le amio pulea o se vala o le fua o le agaga o le Atua, ma e foaʻi mai e Ieova lona agaga iā i latou e talosaga atu iā te ia. (Luka 11:13) E ala i lona agaga, e aumaia ai e Ieova le malosi e tatou te manaʻomia e faaalia ai le amio pulea. (Fili. 4:13) E mafai foʻi ona ia fesoasoani mai e tatou te atiaʻe isi vala o le fua o le agaga e pei o le alofa, lea e faigofie ai ona tatou faaalia le amio pulea.​—1 Kori. 13:5.

ʻAlofia so o se mea e faigatā ai ona faaalia le amio pulea

ʻAlofia so o se mea e faigatā ai ona faaalia le amio pulea. O se faataʻitaʻiga, ia ʻalofia tuatusi i le Initaneti ma faafiafiaga e faaauiluma ai amioga sesē. (Efe. 5:3, 4) O le mea moni, e tatau ona tatou ʻalofia so o se mea e ono faaosoosoina ai i tatou e faia se mea sesē. (Faata. 22:3; 1 Kori. 6:12) O se faataʻitaʻiga, o se  tasi e lologofie atu i le faia o amioga lē mamā, e manaʻomia ona ia ʻalofia tusi ma ata e faagaee ai na faalogona.

E ono faigatā iā i tatou le faatatauina o lenei fautuaga. Ae pe a tatou faia ni taumafaiga, o le a foaʻi mai e Ieova le malosi e manaʻomia e pulea ai i tatou. (2 Pete. 1:5-8) O le a ia fesoasoani mai e pulea o tatou mafaufauga, faamatalaga, ma gaoioiga. O se faamaoniga o lenā mea, o Paul ma Marco lea na taʻua i le amataga, na mafai ona la pulea lo la ita. Seʻi manatu i se uso e masani ona ita i isi avetaavale a o ave lana taavale, ma oo ai lava ina tauupu ma nisi o i latou. O le ā na ia faia? Na faapea mai o ia: “Ou te tatalo faatauanau i aso uma. Na ou suʻesuʻeina mataupu e faatatau i le amio pulea, ma tauloto mau o le Tusi Paia e fesoasoani iā te aʻu. E ui ua tele tausaga o oʻu galue i lea uiga, ae e fesoasoani iā te aʻu le amata o le aso ma le sini ia toʻa pea. Ou te taumafai foʻi ou te vave alu i se mea e manaʻomia ona ou alu i ai, ina ia ʻalofia ai le soona nanati ma oso ai le ita.”

PE A TATOU LĒ TAULAU I LE FAAALIA O LE AMIO PULEA

E iai taimi e tatou te lē taulau ai i le faaalia o le amio pulea. Pe a tupu lenā mea, e tatou te ono lagona le māsiasi e faalatalata iā Ieova i le tatalo. Ae o le taimi lenā e sili ona manaʻomia ai le tatalo. O lea, ia vave ona tatalo iā Ieova. Ia talosaga mo lana faamagaloga, saʻili mo lana fesoasoani, ma ia maumauaʻi e ʻalofia le toe faia o lenā mea sesē. (Sala. 51:9-11) O le a faafofoga mai Ieova i au tatalo faamaoni mo lona alofa mutimutivale. (Sala. 102:17) Na faamanatu mai e le aposetolo o Ioane, ʻe faamamāina i tatou mai i agasala uma’ e ala i le toto o le Atalii o le Atua. (1 Ioa. 1:7; 2:1; Sala. 86:5) Ia manatua, na fetalai Ieova i ana auauna ia faaauau pea ona faamagalo atu. E tatou te mautinoa foʻi la o le a faia faapea e Ieova iā i tatou.​—Mata. 18:21, 22; Kolo. 3:13.

E leʻi fiafia Ieova iā Mose ona e na te leʻi faaalia le amio pulea i se taimi i le toafa. Ae ui i lea, na faamagalo o ia e Ieova, ma o loo taʻua o ia i le Tusi Paia o se faaaʻoaʻoga mataʻina o le faatuatua. (Teu. 34:10; Epe. 11:24-28) E ui e leʻi faatagaina e Ieova Mose e ulu atu i le Nuu Folafolaina, ae o le a Ia faatagaina Mose e ulu atu i le lalolagi Parataiso ma ola ai e faavavau. E mafai foʻi ona tatou olioli i lenā faamanuiaga, pe a tatou taumafai malosi e atiaʻe lenei uiga tāua o le amio pulea.​—1 Kori. 9:25.