1. Aiseā e tatau ai ona tatou utagia le lapataʻiga a Iesu?

I LE valoaga a Iesu e faatatau i aso e gata ai, na ia fetalai ai: “Ia outou uaʻi atu iā te outou lava, ina neʻi faamamafaina o outou loto i le . . . popole i mea o le olaga nei.” (Luka 21:34) E tatau ona tatou utagia lenā lapataʻiga. Aiseā? Talu ai o popolega foʻi na o loo feagai ma le toʻatele i aso nei.

2. O ā faafitauli tugā o loo feagai ma uso ma tuafāfine?

² O nisi taimi e tatou te feagai ai ma le tele o faafitauli tugā i le taimi e tasi. Seʻi mafaufau i faaaʻoaʻoga nei. O John * o se Molimau na aafia i se maʻi tugā e taʻua o le multiple sclerosis. Peitaʻi, na faateʻia o ia ma faanoanoa ina ua tuua o ia e lana avā na la mafuta mo le 19 tausaga. E lē gata i lea, na lē toe auauna iā Ieova ona afafine e toʻalua. E ese foʻi faafitauli na fesagaʻia e Bob ma Linda. Na lē toe iai ni a la galuega, ma lē gafatia ai ona totogi le la fale. E lē gata i lea, na aafia Linda i se maʻi fatu e ono maliu ai, faapea se faamaʻi na faaleagaina ai le malosiaga i lona tino e tetee ai i faamaʻi.

3. E tusa ai ma le Filipi 4:6, 7, o le ā e mafai ona tatou mautinoa i ai?

³ Ia tatou mautinoa e malamalama lelei Lē na foafoaina mea ma lo tatou Tamā alofa o Ieova, i popolega o loo tatou aafia ai. E finagalo o ia e fesoasoani mai iā i tatou e taulima faafitauli o loo tatou fesagaʻia. (Faitau le Filipi 4:6, 7.) O loo iai i le Afioga a le Atua le tele o tala e faatatau i luʻi na fesagaʻia e auauna a Ieova. O loo faamatala ai foʻi auala na fesoasoani ai  Ieova i ana auauna e fesagaʻia na tulaga faigatā. Seʻi o tatou iloiloina nisi o faaaʻoaʻoga.

4. O ā luʻi na feagai ma Elia, ma na faapefea ona fesoasoani Ieova iā te ia?

⁴ E leʻi faigofie le tulaga o mea i le taimi na auauna ai Elia iā Ieova, ma na ia fesagaʻia foʻi luʻi faigatā. O le tupu o Aapo o se tasi o tupu lē faamaoni i Isaraelu, ma sa ia faaipoipo i le fafine leaga o Iesepela lea sa tapuaʻi iā Paala. Na la faaauilumaina i le atunuu le tapuaʻiga iā Paala, ma fasiotia le toʻatele o perofeta a Ieova. Peitaʻi, na mafai ona sola ese mai ai Elia. Na faasaoina o ia mai i se oge mataʻutia e ala i le faalagolago iā Ieova. (1 Tu. 17:2-4, 14-16) Sa faalagolago foʻi le perofeta iā Ieova ina ua ia luʻiina perofeta ma tagata tapuaʻi o Paala. Na uunaʻia e Elia tagata Isaraelu ina ia auauna iā Ieova. (1 Tu. 18:21-24, 36-38) E tele faamaoniga o le fesoasoani a Ieova iā Elia i na taimi faigatā.

5-6. E tusa ai ma le 1 Tupu 19:1-4, o ā faalogona o Elia, ma na faapefea ona faaalia e Ieova lona alofa iā te ia?

⁵ Faitau le 1 Tupu 19:1-4. Peitaʻi, na fefe Elia ina ua faamataʻu ane le masiofo o Iesepela e fasioti o ia. O lea na ia sola ai i Peresepa. Na ia matuā lotovaivai ma ʻtalosaga atu ina ia oti.’ Aiseā na ia lotovaivai ai? Talu ai o ia o se tagata e lē lelei atoatoa, ʻe pei lava o i tatou.’ (Iako. 5:17) Atonu na lofitūina o ia i faalogona mafatia ma na ia lagona le matuā vaivai. Na ono mafaufau Elia e leai se aogā  o ana taumafaiga e faaauiluma le tapuaʻiga mamā, e lē o iai se suiga lelei i Isaraelu, ma e na o ia o loo auauna iā Ieova. (1 Tu. 18:3, 4, 13; 19:10, 14) Atonu e faateʻia i tatou i le auala na tali atu ai lenei perofeta faamaoni. Peitaʻi, sa malamalama lelei Ieova i faalogona o Elia.

⁶ E leʻi otegiaina e Ieova o ia ona o le sasaa atu o ona faalogona. Nai lo o lea, sa ia fesoasoani e toe faamalosia Elia. (1 Tu. 19:5-7) Mulimuli ane, na fesoasoani Ieova iā Elia i se auala agalelei ina ia toe faasaʻo ona manatu, e ala i le faaali mai o le mataʻina o lona mana. Na sosoo ma le faailoa mai ai e Ieova o loo iai isi tagata e toʻa 7,000 i Isaraelu e lē o tapuaʻi iā Paala. (1 Tu. 19:11-18) O nei faaaʻoaʻoga, na faaalia mai ai e Ieova lona alofa iā Elia.

7. O le ā le faamautinoaga e tatou te maua mai i le auala na fesoasoani ai Ieova iā Elia?

⁷ Po o e feagai ma se tulaga faigatā? Maʻeu le faamāfanafanaina o i tatou i le iloaina na malamalama Ieova i faalogona o Elia! E tatou te mautinoa ai e malamalama lelei o ia i o tatou popolega. E na te silafia o tatou mafaufauga, faalogona, ma le mea e gata ai lo tatou malosi. (Sala. 103:14; 139:3, 4) Pe a tatou faataʻitaʻi iā Elia e ala i le faalagolago iā Ieova, o le a ia fesoasoani mai iā i tatou e taulima faafitauli o loo tatou popole ai.​—Sala. 55:22.

8. E faapefea ona fesoasoani mai Ieova iā te oe e taulima ou popolega?

⁸ O le popole e mafai ona faapogaia ai mafaufauga sesē ma lotovaivai ai. Pe a tupu lenā mea, ia manatua o le a fesoasoani mai Ieova iā te oe e taulima ou popolega. E faapefea ona ia fesoasoani mai? Ua ia valaaulia oe ina ia faailoa atu ou popolega iā te ia, ma o le a ia tali mai i au talosaga. (Sala. 5:3; 1 Pete. 5:7) O lea, ia tatalo e lē aunoa iā Ieova e faatatau i ou faafitauli. E lē fetalai mai o ia iā te oe e pei ona ia faia iā Elia, ae o le a ia fetalai mai e ala i lana Afioga le Tusi Paia, faapea lana faalapotopotoga. O tala e te faitau ai i le Tusi Paia, e mafai ona e maua ai faamāfanafanaga ma le faamoemoe. E lē gata i lea, e mafai ona faalaeiau atu ou uso ma tuafāfine iā te oe.​—Roma 15:4; Epe. 10:24, 25.

9. E faapefea ona fesoasoani se uō maufaatuatuaina iā i tatou?

⁹ Na faatonu e Ieova Elia ina ia tuu atu isi tiute tauave iā Elisaia. O le faia faapea, na saunia ai e Ieova se uō lelei mo Elia e mafai ona fesoasoani i ona faalogona lotovaivai. I se tulaga talitutusa, pe a faailoa atu o tatou popolega i se uō maufaatuatuaina, e mafai ona ia fesoasoani mai e tauave o tatou popolega. (2 Tu. 2:2; Faata. 17:17) Ae pe a leai se tasi e mafai ona faasoa i ai ou popolega, ia tatalo iā Ieova e fesoasoani mai i le saʻilia o se Kerisiano taʻumatuaina e mafai ona faalaeiau iā te oe.

10. E faapefea i mea na tutupu iā Elia ona tatou maua ai le faamoemoe, ma e faapefea ona fesoasoani iā i tatou le folafolaga o loo i le Isaia 40:28, 29?

¹⁰ Na fesoasoani Ieova iā Elia e taulima ona popolega ma ia auauna faamaoni mo le tele o tausaga. O mea na tutupu iā Elia e mafai ona tatou maua ai le faamoemoe. O nisi taimi e matuā lofitūina ai i tatou i popolega, ma e tatou te lotovaivai ma lagona ai le vaivai o le tino. Ae pe a tatou faalagolago iā Ieova, o le a ia foaʻiina mai le malosi e tatou te manaʻomia ina ia auauna ai pea iā te ia.​—Faitau le Isaia 40:28, 29.

11-13. O ā popolega na feagai ma nisi o auauna a le Atua?

¹¹ E iai foʻi isi tagata o le Tusi Paia na lofitūina i popolega. O se faaaʻoaʻoga, na faalumaina  Hana ona o lona lē fanau, ma na faatigā foʻi le isi avā a lana tane iā te ia. (1 Samu. 1:2, 6) O le mafatia tele o Hana na matuā tigā ai lona loto, ona tagi ai lea o ia ma lē ʻai ai.​—1 Samu. 1:7, 10.

¹² E iai taimi na lofitūina ai le tupu o Tavita i le lotomafatia. Seʻi mafaufau i faafitauli na ia fesagaʻia. Sa iā te ia faalogona nofosala ona o le tele o ana mea sesē sa fai. (Sala. 40:12) Sa fouvale lona atalii o Apisaloma iā te ia, ma iʻu ai lava ina oti Apisaloma. (2 Samu. 15:13, 14; 18:33) Na faalataina foʻi Tavita e se tasi o ana uō vavalalata. (2 Samu. 16:23–17:2; Sala. 55:12-14) O le tele o salamo na tusia e Tavita, o loo faailoa mai ai ona faalogona mafatia faapea lona faatuatua e lē maluelue iā Ieova.​—Sala. 38:5-10; 94:17-19.

¹³ Mulimuli ane, e iai se faisalamo sa matauʻa i olaga o tagata amioleaga. Atonu o ia o sē na tupuga mai i le sā Levī o Asafo, ma na auauna o ia i “le afioaga paia o le Atua.” Na matuā tigā faalogona o lenei faisalamo, ma māfua ai ona ia lē fiafia ma lē maua le faamalieina. Na amata foʻi ona ia masalosalo i faamanuiaga e maua mai i le auauna i le Atua.​—Sala. 73:2-5, 7, 12-14, 16, 17, 21.

14-15. O le ā e tatou te aʻoaʻoina mai i faaaʻoaʻoga faale-Tusi Paia e tolu e faatatau i le liliu atu iā Ieova mo le fesoasoani?

¹⁴ Sa faalagolago iā Ieova na auauna e toʻatolu mo le fesoasoani. Sa faailoa atu o latou popolega iā te ia e ala i le tatalo faatauanau. Sa latou faailoa manino atu foʻi iā Ieova māfuaaga na latou atuatuvale ai. E lē gata i lea, sa faaauau ona latou ō i le nofoaga o le tapuaʻiga iā Ieova.​—1 Samu. 1:9, 10; Sala. 55:22; 73:17; 122:1.

¹⁵ Na tali mai ma le agalelei Ieova i ana auauna. Na ia foaʻi iā Hana le filemu o le  mafaufau. (1 Samu. 1:18) Na tusi Tavita: “E tele puapuaga o le tagata amiotonu, ae e laveaʻiina e Ieova o ia mai i na mea uma.” (Sala. 34:19) Mulimuli ane, na lagona e le faisalamo e pei na ʻtaofia e Ieova lona lima taumatau,’ ma taʻitaʻia o ia i ana fautuaga alofa. Na ia pese: “A o aʻu nei, ou te faalatalata atu i le Atua ou te lelei ai. Ou te sulufaʻi atu i le Alii Pule Silisili Ese o Ieova.” (Sala. 73:23, 24, 28) O ā ni lesona e tatou te aʻoaʻoina mai i nei faaaʻoaʻoga? E iai taimi e lofitūina ai i tatou i faafitauli ma faapogaia ai popolega. Ae e mafai ona tatou faafetaiaʻia na popolega pe a tatou manatunatu i auala na fesoasoani ai Ieova i isi, faalagolago iā te ia i le tatalo, ma usitaʻi i so o se mea e na te faatonuina i tatou e fai.​—Sala. 143:1, 4-8.

16-17. (a) Aiseā e lē tatau ai ona tatou faaesea i tatou lava? (e) E faapefea ona tatou toe maua le malosi?

¹⁶ O le isi lesona tāua lenei e tatou te aʻoaʻoina mai i nei faaaʻoaʻoga e tolu: E lē tatau ona tatou faaesea i tatou lava mai iā Ieova ma ona tagata. (Faata. 18:1) Na lofitūina le tuafafine o Nancy i popolega ina ua tuua o ia e lana tane, ma na ia faapea mai: “O le tele o aso ou te leʻi toe fia vaai pe talanoa i se tagata. Ae o le tele na ou faaesea ai aʻu, o le atili foʻi lenā  ona ou faanoanoa.” Na suia le tulaga o mea ina ua amata ona saʻili e Nancy auala e fesoasoani ai i isi na feagai ma faafitauli. Ua ia faapea mai: “Na ou faalogo a o faamatala mai e isi o latou faafitauli. Na ou iloa ai, pe a ou faaalia le tigā alofa iā i latou, ou te lē soona uaʻi atu ai i oʻu faafitauli.”

¹⁷ E mafai ona tatou toe maua le malosi e ala i le auai i sauniga a le faapotopotoga. O le auai i sauniga, o le isi avanoa lenā e mafai ai e Ieova ona ʻfesoasoani ma faamāfanafana mai.’ (Sala. 86:17) O i inā e faamalosia ai e Ieova i tatou e ala mai i lona agaga paia, lana Afioga, ma ona tagata. O sauniga foʻi e tatou te maua ai le avanoa e “fefaalaeiauaʻi ai.” (Roma 1:11, 12) Ua faapea mai se tuafafine e igoa iā Sophia: “Na fesoasoani mai Ieova ma le ʻauuso ina ia ou tumau. O le vala na sili ona tāua iā te aʻu o sauniga a le faapotopotoga. Na ou iloa ai o le tele ou te galue mamafa ai i le faiva ma le faapotopotoga, o le lelei foʻi lenā o le auala ou te faafetaiaʻia ai faafitauli ma popolega.”

18. E faapefea ona fesoasoani mai Ieova pe a tatou lotovaivai?

¹⁸ Pe a tatou lotovaivai, ia manatua e lē gata ua folafola mai e Ieova le mapusaga tumau i le lumanaʻi, ae ua ia nofosauni foʻi e fesoasoani mai iā i tatou e faafetaiaʻia popolega i le taimi lenei. Ua ia fesoasoani mai ina ia tatou “lotomalilie ma galulue,” ina ia manumalo i faalogona o le lotovaivai ma le leai o se faamoemoe.​—Fili. 2:13.

19. O le ā le faamautinoaga o loo taʻua i le Roma 8:37-39?

¹⁹ Faitau le Roma 8:37-39. Ua faamanatu mai e le aposetolo o Paulo e leai se mea e mafai ona faateʻaeseina i tatou mai i le alofa o le Atua. E faapefea ona tatou fesoasoani i uso ma tuafāfine o loo taumafai e faafetaiaʻia o latou popolega? O le a talanoa i le mataupu o sosoo mai auala e tatou te faaaʻoaʻo ai iā Ieova i le faaalia o le tigā alofa, ma fesoasoani i o tatou uso ma tuafāfine pe a latou feagai ma popolega.