Alu i mataupu o loo iai

Alu i le lisi o mataupu

Ia Puipuimalu Mai i se Tasi o Mailei a Satani

Ia Puipuimalu Mai i se Tasi o Mailei a Satani

A O SAUNI le nuu o Isaraelu e sopoʻia le vaitafe o Ioritana ma ulu atu i le nuu na folafola atu e Ieova iā i latou, ae asiasi ane loa ni tagata iā i latou. O nei tagata o fafine o nuu ese na ō ane e valaaulia tamāloloa Isaraelu mo se taumafataga. Na foliga mai o lenei mea o se avanoa e lē laumaua. Sa latou fiafia ona o le a maua ai ni uō fou, faia ai siva, ma olioli i se taumafataga manaia. E ui o aganuu ma amioga a nei fafine sa lē ōgatusa ma le Tulafono a le Atua na tuuina atu i le nuu o Isaraelu, ae atonu na mafaufau nisi tamāloloa: ʻE leai se mea e tupu. Ua matou iloa le mea e fai.’

 O le ā na oo i ai? Ua faapea mai le tala: “Ona amata lea ona faia e tagata o feusuaʻiga lē mamā ma afafine o tagata Moapi.” O le mea moni, na mananaʻo nei fafine ina ia tapuaʻi tamāloloa Isaraelu i atua sesē, ma o le mea lenā na tupu. E lētioa la ʻmatuā toʻasā Ieova iā Isaraelu.’​—Nu. 25:1-3.

E lua Tulafono a le Atua na solia e nei tane Isaraelu: Na latou ifo i tupua, ma faia feusuaʻiga lē mamā. Na maliliu le faitau afe o i latou ona o le lē usiusitaʻi. (Eso. 20:4, 5, 14; Teu. 13:6-9) O le mea e faigatā ai le mea na tupu, o le taimi na tupu ai. Pe ana lē solia e nei tamāloloa le Tulafono a le Atua, semanū e sopoʻia e le faitau afe o tagata Isaraelu le vaitafe o Ioritana, ma ulu atu ai i le Nuu Folafolaina.​—Nu. 25:5, 9.

Na tusi le aposetolo o Paulo e faatatau i na mea na tutupu: “Na oo nei mea iā i latou e fai ma faaaʻoaʻoga, ma na tusia ina ia lapataʻia ai i tatou o ē o loo ola i le iʻuga o faiga o mea a le lalolagi.” (1 Kori. 10:7-11) E mautinoa le fiafia o Satani ina ua paʻuʻū tagata Isaraelu i lenā mailei, ma latou lē agavaa ai e ulu atu i le Nuu Folafolaina. O lea e atamai ai ona tatou amanaʻia lenā lapataʻiga, ma iloa e matuā fiafia lava Satani pe a tatou lē ulu atu i le lalolagi fou a le Atua.

SE MAILEI MATAʻUTIA

E maileia e Satani Kerisiano e ala i le faaaogā o togafiti ua ia iloa lelei ua paʻuʻū ai le toʻatele. E pei o le mea na tupu i tagata Isaraelu, na faaaogā e Satani amioga lē mamā. I aso nei, o loo faaauau lava ona avea amioga lē mamā o se mailei mataʻutia. O se tasi o auala e mafai ona tatou aafia ai i lenā mailei, o ata matagā taufeusuaʻiga.

I aso nei, e masani ona matamata faalilolilo ata matagā taufeusuaʻiga. I le faitau sefulu tausaga ua mavae, pe a fia matamata se tagata i nei ata lē talafeagai, e masani ona latou ō i faletifaga po o fale e faatau ai tusi o loo iai ata matagā taufeusuaʻiga. O le toʻatele o tagata e lē ō pe latalata i nei nofoaga, ona o le māsiasi ina neʻi vaaia i latou. Peitaʻi i aso nei, ua mafai ona faaaogā e se tagata le Initaneti ma matamata ai i ata matagā taufeusuaʻiga i le galuega, po o totonu foʻi o le taavale. I le tele foʻi o atunuu, ua mafai ona matamata tagata i ata matagā taufeusuaʻiga, i totonu lava o o latou fale.

E lē gata i lea, o masini faaonapōnei ua faigofie ai i tagata ona matamata i ata matagā taufeusuaʻiga. Pe savavali i le auala pe faimalaga i pasi po o nofoaafi, ua mafai lava ona matamata tagata i ata leaga i a latou masini faaonapōnei.

O le faigofie ona maua ma mafai ona matamata faalilolilo se tagata i ata matagā taufeusuaʻiga, ua sili atu ai ona telē le aafiaga o ata matagā taufeusuaʻiga i le taimi lenei, nai lo o le taimi ua teʻa. O le toʻatele e matamata i nei ata ua faaleagaina ai a latou faaipoipoga, lo latou tulaga faamamaluina, faapea o latou lotofuatiaifo. Ae e sili atu ona leaga, ua faaleagaina ai la latou faiā ma le Atua. E mautinoa, e telē le aafiaga o ata matagā taufeusuaʻiga iā i latou e matamata ai. O le tele o taimi, o nei ata e matuā faamanuʻalia ai faalogona. O na aafiaga e mafai ona umi se taimi e foʻia ai, ae o nisi taimi e tumau pea ona iai.

E ui i lea, e mafai e Ieova ona puipuia i tatou mai i lenei mailei a Satani. Ae ina ia tatou maua le puipuiga a Ieova, e tatau ona tatou faia le mea na lē taulau ai tane Isaraelu, o le “matuā faalogo” lea iā Ieova. (Eso. 19:5) E tatau ona tatou iloa, e matuā inosia lava e Ieova ata matagā taufeusuaʻiga. Aiseā ua tatou fai atu ai faapea?

IA ʻINOʻINO I AI E PEI O IEOVA

Ia manatunatu i le vala lenei: O tulafono a le Atua na matuā faaesea mai ai le nuu o Isaraelu mai i isi atunuu uma. Sa pei na tulafono o se pā, lea sa vavaeesea ai tagata Isaraelu mai i atunuu na siʻomia ai i latou ma a latou faiga inosia. (Teu. 4:6-8) O na tulafono na faailoa mai ai le upu moni lenei: E inosia e Ieova feusuaʻiga lē mamā.

Ina ua uma ona faailoa mai e Ieova faiga lē mamā a nuu tuaoi, ona ia fetalai mai lea i le nuu o  Isaraelu: ʻO mea ua faia i le atunuu o Kanana lea ou te avatu i ai outou, aua neʻi outou faia faapea. Ua lē mamā le laueleele, ma ou te faasalaina ai ona o lana agasala.’ O le matuā leaga o amioga a tagata Kanana, na silasila ai Ieova le Atua paia o Isaraelu i le laueleele na latou nonofo ai, ua lē mamā ma faaleagaina.​—Levi. 18:3, 25.

E ui na faasalaina e Ieova tagata Kanana, ae e iai lava isi tagata na faia pea feusuaʻiga lē mamā. I le silia i le 1,500 tausaga mulimuli ane, na faamatalaina ai e Paulo atunuu na nonofo ai Kerisiano e pei “ua lē toe lagona e i latou le mā.” O le mea moni, “ua latou faia ai amioga matagā, ma amioga lē mamā uma ona o le manaʻo tele.” (Efe. 4:17-19) I aso foʻi nei, o le toʻatele o tagata o loo faia amioga matagā e aunoa ma le iai o faalogona mā. O lea, e tatau ai i tagata tapuaʻi moni ona faia taumafaiga uma e ʻalofia ai le vaai i faiga lē mamā a lenei lalolagi.

O ata matagā taufeusuaʻiga o se matuā lē faaaloalo lea i le Atua. Sa ia foafoaina le tagata i lona faatusa, ma tuuina mai iā i tatou le tomai e iloa ai le lelei ma le leaga. O le atamai foʻi o le Atua, na ia aumaia ai tapulaa talafeagai i le faia o feusuaʻiga. O le faia o feusuaʻiga e na o le liʻo o le faaipoipoga e mafai ona faatino ai, ma e maua ai e le ulugalii le fiafia. (Kene. 1:26-28; Faata. 5:18, 19) Ae e faapefea i latou o loo faia ma faaauilumaina ata matagā taufeusuaʻiga? Ua latou matuā lē amanaʻiaina tapulaa tauamio a le Atua. O ē e faaauilumaina ata matagā taufeusuaʻiga, e lē faaaloalo iā Ieova. O lea, o ē e faia ma faaauilumaina nei ata, o le a faamasinoina i latou e le Atua ona o le lē amanaʻia o ana tapulaa.​—Roma 1:24-27.

Ae e faapefea i latou e faitau pe matamata ma le loto i ai i ata matagā taufeusuaʻiga? Atonu e manatu nisi e leai se afāina o na faafiafiaga. Peitaʻi, o loo latou lagolagoina ai ē e lē o amanaʻia tapulaa a Ieova. Atonu e lē o lo latou faanaunauga lenā i le taimi e matamata ai i nei ata. Peitaʻi, o tagata tapuaʻi o le Atua moni e tatau ona latou matuā ʻinoʻino i ata matagā taufeusuaʻiga. Ua timaʻi mai le Tusi Paia: “O outou o ē e alolofa iā Ieova, ia outou ʻinoʻino i le leaga.”​—Sala. 97:10.

E oo lava iā i latou e mananaʻo e ʻalofia le vaai i ata matagā taufeusuaʻiga, e lē faigofie ona latou faia faapea. E tatou te lē lelei atoatoa, ma e manaʻomia  ai ona tatou tauivi e teena tuʻinanauga lē mamā taufeusuaʻiga. O le faaʻoleʻole foʻi o o tatou loto e tatou te ono saʻili ai se auala e solia ai le tulafono a le Atua. (Iere. 17:9) Peitaʻi, o le toʻatele ua avea nei ma Kerisiano ua manumalo i lenā tauiviga. O le iloaina o lenā mea, e mafai ona faalaeiauina ai oe pe afai o loo e taumafai e teena le matamata i ata matagā taufeusuaʻiga. Ia mātau le auala e mafai ona fesoasoani ai le Tusi Paia iā te oe e ʻalofia lenei mailei a Satani.

AUA LE MAFAUFAU PEA I MEA E LĒ MAMĀ

E pei ona taʻua muamua, o le toʻatele o tagata Isaraelu na taaʻina i latou i tuʻinanauga sesē ma oo atu ai i iʻuga mataʻutia. E mafai foʻi ona tupu lenā mea i aso nei. Na faamatala mai e Iakopo le ʻafa uso o Iesu le lamatiaga lenei: “Ua tosina ma maileia [tagata taʻitoʻatasi] i ona lava tuʻinanau. Auā a tō le tuʻinanau, ona fanau mai ai lea o le agasala.” (Iako. 1:14, 15) Pe a faataga e se tagata le tuputupu aʻe o tuʻinanauga lē mamā i lona loto, o le a iʻu atu ai i lona faia o le agasala. O lea, e tatau ai ona tatou liaʻi ese mafaufauga lē mamā, nai lo o le mafaufau pea i ai.

Pe afai e iai taimi ua e mafaufau ai i mea lē mamā, ia vave ona fai sau gaoioiga. Na fetalai Iesu: “O lenei, a e tausuai ona o lou lima po o lou vae, ia tipi ese ma lafoaʻi. . . . Afai foʻi e te tausuai ona o lou mata, ia sali ese ma lafoaʻi.” (Mata. 18:8, 9) E leʻi uiga le fetalaiga a Iesu i le faaleagaina moni o le tino. Peitaʻi, sa ia faataʻitaʻi mai le manaʻomia ona aveese o mea e māfua ai ona tatou tausuai, ma faia i ai se gaoioiga vave ma maumauaʻi. E faapefea ona tatou faatatauina lenā fautuaga i ata matagā taufeusuaʻiga?

Pe a oso aʻe ni ata matagā taufeusuaʻiga, aua e te mafaufau, ʻE leai se mea e tupu.’ Ia vave ona e tilotilo ese. Ia tapē loa le televise. Ia tapē foʻi le komepiuta po o le masini faaonapōnei i le taimi lava lenā. Ia toe mafaufau i mea e mamā. O le faia faapea o le a fesoasoani iā te oe e pulea ai ou mafaufauga, nai lo o le faataga o ou tuʻinanauga e puleaina oe.

AE E FAAPEFEA PE A E MAFAUFAU PEA I MEA LĒ MAMĀ?

Ae e faapefea pe afai ua e lē toe matamata i ata matagā taufeusuaʻiga, ae o loo e manatua  pea mea na e vaai ai mai i lea taimi i lea taimi? O nei vaaiga po o mafaufauga e mafai ona mau pea i le mafaufau o se tagata mo se taimi umi. O nisi taimi e faafuaseʻi ona oso aʻe na mafaufauga. Pe a tupu lenā mea, e ono faaosoosoina oe e faia ni gaoioiga lē mamā e pei o le taaloalo i totogasā. O lea, ia mataala pe a oso aʻe na mafaufauga, ma ia nofosauni e tetee atu i ai.

Ia maumauaʻi ina ia ōgatusa ou manatu ma gaoioiga ma le finagalo o le Atua. Ia faataʻitaʻi i le aposetolo o Paulo, o lē na lotomalie e “tatuʻi [lona] tino e fai ma pologa.” (1 Kori. 9:27) Aua neʻi faapologaina oe i tuʻinanauga lē mamā. “Ia liliu e ala i le suia o [lou] mafaufau, ina ia faamaonia e [oe] lava po o le ā le finagalo o le Atua, lea e lelei, e mālie, ma lelei atoatoa.” (Roma 12:2) Ia manatua: O le mafaufau ma gaoioi e ōgatusa ma le finagalo o le Atua, e mafai ona faafiafiaina ai i tatou nai lo o le lolo atu i o tatou tuʻinanauga agasala.

O le mafaufau ma gaoioi e ōgatusa ma le finagalo o le Atua, e mafai ona faafiafiaina ai i tatou nai lo o le lolo atu i o tatou tuʻinanauga agasala

Ia taumafai e tauloto ni mau patino. Pe a oso aʻe ni mafaufauga sesē, ia taumafai malosi e taulaʻi i na mau. O mau e pei o le Salamo 119:37; Isaia 52:11; Mataio 5:28; Efeso 5:3; Kolose 3:5; ma le 1 Tesalonia 4:4-8, o le a fesoasoani e faaōgatusa o tatou mafaufauga, ma le silafaga a Ieova e faatatau i ata matagā taufeusuaʻiga, ma mea e na te faafinagaloina mai iā i tatou.

Ae e faapefea pe a iai taimi e faigatā ai ona e teena le faanaunauga e matamata pe mafaufau i mea lē mamā? Ia taumafai e mulimulituʻi i le faaaʻoaʻoga a lo tatou Faaaʻoaʻo o Iesu. (1 Pete. 2:21) Ina ua māeʻa ona papatiso Iesu, sa faaosoosoina pea o ia e Satani. O le ā na faia e Iesu? Sa ia teena pea faaosoosoga a Satani, e ala i le faaaogāina o le tele o mau. Na ia faapea atu: “Inā alu ese ia oe Satani,” ona alu ese ai lea o ia. E pei lava ona lē faavaivai Iesu e tetee atu i le Tiapolo, o le mea foʻi lenā e tatau ona tatou faia. (Mata. 4:1-11) O le a taumafai pea Satani ma lana lalolagi e faatumu o tatou mafaufau i mea lē mamā, ae e lē tatau ona tatou faavaivai ai. E mafai ona tatou manumalo e teena ata matagā taufeusuaʻiga. O le fesoasoani a Ieova e mafai ai ona e teena lenā fili.

IA TATALO IĀ IEOVA MA USITAʻI IĀ TE IA

Ia faalagolago atoatoa iā Ieova i le tatalo. Na faapea mai Paulo: ʻIa faailoa atu o outou manaʻoga i le Atua, ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.’ (Fili. 4:6, 7) E aumaia e le Atua le filemu o le mafaufau, a o tatou tauivi e teena le faia o le agasala. Pe a tatou mafuta vavalalata iā Ieova, ʻona mafuta vavalalata mai lea o ia iā i tatou.’​—Iako. 4:8.

E mafai ona puipuia i tatou mai i mailei a Satani pe a malosi la tatou faiā ma le Pule Silisili Ese i le aoao o mea. Na fetalai Iesu: “O loo sau le pule o le lalolagi [Satani], ae e leai sana pule iā te aʻu.” (Ioa. 14:30) Aiseā na mautinoa ai faapena Iesu? Na ia fetalai: “O loo ma faatasi ma lē na auina mai aʻu; ma na te leʻi tuua aʻu na o aʻu, auā ou te faia pea mea e fiafia i ai lona finagalo.” (Ioa. 8:29) E lē tuulafoaʻia oe e Ieova, pe a e faia mea e fiafia i ai o ia. Ia ʻalofia le mailei o ata matagā taufeusuaʻiga, ona lē mafai lea ona maileia oe e Satani.