Skip to content

Skip to table of contents

 SUʻESUʻEGA 27

Ia Sauniuni Nei Loa mo Sauāga

Ia Sauniuni Nei Loa mo Sauāga

“E sauāina i latou uma e naunau e ola ma le faamaoni i le Atua ma aufaatasi ma Keriso Iesu.”​—2 TIMO. 3:12.

PESE 129 O le a Faaauau Ona Tatou Tumau

AOTELEGA *

1. Aiseā e manaʻomia ai ona tatou sauniuni mo sauāga?

I LE pō a o leʻi maliu lo tatou Alii o Iesu, na ia fetalai o le a sauāina i latou uma e filifili e avea ma ona soo. (Ioa. 17:14) E oo mai lava i aso nei, o loo sauāina auauna faamaoni a Ieova e i latou e tetee i le tapuaʻiga moni. (2 Timo. 3:12) A o lata mai foʻi le iʻuga o lenei faiga o mea, e tatou te faatalitalia o le a faateteleina teteega mai i o tatou fili.​—Mata. 24:9.

2-3. (a) O le ā e tatau ona tatou iloa e faatatau i le fefe? (e) O le ā o le a talanoaina i lenei mataupu?

2 E faapefea ona tatou sauniuni i le taimi lenei e fesagaʻia sauāga? E lē manaʻomia ona faaata i o tatou mafaufau mea lē lelei uma o le a tutupu iā i tatou. Talu ai e mafai ona lofitūina ai i tatou i le popole ma le atuatuvale. O na mafaufauga e mafai ona tatou fefefe ai a o leʻi oo mai sauāga, ma tatou faamaamulu ai i le auaunaga iā Ieova. (Faata. 12:25; 17:22) O le fefe o se auupega malosi a lo tatou ʻfili le Tiapolo,’ e na te faaaogā e osofaʻia ai i tatou. (1 Pete. 5:8, 9) E faapefea ona tatou sauniuni e tatalia sauāga?

3 O le a talanoaina i lenei mataupu auala e faamalosia ai la tatou faiā ma Ieova, ma le māfuaaga e tāua ai le faia o lenā mea i le taimi lenei. O le a talanoaina ai foʻi mea e mafai ona tatou faia e atiaʻe ai lo tatou lototele. E lē gata i lea, o auala e tali atu ai pe a sauāina i tatou.

AUALA E FAAMALOSIA AI LAU FAIĀ MA IEOVA

4. E tusa ai ma le Eperu 13:5, 6, o le ā e tatau ona tatou mautinoa i ai, ma aiseā e tāua ai lenā vala?

4 Ia e mautinoa e alofa Ieova iā te oe ma e na te lē tuulafoaʻia oe. (Faitau le Eperu 13:5, 6.) I le tele o tausaga ua  mavae, na taʻua ai i Le Olomatamata le manatu lenei: “O le tagata e na te iloa lelei le Atua, o le a ia maufaatuatuaina atoatoa le Atua i taimi o sauāga.” Maʻeu le moni o lenā manatu! Ina ia tatou tumau pe a feagai ma sauāga, e tatau ona tatou alolofa iā Ieova ma maufaatuatuaina atoatoa o ia, ma aua neʻi o tatou masalosalo i lona alofa iā i tatou.​—Mata. 22:36-38; Iako. 5:11.

5. O le ā e fesoasoani iā te oe e te lagona ai le alofa o Ieova?

5 Ia faitau le Tusi Paia i aso taʻitasi ma le sini ia mafuta vavalalata atu iā Ieova. (Iako. 4:8) A o e faitau i le Tusi Paia, ia uaʻi atu i uiga māfana o Ieova. Ia taumafai e lagona le tele o lona alofa iā te oe e ala i ana fetalaiga, ma mea na ia faia. (Eso. 34:6) E faigatā i nisi ona talitonu e alofa le Atua iā i latou, ona e leʻi faaalia atu lava e se tasi le alofa iā i latou. Pe afai o ou faalogona na, ia faia se lisi o auala na faaalia ai e Ieova le alofa mutimutivale, ma le agalelei iā te oe i aso taʻitasi. (Sala. 78:38, 39; Roma 8:32) Pe a e tomānatu i mea na tutupu iā te oe ma manatunatu loloto i mea na e faitau ai i le Afioga a le Atua, atonu o le a e tusia ai i lau lisi le tele o mea na faia e Ieova mo oe. O le tele o lou talisapaia o na mea, o le malosi foʻi lenā o la oulua faiā ma Ia.​—Sala. 116:1, 2.

6. E tusa ai ma le Salamo 94:17-19, e faapefea ona fesoasoani iā te oe au tatalo mai i le loto?

6 Ia tatalo e lē aunoa. Seʻi mafaufau i se tamaitiiti o loo opo ma le māfana e lona tamā. E lagona e le tamaitiiti le malupuipuia, ma o loo saʻoloto lana talanoa i lona tamā e faatatau i mea lelei ma mea leaga na tutupu i le aso. E mafai foʻi ona e maua se faiā faapena pe a e mafuta vavalalata iā Ieova, e ala i au tatalo mai i le loto i aso taʻitasi. (Faitau le Salamo 94:17-19.) A o e tatalo atu iā Ieova, ʻia sasaa atu lou loto iā te ia e pei o le vai,’ ma faailoa atu i lou Tamā mea uma o loo e popole ma atuatuvale ai. (Aue. 2:19) O le ā le iʻuga? O le a e maua ai “le filemu mai i le Atua, e silisili i mea uma lava e manatu i ai.” (Fili. 4:6, 7) O le tele e te tatalo ai i aso taʻitasi, o le atili foʻi lenā ona e mafuta vavalalata atu iā Ieova.​—Roma 8:38, 39.

E tatou te maua le lototele mai i le talitonu atoatoa iā Ieova ma lona Malo

Na faamalosia le faatuatua o Stanley Jones, ona o lona mautinoa e moni le Malo o le Atua (Tagaʻi i palakalafa 7)

7. Aiseā e tatau ai ona e mautinoa e taunuu moni folafolaga a le Atua e faatatau i lona Malo?

7 Ia e mautinoa o le a taunuu moni faamanuiaga o le Malo o le Atua. (Nu. 23:19) Pe a lē malosi lou faatuatua i na folafolaga, o le a faigofie ona faamataʻu oe e Satani ma ē e lagolagoina o ia. (Faata. 24:10; Epe. 2:15) E faapefea ona faamalosia lou mautinoa i le Malo o le Atua i le taimi lenei? Ia sema se taimi e saʻiliʻili ai e faatatau i folafolaga a le Malo o le Atua, ma māfuaaga e te mautinoa ai o le a taunuu moni na folafolaga. E faapefea ona fesoasoani lenā mea iā te oe? Seʻi mafaufau i le faaaʻoaʻoga a Stanley Jones, lea na falepuipui mo le fitu tausaga ona o lona faatuatua. * O le  ā na fesoasoani iā te ia ina ia tumau ai ma le faamaoni? Na ia faapea mai: “O le faamalosia o loʻu faatuatua i le poto e faatatau i le Malo o le Atua, ma le mautinoa atoatoa i ai, e leʻi mafai ai ona latou aveesea loʻu faamaoni.” Pe a malosi lou faatuatua i folafolaga a le Atua, o le a e mafuta vavalalata ai iā Ieova ma lē mafai ai ona taofia lau auaunaga ona o le fefe.​—Faata. 3:25, 26.

8. O le ā e mafai ona iloa mai i la tatou vaaiga e faatatau i le auai i sauniga? Ia faamatala.

8 Ia auai e lē aunoa i sauniga faa-Kerisiano. E fesoasoani sauniga ina ia tatou mafuta vavalalata atu ai iā Ieova. O la tatou vaaiga e faatatau i le auai i sauniga, e iloa ai po o le a tatou tumau pe a fesagaʻia sauāga i le lumanaʻi. (Epe. 10:24, 25) I le ā le itu? Pe a tatou faataga ni mea lāiti e taofia ai i tatou mai i le auai i sauniga i le taimi lenei, o le ā la o le a tupu i le lumanaʻi pe a lamatia o tatou ola ina ia faatasitasi ai ma o tatou uso? Ae pe a tatou maumauaʻi e auai i sauniga i le taimi lenei, o le a tatou lē fefefe pe a taumafai ē tetee e faasā a tatou sauniga. O le taimi lenei e atiaʻe ai lo tatou fiafia i sauniga. Pe a tatou faia faapea, o le a lē mafai e teteega ma faasāsāaga mai i faigāmalo, ona taofia i tatou mai i le usiusitaʻi i le Atua nai lo o tagata.​—Galu. 5:29.

O le taulotoina o mau ma pese o le Malo i le taimi nei, o le a fesoasoani iā te oe pe a feagai ma sauāga (Tagaʻi i palakalafa 9) *

9. E faapefea i le taulotoina o mau ona sauniunia ai i tatou mo sauāga?

9 Ia tauloto mau e te fiafia i ai. (Mata. 13:52) E lē mafai ona e manatua mea uma. Peitaʻi, e mafai ona faaaogā e Ieova lona agaga paia e toe faamanatu mai ai na mau i lou mafaufau. (Ioa. 14:26) Seʻi mātau le faamatalaga a se uso mai i Siamani i Sasaʻe na loka toʻatasi na o ia i se sela: “O se faamanuiaga le oo ane i lenā taimi, e faitau selau mau na ou taulotoina! Sa ou faaaogā ia aso e mafaufau loloto ai i mataupu eseese o le Tusi Paia.” O na mau na fesoasoani i lo tatou uso ina ia mafuta vavalalata ai iā Ieova, ma tumau faamaoni ai.

(Tagaʻi i palakalafa e 10) *

10. Aiseā e tatau ai ona tatou taulotoina pese e vivii ai iā Ieova?

10 Ia tauloto ma usu pese e viia ai Ieova. Ina ua faafalepuipui Paulo ma Sila i Filipi, na la usuina pese faaleagaga na la taulotoina. (Galu. 16:25) I se tulaga talitutusa, ina ua faaaunuua i Siberia o tatou uso mai i le Soviet Union, na faapefea ona faamalosia i latou? Na faamatala e Mariya Fedun e faapea: “Na matou usuina pese uma na matou manatua mai i le tusi pese.” Na ia faamatala o na pese na faalaeiauina ma fesoasoani iā i latou, ina ia mafuta vavalalata ai iā Ieova. Pe e faamalosia oe pe a e usuina se pese faaleagaga e te fiafia i  ai? O lea, ia taumafai e tauloto na pese i le taimi lenei.​—Tagaʻi i le pusa “ Aumai le Lototele.”

AUALA E ATIAʻE AI LOU LOTOTELE

11-12. (a) I le 1 Samuelu 17:37, 45-47, aiseā na lototele ai Tavita? (e) O le ā le lesona e tatou te aʻoaʻoina mai i le faaaʻoaʻoga a Tavita?

11 E tatou te manaʻomia le lototele, ina ia mafai ai ona tatou tumau pe a feagai ma sauāga. Pe a e manatu e lē o oe o se tagata lototele, o le ā e manaʻomia ona e faia? Ia manatua, o le lototele moni e lē faalagolago i le telē o lou tino, malosi, po o tomai. Seʻi mafaufau i le faaaʻoaʻoga a le talavou o Tavita ina ua fetaiaʻi ma Koliata. E lē faatusalia Tavita i le sauʻai o Koliata i lona fuaitino, malosi, ana auupega, ma e leʻi iai foʻi sana pelu. Peitaʻi, sa matuā lototele o ia. Na ia tamoʻe atu ma le lototele ma tau ma lenā tagata tinoese faasausili.

12 Aiseā na lototele ai Tavita? Talu ai na ia matuā mautinoa sa faatasi Ieova ma ia. (Faitau le 1 Samuelu 17:37, 45-47.) E leʻi uaʻi atu Tavita i le tinoese o Koliata pe a faatusatusa iā te ia. Nai lo o lea, na ia taulaʻi atu i le faatauvaa o Koliata pe a faatusatusa iā Ieova. O le ā e tatou te aʻoaʻoina mai i lenei tala? E tatou te maua le lototele pe a tatou mautinoa o loo faatasi Ieova ma i tatou, ma pe a tatou mautinoa e faatauvaa o tatou fili pe a faatusatusa i le Atua o Lē e ona le malosi uma lava. (2 No. 20:15; Sala. 16:8) E faapefea ona atiaʻe lo tatou lototele i le taimi lenei a o leʻi oo mai sauāga?

13. E faapefea ona atiaʻe lo tatou lototele? Ia faamatala.

13 E mafai ona atiaʻe lo tatou lototele i le taimi lenei, e ala i le talaʻi atu i isi o le tala lelei o le Malo o le Atua. Aiseā? Talu ai o le talaʻiga e aʻoaʻoina ai i tatou ina ia maufaatuatuaina Ieova ma ʻalofia ai le fefe i tagata. (Faata. 29:25) E pei lava ona malosi maso o le tino pe a fai faamalositino, e faapena foʻi ona faamalosia lo tatou lototetele pe a talaʻi mai i lea fale i lea fale, i nofoaga faitele, oganuu pisinisi, ma molimau atu lē fuafuaina. Pe a tatou atiaʻe le lototele e talaʻi i le taimi lenei, o le a sauniunia ai i tatou e talaʻi pea e tusa pe e faasā la tatou galuega.​—1 Tesa. 2:1, 2.

E leʻi mafai ona taofia Nancy Yuen i le talaʻia o le tala lelei (Tagaʻi i palakalafa 14)

14-15. O ā lesona e tatou te aʻoaʻoina mai iā Nancy Yuen ma Valentina Garnovskaya?

14 E tele lesona e tatou te aʻoaʻoina mai i ni tuafāfine faamaoni se toʻalua na mataʻina lo la lototetele. O Nancy Yuen e na o le lima futu (1.5 m) lona umī, ae e leʻi faigofie ona  faamataʻuina o ia. * E leʻi mafai ona taofia lona talaʻia o le tala lelei o le Malo. O le iʻuga, e silia ma le 20 tausaga na faafalepuipui ai o ia i le malo faa-Komunisi i Saina. Na faapea mai tagata o le malo na suʻesuʻeina Nancy, o ia le tagata “e sili ona tetee” i le atunuu.

Na mautinoa e Valentina Garnovskaya sa faatasi Ieova ma ia (Tagaʻi i palakalafa 15

15 E faapena foʻi le tulaga o Valentina Garnovskaya, lea e tolu taimi eseese na faafalepuipui ai i Soviet Union mo le 21 tausaga. * Aiseā? Talu ai sa ia maumauaʻi e talaʻi pea, ma na faaigoa ai o ia e tagata o le malo o se “tagata solitulafono mataʻutia.” Aiseā na matuā lototetele ai nei tuafāfine? Talu ai sa la mautinoa o loo faatasi Ieova ma i laʻua.

16. E faapefea ona tatou maua le lototele moni?

16 E pei ona tatou talanoaina, ina ia mafai ona tatou atiaʻe le lototele, e lē tatau ona tatou faalagolago i lo tatou lava malosi ma tomai. Nai lo o lea, e tatau ona tatou mautinoa o loo faatasi Ieova ma i tatou, ma o loo ia tau mo i tatou. (Teu. 1:29, 30; Saka. 4:6) O le auala lenā e tatou te maua ai le lototele moni.

AUALA E TALI ATU AI PE A ʻINOʻINO MAI TAGATA

17-18. E tusa ai ma le Ioane 15:18-21, o le ā le lapataʻiga na aumaia e Iesu? Ia faamatala.

17 E tatou te fiafia pe a faaaloalo mai isi ae pe a lē fiafia mai, e lē tatau ona tatou manatu ua leai so tatou aogā. Na fetalai Iesu: “E fiafia outou pe a inosia outou e tagata, ma latou tuliesea outou, ma faalumaina outou, ma taʻuleagaina o outou igoa ona o le Atalii o le tagata.” (Luka 6:22) O le ā le uiga o le fetalaiga a Iesu?

18 E leʻi uiga le fetalaiga a Iesu e fiafia Kerisiano pe a inosia i latou. Nai lo o lea, na ia aumaia se lapataʻiga i le mea o le a tupu iā i tatou. E lē o i tatou o se vaega o le lalolagi. E tatou te ola foʻi e ōgatusa ma aʻoaʻoga a Iesu ma talaʻi atu le feʻau na ia talaʻia. O le iʻuga, o le a ʻinoʻino mai le lalolagi iā i tatou. (Faitau le Ioane 15:18-21.) E tatou te mananaʻo e faafiafia Ieova. O lea, e leai se mea e soona popole ai pe a inosia i tatou e tagata, ona o lo tatou alolofa i lo tatou Tamā.

19. E faapefea ona tatou mulimuli i le faaaʻoaʻoga a aposetolo?

19 Aua neʻi faatagaina ni faamatalaga po o  gaoioiga a tagata faatauvaa, e te matamuli ai i le avea o oe o se Molimau a Ieova. (Mika 4:5) E mafai ona tatou aʻoaʻoina le auala e manumalo ai i le fefe i tagata, e ala i le mafaufau i le faaaʻoaʻoga na faia e aposetolo i Ierusalema ina ua maliu Iesu. Sa latou malamalama lelei i le ʻinoʻino o taʻitaʻi lotu Iutaia iā i latou. (Galu. 5:17, 18, 27, 28) E ui i lea, na faaauau ona latou ō atu i le malumalu i aso taʻitasi, ma faailoa atu i latou o soo o Iesu e ala i la latou talaʻiga. (Galu. 5:42) E latou te leʻi toʻilalo i le fefe i tagata. E mafai foʻi ona tatou manumalo i le fefe i tagata, e ala i le faalauiloa atu e lē aunoa o i tatou o Molimau a Ieova i galuega, aʻoga, ma o tatou tuaoi.​—Galu. 4:29; Roma 1:16.

20. Aiseā na fiafia ai le ʻauaposetolo e ui na inosia i latou?

20 Aiseā na fiafia ai le ʻauaposetolo? Sa latou malamalama i le māfuaaga na inosia ai i latou, ma na manatu o se faaeaga le sauāina o i latou ona o le faia o le finagalo o Ieova. (Luka 6:23; Galu. 5:41) Na tusi mulimuli ane le aposetolo o Peteru: “E tusa lava pe e tou te mafatia ona o le amiotonu, e fiafia lava outou.” (1 Pete. 2:19-21; 3:14) Pe a tatou malamalama ua inosia i tatou ona o le faia o le mea saʻo, o le a tatou lē faatagaina la le inoino mai o tagata, e taofia ai i tatou mai i le auauna atu iā Ieova.

E TAUIA I TATOU PE A SAUNIUNI

21-22. (a) O le ā ua e filifili e fai ina ia sauniuni ai mo sauāga? (e) O le ā o le a iloiloina i le mataupu o loo sosoo mai?

21 E tatou te lē iloa po o afea o le a amata ai ona tatou aafia i sauāga, ma po o afea o le a faasā ai e faigāmalo la tatou tapuaʻiga iā Ieova. Peitaʻi, ua tatou iloa e mafai ona tatou sauniuni i le taimi lenei e ala i le faamalosia o la tatou faiā ma Ieova, atiaʻe le lototele, ma iloa auala e tatou te manumalo ai i le fefe i tagata. O a tatou sauniuniga i le taimi lenei, e mafai ona tatou tūmausalī ai i le lumanaʻi.

22 Ae faapefea pe a faasā la tatou tapuaʻiga? I le mataupu o loo sosoo mai, o le a tatou iloiloina taʻiala faale-Tusi Paia e fesoasoani iā i tatou e auauna ai pea iā Ieova, e tusa pe e faasā la tatou galuega.

PESE 118 “Ia E Faatuputeleina lo Matou Faatuatua”

^ pala. 5 E tatou te lē mananaʻo e inosia i tatou e tagata. Ae o le mea moni, e lē o toe umi ona tatou feagai lea ma sauāga. O le a fesoasoani lenei mataupu iā i tatou, ina ia faaalia ai le lototele pe a feagai ma sauāga.

^ pala. 7 Tagaʻi i Le Olomatamata faa-Peretania o Tesema 15, 1965, itu. 756-767.

^ pala. 14 Tagaʻi i Le Olomatamata faa-Peretania o Iulai 15, 1979, itu. 4-7.

^ pala. 67 FAAMATALAGA O ATA: A o faia le tapuaʻiga a le aiga, o loo faaaogā e mātua tamaʻi pepa e tusia ai mau ina ia fesoasoani i le fanau e manatua.

^ pala. 70 FAAMATALAGA O ATA: A o agaʻi i le sauniga, o loo usuina e se aiga pese o le Malo i totonu o le taavale.