Skip to content

Skip to table of contents

 SUʻESUʻEGA 1

ʻIa Outou Ō Atu e Fai Tagata ma Soo’

ʻIa Outou Ō Atu e Fai Tagata ma Soo’

O LE MAU O LE TAUSAGA MO LE 2020: ʻO le mea lea, ia outou ō atu e fai tagata ma soo, ma papatiso atu iā i latou.’​—MATA. 28:19.

PESE 79 Aʻoaʻo i Latou ia Tutū Mausalī

AOTELEGA *

1-2. O le ā na taʻu atu e le agelu i fafine a o la i ai i le tuugamau o Iesu, ma o le ā le faatonuga na avatu e Iesu i nei fafine?

I LE taeaopō o Nisani 16, 33 T.A., ua savavali faanoanoa atu ni fafine e matataʻu i le Atua, i le tuugamau na tanu ai le tino maliu o le Alii o Iesu Keriso, lea e pe ā ma le 36 itula talu ona i ai i inā. Ina ua la taunuu i le nofoaga na tanu ai, na mananaʻo nei fafine e uu le tino maliu o Iesu i mea manogi ma suāuu manogi, ae na faateʻia i laʻua i le gaogao o le tuugamau. Na taʻu atu e le agelu i nei soo, ua toe faatūina mai Iesu i le oti, ma na ia faapea atili atu: “Ua muamua atu o ia iā te outou i Kalilaia; o i inā tou te iloa ai o ia.”​—Mata. 28:1-7; Luka 23:56; 24:10.

2 Ina ua tuua e fafine le tuugamau, na faafeiloaʻi i laʻua e Iesu ma avatu i ai le faatonuga lenei: “Ia oulua ō ma taʻu atu i oʻu uso, ina ia latou ō atu i Kalilaia; ma o i inā e latou te vāai mai ai iā te aʻu.” (Mata. 28:10) Atonu e matuā tāua le faatonuga o le a avatu e Iesu i ona soo, ona o le mea muamua lea na faatulaga e Iesu ina ua toetū mai.

O AI NA TUUINA ATU I AI LE FAATONUGA?

Ina ua feiloaʻi Iesu ma ona aposetolo faatasi ai ma isi i Kalilaia, ina ua mavae lona toetū mai, ona ia faatonuina lea o i latou ia ʻō atu e fai isi ma soo’ (Tagaʻi i le palakalafa 3-4)

3-4. Aiseā e tatou te faapea atu ai, e lē na o aposetolo na avatu i ai le faatonuga o loo i le Mataio 28:19, 20? (Tagaʻi i le ata i le faavaa.)

3 Faitau le Mataio 28:16-20. I le faatasiga lea na faatulaga e Iesu, na ia faamatala ai le galuega tāua o le a faia e ona soo i le uluaʻi senituri, o le galuega foʻi lenā o loo tatou faia i aso nei. Na faapea atu Iesu: “O le mea lea, ia outou ō atu e fai tagata o nuu uma lava ma soo, . . . ia aʻoaʻoina i latou ia tausi i mea uma ua ou poloaʻi atu ai iā te outou.”

 4 Na finagalo Iesu ia talaʻi ona soo uma. E lē na o ona aposetolo faamaoni e 11 na avatu i ai lenei faatonuga. E faapefea ona tatou mautinoa e moni lenā manatu? Seʻi mafaufau, pe e na o aposetolo na i ai i le mauga o Kalilaia ina ua avatu le faatonuga ia fai isi ma soo? Ia manatua le tala a le agelu na fai atu i fafine: “O i inā [i Kalilaia] tou te iloa ai o ia.” Na tatau foʻi la ona i ai nei fafine faamaoni i lenā faatasiga. E lē gata i lenā, ae na faailoa mai foʻi e le aposetolo o Paulo e faapea, na “faaali atu . . . o ia [Iesu] i le ʻauuso pe ā ma le toʻalima selau.” (1 Kori. 15:6) I fea?

5. O le ā ua tatou aʻoaʻoina mai i le 1 Korinito 15:6?

5 E iai māfuaaga lelei e tatou te faapea atu ai, na faasino atu Paulo i le faatasiga i Kalilaia, lea o loo i le Mataio mataupu e 28. O ā na māfuaaga? Muamua, o le toʻatele o soo o Iesu o tagata Kalilaia. O lea, o le mauga i Kalilaia o se nofoaga talafeagai e potopoto ai ni tagata se toʻatele, nai i lo o se fale o se aiga i Ierusalema. Lua, ua uma ona feiloaʻi Iesu ma ona aposetolo e 11 i se fale o se aiga i Ierusalema, ina ua toe faatūina mai. Pe ana fai e finagalo Iesu e faatonu na o ona aposetolo e talaʻi ma fai isi ma soo, semanū la e na te avatu le faatonuga iā i latou i Ierusalema. Peitaʻi, na ia talosaga atu iā i latou, fafine ma isi ia latou feiloaʻi i Kalilaia.​—Luka 24:33, 36.

6. Ua faapefea ona faailoa mai i le Mataio 28:20, o le faatonuga o le fai o isi ma soo e faatatau foʻi i aso nei, ma o le ā le tele ua usitaʻia ai lenā faatonuga?

6 Mātau mai le māfuaaga tāua lona tolu lenei. E lē na o Kerisiano na ola i le uluaʻi senituri, na avatu i ai e Iesu le faatonuga ia fai isi ma soo. E faapefea ona tatou iloa? Na faaiʻu e Iesu ana faatonuga i ona soo i upu nei: “Ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mata. 28:20) I aso nei, ua faamaonia le moni o upu a Iesu, ona ua matuā faateleina le galuega o le faia o isi ma soo. Sei manatu i le mea lenei! I tausaga taʻitasi, e toetoe 300,000 tagata e papatisoina o ni Molimau a Ieova, ma avea ma soo o Iesu Keriso!

7. O le ā o le a tatou talanoaina, ma aiseā?

7 E toʻatele i latou na suʻesuʻeina le Tusi Paia ua agaʻigaʻi i luma ma papatisoina. Peitaʻi, o nisi o loo tatou faia a latou suʻesuʻega faale-Tusi Paia, e foliga mai e faatalatū e avea ma soo. E fiafia i le suʻesuʻega, ae e latou te lē o agaʻigaʻi i luma mo le papatisoga. Pe afai o loo e faia se suʻesuʻega faale-Tusi Paia, e matou te mautinoa e te manaʻo e fesoasoani i lau tagata aʻoga ia faatatau mea o loo ia aʻoaʻoina, ma avea ma soo o Keriso. O le a talanoaina i lenei mataupu auala e fesoasoani ai ina ia pāʻia le loto o lau tagata aʻoga, ma auala e agaʻigaʻi ai i luma faaleagaga. Aiseā e manaʻomia ai ona tatou talanoaina lenei mataupu? Talu ai e iai le taimi e ono manaʻomia ai ona tatou filifili, pe e faaauau pe taofi le suʻesuʻega.

TAUMAFAI E PĀʻIA LE LOTO

8. Aiseā e faigatā ai ona pāʻia loto o tagata?

8 E finagalo Ieova ia auauna atu tagata iā te ia, ona e latou te alolofa iā te ia. O lea la, o lo tatou sini, o le fesoasoani i a tatou tagata aʻoga ia malamalama e matuā manatu mamafa mai Ieova iā i latou taʻitoʻatasi, ma e alofa tele iā i latou. E tatou te mananaʻo ia latou iloa, o Ieova “o le tamā o tamaiti e leai ni tamā, ma o le faamasino foʻi o fafine ua oti a latou tane.” (Sala. 68:5) Pe a oo ina talisapaia e au tagata aʻoga le alofa o le Atua mo i latou, o le a pāʻia o latou loto, ma o le a tuputupu aʻe foʻi lo latou alofa mo ia. Atonu e faigatā i nisi tagata aʻoga ona manatu iā Ieova o se Tamā alofa, ona e leʻi faaalia e o latou lava tamā le alofa ma le faapelepele iā i latou.  (2 Timo. 3:1, 3) O lea, a o e faia le suʻesuʻega, ia faamatilatila uiga mataʻina o Ieova. Ia fesoasoani i lau tagata aʻoga ia malamalama, e finagalo lo tatou Atua alofa ia latou maua le ola e faavavau, ma ua ia nofosauni e fesoasoani iā i latou ia maua lenā sini. O ā nisi mea e mafai ona tatou faia?

9-10. O ā lomiga e tatau ona tatou faaaogāina pe a fai se suʻesuʻega faale-Tusi Paia, ma aiseā e faaaogā ai na tusi?

9 Ia faaaogā tusi “O ā Aʻoaʻoga Mai i le Tusi Paia?” ma le “Auala e Tumau ai i le Alofa o le Atua.Ua saunia faapitoa nei lomiga, e fesoasoani ai iā i tatou ina ia pāʻia loto o a tatou tagata aʻoga. O se faaaʻoaʻoga, i le mataupu 1 o le tusi Aʻoaʻoga Mai i le Tusi Paia o loo taliina ai fesili nei: Po o silasila alofa moni mai le Atua?, O ā faalogona o le Atua pe a mafatia tagata?, ma Pe e mafai ona avea oe ma uō a Ieova? Ae e faapefea le tusi Tumau i le Alofa o le Atua? O le a fesoasoani lenei lomiga i lau tagata aʻoga ina ia malamalama ai, o le faatatauina o mataupu silisili o le Tusi Paia, e mafai ona faaleleia ai lona olaga ma vavalalata atu ai iā Ieova. E  tusa pe na e faaaogāina nei lomiga e faia ai suʻesuʻega a isi, ae e ao pea ona e sauniuni lelei mo suʻesuʻega taʻitasi, ma ia manatua manaʻoga e patino i lau tagata aʻoga.

10 Seʻi faapea e fiafia lau tagata aʻoga i se mataupu, o loo talanoaina i se lomiga e lē o aofia i a tatou Meafaigaluega mo le Aʻoaʻo Atu. Atonu e mafai ona e faalaeiauina o ia e faitau i lenā lomiga i sona taimi avanoa, ina ia faaauau ai ona fai le suʻesuʻega i se lomiga ua faatulaga mo suʻesuʻega faale-Tusi Paia, e pei ona taʻua muamua.

Ia amata le suʻesuʻega i le tatalo (Tagaʻi i le palakalafa e 11)

11. O le ā le taimi e tatau ai ona amata ma faaiʻu le suʻesuʻega i se tatalo, ma e ono faapefea ona e lāgā lenei mataupu?

11 Ia amata le suʻesuʻega i le tatalo. E tāua tele ona amata ma faaiʻu le suʻesuʻega i se tatalo i le vave e mafai ai, lea e masani ona amata fai i ni nai vaiaso talu ona fai le suʻesuʻega. E ao ona tatou fesoasoani i le tagata aʻoga ia iloa, e faatoʻā mafai ona tatou malamalama i le Afioga a le Atua, pe a fesoasoani mai le agaga o le Atua. E lāgā e nisi fai-aʻoga o le Tusi Paia le mataupu e faatatau i le tatalo, e ala i le faitau o le Iakopo 1:5, lea e faapea mai: “Pe afai ua leai se atamai i se tasi o outou, inā ōle atu pea ia i le Atua.” E fesili atu lē e faia le suʻesuʻega i le tagata aʻoga, “E faapefea ona tatou ōle atu i le Atua mo le atamai?” Atonu e ioe le tagata aʻoga e tatau ona tatou tatalo i le Atua.

12. E faapefea ona e faaaogā le Salamo 139:2-4 e fesoasoani ai i lau tagata aʻoga ia faaleleia ana tatalo?

12 Ia aʻoaʻo lau tagata aʻoga i le auala e tatalo ai. Ia faamautinoa atu iā te ia, e fiafia Ieova e faafofoga i ana tatalo mai i le loto. Ia faamatala atu, pe a tatou tatalo na o i tatou, ia matuā tatala o tatou loto iā Ieova, e ala i le faailoa atu o o tatou faalogona, lea atonu e tatou te lē mananaʻo e faamatala atu i isi. Auā o le mea moni, e silafia lelei e Ieova o tatou manatunatuga. (Faitau le Salamo 139:2-4.) E mafai foʻi ona faalaeiau tatou tagata aʻoga, e talosaga atu mo le fesoasoani a le Atua ina ia sui ona mafaufauga lē saʻo, ma manumalo mai i masaniga leaga. Seʻi mafaufau i se faaaʻoaʻoga, o se tasi ua leva ona suʻesuʻe ae o loo fiafia pea i aso faamanatu e lē faamanatuina e Kerisiano. Ua ia iloa e sesē, ae o le mea moni e fiafia e fai isi mea e aofia ai. Ia faalaeiau o ia e taʻu patino iā Ieova ona faalogona, ma talosagaina lana fesoasoani ia fiafia i mea e fiafia i ai Ieova.​—Sala. 97:10.

Ia valaaulia lau tagata aʻoga o le Tusi Paia ia auai i sauniga (Tagaʻi i le palakalafa e 13)

13. (a) Aiseā e tatau ai ona vave valaaulia a tatou tagata aʻoga e auai i sauniga? (e) E faapefea ona tatou fesoasoani i a tatou tagata aʻoga ia tau lē faamasania pe a auai mai i sauniga?

13 Ia vave ona valaaulia lau tagata aʻoga o le Tusi Paia ia auai i sauniga. O mea e faalogo ma mātauina e lau tagata aʻoga i sauniga faa-Kerisiano, e mafai ona pāʻia ai lona loto ma fesoasoani ai iā te ia e agaʻigaʻi i luma. Ia faaali i ai le vitiō O ā Mea o Loo Faia i se Maota mo Sauniga? ma valaaulia o ia e te lua ō faatasi. Ia ofo atu e piki o ia pe a mafai. O se mea lelei foʻi le valaaulia o tagata talaʻi eseese, e tou te ō e fai lana suʻesuʻega. O le faia faapea, o le a masani ai lau tagata aʻoga i isi i le faapotopotoga, ma tau lē faamasania ai pe a auai mai i a tatou sauniga.

FESOASOANI I LE TAGATA AʻOGA IA TUPUTUPU AʻE FAALEAGAGA

14. O le ā e uunaʻia ai le tagata aʻoga e tuputupu aʻe faaleagaga?

14 O lo tatou sini, ia fesoasoani i a tatou tagata aʻoga o le Tusi Paia ia tuputupu aʻe faaleagaga. (Efe. 4:13) Pe a ioe le tagata e suʻesuʻe le Tusi Paia, atonu o le māfuaaga autū e na te talia ai le suʻesuʻega ona e aogā iā te ia lava. Ae a o tuputupu aʻe lona alofa mo Ieova, atonu o le a uunaʻia ai o ia e mafaufau i auala e fesoasoani ai i isi, e aofia ai tagata  o le faapotopotoga. (Mata. 22:37-39) Pe a talafeagai le taimi, aua le faatalatū e taʻu atu, o se faaeaga le faia o foaʻi tauofo e lagolagoina ai le galuega o le Malo.

Aʻoaʻo lau tagata aʻoga i mea e fai pe a tulaʻi mai faafitauli (Tagaʻi i le palakalafa e 15)

15. O le ā le auala e tatou te fesoasoani ai i se tagata aʻoga, ina ia lelei le auala e tali atu ai pe a tulaʻi mai se faafitauli?

15 Aʻoaʻo lau tagata aʻoga o le Tusi Paia i mea e fai pe a tulaʻi mai faafitauli. O se faaaʻoaʻoga, seʻi faapea ua faamatala atu e lau tagata aʻoga lea ua avea ma tagata talaʻi e leʻi papatiso, se mea ua lē fiafia ai i se tasi i le faapotopotoga. Nai i lo o le faaituʻau, aiseā e lē faamatala atu ai mea o loo i le Tusi Paia e mafai ona ia faia? E mafai ona ia faamagalo lona uso, ae afai e lē mafai ona ia faagalo le mea na tupu, e mafai ona ia talanoa i le tagata i se auala agalelei ma alofa, ma le sini ʻia maua lona uso.’ (Faatusatusa i le Mataio 18:15.) Ia fesoasoani i lau tagata aʻoga ia sauniuni ana tala e fai atu. Ia faailoa atu le auala e faaaogā ai le JW Library, le Tusi Taʻiala mo Saʻiliʻiliga a Molimau a Ieova ma le jw.org/sm ina ia iloa ai auala aogā e taulima ai le faafitauli. O le tele o toleniga e na te maua a o leʻi papatiso, o le lelei foʻi lenā o le auala e feutagaʻi ai ma isi i le faapotopotoga, pe a uma ona papatiso.

16. Aiseā e lelei ai le valaaulia o isi tagata talaʻi e tou te ō e fai lau suʻesuʻega?

16 Ia valaaulia i le suʻesuʻega isi o le faapotopotoga, ma le ovasia matagaluega pe a asia le faapotopotoga. Aiseā? E faaopoopo atu i māfuaaga na taʻua i le amataga, atonu e mafai e nisi tagata talaʻi ona fesoasoani i lau tagata aʻoga, i ni auala e lē mafai ona e faia. O se faaaʻoaʻoga, seʻi faapea e tele taimi na taumafai ai le tagata aʻoga e tuu lana ulaula, ae e leʻi mafai. E lelei la ona valaaulia i le suʻesuʻega se Molimau, atonu na lē taulau i le tele o taimi na taumafai ai e tuu lana ulaula, ae ua manumalo mai i lea masaniga. E ono faamatala atu e lenei Molimau i le tagata aʻoga fautuaga aogā e na te manaʻomia. Pe afai e te matamuli e fai le suʻesuʻega a o iai se uso po o se tuafafine ua lava le poto masani, ia valaaulia o ia e fai le suʻesuʻega i lenā aso. Po o ai lava e te lua ō i le suʻesuʻega, ia faaaogā lona tomai e fesoasoani ai i le tagata aʻoga. Ia manatua, o lo tatou sini o le fesoasoani i le tagata aʻoga ia tuputupu aʻe faaleagaga.

PE E TATAU ONA TAOFI LE SUʻESUʻEGA?

17-18. O le ā e tatau ona e mafaufau i ai pe a e filifili e taofi le suʻesuʻega?

17 Pe afai e lē o agaʻigaʻi i luma lau tagata aʻoga, e iai le taimi e tatau ona e fesili ifo ai, ʻPe e tatau ona taofi le suʻesuʻega?’ A o leʻi faia lenā faaiʻuga, e tatau ona e mafaufau i le tomai o le tagata e aʻoaʻo ai mea. E iai tagata e umi se taimi e agaʻigaʻi ai i luma, nai i lo o isi. Ia fesili ifo: ʻPo o agaʻigaʻi i luma laʻu tagata aʻoga, pe a fua i mea e mafai ona ia faia?’ ʻPo ua amata ona “ia tausi” pe faatatau mea ua ia aʻoaʻoina?’ (Mata. 28:20) Atonu e umi se taimi o taumafai le tagata aʻoga e fai suiga i  lona olaga, ae e tatau ona faasolosolo ona agaʻigaʻi i luma.

18 Ae e faapefea pe afai ua umi ona suʻesuʻe se tasi, ae e itiiti pe leai foʻi se mea e iloa ai e na te talisapaia le suʻesuʻega? Seʻi mātau mai le faataʻitaʻiga lenei: Ua māeʻa ona suʻesuʻe e lau tagata aʻoga le tusi Aʻoaʻoga Mai i le Tusi Paia, ma atonu ua amata le tusi Tumau i le Alofa o le Atua, ae e leʻi auai lava i se sauniga po o le Faamanatuga. E masani foʻi ona ia tolopōina le faia o le suʻesuʻega, ona o ni māfuaaga e lē tāua. E manaʻomia la ona e talanoa atu i le tagata aʻoga i se auala manino, e faatatau i lenā tulaga. *

19. O le ā atonu e te fai atu ai i se tasi e foliga mai e lē o talisapaia lana suʻesuʻega faale-Tusi Paia, ma o le ā e manaʻomia ona e mafaufau i ai?

19 Atonu e amata le lua talanoaga i lou fesili atu iā te ia, ʻO le ā sou manatu, o le ā se luʻi e sili ona faigatā pe a avea oe ma Molimau a Ieova?’ E ono tali mai le tagata aʻoga, ʻOu te fiafia lava i laʻu suʻesuʻega, ae e lē mafai ona avea aʻu ma Molimau a Ieova.’ Pe afai o lona manatu lea ae ua umi ona suʻesuʻe, pe e aogā la ona faaauau pea lana suʻesuʻega? I le isi itu, atonu o le taimi muamua lea e faailoa mai ai e le tagata aʻoga le māfuaaga e lē o mafai ai ona agaʻigaʻi i luma. O se faaaʻoaʻoga, atonu e manatu e lē mafai ona ia talaʻi mai i lea fale i lea fale. O lea, o le iloa o ona faalogona, ua e malamalama la i le auala e fesoasoani ai iā te ia.

Aua le faaaluina le taimi e fai ai se suʻesuʻega a se tasi e lē fua mai (Tagaʻi i le palakalafa e 20)

20. E faapefea i lo tatou malamalama i le Galuega 13:48, ona fesoasoani e filifili ai pe e faaauau ona fai le suʻesuʻega pe e taofi?

20 E faanoanoa ona ua pei nisi tagata aʻoga, o tagata Isaraelu i aso o Esekielu. Na taʻu atu e Ieova iā Esekielu e faatatau iā i latou na: “Faauta foʻi! ua pei oe o sē e usuina pese aualofa iā i latou, e pei o sē e manaia lona leo ma tāina lelei se meafaifaaili e iai uaua. O le a latou faalogo i au upu ae e leai se tasi e faia ia mea.” (Eseki. 33:32) Atonu e faigatā ona tatou faapea atu i se tasi, o le a taofi le faia o lana suʻesuʻega. Peitaʻi, “ua itiiti le taimi o totoe.” (1 Kori. 7:29) Nai lo o le faaalu o le taimi e fai ai se suʻesuʻega e lē fua mai, ae e manaʻomia ona tatou saʻili tagata e iai faamaoniga “ua saunia o latou loto mo le ola e faavavau.”​—Faitau le Galuega 13:48.

Atonu o loo iai nisi i lau oganuu o loo tatalo mo se fesoasoani (Tagaʻi i le palakalafa e 20)

21. O le ā le mau o le tausaga 2020, ma aiseā e talafeagai ai?

21 O la tatou mau o le tausaga 2020, o le a fesoasoani iā i tatou e uaʻi atu ai i le faaleleia o o tatou tomai i le galuega o le fai o isi ma soo. O loo taʻua ai nisi o upu a Iesu na fetalai ai i le faatasiga iloga i le mauga o Kalilaia: ʻO le mea lea, ia outou ō atu e fai tagata ma soo, ma papatiso atu iā i latou.’​Mata. 28:19.

Tau ina ia tatou maumauaʻi e uaʻi atu i le faaleleia o o tatou tomai i le galuega o le fai o isi ma soo, ma fesoasoani i a tatou tagata aʻoga ia papatiso (Tagaʻi i le palakalafa e 21)

PESE 70 Saʻili Ē ua Tatau i Ai

^ pala. 5 Ua faalaeiauina i tatou i le mau o le tausaga 2020, ia ʻfai tagata ma soo.’ E aofia auauna uma a Ieova i lenā faatonuga. E faapefea ona tatou pāʻia loto o a tatou tagata aʻoga o le Tusi Paia, ina ia avea ai i latou ma soo o Keriso? O le a faailoa mai i lenei mataupu, auala e tatou te fesoasoani ai i a tatou tagata aʻoga o le Tusi Paia, ia vavalalata atu iā Ieova. O le a tatou talanoaina ai foʻi le auala e tatou te filifili ai, pe e tatau ona faaauau le suʻesuʻega pe taofi.

^ pala. 18 Ia maimoa i le vitiō Taofia le Faaauauina o Suʻesuʻega Faale-Tusi Paia e Lē Fua Mai o loo i le TV i le Initaneti a Molimau a Ieova.