Skip to content

Skip to table of contents

 SUʻESUʻEGA 8

Ia Tausisi i le Filemu e Ala i le Teena o le Matauʻa

Ia Tausisi i le Filemu e Ala i le Teena o le Matauʻa

“Seʻi tatou tausisi i mea e faatupu ai le filemu, ma mea e atiaʻe ai e le tasi le isi.”​—ROMA 14:19.

PESE 113 Lo Tatou Filemu

AOTELEGA *

1. O ā aafiaga o le matauʻa i le aiga o Iosefa?

NA ALOFA Iakopo i ona atalii uma, ae na sili atu lona alofa iā Iosefa lea ua 17 ona tausaga. O ā uiga na faaalia e uso o Iosefa? Na latou faaalia le matauʻa, ma iʻu ai lava ina latou ʻinoʻino iā Iosefa. E leai se mea na faia e Iosefa sa tatau ai ona ʻinoʻino ona uso iā te ia. E ui i lea, ae na latou faatau atu Iosefa e avea ma pologa, ma latou pepelo ai i lo latou tamā e faapea, ua ʻaina e se manufeʻai lona atalii pele. O le matauʻa na māfua ai ona latou saveʻuina le filemu o le aiga, ma latou faatupu ai mafatiaga i lo latou tamā.​—Kene. 37:3, 4, 27-34.

2. E tusa ai ma le Kalatia 5:19-21, aiseā e mataʻutia ai le matauʻa?

2 I le Tusi Paia, o loo lisiina ai le matauʻa * i “galuega a le tino” e iʻu ai i le oti, lea e lē agavaa ai se tasi e ulu atu i le Malo o le Atua. (Faitau le Kalatia 5:19-21.) O le matauʻa e māfua ai isi uiga leaga e pei o le femisaaʻi, lotoa ma le ita.

3. O le ā o le a tatou talanoaina i lenei mataupu?

3 O le mea na tupu i uso o Iosefa ua faaalia ai e mafai e le matauʻa ona faaleagaina ai faiā, ma saveʻuina ai le filemu o se aiga. E ui e tatou te lē faia mea ia na faia e uso o Iosefa, ae o o tatou loto e lē lelei atoatoa ma e faaʻoleʻole. (Iere. 17:9) E lētioa la a iai taimi e tatou te matauʻa ai i isi. O lea, seʻi o tatou iloiloina ni faaaʻoaʻoga o lapataʻiga mai i le Tusi Paia, e fesoasoani iā i tatou e iloa ai māfuaaga e ono tutupu ai faalogona  matauʻa i o tatou loto. O le a tatou talanoaina foʻi auala aogā e teena ai le matauʻa ma atiaʻe ai le filemu.

O LE Ā E MĀFUA AI ONA MATAUʻA?

4. Aiseā na matauʻa ai tagata Filisitia iā Isaako?

4 Pe a tamaoaiga se tasi. O Isaako o se tane mauʻoa, ma na matauʻa tagata Filisitia ona o lona tamaoaiga. (Kene. 26:12-14) Na latou tatanu vaieli na faamoemoe i ai Isaako mo vai e faainu ai ana lafu. (Kene. 26:15, 16, 27) O nisi tagata i aso nei, ua pei o tagata Filisitia e matauʻa iā i latou e tele a latou meafaitino. E lē gata e latou te mananaʻo i mea o loo maua e isi, ae e mananaʻo foʻi e aveese mai mea o loo maua e na tagata.

5. Aiseā na matauʻa ai taʻitaʻi lotu iā Iesu?

5 Pe a alofagia e tagata. Na matauʻa taʻitaʻi lotu Iutaia iā Iesu, ona na alofagia o ia e le toʻatele o tagata. (Mata. 7:28, 29) Na avea Iesu ma sui o le Atua, ma na ia aʻoaʻoina atu le upu moni. Peitaʻi, na faasalalau atu e taʻitaʻi lotu tala pepelo ma faamatalaga taufaaleaga, ina ia faaleaga ai le talaaga lelei o Iesu. (Mare. 15:10; Ioa. 11:47, 48; 12:12, 13, 19) O ā ni lesona lapataʻi ua tatou aʻoaʻoina mai i lenei tala? E tatau ona tatou teena so o se faanaunauga e matauʻa ai iā i latou e iai uiga e alofagia ai i le faapotopotoga. Nai lo o lea, e tatau ona tatou taumafai e faaaʻoaʻo i o latou uiga lelei.​—1 Kori. 11:1; 3 Ioa. 11.

6. Na faapefea ona faaalia e Tioterifi le matauʻa?

6 Faaeaga i le faapotopotoga. I le uluaʻi senituri, na matauʻa Tioterifi iā i latou na taʻimua i le faapotopotoga Kerisiano. Na “fia muamua” o ia i le faapotopotoga, ma ia faasalalau ai tala taufaaleaga e faaleaga ai le aposetolo o Ioane ma isi uso agavaa. (3 Ioa. 9, 10) Atonu e tatou te lē faia mea na faia e Tioterifi, ae e ono mafai ona tatou matauʻa i se Kerisiano ua maua se faaeaga na tatou faamoemoe e mauaina, aemaise pe a tatou manatu e mafai ona tatou faia le tiute tauave, pe e sili atu foʻi le auala e tatou te faia ai nai lo o lenā uso.

O o tatou loto e pei o se eleele, a o o tatou uiga lelei e pei o ni fugālaau matagofie. Ae e pei le matauʻa o se vao oona. E mafai e le matauʻa ona taofia le tupu aʻe o uiga lelei e pei o le alofa, alofa mutimutivale ma le agalelei (Tagaʻi i le palakalafa e 7)

7. O ā aafiaga o le matauʻa iā i tatou?

7 E pei le matauʻa o se vao oona. O le taimi lava e mauaa ai i o tatou loto lenā vao oona, o le a matuā faigatā lava ona tapē. E tupu tele le matauʻa pe a iā i tatou isi uiga leaga e pei o le fuā lē tatau, faamaualuga ma le manatu faapito. E mafai e le matauʻa ona taofia le tupu aʻe o uiga lelei iā i tatou e pei o le alofa, alofa mutimutivale ma le agalelei. O lea, o le taimi lava e tatou te lagona ai ua tupu aʻe le matauʻa i o tatou loto, o le taimi foʻi lenā e manaʻomia ai ona liaʻieseina. E faapefea ona tatou teena le matauʻa?

ATIAʻE LE LOTOMAULALO MA LE LOTOMALIE

E faapefea ona tatou teena le matauʻa? E ala i le fesoasoani a le agaga paia o le Atua, e mafai ai ona tatou liaʻieseina le matauʻa ae suia i le lotomaulalo ma le lotomalie (Tagaʻi i palakalafa e 8-9)

8. O ā uiga e fesoasoani iā i tatou e teena ai le matauʻa?

8 E mafai ona tatou teena le matauʻa, pe a atiaʻe le lotomaulalo ma le lotomalie. Pe a tumu o tatou loto i nei uiga lelei, o le a leai la se avanoa e tupu aʻe ai le matauʻa. O le lotomaulalo, e fesoasoani iā i tatou e lē manatu ai ua sili i tatou i isi. O le tagata e lotomaulalo, e lē manatu e tatau ona sili atu mea e na te maua nai lo o isi. (Kala. 6:3, 4) O le tagata e lotomalie, e faamalieina i mea ua ia maua, ma e na te lē faatusatusa o ia i isi. (1 Timo. 6:7, 8) E fiafia le tagata e lotomaulalo ma lotomalie pe a vaai atu ua maua e se tasi se mea lelei.

9. E tusa ai ma le Kalatia 5:16 ma le Filipi 2:3, 4, e faapefea ona fesoasoani mai le agaga paia iā i tatou?

9 E tatou te manaʻomia le fesoasoani a le agaga paia o le Atua ina ia ʻalofia ai le tuʻinanauga o le tino o le matauʻa, ae atiaʻe le lotomaulalo ma le lotomalie. (Faitau le Kalatia 5:16; Filipi 2:3, 4.) E mafai ona fesoasoani le agaga paia o Ieova, e tatou te iloiloina ai o tatou faanaunauga moni ma uunaʻiga. O le  fesoasoani a le Atua e mafai ai ona tatou suia mafaufauga ma faalogona lē lelei, i mafaufauga ma faalogona e atiaʻe ai. (Sala. 26:2; 51:10) Seʻi tatou talanoa i faaaʻoaʻoga a Mose ma Paulo, o tane na manumalo i le teena o faanaunauga matauʻa.

Ua tamoʻe atu se talavou Isaraelu e taʻu iā Mose ma Iosua, ni tane se toʻalua o loo vavalo e pei o ni perofeta. Ua fai atu Iosua iā Mose e taofi nei tane, ae na teena e Mose. Nai lo o lea, na ia taʻu atu iā Iosua lona fiafia ina ua tuu e Ieova Lona agaga i nei tane e toʻalua (Tagaʻi i palakalafa e 10)

10. O le ā le mea na tupu na tofotofoina ai Mose? (Tagaʻi i le ata i le faavaa.)

10 E tele le pule na iā Mose i tagata o le Atua, ae e na te leʻi taumafai e taofi isi mai i le mauaina o lenā pule. O se faaaʻoaʻoga, i se tasi taimi, na aveese ai e Ieova se vaega o lona agaga paia mai iā Mose, ma tuuina atu i ni toeaina Isaraelu na tutū latalata i le faleʻie o le feiloaʻiga. E leʻi umi ae logotala Mose, ua maua e ni tane se toʻalua le agaga paia ae e leʻi ō i le faleʻie o le feiloaʻiga, ma ua amata ona la gaoioi e pei o ni perofeta. O le ā le tali a Mose ina ua talosaga atu Iosua e taofi nei tane e toʻalua? E leʻi matauʻa Mose ona ua faaaogā e Ieova nei tane e toʻalua. Nai i lo lea, na lotomaulalo Mose ma na fiafia faatasi ma i laʻua i lo la faaeaga. (Nu. 11:24-29) O le ā le lesona e tatou te aʻoaʻoina mai iā Mose?

E faapefea ona faaaʻoaʻo toeaina Kerisiano i uiga lotomaulalo o Mose? (Tagaʻi i palakalafa e 11-12) *

11. E faapefea ona faaaʻoaʻo toeaina iā Mose?

11 Pe afai o oe o se toeaina, pe na talosagaina oe e toleni se tasi e na te vaaia le faaeaga o le faapotopotoga lea e te fiafia i ai? O se faaaʻoaʻoga, atonu e te fiafia i le faaeaga o le faia o le Suʻesuʻega o le Olomatamata i vaiaso taʻitasi. Ae pe a e lotomaulalo e pei o Mose, o le a e lē popole la pe a talosagaina oe e toleni se isi uso ina ia taulima lenā faaeaga i se taimi o i luma. Nai i lo o lea, o le a e fiafia e fesoasoani i lou uso.

12. Ua faapefea ona faaalia e le toʻatele o Kerisiano i aso nei le lotomalie ma le lotomaulalo?

12 Seʻi mātau se isi tulaga o loo fesagaʻia e le toʻatele o uso matutua. Mo le tele o tausaga, na latou auauna o ni sooupu o le ʻautoeaina. Ae pe a atoa le taʻi 80 o o latou tausaga, e latou te lotomalilie e faamatuu ese atu lenei faaeaga. O ovasia matagaluega ua atoa le taʻi 70 o o latou tausaga, e lotomaulalo e tuua o latou faaeaga, ae talia se isi faaeaga e galulue ai i se isi vala o le auaunaga. I tausaga talu ai nei, o le toʻatele o tagata o le aiga Peteli i le lalolagi aoao, ua amata ona auauna i o latou faaeaga fou i le fanua. O nei uso ma tuafāfine faamaoni, e lē tigā o latou loto iā i latou o loo tauaveina faaeaga ia na latou faia muamua.

13. O ā mea na ono faaosoosoina ai Paulo e matauʻa i aposetolo e 12?

13 O le aposetolo o Paulo o le isi faaaʻoaʻoga lelei o se tasi na atiaʻe le lotomalie ma le lotomaulalo. E leʻi faatagaina e Paulo le matauʻa e tuputupu aʻe i lona loto. Na ia galue mamafa i le galuega talaʻi, ae na ia lotomaulalo e faapea mai: “O aʻu o lē e aupito faatauvaa o le ʻauaposetolo, ma e lē tatau ona taʻua aʻu o se aposetolo.” (1 Kori. 15:9, 10) Na mulimuli aposetolo e 12 iā Iesu a o iai i lana faiva i le lalolagi, ae e leʻi avea Paulo o se Kerisiano i lenā taimi, seʻia oo ina mavae le maliu ma le toetū mai o Iesu. E ui lava na tofia o ia e avea ma “aposetolo o nuu ese,” ae e leʻi agavaa Paulo mo le faaeaga faapitoa o le avea ai ma se tasi o aposetolo e 12. (Roma 11:13; Galu. 1:21-26) Nai lo o le matauʻa o Paulo i nei tane e 12 ma le vavalalata o a latou faiā ma Iesu, ae na lotomalie pea o ia i faaeaga na ia maua.

14. O le ā e tatou te faia pe a tatou lotomalilie ma lotomaulalo?

14 Pe a tatou lotomalilie ma lotomaulalo, o le a tatou pei la o Paulo i le faaalia o le faaaloalo iā i latou ua tuu atu i ai e Ieova le pule. (Galu. 21:20-26) Ua faatulagaina e Ieova tane tofia e taʻimua i le faapotopotoga Kerisiano. E ui e lē lelei atoatoa nei tane, ae e silasila Ieova iā i latou o ni “meaalofa i tagata.” (Efe. 4:8, 11) Pe a tatou faaaloalo i nei tane tofia ma  lotomaulalo e mulimuli i le latou taʻitaʻiga, o le a tatou vavalalata atu iā Ieova ma maua ai le filemu ma o tatou uso Kerisiano.

“TAUSISI I MEA E FAATUPU AI LE FILEMU”

15. O le ā e manaʻomia ona tatou faia?

15 E lē mafai ona maua le filemu pe a tatou faatagaina le matauʻa e tupu i o tatou va ma uso. E manaʻomia ona liaʻieseina le matauʻa mai i o tatou loto, ma ʻalofia le totō i loto o isi o le matauʻa. E tatau ona tatou faia nei gaoioiga tāua ina ia tatou usitaʻia ai le faatonuga a Ieova, e “tausisi i mea e faatupu ai le filemu, ma mea e atiaʻe ai e le tasi le isi.” (Roma 14:19) O ā ni mea patino e tatou te faia e fesoasoani ai i isi e teena le matauʻa, ma e faapefea ona tatou faatupuina le filemu?

16. E faapefea ona tatou fesoasoani i isi e teena le matauʻa?

16 E telē se aafiaga o o tatou uiga ma gaoioiga i isi. E manaʻo le lalolagi ia iā i tatou uiga “faalialiavale” i mea ua tatou maua. (1 Ioa. 2:16) Ae o lenā uiga, e faatupu ai le matauʻa. E mafai ona tatou ʻalofia le faatupu o le matauʻa i isi, pe a lē talanoa soo i mea ua tatou maua, po o mea foʻi o tatou fuafua e faatau. O le isi auala e mafai ai ona tatou ʻalofia le faatupu o le matauʻa i isi, o le auala e amioaʻi ai pe a tatou maua faaeaga i le faapotopotoga. Pe a tatou faauaʻi mai isi i faaeaga ua tatou maua, ua tatou faatoʻaina la se eleele lelei e ola lauusiusi ai le matauʻa. Peitaʻi, pe a faaalia le naunau moni i isi ma faailoa i ai mea lelei ua latou faia, ua tatou fesoasoani la iā i latou ia  lotomalilie, ma ua tatou atiaʻe ai foʻi le autasi ma le filemu i le faapotopotoga.

17. O le ā na mafai ona fai e uso o Iosefa, ma aiseā?

17 E mafai ona tatou manumalo mai i le taua faasaga i le matauʻa! Seʻi toe mafaufau i le mea na tupu i uso o Iosefa. Na latou toe feiloaʻi ma Iosefa i Aikupito ina ua mavae le tele o tausaga talu ona latou faileagaina o ia. A o leʻi faailoa atu e Iosefa o ia i ona uso, na ia tofotofoina i latou ina ia iloa po ua i ai se suiga. Na ia faia se taumafataga, ma na ia avatu le tele o meaʻai iā Peniamina le uso laʻitiiti nai i lo o isi. (Kene. 43:33, 34) Peitaʻi, e leʻi iai se faailoga na iloa ai e matauʻa ona uso iā Peniamina. Nai lo o lea, na latou faaalia le manatu mamafa i lo latou uso, ma lo latou tamā o Iakopo. (Kene. 44:30-34) Na mafai ona toe maua e le aiga o Iosefa le filemu, ona na liaʻiese e uso o Iosefa le matauʻa. (Kene. 45:4, 15) E faapena foʻi pe a tatou liaʻiese so o se lagona matauʻa, o le a faatumauina ai le filemu i o tatou aiga ma le faapotopotoga.

18. E tusa ai ma le Iakopo 3:17, 18, o le ā e tupu pe a tatou fesoasoani e atiaʻe se siʻomaga filemu?

18 E finagalo Ieova ia tatou teena le matauʻa ae tausisi i le filemu. E tatau ona tatou galulue mamafa e faia nei mea. E pei ona talanoaina, e iai o tatou faanaunauga matauʻa. (Iako. 4:5) O loo siʻomia foʻi i tatou i se lalolagi o loo faaauilumaina le matauʻa. Ae pe a tatou atiaʻe le lotomaulalo, lotomalie ma le talisapaia, o le a leai la se avanoa e tupu aʻe ai le matauʻa i o tatou loto. Nai lo o lea, o le a tatou fesoasoani e atiaʻe se siʻomaga filemu lea e faatupu aʻe ai uiga lelei.​—Faitau le Iakopo 3:17, 18.

PESE 130 Ia Faamagalo Atu

^ pala. 5 E filemu le faalapotopotoga a Ieova. Ae e mafai ona saveʻuina lenei filemu, pe a tatou faatagaina lagona matauʻa e tuputupu aʻe i o tatou loto. O lenei mataupu, o le a tatou iloa ai māfuaaga e tupu ai le matauʻa. O le a tatou talanoaina ai foʻi auala e teena ai lenei uiga leaga, ma auala e atiaʻe ai le filemu.

^ pala. 2 UIGA O FAAUPUGA: E pei ona faamatalaina i le Tusi Paia, o le matauʻa e māfua ai ona manaʻo se tasi i mea o loo maua e isi, ae e mananaʻo foʻi e aveese mea ua maua e na tagata.

^ pala. 61 FAAMATALAGA O ATA: A o faia le fono a le ʻautoeaina, na talosagaina ai se uso matua o loo faia le Suʻesuʻega o le Olomatamata a le faapotopotoga e toleni se toeaina talavou ina ia faia lenā faaeaga. E ui i le fiafia o le uso matua lenei i lona tofiga, ae na ia lagolagoina ma lona lotoatoa le faaiʻuga a toeaina, e ala i le avatu i le uso talavou o fautuaga aogā ma faamālō atu i ai.