Skip to content

Skip to table of contents

 SUʻESUʻEGA 7

E Tatou te Alolofa Faapelepele iā Ieova lo Tatou Tamā

E Tatou te Alolofa Faapelepele iā Ieova lo Tatou Tamā

“Ua tatou alolofa auā na muaʻi alofa mai le Atua iā i tatou.”​—1 IOA. 4:19.

PESE 3 Lo Matou Malosi, Faamoemoega, ma lo Matou Faatuatuaga

AOTELEGA *

1-2. Aiseā ma na faapefea ona tatala mai e Ieova le avanoa mo i tatou e avea ai ma vaega o lona ʻauaiga?

UA VALAAULIA e Ieova i tatou ia avea ma vaega o lona ʻauaiga o tagata tapuaʻi. Maʻeu se valaaulia inā matagofie! Ua faia aʻe lo tatou aiga iā i latou ua tuuina atu i le Atua, ma faatuatua i le taulaga togiola a lona Alo. O i tatou o se aiga fiafia. Ua tatou olioli i se olaga uigā i aso nei, ma o le a tatou fiafia i le faamoemoe o le ola e faavavau i le lagi, po o le Parataiso i le lalolagi.

2 Na tatala mai e Ieova le avanoa e avea ai i tatou ma vaega o lona ʻauaiga. Na mafai ona ia faia lenā mea ona o lona alofa, ma le faataulaga tele na ia faia. (Ioa. 3:16) “E taugatā le tau na faatauina mai ai” i tatou. (1 Kori. 6:20) O le saunia e Ieova o le togiola, ua mafai ai ona tatou maua se faiā māfana ma ia. Ua iā i tatou foʻi le faaeaga o le taʻua o Lē e silisili ese i le aoao o mea o le Tamā. Sa tatou talanoaina i le mataupu ua mavae, o Ieova o le Tamā sili.

3. O ā fesili atonu e tatou te fesili ifo ai? (Tagaʻi foʻi i le pusa “ Po o Silafia Aʻu e Ieova?”)

3 I le pei o se tasi o tusitala o le Tusi Paia, atonu e tatou te fesili: “O le ā se mea ou te totogi atu iā Ieova ona o mea lelei uma ua ia faia iā te aʻu?” (Sala. 116:12) O le tali, e lē mafai ona tatou toe taui atu se mea i lo tatou Tamā i le lagi. Ae o lona alofa iā i tatou e uunaʻia ai pea i tatou e alolofa iā te ia. Na tusi le aposetolo o Ioane: “Ua tatou alolofa auā na muaʻi alofa mai le Atua iā i tatou.” (1 Ioa. 4:19) O ā auala e tatou te faailoa atu ai i lo tatou Tamā i le lagi e tatou te alolofa iā te ia?

 IA MAFUTA VAVALALATA IĀ IEOVA

E tatou te faailoa atu e tatou te alolofa faapelepele iā Ieova lo tatou Tamā i le lagi, e ala i le mafuta vavalalata atu iā te ia i le tatalo, usiusitaʻi iā te ia, ma fesoasoani i isi ia alolofa iā te ia (Tagaʻi i palakalafa e 4-14)

4. E tusa ai ma le Iakopo 4:8, aiseā e tatau ai ona tatou faia taumafaiga e mafuta vavalalata atu ai iā Ieova?

4 E finagalo Ieova ia tatou mafuta vavalalata atu iā te ia, ma talanoa atu iā te ia. (Faitau le Iakopo 4:8.) Ua ia uunaʻia i tatou ia “finafinau i le tatalo,” ma e faafofoga mai o ia i taimi uma. (Roma 12:12) E lē mafai ona vaivai pe pisi Ieova e faafofoga mai i a tatou tatalo. Ae e tatou te faalogo atu iā te ia, e ala i le faitau i lana Afioga le Tusi Paia ma lomiga ia e fesoasoani iā i tatou e malamalama ai i le Tusi Paia. E tatou te faalogo atu foʻi iā te ia e ala i le uaʻi totoʻa atu i sauniga. E pei lava ona fesoasoani talanoaga faifai pea a mātua ma fanau e vavalalata ai, e faapena foʻi ona fesoasoani le talanoa e lē aunoa iā Ieova e vavalalata atu ai iā te ia.

Tagaʻi i le palakalafa e 5

5. E faapefea ona faaleleia a tatou tatalo?

5 Seʻi mafaufau po o faapeʻī mai au tatalo i le Atua. E finagalo Ieova ia sasaa atu o tatou loto iā te ia i le tatalo. (Sala. 62:8) E lelei ona tatou fesili ifo iā i tatou lava i lenei fesili: ʻPo o tau ina fai aʻu tatalo ma tautū i faaupuga masani, po ou te tatalo mai i le loto e tai pei o se tusi e tusiaina lelei?’ E mautinoa e loloto lou alofa mo Ieova, ma e te manaʻo e faatumauina le malosi o la oulua faiā ma ia. Ae ina ia faia faapea, e manaʻomia ona e talanoa iā te ia e lē aunoa. Ia sasaa atu ou faalogona iā te ia. Ia faailoa atu iā te ia mea o loo e fiafia ai ma mea o loo e tigā ai. Ia e mautinoa e mafai ona e talosaga atu iā te ia mo le fesoasoani.

6. O le ā e tatau ona tatou faia ina ia vavalalata atu ai i lo tatou Tamā i le lagi?

6 Ina ia tatou mafuta vavalalata atu i lo tatou Tamā i le lagi, e tatau ona faatumauina pea lo tatou lotofaafetai. E tatou te ioe faatasi ma le faisalamo o lē na tusi: “E tele lava mea ua e faia, Ieova e, loʻu Atua, e oo lava i au galuega ofoofogia ma ou manatunatuga iā i matou. E leai se isi e faatusaina iā te oe. O mea ia na ou fia taʻu atu ma tautala i ai, a ua matuā tele lava, ua lē mafaitaulia.” (Sala. 40:5) E tele mea e tatou te faia nai lo o le tau ina lagona o le lotofaafetai; e tatou te faailoa atu lo tatou lotofaafetai iā Ieova e ala i a tatou upu ma gaoioiga. O le faia faapea, o le a tatou tutū matilatila ese ai mai i le toʻatele i aso nei. Ua tatou ola i se lalolagi e lē faaalia e tagata le lotofaafetai i mea uma ua faia e le Atua mo i latou. O le mea moni, o se tasi o mea e iloa ai o loo tatou ola i “aso e gata ai,” o le lē lotofaafetai o tagata. (2 Timo. 3:1, 2) Ia aua lava neʻi iā i tatou lenā uiga!

7. O le ā e finagalo Ieova e tatou te faia, ma aiseā?

7 E lē mananaʻo mātua e tauaʻimisa a latou fanau, ae ia avea ma uō. E finagalo foʻi Ieova ia avea uma lana fanau ma uō. O le mea moni, o le alofa o le tasi i le isi, e iloa ai o i tatou o Kerisiano moni. (Ioa. 13:35) E tatou te ioe ma le faisalamo o lē na tusi: “Faauta! Maʻeu le lelei ma le matagofie pe a nonofo faatasi o uso i le autasi!” (Sala. 133:1) Pe a tatou alolofa i o tatou uso ma tuafāfine, ua tatou faamaonia atu foʻi la iā Ieova e tatou te alolofa iā te ia. (1 Ioa. 4:20) Maʻeu le matagofie o le avea ai ma vaega o le aiga o uso ma tuafāfine, o ē e ʻagalelei le tasi i le isi, ma māfana le alofa’!​—Efe. 4:32.

IA FAAALI ATU LOU ALOFA E ALA I LE USITAʻI

Tagaʻi i le palakalafa e 8

8. E tusa ai ma le 1 Ioane 5:3, o le ā le māfuaaga autū e tatou te usiusitaʻi ai iā Ieova?

8 E faatalitalia e Ieova fanau e usiusitaʻi i o latou mātua, ma e na te faatalitalia i tatou e usiusitaʻi iā te ia. (Efe. 6:1) E alagatatau ona tatou usiusitaʻi iā te ia, ona o ia o Lē na foafoaina i tatou, o Lē e faatumauina o tatou ola, ma o le matua e sili ona atamai i mātua uma. Peitaʻi, o le māfuaaga autū e tatou te usiusitaʻi ai iā Ieova, ona e tatou te alolofa iā te ia. (Faitau le 1 Ioane 5:3.) E ui e tele māfuaaga e tatau ai ona tatou usiusitaʻi iā Ieova, ae e na te lē faamalosia i tatou e faia faapea. Ua foaʻi mai e Ieova iā i tatou le meaalofa o le filifiliga saʻoloto, o lea,  e fiafia o ia pe a tatou filifili e usiusitaʻi iā te ia ona e tatou te alolofa iā te ia.

9-10. Aiseā e tāua ai le iloa o tapulaa a Ieova ma ola e ōgatusa ai ma na tapulaa?

9 E mananaʻo mātua ia saogalemu a latou fanau. O le māfuaaga lea e latou te faataatitia ai tapulaa tauamio e puipuia ai a latou fanau. Pe a usitaʻia e fanau nei tapulaa, ua faaalia ai lo latou maufaatuatuaina ma faaaloalo i o latou mātua. Maʻeu le tāua tele o lo tatou iloa o tapulaa a lo tatou Tamā i le lagi, ma ola e ōgatusa ai ma na tapulaa. Pe a tatou faia faapea, ua tatou faaali atu ai iā Ieova e tatou te alolofa ma faaaloalo iā te ia, ma e aogā foʻi mo i tatou na tapulaa. (Isa. 48:17, 18) Peitaʻi, o i latou e teena Ieova ma ana tapulaa, e iʻu atu ai i tigā.​—Kala. 6:7, 8.

10 Pe a tatou ola i se auala e faafiafiaina ai Ieova, e puipuia la i tatou mai i le faaleagaina o le itu i le tino, itu tau faalogona ma le itu faaleagaga. E silafia e Ieova mea e sili mo i tatou. Ua faapea mai Aurora e nofo i le Iunaite Setete, “Ou te iloa o le usitaʻi iā Ieova e iʻu atu ai i se olaga e sili ona lelei.” E moni lenā manatu mo i tatou uma. O ā aogā ua e maua mai i le usitaʻia o taʻiala alofa a Ieova?

11. E faapefea ona fesoasoani le tatalo iā i tatou?

11 E fesoasoani le tatalo iā i tatou ia usiusitaʻi ai e tusa pe e faigatā. E iai taimi e faigatā ai ona tatou usiusitaʻi iā Ieova, ae e tatau ona tauivi pea ma o tatou faanaunauga agasala. Na ʻaiʻoi atu le faisalamo i le Atua: “Tau ina ia e lagolagoina aʻu i le agaga usiusitaʻi.” (Sala. 51:12) Ua faapea mai Denise o se paeonia sauatoa,  “Pe a faigatā ona ou usitaʻi i se faatonuga a Ieova, ou te tatalo mo le malosi ia ou faia ai le mea saʻo.” E tatou te mautinoa foʻi e tali mai Ieova i taimi uma e tatou te talosaga atu ai.​—Luka 11:9-13.

IA FESOASOANI I ISI E ALOLOFA I LO TATOU TAMĀ

12. E tusa ai ma le Efeso 5:1, o le ā e tatau ona tatou faia?

12 Faitau le Efeso 5:1. Ona o i tatou o le “fanau pele” a Ieova, e tatou te taumafai malosi la e faaaʻoaʻo iā te ia. E tatou te faaaʻoaʻo i ona uiga e ala i le faaalia o le alofa, agalelei, ma faamagalo atu i isi. Pe a mātauina e i latou o ē e lē iloa le Atua a tatou amioga lelei, e ono uunaʻia ai foʻi la i latou e fia iloa atili mea e faatatau iā te ia. (1 Pete. 2:12) E tatau i mātua Kerisiano ona feutagaʻi ma a latou fanau e pei ona feutagaʻi Ieova ma i tatou. Pe a faia faapea, atonu o le a mananaʻo fanau e atiaʻe sa latou lava faauōga ma lo tatou Tamā alofa.

Tagaʻi i le palakalafa e 13

13. O le ā e manaʻomia ona tatou uaʻi atu i ai?

13 E mitamita se tamaitiiti i lona tamā ma e fiafia e talanoa e uiga iā te ia. E faapena foʻi ona tatou mitamita i lo tatou Tamā i le lagi o Ieova, ma e tatou te mananaʻo ia iloa o ia e isi. E tatou te lagona uma faalogona o le tupu o Tavita, o lē na tusi: “E mitamita loʻu loto iā Ieova.” (Sala. 34:2) Ae e faapefea pe afai e tatou te matamumuli? E faapefea ona tatou maua le lototele? E tatou te maua le lototele pe a tatou uaʻi atu i le faafiafiaina o Ieova, ma le tele o aogā e maua e isi mai i le aʻoaʻoina o mea e faatatau iā te ia. E foaʻi mai e Ieova le lototele e tatou te  manaʻomia. Na ia fesoasoani i o tatou uso i le uluaʻi senituri ia lototetele, ma o le a ia fesoasoani mai foʻi iā i tatou.—1 Tesa. 2:2.

14. O ā nisi māfuaaga e tāua ai le faia o so tatou sao i le galuega o le faia o isi ma soo?

14 E lē faailoga tagata Ieova, ma e fiafia o ia pe a silasila mai o loo tatou alolofa i isi e tusa lava po o le ā lo latou talaaga. (Galu. 10:34, 35) O se tasi o auala sili e faaalia ai le alofa i isi, o le faailoa atu lea iā i latou o le tala lelei. (Mata. 28:19, 20) O le ā e mafai ona faataunuu e lenei galuega? O i latou e faalogo mai, e mafai ona faaleleia o latou olaga i le taimi nei, ma maua le faamoemoe o le olioli i le ola e faavavau i le lumanaʻi.​—1 Timo. 4:16.

IA ALOFA I LO TATOU TAMĀ MA IA FIAFIA

15-16. O ā māfuaaga ua tatou fiafia ai?

15 O Ieova o se matua alofa, ma o lona finagalo ia fiafia lona aiga. (Isa. 65:14) E tele māfuaaga e tatou te fiafia ai i le taimi nei e ui atonu o loo tatou feagai ma faigatā. O se faaaʻoaʻoga, ua tatou mautinoa e alofa faapelepele lo tatou Tamā i le lagi iā i tatou. Ua tatou maua le poto saʻo o le Afioga a le Atua, le Tusi Paia. (Iere. 15:16) O i tatou o se vaega o le ʻauaiga e faia aʻe i tagata e alolofa iā Ieova, ola e tusa ai ma ana tapulaa maualuluga tauamio, ma e alofa le tasi i le isi.​—Sala. 106:4, 5.

16 E mafai ona faatumauina pea lo tatou fiafia, ona ua tatou mautinoa o le a sili atu ona lelei le olaga i le lumanaʻi. Ua tatou iloa e lē o toe umi ona aveesea lea e Ieova o tagata amioleaga uma, ma i lalo o le taʻitaʻiga a lona Malo o le a toe faafoʻisia ai le lalolagi e avea ma Parataiso. O loo iai foʻi iā i tatou se faamoemoe matagofie i le lumanaʻi, o le a toe faatutūina i latou ua maliliu ma toe faatasi ma ē pele iā i latou. (Ioa. 5:28, 29) Maʻeu le olioli o le a i ai! O le mea e sili ona tāua, o lo tatou mautinoa ua toeitiiti ona avatu lea e i latou uma i le lagi ma le lalolagi o le mamalu, viiga ma le tapuaʻiga e tatau ai i lo tatou Tamā alofa.

PESE 12 O Ieova o le Atua Silisili

^ pala. 5 Ua tatou iloa e alofa faapelepele Ieova lo tatou Tamā iā i tatou, ma ua ia aumaia i tatou i lona ʻauaiga o tagata tapuaʻi. O lea, ua uunaʻia ai i tatou e alolofa iā te ia. E faapefea ona tatou faaalia le alofa i lo tatou Tamā? O le a talanoaina i lenei mataupu ni mea patino e mafai ona tatou faia.