Alu i mataupu o loo iai

Alu i le lisi o mataupu

TALAAGA O LE SOIFUAGA

O le Faaaʻoaʻo i Faaaʻoaʻoga Lelei, na Ou Maua ai Faamanuiaga e Tele

O le Faaaʻoaʻo i Faaaʻoaʻoga Lelei, na Ou Maua ai Faamanuiaga e Tele

NA FAIGATĀ ona ou talaʻi a o oʻu laʻitiiti. Ae ina ua ou matua, na ou maua ni faaeaga na ou manatu ou te lē agavaa e fai. O lea, seʻi oʻu faamatala atu faaaʻoaʻoga lelei na fesoasoani iā te aʻu e foʻia ai loʻu fefe, ma ou olioli ai i faamanuiaga matagofie i laʻu auaunaga faataimi atoa mo le 58 tausaga.

Na ou fanau i le aai o Quebec i le itumalo o Kanata e taʻua foʻi o Quebec, e tautatala i le gagana Falani. Na tausia aʻu e oʻu mātua o Louis ma Zélia i se siʻomaga alofa. O loʻu tamā o se tagata e filemu, ma e ese le fiafia e faitau tusi. Ae na ou fiafia e tusitusi, ma na ou faanaunau e avea aʻu ma tusitala.

I le pe ā ma le 12 o oʻu tausaga, na asia ai lo matou aiga e Rodolphe Soucy ma lana uō. Na faigaluega faatasi Rodolphe ma loʻu tamā. O Rodolphe ma lana uō o ni Molimau a Ieova. Ou te leʻi malamalama lelei e faatatau i Molimau, ma ou te leʻi fiafia foʻi i ai. E ui i lea, na ou fiafia tele i le agalelei ma le talafeagai o le auala na latou taliina ai fesili, e faaaogā ai le Tusi Paia. Na matuā fiafia foʻi i ai oʻu matua, o lea na matou talia ai se suʻesuʻega faale-Tusi Paia.

I lenā taimi, na ou auai ai i se aʻoga a le lotu Katoliko. E iai taimi e matou te talanoa ai ma tamaiti o laʻu vasega e faatatau i mea na ou aʻoaʻoina mai i laʻu suʻesuʻega faale-Tusi Paia. Na iʻu lava ina iloa e faiaʻoga, o ni patele. Nai lo o le faaaogā o le Tusi Paia e aʻoaʻi ai aʻu, ae na tuuaʻia aʻu e se faiaʻoga i luma o le vasega atoa, ma faapea mai ou te fouvale. E ui ina lē lelei le mea na tupu ae na avea o se faamanuiaga, auā na fesoasoani iā te aʻu e iloa ai o aʻoaʻoga faalotu lea na aʻoaʻo i le aʻoga e lē ōgatasi ma aʻoaʻoga a le Tusi Paia. Na ou iloa e lē tatau ona ou toe auai i lenā aʻoga. O lea, na faataga ai aʻu e oʻu mātua e sui laʻu aʻoga.

TOLENIINA IA FIAFIA I LE TALAʻIGA

Na faaauau ona ou suʻesuʻeina le Tusi Paia, ae na tuai ona ou agaʻigaʻi i luma faaleagaga auā na ou fefe e talaʻi mai i lea fale i lea fale. Na aafia tagata i le malosi o taaʻiga a le lotu Katoliko, ma na matuā malosi a latou teteega i le matou galuega talaʻi. Na auaufaatasi Maurice Duplessis o le taʻitaʻi faapolotiki o Quebec, ma le lotu Katoliko. Na lagolagoina e Maurice taufaifaiga ma osofaʻiga a vaega faatupu faalavelave i Molimau. O lea, na matuā manaʻomia le lototele e talaʻi ai i na taimi.

O le uso o John Rae na faauu mai i le vasega lona iva o le Aʻoga mo Kiliata, na fesoasoani iā te aʻu e manumalo mai i loʻu fefe. O John o se tagata ua lava le poto masani i le talaʻiga, e agamalu, e filemu ma e faigofie ona talanoa i ai. E seāseā ia aumaia ni fautuaga tuusaʻo, ae o ana faaaʻoaʻoga lelei na sili atu ona aogā iā te aʻu. E leʻi faigofie ona tautala John i le gagana Falani, o lea, e masani ai ona ma ō faatasi i le talaʻiga ma fesoasoani iā te ia i le gagana. O le faifaimea faatasi ma John, na iʻu ai ina ou filifili e avea aʻu ma Molimau a Ieova. Ina ua mavae le 10 tausaga talu ona ou feiloaʻi i Molimau, na ou papatiso ai iā Me 26, 1951.

O le faaaʻoaʻoga lelei a John Rae (A) na fesoasoani iā te aʻu (E) e foʻia ai loʻu fefe e talaʻi mai i lea fale i lea fale

E toʻatele i paeonia la matou faapotopotoga laʻitiiti i le aai o Quebec. O a latou faaaʻoaʻoga lelei na uunaʻia ai aʻu e paeonia. I na taimi, e na o le Tusi Paia na matou faaaogāina i le galuega talaʻi mai i lea fale i lea fale. Na tatau la ona matou faaaogāina ma le uigā le Tusi Paia, ona e leʻi faaaogāina ni lomiga. O lea, na ou filigā ai e faamasani i mau o le Tusi Paia e puipuia ai le upu moni. Peitaʻi, e toʻatele na mumusu e faitau le Tusi Paia pe a lē iai le faailoga aloaʻia, e iloa ai ua faataga e le lotu Katoliko.

Na ou faaipoipo iā Simone Patry i le 1952, o se tuafafine faamaoni mai i Quebec. Na ma siitia i Montreal, ma ina ua mavae se tausaga, na faamanuiaina i maʻua i se tama teine e igoa iā Lise. E ui ina taofi laʻu paeonia ae ua toeitiiti ma faaipoipo, ae na ma taumafai ma Simone e faafaigofie o ma olaga, ina ia mafai ai e lo matou aiga ona fai se sao atoatoa i galuega a le faapotopotoga.

Ina ua mavae le 10 tausaga, na ou toe mafaufau e auai i le auaunaga paeonia. I le 1962, ina ua ou auai i le Aʻoga o le Faiva o le Malo mo Toeaina mo se masina i le Peteli i Kanata, na tofia aʻu e potu faatasi ma se uso e igoa iā Camille Ouellette. Na matuā faalaeiauina aʻu i le maelega o Camille i le talaʻiga, aemaise lava o ia o se uso e faaipoipo ma e fai lana fanau. I na aso, e lē o se mea masani i Quebec le paeonia o se matua ae fai se fanau, peitaʻi o le sini lenā o Camille. A o ma potu faatasi, na faalaeiauina aʻu e le uso e mafaufau i loʻu tulaga. Ina ua mavae ni nai masina, na ou iloa ai ua mafai ona toe avea aʻu ma paeonia sauatoa. E iai nisi na fesiligia pe e atamai laʻu filifiliga na fai ae na ou paeonia lava, ma le mautinoa o le a faamanuia Ieova i aʻu taumafaiga ina ia tele soʻu sao i le galuega talaʻi.

TOE FOʻI I LE AAI O QUEBEC O NI PAEONIA FAAPITO

Na tofia i maʻua ma Simone i le 1964 e auauna o ni paeonia faapito i le aai o Quebec, le nuu na ma feola ane ai, lea o le a ma auauna ai mo ni tausaga. I lenā taimi, ua faaleleia tulaga o le talaʻiga, ae na iai lava teteega.

I le aoauli o se Aso Toonaʻi, na lokaina ai aʻu i Sainte-Marie, o se tamaʻi taulaga e lē mamao mai i le aai o Quebec. Na ave aʻu e se leoleo i le ofisa autū o leoleo, ma loka i le falepuipui ona na ou talaʻi e aunoa ma se pemita. Mulimuli ane, na ou tulaʻi i luma o le faamasino e igoa iā Baillargeon, o se tamāloa e foliga faasiasia. Na ia fesili mai po o ai laʻu lōia. Ina ua ou taʻua le igoa o Glen How, * o se lōia Molimau e lauiloa, na ia faapea mai ma le popole: “E a? O le tagata lenā!” Na lauiloa Glen How i lona puipuia faaletulafono o Molimau a Ieova i na aso. E leʻi umi ae faailoa mai e le faamasinoga ua faalēaogāina oʻu moliaga.

O teteega i la matou galuega i Quebec, na faafaigatā ai ona maua se fale mautotogi e talafeagai mo sauniga. E na o se faletaavale tuai e matuā mālūlū na maua e si o matou faapotopotoga laʻitiiti. Ina ia maua sina māfanafana i le maʻatiʻati o le mālūlū, na faaaogā e uso le suāuu e tafu ai se afi e faamāfanafana ai. E masani ona matou faapotopoto ai mo ni nai itula a o leʻi amataina le sauniga e faasoa ai ni tala faalaeiau.

E ese le matagofie o le faatuputeleina o le galuega talaʻi talu mai na tausaga e oo mai lava i le taimi nei. I le vaitaimi o le 1960 i le 1969, e toʻaitiiti faapotopotoga na iai i le aai o Quebec, le vaipanoa o Côte-Nord ma le penisula o Gaspé. I aso nei, ua sili atu ma le lua matagaluega i nei nofoaga, ma e mananaia Maota mo Sauniga e feiloaʻi ai uso.

VALAAULIA I LE GALUEGA FEMALAGAAʻI

I le 1977, na ou auai i se fono mo ovasia femalagaaʻi i Toronto i Kanata

Na valaaulia i maʻua ma Simone i le galuega matagaluega i le 1970. Ae i le 1973, na tofia ai i maʻua i le galuega itumalo. I na tausaga, na ou aʻoaʻoina le tele o mea mai i uso ua lava le tomai e pei o Laurier Saumur * ma David Splane, * na la galulue i galuega femalagaaʻi. Pe a māeʻa fonotaga taʻitasi, e ma te fefaasoaaʻi ma David i ni fautuaga i le auala e faaleleia ai o ma tomai o le aʻoaʻo atu. Ou te manatua se taimi na faapea mai ai David: “Na ou fiafia i lau lauga faaiʻu Léonce. Na lelei, ae tolu lauga ou te faia mai i lau lauga!” O laʻu masani lenā o le faaaofia o le tele o manatu i aʻu lauga. Sa manaʻomia la ona ou galue e faafaigofie aʻu lauga.

Na ou galue i aai eseese i le itu sasaʻe o Kanata

Na tofia ovasia itumalo e faalaeiau i ovasia o matagaluega. Peitaʻi, e toʻatele le ʻautalaʻi na iloa lelei aʻu i Quebec. Na masani ona latou mananaʻo e matou te galulue faatasi pe a ou asia matagaluega. E ui na ou fiafia e talaʻi faatasi ma i latou, ae e leʻi tele soʻu taimi na faaalu ma le ovasia o le matagaluega. I se tasi aso, na faamanatu mai e se ovasia matagaluega agalelei: “O se mea lelei le faaalu o lou taimi mo uso, ae aua neʻi galo iā te oe o le vaiaso lenei e ta te galulue ai!” O lenei fautuaga agalelei, na fesoasoani iā te aʻu e maua ai se vaaiga paleni.

O se tulaga faanoanoa le mea na tupu faafuaseʻi i le 1976. Na maʻi tigāina si aʻu avā pele o Simone ma maliu ai. O lona agaga faataulaga ma lona alofa mo Ieova, na pele ai o ia iā te aʻu. O loʻu pisi tele i le talaʻiga na matuā fesoasoani iā te aʻu e onosaia ai oʻu faalogona faavauvau ona o le misia o ia, ma e faafetai iā Ieova mo lana fesoasoani mai i na taimi faigatā. Mulimuli ane, na ou faaipoipo atu iā Carolyn Elliott, o se paeonia maelega e tautala i le gagana faa-Peretania, na siitia mai e auauna i Quebec i le mea na tele ai le manaʻoga. E faigofie ona talanoa iā Carolyn, ma e ese le naunau i isi, aemaise i latou e matamumuli ma tuua toʻatasi. Na avea o ia o se faamanuiaga ina ua ma galulue faatasi i le galuega femalagaaʻi.

SE TAUSAGA ILOGA

Iā Ianuari 1978, na tofia ai aʻu e avea ma faiaʻoga i le uluaʻi Aʻoga mo le Auaunaga Paeonia i Quebec. Na ou matuā popole, ona e lē gata e fou iā te aʻu mataupu na aʻoaʻoina ai ae fou foʻi i tagata aʻoʻoga. Ae o le mea e lelei ai, e toʻatele paeonia e iai le poto masani na auai i le vasega muamua. E ui o aʻu o le faiaʻoga, ae e tele mea na ou aʻoaʻoina mai i le vasega.

Mulimuli ane i le 1978, na faia ai le Tauaofiaga Faavaomalo i le Montreal’s Olympic Stadium, na faamatuaina, “Victorious Faith.” O le tauaofiaga pito sili lea ona telē i Quebec, lea na silia ma le 80,000 le aofia. Na tofia aʻu e talanoa atu i le ʻautusitala ma le ʻaufaasalalau e faatatau i le tauaofiaga. Na ou matuā fiafia i le tele o tala lelei na latou faasalalauina. Pe a tuufaatasi le umi na faatalanoa ai uso i luga o televise ma leitiō, e silia ma le 20 itula na faaalu ai, ma e faitau selau tala na lomia e faatatau i le tauaofiaga. Maʻeu se molimau tele na avatu ai!

SIITIA I SE ISI OGANUU

E telē le suiga na oo iā te aʻu i le 1996. Talu mai loʻu papatisoga, na ou galue i faapotopotoga na tautatala i le gagana Falani i Quebec, ae o lea ua tofia aʻu e galue i se itumalo e tautatala i le gagana Peretania, i le vaipanoa o Toronto. Na ou lagona le lē agavaa ma na ou matuā popole e fai ni aʻu lauga, ona e leʻi lelei laʻu faa-Peretania. Na manaʻomia ona ou tatalo e lē aunoa, ma faalagolago atoatoa iā Ieova.

Pe a ou toe tepa i tua, ou te taʻutino atu, na ou matuā fiafia i le lua tausaga lea na ou auauna ai i Toronto. Na onosaʻi Carolyn ma fesoasoani mai ia ou maua pea le mautinoa pe a ou tautala faa-Peretania, ma na lagolagosua uso ma faalaeiau mai. Na vave ona maua ni ma uō fou.

E tele isi galuega ma sauniuniga mo le fonotaga i le faaiʻuga o se vaiaso, ae na masani ona ou faaalu se itula o afiafi o Aso Faraile e talaʻi ai mai i lea fale i lea fale. Na ono manatu nisi, ʻAiseā e talaʻi ai, ae ua lata i le faaiʻuga o le vaiaso e pisi ai i le fono?’ E ui i lea, na ou iloa o le faia o ni talanoaga i le talaʻiga na faafouina ai aʻu. E oo mai lava i aso nei, o le faia o se sao i le talaʻiga, e faamalosia ai pea aʻu.

I le 1998, na toe tofia i maʻua ma Carolyn i Montreal o ni paeonia faapito. Mo le tele o tausaga, na aofia i lo ma tofiga le faamaopoopoina o galuega talaʻi faapitoa i nofoaga faitele, ma galulue ma le ʻautusitala ina ia faamalamalama ai tala sesē e uiga i Molimau a Ieova. Na ma fiafia i lenā taimi ma Carolyn e talaʻi i tagata mai i isi atunuu, o ē na faatoʻā siitia ane i Kanata ma e naunau e fia iloa atili e faatatau i le Tusi Paia.

Ma laʻu avā o Carolyn

Pe a ou toe mafaufau i le 68 tausaga talu ona avea aʻu ma auauna papatiso a Ieova, ou te lagona le matuā faamanuiaina. O le aʻoaʻoina ia fiafia i le talaʻiga ma fesoasoani i le toʻatele e iloa le upu moni, o se faamanuiaga sili. Ina ua matutua le fanau a loʻu afafine o Lise ma lana tane, na la auauna ai o ni paeonia sauatoa. O lona maelega i le galuega talaʻi na matuā pāʻia ai loʻu loto. Ou te matuā lotofaafetai i uso Kerisiano na fesoasoani a latou faaaʻoaʻoga lelei ma fautuaga atamai iā te aʻu, e tuputupu aʻe ai faaleagaga ma taulima ai le tele o faaeaga. Ua ou iloa e faatoʻā mafai ona tatou tumau faamaoni i se tofiga, pe a faalagolago i le malosi o le agaga paia o Ieova. (Sala. 51:11) Ou te faafetai pea iā Ieova mo lenei faaeaga matagofie ua ia tuuina mai, o le viiaina o lona suafa!—Sala. 54:6.

^ pala. 16 Tagaʻi i le talaaga o le soifuaga o W. Glen How, “The Battle Is Not Yours, but God’s,” i le Ala Mai! faa-Peretania o Aperila 22, 2000.

^ pala. 20 Tagaʻi i le talaaga o le soifuaga o Laurier Saumur, “I Found Something Worth Fighting For,” i Le Olomatamata faa-Peretania o Novema 15, 1976.

^ pala. 20 O loo auauna nei David Splane o se sui o le Vaega Pule o Molimau a Ieova.