O loo iai i le Tusi Paia le tele o talafaatusa. Peitaʻi, e faigatā ona malamalama le toʻatele i na talafaatusa. (Mata. 13:13) O le ā la e fesoasoani iā te oe ina ia malamalama ai i le uiga moni o se talafaatusa i le Tusi Paia? Ia faataʻitaʻi nisi o fautuaga nei:

• Ia iloa le manatu autū ma le mea o loo faatusa i ai. O se faataʻitaʻiga, na fetalai Iesu i le Faaaliga 3:​3, o le a pei lona afio mai (manatu autū) o le sau o se gaoi (mea o loo faatusa i ai).

• Ia mātau le fesootaʻiga o le manatu autū i le mea o loo faatusa i ai. Ia taumafai e mafaufau i le māfuaaga ua faaaogā ai lenā talafaatusa, ma mea e taitutusa ai le manatu autū ma le mea o loo faatusa i ai.

• Ia faamautinoa e saʻo le auala e faatatau ai le talafaatusa. O nisi taimi e ono sesē ai le auala e faatatau ai e se tasi se talafaatusa. O se faataʻitaʻiga, i le Faaaliga 3:​3, e lē o uiga atu o le a afio mai Iesu ina ia gaoia se mea. Nai lo o lea, pe a fua i le siʻomaga o le mau, o loo faatusaina e Iesu lona afio mai e tai pei o le sau a se gaoi, auā e lē faatalitalia ma e tatou te lē iloa foʻi le taimi e sau ai.