Skip to content

Skip to table of contents

Faatuatua—O se Uiga e Faamalosia ai

Faatuatua—O se Uiga e Faamalosia ai

E MALOSI tele le faatuatua. Mo se faataʻitaʻiga, e ui ina manaʻo Satani e fasiotia i tatou i le itu faaleagaga, ae o le faatuatua e fesoasoani iā i tatou e “tineia ai aū fanafana mū uma a lē o loo leaga.” (Efe. 6:16) A iai le faatuatua, e mafai ona tatou fesagaʻia faafitauli e pei o ni mauga. Na fetalai Iesu i ona soo e faapea: “Afai e pei lo outou faatuatua o le fatu o le sinapi, tou te fai atu i lenei mauga, ʻIa siitia oe i o,’ ona siitia ai lea.” (Mata. 17:20) Talu ai e mafai e le faatuatua ona faamalosia lo tatou itu faaleagaga, e tāua la ona tatou iloiloina nei fesili: O le ā le faatuatua? E faapefea ona aafia lo tatou faatuatua ona o o tatou loto? E faapefea ona faamalosia lo tatou faatuatua? Ma o ai e tatau ona tatou faatuatua i ai?​—Roma 4:3.

O LE Ā LE FAATUATUA?

E sili atu mea e aofia i le faatuatua nai lo o le tau ina talitonu pe talia le mea moni mai i le Tusi Paia, auā “e talitonu foʻi temoni [e iai le Atua] ma latou tetemū.” (Iako. 2:19) O le ā la le faatuatua?

E pei ona tatou talitonu e lē mafai ona mavae le ao ma le pō, e tatou te talitonu foʻi o le a taunuu moni lava le finagalo o le Atua

E lua vala o loo faamatala ai e le Tusi Paia le faatuatua. Muamua, “O le faatuatua, o le faatalitali lea ma le mautinoa i mea ua faamoemoe i ai.” (Epe. 11:1a) Pe a iā te oe le faatuatua, e te talitonu atoatoa e moni fetalaiga uma a Ieova ma o le a faataunuuina. O se faaaʻoaʻoga, na fetalai Ieova i tagata Isaraelu: “Afai e tou te mafaia ona lepeti laʻu feagaiga ma le ao, ma laʻu feagaiga ma le pō, ina ia lē toe iai se ao po o se pō i o latou taimi, e faapena foʻi ona mafai ona lepeti laʻu feagaiga ma Tavita laʻu auauna.” (Iere. 33:20, 21) Pe e te popole neʻi lē oso aʻe pe goto ifo le lā, ma leai ai ni pō po o ni ao? Afai e te talitonu i le tulafono o le natura lea e mafai ona maua ai ao ma pō, ma taamilo ai le lalolagi i le lā, pe e te talitonu foʻi la o le a faataunuuina e Lē na faia na tulafono ana folafolaga? Ioe!​—Isa. 55:10, 11; Mata. 5:18.

Lua, o le faatuatua “o le faamaoniga manino lea o mea moni e ui ina e lē o vaaia.” O loo faamatalaina le faatuatua “o le faamaoniga manino,” po o faamaoniga e maufaatuatuaina o mea e lē o vaaia e mata, ae e iai moni lava. (Epe. 11:1e) I le ā le itu? Pe a faapea e fesili atu se tamaitiiti iā te oe. ʻE faapefea ona e iloa e iai moni le ʻea?’ E ui e te leʻi vaaitino i le ʻea, ae e te ono taumafai e taʻu atu i le tamaitiiti faamaoniga e iai le ʻea, e pei o le mānava, minoi o laulaau ona o le savili, ma isi faamaoniga. E talitonu loa le tamaitiiti i na faamaoniga, ona ia talia loa lea o le iai moni o se mea e na te lē o vaaia. I se tulaga talitutusa, o le faatuatua e faavae i faamaoniga moni.​—Roma 1:20

E TĀUA LE SAʻO O LE LOTO

Talu ai e faavae aʻe le faatuatua i faamaoniga, e tatau ona iai muamua i se tasi “le poto saʻo i le upu moni” ina ia maua ai le faatuatua. (1 Timo. 2:4) Ae e lē lava lenā. Na tusi le aposetolo o Paulo: “Auā o le loto e faatuatua ai.” (Roma 10:10) E lē tau ina talitonu i le mea moni se tagata ae na te faatāua foʻi. O le faia la faapea, e faatoʻā mafai ai ona uunaʻia o ia e faaalia le faatuatua, o lona uiga ia ola e ōgatusa ma le upu moni. (Iako. 2:20) O se tagata e lē lotofaafetai mo le upu moni, e ono teena faamaoniga maufaatuatuaina pe afai e lotomaaa e taofimau i ona lava manatu, pe fai faamolemolega  ina ia faamalie ai ona tuʻinanauga. (2 Pete. 3:3, 4; Iuta 18) O le māfuaaga lea, na leʻi mafai ai ona atiaʻe le faatuatua e i latou uma na molimauina vavega i taimi o le Tusi Paia. (Nu. 14:11; Ioa. 12:37) E fesoasoani le agaga paia o Ieova, e faatupu le faatuatua i loto o tagata e fiafia i le mea moni nai lo o pepelo.​—Kala. 5:22; 2 Tesa. 2:10, 11.

LE AUALA NA ATIAʻE AI E TAVITA LE FAATUATUA MALOSI

O le tupu o Tavita o se tasi na faaalia le faatuatua malosi. (Epe. 11:32, 33) Peitaʻi, e lē o tagata uma i le aiga o Tavita na iai lenā faatuatua. Mo se faaaʻoaʻoga, o Eliapo le uso matua o Tavita, e i ai se mea na tupu na iloa ai le leai o sona faatuatua. Na ita iā Tavita a o taumafai Tavita e tali atu i le luʻi a Koliata. (1 Samu. 17:26-28) E leai se tasi e fanau mai ma le faatuatua, e lē o se uiga foʻi e tuufaasolo mai i mātua, o lea na maua le faatuatua o Tavita i le iai o lana faiā ma le Atua.

I le Salamo e 27, o loo faailoa mai e Tavita le auala na ia maua ai le faatuatua malosi. (Fuai. 1) Na mafaufau loloto Tavita i mea na tutupu iā te ia ma le auala na feagai ai Ieova ma ona fili. (Fuai. 2, 3) Na ia matuā talisapaia le faatulagaga a Ieova mo le tapuaʻiga. (Fuai. 4) Na tapuaʻi Tavita i le Atua faatasi ma uso talitonu i le malumalu. (Fuai. 6) Na naunau o ia e saʻili atu iā Ieova i le tatalo. (Fuai. 7, 8) Na manaʻo foʻi Tavita e faatonuina o ia i ala o le Atua. (Fuai. 11) Sa matuā tāua lenei uiga iā Tavita, o lea na ia faapea mai ai: “Pe ana ou lē faatuatua i le vaai atu i le lelei o Ieova i le nuu o tagata ola, semanū ua leai soʻu faamoemoe!”​—Fuai. 13.

LE AUALA E FAAMALOSIA AI LOU FAATUATUA

E mafai ona e maua le faatuatua e pei ona sa iai iā Tavita, pe afai e te faaaʻoaʻo i uiga lelei ma masaniga o loo i le Salamo e 27. Talu ai o le faatuatua e faavae aʻe i le poto saʻo, o le tele la e te suʻesuʻeina ai le Afioga a le Atua ma lomiga faale-Tusi Paia, o le faigofie foʻi lenā ona atiaʻe o lenei vala o le fua o le agaga o le Atua. (Sala. 1:2, 3) A o e suʻesuʻe, ia faaalu se taimi e mafaufau loloto ai. O le mafaufau loloto e pei o se eleele e tupu aʻe ai lo tatou lototalisapaia. A o faateleina lo tatou lototalisapaia o Ieova, e faateleina foʻi lo tatou naunau e faaalia le faatuatua, e ala i le tapuaʻi atu iā te ia i sauniga a le faapotopotoga, ma faalauiloa i isi lou faamoemoe. (Epe. 10:23-25) E tatou te faaalia foʻi le faatuatua pe a “tatalo e lē aunoa, ma ia aua le faavaivai.” (Luka 18:1-8) O lea, ia “tatalo e lē aunoa” iā Ieova, ma mautinoa e “manatu mamafa mai o ia iā te outou.” (1 Tesa. 5:17; 1 Pete. 5:7) O le faatuatua e uunaʻia ai i tatou e gaoioi, ma o gaoioiga e faamalosia ai lo tatou faatuatua.​—Iako. 2:22.

IA FAATUATUA IĀ IESU

I le pō a o lumanaʻi lona maliu, na fetalai atu Iesu i ona soo: “Ia faatuatua i le Atua, ma ia  faatuatua mai foʻi iā te aʻu.” (Ioa. 14:1) O lea, e tatau ona tatou faatuatua e lē na o Ieova, ae faapea foʻi iā Iesu. E faapefea ona e faatuatua iā Iesu? Seʻi o tatou talanoaina ni auala se tolu.

O le ā le uiga o le faatuatua iā Iesu?

Muamua, ia vaai i le taulaga togiola o se meaalofa patino a le Atua mo oe. Na faapea mai le aposetolo o Paulo: “Ou te ola ai i le faatuatua i le Alo o le Atua, o lē na alofa mai iā te aʻu ma foaʻiina mai lona ola mo aʻu.” (Kala. 2:20) Pe a e faatuatua iā Iesu, ua e talitonu atoatoa e aogā le togiola iā te oe, o le faavae mo le faamagaloina o au agasala, aumaia ai le faamoemoe o le ola e faavavau, ma o le faamaoniga sili o le alofa o le Atua mo oe. (Roma 8:32, 38, 39; Efe. 1:7) O le a faamalosia ai oe ina ia faaauau ona teena ou faalogona sesē, e faatatau iā te oe lava.​—2 Tesa. 2:16, 17.

Lua, ia faalatalata iā Ieova i le tatalo e faavae i le taulaga a Iesu. O le togiola, ua mafai ai ona tatou tatalo iā Ieova “ma le saʻolotoga e tautatala atu ai i le nofoālii o le agalelei faifua, ina ia tatou maua ai le alofa mutimutivale ma le agalelei faifua o le Atua e fesoasoani mai i le taimi e tatau ai.” (Epe. 4:15, 16; 10:19-22) O le tatalo, e faamalosia ai lo tatou faanaunauga e teena faaosoosoga e faia le agasala.​—Luka 22:40.

Tolu, ia usitaʻi iā Iesu. Na tusi le aposetolo o Ioane: “O lē e faatuatua i le Alo e maua e ia le ola e faavavau. A o le tagata e lē usiusitaʻi i le Alo, e lē maua e ia le ola, ae tumau pea le toʻasā o le Atua iā te ia.” (Ioa. 3:36) Ia mātau na matuā faaeseese e Ioane le faatuatua mai i le lē usiusitaʻi. O lea, e te faaalia le faatuatua iā Iesu pe a e usitaʻi iā te ia. E te usitaʻi iā Iesu e ala i le mulimuli i “le tulafono a le Keriso,” o lona uiga o ana aʻoaʻoga ma faatonuga uma. (Kala. 6:2) E te usitaʻi foʻi iā Iesu, pe a e faalogo i le taʻitaʻiga ua ia saunia e ala mai i “le pologa faamaoni ma le faautauta.” (Mata. 24:45) O le usiusitaʻi iā Iesu, o le a e maua ai le malosi e onosaia ai faafitauli e pei o matagi malolosi.​—Luka 6:47, 48.

“IA ATIAʻE IĀ TE OUTOU I LO OUTOU FAATUATUA E SILI ONA PAIA”

Na iai se taimi na alaga leotele atu ai se tamāloa iā Iesu: “Ua ou faatuatua! Ia e fesoasoani mai ina ia malosi loʻu faatuatua!” (Mare. 9:24) Na iai i le tamāloa sina faatuatua, ae na ia faamaulalo e iloa na manaʻomia ona faateleina lona faatuatua. I le pei o lenā tamāloa, e iai se taimi o le a manaʻomia ai ona faateleina lo tatou faatuatua. Ma e mafai ona faamalosia lo tatou faatuatua i le taimi nei. Ua tatou aʻoaʻoina, e faamalosia le faatuatua pe a suʻesuʻe i le Afioga a le Atua ma mafaufau loloto i ai, lea e faalolotoina ai lo tatou lototalisapaia mo Ieova. O le a faatuputeleina foʻi lo tatou faatuatua pe a tapuaʻi iā Ieova, faalauiloa atu lo tatou faamoemoe i le lautele ma finafinau i le tatalo faatasi ma o tatou uso talitonu. E lē gata i lea, pe a faamalosia lo tatou faatuatua, e tatou te maua le taui sili. Ua uunaʻia e le Tusi Paia i tatou: “Le ʻaupele e, ia atiaʻe iā te outou i lo outou faatuatua e sili ona paia . . . ia outou faatumau iā te outou i le alofa o le Atua.”​—Iuta 20, 21.