Skip to content

Skip to table of contents

 SUʻESUʻEGA 33

O le a Faaolaina i Latou e “Faalogo iā te Oe”

O le a Faaolaina i Latou e “Faalogo iā te Oe”

“Ia uaʻi totoʻa iā te oe lava ma lau aʻoaʻo atu. Ia e tumau ai i nei mea, auā o le faia faapea e faaolaina ai oe lava atoa ma i latou o faalogo iā te oe.”​—1 TIMO. 4:16.

PESE 67 “Ia Talaʻi Atu le Upu”

AOTELEGA *

1. O ā o tatou faanaunauga mo tagata o o tatou aiga?

“I LE taimi lava na ou aʻoaʻoina ai le upu moni, na ou manaʻo ai e matou te iai faatasi ma tagata o lo matou aiga i le Parataiso. Ou te manaʻo foʻi ia matou auauna faatasi iā Ieova ma laʻu tane o Wayne ma le ma tama tama,” o le tala lea a se tuafafine e igoa iā Pauline. * Pe e i ai nisi o lou aiga e leʻi iloa Ieova, ma alolofa iā te ia? Atonu e tutusa ou faalogona ma faalogona o Pauline e faatatau i lona aiga.

2. O ā fesili o le a tatou iloiloina i lenei mataupu?

2 E lē mafai ona tatou faamalosia tagata o o tatou aiga e talia le tala lelei, ae e tatou te faalaeiau i latou ina ia faalogo i le feʻau o le Tusi Paia. (2 Timo. 3:14, 15) Aiseā e tatau ai ona tatou molimau i tagata o lo tatou aiga? Aiseā e tāua ai ona faaalia le tigā alofa? O le ā e mafai ona tatou faia e fesoasoani ai i tagata o lo tatou aiga ia latou alolofa iā Ieova, e pei foʻi o i tatou? E faapefea ona fesoasoani la tatou faapotopotoga?

AISEĀ E TATAU AI ONA TATOU MOLIMAU I TAGATA O LO TATOU AIGA?

3. I le 2 Peteru 3:9, aiseā e tatau ai ona tatou molimau atu i o tatou aiga?

3 Ua toeitiiti ona aumaia lea e Ieova o le iʻuga i lenei faiga o mea. E na “o ē ua saunia o latou loto mo le ola e faavavau” e  faaolaina. (Galu. 13:48) E tatou te faaaluina le tele o taimi ma le malosi e talaʻi ai i tagata ese i lo tatou vaipanoa, o se mea masani la lo tatou mananaʻo foʻi e auauna faatasi iā Ieova ma o tatou aiga. O Ieova o lo tatou Tamā alofa, “e lē finagalo o ia e faaumatia se tasi, ae e finagalo ia oo uma lava i le salamō.”—Faitau le 2 Peteru 3:9.

4. O le ā le mea sesē e tatou te ono faia pe a molimau atu i tagata o lo tatou aiga?

4 E ao ona tatou manatua, e i ai le auala saʻo ma le auala sesē e faasoa atu ai le feʻau faasaoola. E ui e tatou te faautauta pe a talaʻi i tagata ese, ae atonu e tatou te lē faautauta pe a talaʻi i o tatou aiga.

5. O le ā e ao ona manatua a o leʻi taumafai e faasoa atu le upu moni i lo tatou aiga?

5 Atonu e toʻatele e faanoanoa pe a toe tepa i tua i le taimi muamua, na latou molimau ai i lo latou aiga, ma faapea ifo, maʻimau pe ana saʻo le auala na ou molimau ai iā i latou. Na fautua atu Paulo i Kerisiano: “Ia lē aunoa ona outou tautatala atu i upu e logolelei, ia faamāi i le masima, ina ia outou iloa le auala e tali atu ai i tagata taʻitoʻatasi.” (Kolo. 4:5, 6) E lelei ona manatua lenei fautuaga pe a talanoa atu i lo tatou aiga. A lē faia faapea, e ono iʻu ai i lo tatou faaesea o i latou, nai lo o le faalaeiau o i latou e faalogo mai.

O LE Ā E TATOU TE FAIA E FESOASOANI AI I TAGATA O LO TATOU AIGA?

O lou tigā alofa ma lau amio o se molimau sili lea e mafai ona e avatu (Tagaʻi i palakalafa 6-8) *

6-7. Aumai se faaaʻoaʻoga e faataʻitaʻi ai le manaʻomia ona faaalia o le tigā alofa, i se paaga lē talitonu.

6 Ia faaalia le tigā alofa. Na faapea mai Pauline lea na taʻua i le amataga: “I le taimi muamua, e na o mea faaleagaga na ou manaʻo e talanoa ai i loʻu toʻalua. E leai ni talanoaga ʻfaasamasamanoa.’” Peitaʻi, o lana tane o Wayne e itiiti sona iloa i le Tusi Paia, ma e lē malamalama i mea o loo talanoa atu  ai Pauline. I le manatu o Wayne, e foliga mai e pau le mea o loo mafaufau i ai Pauline, e na o lana lotu. Na popole la o ia i le auai o Pauline i se lotu mataʻutia, ma ua faasesēina ai.

7 Na taʻutino mai e Pauline, na faaalu le tele o lona taimi i afiafi ma faaiʻuga o vaiaso, e faatasitasi ai ma uso ma tuafafine faaleagaga i sauniga, talaʻiga ma faatasitasiga faasamasamanoa. Na taʻua e Pauline, “i nisi taimi e taunuu Wayne i le fale e ma te lē o i ai, ma na lagona ai lona tuua toʻatasi.” E mautinoa na misia e Wayne lona toʻalua ma le la tama. E na te lē o iloa tagata o loo latou faatasitasi, ma e foliga mai ua sili atu ona tāua iā Pauline ana uō fou nai lo o ia. Na faamataʻu e Wayne Pauline o le a tatala le la faaipoipoga. Pe e te mātauina ni auala sa tatau ai iā Pauline ona faaalia le tigā alofa?

8. I le 1 Peteru 3:1, 2, o le ā e sili ona uaʻi mai ai tagata o lo tatou aiga?

8 Avea oe ma faaaʻoaʻoga lelei. E masani lava, e sili ona uaʻi mai tagata o lo tatou aiga i mea e tatou te faia nai lo o mea e tatou te fai atu ai. (Faitau le 1 Peteru 3:1, 2.) Na iʻu ina iloa e Pauline le saʻo o lenā manatu. Na ia faapea mai: “Na ou iloa le alofa o Wayne iā i maʻua, ma e lē o manaʻo e tatala le ma faaipoipoga. Ae o lana faamataʻu mai, na ou iloa ai e tatau ona amata ona ou faia mea i le auala a Ieova. Nai lo o le tautala soo, e manaʻomia ona ou faataatia se faaaʻoaʻoga lelei i laʻu amio.” E leʻi toe faamalosia e Pauline ia Wayne e talanoa e faatatau i le Tusi Paia, ae ua amata ona la talanoa i mea e tutupu i le aso. Na mātau e Wayne ua amata ona tausia e Pauline le filemu, ma ua usitaʻi le la tama. (Faata. 31:18, 27, 28) Ina ua mātauina  e Wayne suiga lelei i lo latou aiga ona o le faatatauina o le feʻau mai i le Tusi Paia, na ia fia iloa ai foʻi la lenei feʻau mai i le Afioga a le Atua.—1 Kori. 7:12-14, 16.

9. Aiseā e tāua ai lo tatou fesoasoani pea i tagata o lo tatou aiga?

9 Ia fesoasoani pea i tagata o le aiga. Na faataatia e Ieova le faaaʻoaʻoga mo i tatou. Ua tuuina mai “pea lava pea” e Ieova i tagata le avanoa, e mafai ai ona latou tali mai i le tala lelei ma latou maua ai le ola. (2 No. 36:15) Na taʻu atu e le aposetolo o Paulo iā Timoteo, ia tumau pea e fesoasoani i isi. Aiseā? Auā o le faia faapea, e lē gata e faaolaina ai o ia, ae faapea foʻi i latou e faalogo iā te ia. (1 Timo. 4:16) E tatou te alolofa i tagata o lo tatou aiga, o le māfuaaga lea e tatou te mananaʻo ai ia latou iloa le upu moni i le Afioga a le Atua. Na iʻu ina i ai se aafiaga lelei o faamatalaga ma gaoioiga a Pauline i lo latou aiga. Ua fiafia nei o ia e auauna faatasi ma lana tane. Ua avea i laʻua uma ma paeonia, ma ua auauna nei Wayne o se toeaina.

10. Aiseā e manaʻomia ai ona tatou onosaʻi?

10 Ia onosaʻi. Pe a faatatau i o tatou olaga tapulaa a le Atua, atonu o le a faigatā ai i tagata o lo tatou aiga ona talia o tatou talitonuga, ma le olaga fou o loo tatou ola ai. O le mea muamua e masani ona latou mātauina, ua tatou lē toe auai i aso faamanatu, ma lē toe aafia i faiga faapolotiki. O nisi o le aiga atonu na amata o feita iā i tatou. (Mata. 10:35, 36) Ae e lē tatau ona tatou fiu ai. Afai e tatou te lē toe fesoasoani iā i latou ia malamalama i o tatou talitonuga, ua tatou faamasinoina la i latou, e lē aogā i ai le ola e faavavau. E leʻi tofia i tatou e Ieova e avea ma faamasino, o le tofiga lenā na tuu atu iā Iesu. (Ioa. 5:22) Pe a onosaʻi, e ono iʻu ai ina faalogo mai tagata o lo tatou aiga i le tatou feʻau.—Tagaʻi i le pusa “Faaaogā la Tatou Upega Tafaʻilagi e Aʻoaʻo Atu Ai”

11-13. O le ā e tatou te aʻoaʻoina mai i le auala na feagai ai Alice ma ona mātua?

11 Ia maumauaʻi ae faautauta. (Faata. 15:2) Seʻi iloilo le faaaʻoaʻoga a Alice. Na ia aʻoaʻoina le upu moni a o nofo i se isi atunuu e mamao ese mai i ona mātua, o ni tagata e lē talitonu i se Atua ma e aafia tele i faiga faapolotiki. Na vave ona ia iloa, e manaʻomia ona ia taʻu atu iā i laʻua mea lelei na ia aʻoaʻoina. Na faapea mai Alice, “o le tuai e te faailoa atu ai i lou aiga mea ua e talitonu i ai ma au tapulaa, o le tele foʻi lenā o le faateʻia o i latou.” Na ia tusia ni tusi e fesili i ai i ona mātua i so la manatu, e faatatau i aʻoaʻoga a le Tusi Paia i mataupu e manatu e la te fiafia i ai, e pei o le alofa. (1 Kori. 13:1-13) Na ia faafetai i ona mātua i le tausia aʻe ma le vaaia faaleleia o ia, ma na ia lafo foʻi i ai ni meaalofa. Pe a asiasi atu i ona mātua, e na te faia mea uma e fesoasoani ai i lona tinā i galuega i le fale. I le amataga, e leʻi fiafia mātua o Alice ina ua ia taʻu i ai ona talitonuga fou.

12 A o i ai Alice i le fale a ona mātua, na pipii pea o ia i lana faasologa o le faitauga o le Tusi Paia. Na faapea mai Alice, “Na fesoasoani lea i loʻu tinā e malamalama ai i le tāua o le Tusi Paia iā te aʻu.” I lenā taimi, na filifili le tamā o Alice e faitau le Tusi Paia, ina ia malamalama ai i le māfuaaga ua sui ai le mafaufau o lona afafine. Na ia manaʻo foʻi e saʻili se mea e sesē ai le Tusi Paia. Na taʻua e Alice, “Na ou ave i ai le Tusi Paia, ma na ou tusia ai se faaupuga i totonu.” O le ā le iʻuga? Nai lo o le maua o se mea e sesē ai le Tusi Paia, ae na matuā pāʻia lona loto i mea na ia faitau i ai.

13 E manaʻomia ona tatou maumauaʻi ae faautauta, e tusa pe iʻu ai i lo tatou onosaia o faafitauli. (1 Kori. 4:12e) Mo se faaaʻoaʻoga o  Alice, na ia onosaia teteega mai i lona tinā. “Ina ua ou papatiso, na faapea mai loʻu tinā o aʻu o se ʻteine leaga.’” O le ā le auala na tali atu ai Alice? “Nai lo o le ʻalofia o le faafitauli, na ou faamatala atu ma le faaaloalo e lē toe suia laʻu filifiliga i le avea ma Molimau a Ieova, ma ou te pipii pea i ai. Na ou taumafai e faamautinoa atu i loʻu tinā loʻu alofa tele iā te ia ma na ma fetagisi. Na ou kukaina foʻi se meaʻai manaia mo ia. Mai i lenā taimi, na amata iloa ai e loʻu tinā ua mafai e le Tusi Paia ona fesoasoani iā te aʻu, e avea ai ma tagata lelei.”

14. Aiseā e lē tatau ai lava ona tatou lolo atu i omiga?

14 E ono umi se taimi, faatoʻā malamalama atoatoa tagata o lou aiga i le tāua iā i tatou o le auaunaga iā Ieova. O se faaaʻoaʻoga, ina ua filifili Alice e paeonia nai lo o le auai i se aʻoga maualuga na mananaʻo i ai ona mātua, na toe tagi foʻi lona tinā. Ae na maumauaʻi pea Alice. Na ia faapea mai, “Pe a e lolo atu i se omiga, e latou te ono faamalosia foʻi oe e lolo atu i nisi omiga. Ae pe a e agalelei ma maumauaʻi, atonu o le a faalogo mai nisi o lou aiga iā te oe.” O le mea lenā na tupu iā Alice. Ua paeonia uma nei ona mātua, ma ua auauna lona tamā o se toeaina.

E FAAPEFEA ONA FESOASOANI LA TATOU FAAPOTOPOTOGA?

E faapefea ona fesoasoani le faapotopotoga i tagata lē talitonu o lo tatou aiga? (Tagaʻi i palakalafa 15-16) *

15. I le Mataio 5:14-16 ma le 1 Peteru 2:12, e faapefea i “galuega lelei” a isi ona fesoasoani i tagata o lo tatou aiga?

15 Ua tosina mai e Ieova tagata iā te ia, e ala i “galuega lelei” a le faapotopotoga Kerisiano. (Faitau le Mataio 5:14-16; 1 Peteru 2:12.) Pe afai e lē o se Molimau a Ieova lau paaga, pe ua ia feiloaʻi i uso ma tuafafine o lau faapotopotoga? Na valaaulia e Pauline  lea na taʻua i le amataga, uso ma tuafafine i lo latou fale, ina ia mafai ai e lana tane o Wayne ona faamasani iā i latou. Na faamatala e Wayne le auala na fesoasoani ai se uso iā te ia, e malamalama i tulaga o Molimau a Ieova. “Na ave se aso mālōlō o le uso mai i lana galuega, e ma te matamata ai i se taaloga. Ma na ou faapea ifo, ʻe tutusa a maʻua.’”

16. Aiseā e tatau ai ona tatou valaaulia tagata o lo tatou aiga e auai i sauniga?

16 O se tasi auala sili ona lelei e fesoasoani ai i o lo tatou aiga, o le valaaulia lea o i latou i a tatou sauniga. (1 Kori. 14:24, 25) O le sauniga muamua na auai ai Wayne, o le Faamanatuga, auā na fai i le taimi na mānava ai galuega ma e puupuu foʻi le polokalame. Na ia faapea mai, “Ou te leʻi malamalama i le lauga, ae na ou manatua tagata. Na latou faafeiloaʻi ma faatalofa mai. Na ou lagonaina le moni o lo latou alofa.” E i ai se ulugalii na agalelei tele iā Pauline, na fesoasoani iā te ia ma lana tama i sauniga ma le talaʻiga. Ina ua filifili Wayne e fia malamalama i talitonuga fou a Pauline, na ia talosaga atu i le tane a le tuafafine e fai sana suʻesuʻega faale-Tusi Paia.

17. O le ā e lē tatau ona tatou tuuaʻia ai i tatou lava, ma aiseā e lē tatau ai ona tatou fiu i tagata o lo tatou aiga?

17 E tatou te faamoemoe e auai mai tagata o lo tatou aiga e tapuaʻi faatasi iā Ieova. Peitaʻi, e ui i a tatou taumafaiga uma e fesoasoani iā i latou e avea ma auauna a le Atua, ae atonu e lē ō mai i le upu moni. Pe afai o le tulaga lenā, e lē tatau ona tuuaʻia i tatou i a latou filifiliga. O le mea moni, e lē mafai ona tatou faamalosia se tasi e talia o tatou talitonuga. E ui i lea, aua neʻi o tatou manatu faatauvaa i le i ai o ni taaʻina lelei i lou aiga, a o latou vaai atu i lou fiafia e auauna iā Ieova! Ia tatalo mo i latou, talanoa i ai i se auala faautauta ma aua le fiu e fesoasoani atu. (Galu. 20:20) Ia e mautinoa o le a faamanuia Ieova i au taumafaiga. Ma pe a filifili lou aiga e faalogo iā te oe, o le a faasaoina i latou!

PESE 57 Talaʻi i Ituaiga Uma o Tagata

^ pala. 5 E tatou te mananaʻo ia iloa e tagata o o tatou aiga Ieova, ae e latou te filifili pe auauna iā Ieova pe leai. O le a iloiloina i lenei mataupu mea e mafai ona tatou faia, ina ia faigofie ai ona faalogo mai o tatou aiga.

^ pala. 1 Ua suia nisi igoa. I lenei mataupu, o le upu “aiga” e faasino atu i tagata o le aiga e lē auauna iā Ieova.

^ pala. 53 FAAMATALAGA O ATA: O se uso talavou o loo fesoasoani e fai le taavale a lona tamā lē talitonu. I se taimi talafeagai, o loo ia faaali atu se vitiō mai i le jw.org.

^ pala. 55 FAAMATALAGA O ATA: O loo faalogologo lelei atu se tuafafine, a o faamatala mai e lana tane lē talitonu le pisi o lona aso. Mulimuli ane, na taaalo faatasi ma lona aiga.

^ pala. 57 FAAMATALAGA O ATA: Na valaaulia e se tuafafine i lona aiga nisi mai i lana faapotopotoga. Na latou naunau moni e faamasani i le tane a le tuafafine. Mulimuli ane, na auai le tane i le Faamanatuga faatasi ma lana avā.