Skip to content

Skip to table of contents

 SUʻESUʻEGA 32

Ia Faatuputeleina lo Outou Alofa

Ia Faatuputeleina lo Outou Alofa

“O le mea lenei ua faaauau ai ona ou tatalo, ina ia faatuputeleina lo outou alofa.”​—FILI. 1:9.

PESE 106 Atiaʻe le Uiga o le Alofa

AOTELEGA *

1. O ai na fesoasoani i le faavaeina o le faapotopotoga i Filipi?

INA ua taunuu le aposetolo o Paulo, Sila, Luka ma Timoteo i Filipi, o se aai na pulea e Roma, na latou maua le toʻatele o tagata na fiafia i le feʻau o le Malo. Na fesoasoani nei uso maelega i le faavaeina o se faapotopotoga, ma na amata faatasitasi uma ai le ʻausoo, atonu i le fale o se soo talimālō e igoa iā Litia.​—Galu. 16:40.

2. O le ā le luʻi na vave ona fesagaʻia e le faapotopotoga?

2 E leʻi umi, ae fesagaʻia e lenā faapotopotoga fou se luʻi. Na faatupu e Satani i fili o le upu moni le ita, e tetee atu ai ma le sauā i le talaʻiga a nei Kerisiano faamaoni. Na lokaina Paulo ma Sila, sasaina i laau ma faafalepuipuiina. Ina ua faasaʻoloto mai i le falepuipui, na la asiasi atu loa ma faalaeiau i soo fou. Ona tuua lea e Paulo, Sila ma Timoteo le aai, ae foliga na nofo ai na o Luka. O le ā o le a tupu i lenei faapotopotoga fou? O le fesoasoani a le agaga paia o Ieova, sa faaauau ai pea ona maelega nei soo fou i le auaunaga iā Ieova. (Fili. 2:12) O lea, e iai māfuaaga lelei na mitamita ai Paulo iā i latou!

3. E pei ona faamatalaina i le Filipi 1:9-11, o le ā na fai ma mataupu o tatalo a Paulo?

3 Na tusi atu Paulo i le faapotopotoga i Filipi, pe ā ma le sefulu tausaga mulimuli ane ai. A o e faitau i lenā tusi, o le a faigofie ona e mātauina le alofa tele o Paulo i ona uso. Na ia tusi atu, na ou “matuā naunau iā te outou ma le alofa faapelepele, e pei ona iā Keriso Iesu.” (Fili. 1:8) Na ia tusi foʻi, na ia tatalo mo i latou. Sa ia tatalo iā Ieova ina ia fesoasoani iā i latou e  faatuputeleina lo latou alofa, faamautinoa mea e sili ona tāua, ia lē ponā, ʻalofia le faia o se mea e tausuai ai isi, ma faaauau pea ona fua mai fua o le amiotonu. E mautinoa o le a e ioe, e mafai ona aogā iā i tatou i aso nei upu faalaeiau a Paulo. O lea, seʻi o tatou faitau i mea na tusi atu ai Paulo i Kerisiano i Filipi. (Faitau le Filipi 1:9-11.) O le a tatou iloilo manatu na ia tusia, ma talanoa auala e mafai ona tatou faatatauina ai na manatu taʻitasi.

FAATUPUTELEINA LO OUTOU ALOFA

4. (a) I le 1 Ioane 4:9, 10, na faapefea ona faaalia e Ieova lona alofa mo i tatou? (e) O le ā le tele e tatau ona tatou alolofa ai i le Atua?

4 Na faaalia e Ieova lona alofa tele mo i tatou, e ala i le auina mai o lona Alo i le lalolagi e maliu mo a tatou agasala. (Faitau le 1 Ioane 4:9, 10.) O le alofa lē manatu faapito o le Atua ua uunaʻia ai i tatou e alolofa iā te ia. (Roma 5:8) O le ā le tele e tatau ona tatou alolofa ai i le Atua? Na tali e Iesu lenā fesili ina ua ia fai atu i se Faresaio e faapea: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.” (Mata. 22:36, 37) E tatou te lē mananaʻo e vaeluaina lo tatou alofa mo le Atua. Nai lo o lea, tatou te mananaʻo e faamalosia pea lo tatou alofa mo Ieova i aso taʻitasi. Na taʻu atu e Paulo i Kerisiano i Filipi, e tatau ona faatuputeleina lo latou alofa. O le ā e tatou te faia e faamalosia ai lo tatou alofa mo le Atua?

5. E faapefea ona faamalosia lo tatou alofa?

5 E manaʻomia ona tatou iloa le Atua, ina ia mafai ai ona tatou alolofa iā te ia. Ua taʻua i le Tusi Paia: “O lē e lē alofa, e na te lē iloa le Atua, auā o le Atua o le alofa lava ia.” (1 Ioa. 4:8) Na faailoa mai e le aposetolo o Paulo, o le a faamalosia lo tatou alofa mo le Atua, a o tatou aʻoaʻoina pea le “poto saʻo ma le faautaga loloto” e faatatau iā te Ia. (Fili. 1:9) Ina ua faatoʻā tatou suʻesuʻeina le Tusi Paia, na amata atiaʻe ai lo tatou alofa mo le Atua e faavae i nai mea na tatou aʻoaʻoina, e faatatau i ona uiga matagofie. O le tele o mea na tatou aʻoaʻoina e faatatau iā Ieova, na faamalosia ai lo tatou alofa mo ia. E lētioa a tatou vaai i le suʻesuʻeina o le Tusi Paia i aso taʻitasi, ma le manatunatu loloto i lana Afioga, o nisi o mea e sili ona tāua i o tatou olaga!​—Fili. 2:16.

6. I le 1 Ioane 4:11, 20, 21, o le ā le auala e faatuputeleina ai lo tatou alofa?

6 O le alofa tele o le Atua mo i tatou, ua uunaʻia ai i tatou e alolofa i o tatou uso. (Faitau le 1 Ioane 4:11, 20, 21.) E tatou te ono manatu e faigofie lava ona tatou alolofa i o tatou uso ma tuafafine, ona e tatou te tapuaʻi uma iā Ieova ma tatou te taumafai malosi e atiaʻe ona uiga lelei. E tatou te mulimuli foʻi i le faaaʻoaʻoga a Iesu, o lē na alofa tele ma ia foaʻiina mai ai lona ola mo i tatou. Peitaʻi, e iai taimi atonu e faigatā ai ona tatou usiusitaʻi i le poloaʻiga ia alofa le tasi i le isi. Seʻi o tatou iloilo se faaaʻoaʻoga i le faapotopotoga i Filipi.

7. O le ā e tatou te aʻoaʻoina mai i le aʻoaʻiga na avatu e Paulo iā Evotia ma Sunetui?

7 O Evotia ma Sunetui o ni tuafāfine maelega na “galulue faatasi” ma le aposetolo o Paulo. Peitaʻi, atonu na la faataga ni o la feeseeseaʻiga e fevaevaeaʻi ai. I lana tusi i le faapotopotoga na auauna ai nei tuafāfine, na taʻua patino ai e Paulo igoa o Evotia ma Sunetui, ma na ia avatu ai le aʻoaʻiga manino “ina ia tutusa o la manatu.” (Fili. 4:2, 3) Na manatu foʻi Paulo e tatau ona ia taʻu atu i le faapotopotoga uma, ia latou “faia mea uma lava e aunoa ma le muimui ma fefinauaʻiga.” (Fili. 2:14) E mautinoa o lenei aʻoaʻiga  tuusaʻo a Paulo na fesoasoani i nei tuafāfine faamaoni ma le faapotopotoga atoa, e faamalosia ai pea le fusi o le alofa o le tasi mo le isi.

Aiseā e manaʻomia ai ona tatou faatumauina se vaaiga saʻo i o tatou uso? (Tagaʻi i le palakalafa e 8) *

8. O le ā se faafitauli masani e faigatā ai ona tatou alolofa i o tatou uso, ma e faapefea ona foʻia?

8 I le pei o Evotia ma Sunetui, e tatou te ono fesagaʻia foʻi se faafitauli masani e pei o le taulaʻi atu i mea sesē a isi, ma faigatā ai ona atiaʻe le fusi māfana o le alofa mo i latou. E tatou te faia mea sesē i aso uma. A tatou taulaʻi atu la i mea sesē a isi, o le a maalili lo tatou alofa mo i latou. O se faaaʻoaʻoga, pe a galo i se uso ona fesoasoani i le faamamāina o le Maota mo Sauniga, atonu e tatou te lagona le lē fiafia. Afai la e amata ona tatou faitauina isi mea sesē ua tatou iloa na fai e le uso, o le a atili ai ona tatou lē fiafia, ma amata mou ese ai lo tatou alofa mo ia. Pe a e fesagaʻia lenei faafitauli, e lelei la pe a tatou mafaufau i le manatu moni lenei: E silafia e Ieova a tatou mea sesē faapea mea sesē a lo tatou uso. E ui i na mea sesē, ae e alofa pea Ieova i lo tatou uso faapea i tatou. O le mea lea, e manaʻomia ai ona tatou faaaʻoaʻo i le alofa o Ieova ma faatumauina se vaaiga saʻo i o tatou uso. Pe afai tatou te galulue mamafa e faaalia le alofa i o tatou uso, o le a faamalosia ai pea la le fusi o le autasi.​—Fili. 2:1, 2.

“O MEA E SILI ONA TĀUA”

9. O ā “mea e sili ona tāua” o loo aofia i le tusi a Paulo i Kerisiano i Filipi?

9 Na faagaeeina Paulo e le agaga paia e taʻu atu i Kerisiano i Filipi ma Kerisiano uma ia ʻfaamautinoa mea e sili ona tāua.’ (Fili. 1:10) O nei mea e sili ona tāua e aofia ai le faapaiaina o le suafa o Ieova, le faataunuuina o ana fuafuaga, ma le filemu ma le autasi o le faapotopotoga. (Mata. 6:9, 10; Ioa. 13:35) Pe a faatāua i o tatou olaga nei mea, o le a faamaonia atu ai e tatou te alolofa iā Ieova.

10. O le ā e tatau ona tatou faia ina ia avea ai tatou ma ni ē e lē ponā?

10 Na faapea mai foʻi Paulo e tatau ona tatou “lē ponā.” E lē uiga atu faapea e tatau ona tatou lelei atoatoa. E lē mafai ona tatou lē ponā e pei o Ieova le Atua. Ae e silasila Ieova iā i tatou o ni ē e lē ponā, pe afai e tatou te faia le mea sili e faaloloto ai lo tatou alofa, ma faamautinoa mea e sili ona tāua. O se tasi o auala e faaalia ai lo tatou alofa, o le taumafai malosi lea e ʻalofia le faia o se mea e tausuai ai isi.

11. Aiseā e tatau ai ona tatou ʻalofia le faia o se mea e tausuai ai isi?

11 O le faatonuga o le ʻalofia o le faia o se mea e tausuai ai isi, o se lapataʻiga. E faapefea ona tatou ono faia se mea e tausuai ai se isi? E mafai ona tupu lenā mea i filifiliga e tatou te faia i faafiafiaga, lāʻei, ma galuega. Atonu e lē sesē a tatou filifiliga. Peitaʻi, afai e tausuai ai isi ma aafia ai o latou lotofuatiaifo, o le a faavaivaia ai lo latou faatuatua. Na faapea mai Iesu, e lelei la pe a nonoa i o tatou ua se maaolo e toso e asini, ma faamāgoto i le moana sausau nai lo o le faia o se mea e tausuai ai se tasi o ana mamoe!​—Mata. 18:6.

12. O le ā e tatou te aʻoaʻoina mai i le faaaʻoaʻoga a se ulugalii paeonia?

12 Mātau le auala na faatatauina ai e se ulugalii paeonia le lapataʻiga lenei a Iesu. Na latou auauna faatasi i se faapotopotoga ma se ulugalii faatoʻā uma ona papatiso, na ola aʻe i se siʻomaga e maumaututū lava tagata i o latou manatu. Na talitonu lenei ulugalii fou e faapea e lē tatau i Kerisiano ona ō i le tifaga, e tusa pe e talafeagai le ata. Na faateʻia i laʻua ina ua la iloa, sa ō le ulugalii paeonia e tifaga. E leʻi toe ō le ulugalii paeonia i se tifaga, seʻia mafai e nei soo fou ona toleniina o  la lotofuatiaifo, ma iai se la vaaiga paleni i mea. (Epe. 5:14) Ona o le alofa lē manatu faapito o lenei ulugalii paeonia, na la faamaonia atu ai lo la alolofa i le uso ma le tuafafine fou, e lē na o upu ae i gaoioiga foʻi.​—Roma 14:19-21; 1 Ioa. 3:18.

13. E faapefea ona tatou ono uunaʻia se tasi e fai se gaoioiga e agasala ai?

13 O le isi auala e tausuai ai se tasi, o lo tatou uunaʻia lea o ia e fai se gaoioiga e agasala ai. E faapefea? Mātau le faataʻitaʻiga lenei. Na umi se taimi o tauivi malosi se tagata aʻoga o le Tusi Paia ma se vaivaiga, o le lē pulea o le ʻava malosi ma na manumalo mai ai. Na ia iloa e lē tatau lava ona ia toe tagofia le ʻava malosi. O lea, na vave ona ia agaʻigaʻi i luma ma papatiso. Mulimuli ane, na uunaʻia e se uso agalelei o ia i se faatasitasiga faa-Kerisiano e taumafa sana ʻava malosi. Na faapea atu le uso: “Ua avea oe ma Kerisiano, ua iā te oe foʻi le agaga o Ieova. O le amio pulea, o se vala o le fua o le agaga. A iā te oe la lenā uiga, e mafai a ona inu sina au fagu.” Pagā iʻuga e ono oo i ai lenei uso fou, pe ana faalogo atu i lenā fautuaga lē atamai!

14. E faapefea ona fesoasoani sauniga faa-Kerisiano e tatou te faatatauina ai le faatonuga o loo i le Filipi 1:10?

14 E tele auala e fesoasoani ai sauniga faa-Kerisiano iā i tatou, e faatatauina le faatonuga o loo i le Filipi 1:10. Muamua, ua faamanatu mai e le polokalame o meaʻai faaleagaga iā i tatou, mea e sili ona tāua iā Ieova. Lua, ua aʻoaʻo ai i tatou i auala e faatatauina ai mea ua tatou aʻoaʻoina, ina ia lē ponā ai. Tolu, ia faatupu ai le “alofa ma galuega lelei.” (Epe. 10:24, 25) O le tele e faalaeiau ai i tatou  e uso, o le tuputupu aʻe foʻi lenā o lo tatou alofa mo lo tatou Atua ma o tatou uso. Pe a faatumulia o tatou loto i le alofa mo Ieova ma o tatou uso, o le a tatou faia la le mea sili e ʻalofia ai le faia o se mea e tausuai ai isi.

IA FAAAUAU ONA “FAATUMUINA OUTOU I FUA O LE AMIOTONU”

15. O le ā le uiga ia ʻfaatumuina i fua o le amiotonu?’

15 Na tatalo faatauanau Paulo mo Kerisiano i Filipi, ina ʻia faatumuina i fua o le amiotonu.’ (Fili. 1:11) E lē taumatea e aofia i “fua o le amiotonu” lo latou alolofa mo Ieova ma ona tagata. E aofia ai foʻi le talanoa atu i isi e faatatau i lo latou faatuatua iā Iesu, ma lo latou faamoemoe matagofie. O loo faaaogā i le Filipi 2:15 se isi faataʻitaʻiga, ia “susulu atu ai e pei o molī e faamalamalama aʻi le lalolagi.” E fetaui lelei lenā faataʻitaʻiga, ona na faaigoa e Iesu ona soo “o le malamalama o le lalolagi.” (Mata. 5:14-16) Na ia faatonuina foʻi ona soo ina ia ʻfai isi ma soo’ ma toe faapea atu, o le a latou ʻmolimau i tuluʻiga uma o le lalolagi.’ (Mata. 28:18-20; Galu. 1:8) E tatou te ʻfua mai le amiotonu,’ pe a tatou faia se sao atoatoa i lenei galuega e sili ona tāua.

A o saisaitia Paulo i se fale i Roma, na ia tusi atu i le faapotopotoga i Filipi. I lenā taimi, sa faaaogā tatau foʻi e Paulo lenā avanoa e talaʻi atu ai i fitafita ma ē na asiasi ane. (Tagaʻi i le palakalafa e 16)

16. Ua faapefea ona faailoa mai e le Filipi 1:12-14, e mafai ona tatou faasusulu atu le malamalama e ui i tulaga faigatā? (Tagaʻi i le ata i le faavaa)

16 Po o le ā lava lo tatou tulaga, e mafai lava ona faasusulu atu lo tatou malamalama. I nisi taimi, o mea e foliga mai o ni faafitauli i le talaʻia o le tala lelei, e ono mafai ona avea ma avanoa e talaʻi atu ai. O se faaaʻoaʻoga, na saisaitia le aposetolo o Paulo i se fale i Roma, a o tusi atu i Kerisiano i Filipi. E leʻi taofia e na saisaitiaga lona molimau atu i ē na puʻea o ia ma ē na asiasi ane. Na talaʻi pea ma le maelega Paulo e ui i nei tulaga, ma na avea lenā ma mea e mautinoa ma lototetele ai uso “e tautatala atu ma le lē fefefe i le afioga a le Atua.”​—Faitau le Filipi 1:12-14; 4:22.

Ia saʻili pea ni auala e faia ai so tatou sao atoatoa i le faiva (Tagaʻi i le palakalafa e 17) *

17. Aumai se faaaʻoaʻoga i aso nei o le fua tele mai e ui i tulaga faigatā.

 17 E toʻatele o tatou uso ma tuafafine ua maua le avanoa e faataʻitaʻi ai i le faaaʻoaʻoga lototele a Paulo. E latou te nonofo i atunuu e lē saʻoloto le talaʻi i nofoaga faitele, pe talaʻi i le fale i le fale, o lea, e latou te saʻili ai nisi auala e talaʻi ai le tala lelei. (Mata. 10:16-20) I se tasi o na atunuu, na fautua atu le ovasia matāgaluega e mafai e tagata talaʻi taʻitoʻatasi, ona talaʻi atu i o latou aiga, tuaoi, uō, o ē e aʻoʻoga ma faigaluega faatasi. I totonu o le lua tausaga, na faatupulaʻia le aofaʻi o faapotopotoga i lenā matāgaluega. Atonu e tatou te lē o nonofo i se atunuu e lē saʻoloto ona talaʻi. Peitaʻi, e mafai ona tatou aʻoaʻoina se lesona tāua mai i le faaaʻoaʻoga a nei uso maelega: Ia saʻili pea ni auala e tatou te faia ai se sao atoatoa i le faiva, ma ia mautinoa o le a foaʻi mai e Ieova le malosi e foʻia ai so o se faafitauli.​—Fili. 2:13.

18. O le ā e tatau ona tatou maumauaʻi e fai?

18 I nei taimi e sili ona tāua, seʻi o tatou maumauaʻi e faatatau le fautuaga faagaeeina, o loo i le tusi a Paulo i Kerisiano i Filipi. Seʻi o tatou faamautinoa mea e sili ona tāua, ia lē ponā, ʻalofia le faia o se mea e tausuai ai isi, ma ia fua mai fua o le amiotonu. O le faia faapea, o le a faatuputeleina ai lo tatou alofa ma faamamaluina ai lo tatou Tamā alofa o Ieova.

PESE 17 “Ou te Loto i Ai”

^ pala. 5 Ua matuā manaʻomia ona faamalosia i taimi uma le alofa mo o tatou uso. O le tusi i Kerisiano i Filipi o le a fesoasoani iā i tatou e iloa auala e faatuputeleina ai lo tatou alofa, e tusa lava pe fesagaʻia luʻi.

^ pala. 54 FAAMATALAGA O ATA: I le galuega faamamā o le Maota mo sauniga, na tuu ai e Joe lana galuega na fai, ae talanoa atu i se uso ma lona atalii. E leʻi fiafia ai Mike, le uso lea e faia le vaccuum. E manatu Mike, ʻe tatau ona fai se galuega a Joe ae aua le talanoa.’ Mulimuli ane, na mātauina e Mike le agalelei o Joe e fesoasoani atu i se tuafafine matua. O lenei vaaiga faamāfanafanaloto, na faamanatu atu ai iā Mike e ao ona ia uaʻi i uiga lelei o lona uso.

^ pala. 58 FAAMATALAGA O ATA: I se atunuu e lē saʻoloto Molimau a Ieova e talaʻi ai, ua talaʻi atu ma le faautauta e se uso le feʻau o le Malo i sē la te masani. Mulimuli ane, a o faia se mālōlōga i le galuega, ua molimau atu le uso i se tasi e la te faigaluega faatasi.