Skip to content

Skip to table of contents

 SUʻESUʻEGA 34

O Auala e Faamasani ai i se Tofiga Fou

O Auala e Faamasani ai i se Tofiga Fou

“Auā e lē amiolētonu le Atua e na te lē faagalogalo ai la outou galuega, ma le alofa ua outou faaali mai i lona suafa.”​—EPE. 6:10.

PESE 38 E na te Faamalosia Oe

AOTELEGA *

1-3. O ā ni māfuaaga e ono suia ai tofiga o i latou o loo i le auaunaga faataimi atoa?

NA TAʻUA e Robert ma Mary Jo e faapea, “Ina ua mavae tausaga mataʻina e 21 talu ona ma auauna o ni misionare, ae mamaʻi uma loa o ma mātua. Na ma fiafia e tausi i latou, ae sa ootia o ma faalogona ona ua tuua le mea na pele i o ma loto.”

2 Na faamatala foʻi e William ma Terrie e faapea, “Ina ua ma iloa ane ua lē mafai ona toe faaauau i lo ma tofiga ona ua ma mamaʻi, na ma fetagisi ma faapea ane, ua muta lo ma faamoemoega e auauna iā Ieova i se isi atunuu.”

3 Na faapea mai Aleksey, “Na matou iloa na mananaʻo tagata tetee e tapuni le ofisa o le lālā, ae ina ua tapunia ma matou tuua Peteli, na faateʻia ai lava i matou.”

4. O ā fesili o le a tatou talanoaina i lenei suʻesuʻega?

4 E faitau afe foʻi tagata Peteli ua tuua o latou tofiga, ma isi ua maua tofiga fou. * E ono faigatā i nei uso ma tuafāfine faamaoni, ona tuua tofiga e pele iā i latou. O le ā e mafai ona fesoasoani iā i latou e fesagaʻia ai suiga? E faapefea ona e fesoasoani iā i latou? O tali i nei fesili, e mafai ona fesoasoani iā i tatou uma e fesagaʻia ai suiga o tulaga o mea i le olaga.

 LE AUALA E FEAGAI AI MA SE SUIGA

Aiseā e ono avea ai le tuua o se tofiga ma se luʻi iā i latou o loo auauna faataimi atoa? (Tagaʻi i le palakalafa e 5) *

5. O ā auala e aafia ai i tatou pe a sui se tofiga?

5 Pe e tatou te galulue i le fanua po o le Peteli, e mafai lava ona tatou atiaʻe le alofa mo tagata ma le fiafia i le vaipanoa o loo tatou auauna ai. Pe a iai se māfuaaga e tuua ai se tofiga, e tatou te lagona le faanoanoa. E tatou te misia uso ma tuafāfine, popole iā i latou, aemaise lava pe afai na tuua o tatou tofiga ona o sauāga. (Mata. 10:23; 2 Kori. 11:28, 29) E lē gata i lea, o le iai i se tofiga fou po o le toe foʻi i aiga, e masani ona tatou popole ona o tū ma aganuu. Ua faapea mai Robert ma Mary Jo, “Ua fou iā i maʻua le matou aganuu ma le talaʻi atu i le maʻua lava gagana. Ua pei i maʻua o ni tagata ese.” O nisi ua suia o latou tofiga, e ono faafuaseʻia ona feagai ma faafitauli tau tamaoaiga. E latou te ono lagona le lē mautonu, popole ma le lotovaivai. O le ā e fesoasoani iā i latou?

E tāua lo tatou mafuta vavalalata iā Ieova ma maufaatuatuaina o ia (Tagaʻi i palakalafa e 6-7) *

6. E faapefea ona tatou mafuta vavalalata iā Ieova?

6 Ia mafuta vavalalata iā Ieova. (Iako. 4:8) E faapefea ona tatou faia faapea? E ala i le maufaatuatuaina o ia o “Le Faafofoga tatalo.” (Sala. 65:2) Ua faapea mai le Salamo 62:8, “Ia outou sasaa atu iā te ia mea o loo i o outou loto.” E mafai e Ieova ona “fai o mea e matuā sili atu i lo o mea tatou te talosaga atu ai pe e mafaufau i ai.” (Efe. 3:20) E lē na o mea e tatou te talosaga patino iā Ieova e tali mai ai. Ae e ono tali mai foʻi Ieova i se auala e tatou te leʻi faatalitalia pe mafaufauina, ina ia foʻia ai o tatou faafitauli.

7. (a) O le ā e fesoasoani iā i tatou e mafuta vavalalata ai pea iā Ieova? (e) I le Eperu 6:10-12, o le ā e iʻu i ai pe a faaauau ona tatou auauna iā Ieova ma le faamaoni?

7 Ina ia mafuta vavalalata atu pea iā Ieova, ia faitau e lē aunoa le Tusi Paia ma mafaufau loloto i ai. Ua faapea mai sē na avea ma misionare, “Ia tumau pea i lau faasologa masani o le tapuaʻiga a le aiga, ma sauniuni mo sauniga e pei lava ona sa e faia muamua.” E lē gata i lea, ia fai se sao atoatoa i le talaʻia o le tala lelei i lau faapotopotoga fou. E manatua e Ieova i latou o loo auauna pea ma le faamaoni iā te ia, e tusa pe ua lē mafai ona latou faia mea uma na latou faia muamua.—Faitau le Eperu 6:10-12.

8. E faapefea ona fesoasoani le 1 Ioane 2:15-17 e faafaigofie ai lou olaga?

8 Ia faafaigofie lou olaga. Aua neʻi avea  popolega o le lalolagi a Satani, ma itu e “fetinaʻiina” ai au gaoioiga faaleagaga. (Mata. 13:22) Ia teena omiga mai i le lalolagi, po o uō ma tauaiga ina ia saʻili le tele o le tamaoaiga i lenei faiga o mea a Satani. (Faitau le 1 Ioane 2:15-17.) Ia maufaatuatuaina Ieova, o lē ua folafola mai e na te saunia mea e faamalieina ai o tatou manaʻoga faaleagaga, tau faalogona ma le faaletino “i le taimi e tatau ai.”—Epe. 4:16; 13:5, 6.

9. I le Faataoto 22:3, 7, aiseā e tāua ai le ʻalofia o aitalafu e lē manaʻomia ma o le ā e fesoasoani iā i tatou e faia ai filifiliga atamai?

9 ʻAlofia le faia o aitalafu e lē manaʻomia. (Faitau le Faataoto 22:3, 7.) E tele tupe alu pe a siitia, ma e faigofie lava ona fai ai ni aitalafu. Ina ia faaitiitia le nofo aitalafu, ia faaeteete le aitalafu mai o mea e lē o manaʻomia moni. Pe a lē mautonu o tatou faalogona ona o le tausia o ē pele ua mamaʻi, e ono faigatā la ona filifili po o le a le telē o le aitalafu e fai. I na tulaga, e ao ona manatua o le “tatalo ma le faatoga,” e mafai ona fesoasoani iā i tatou e faia ai filifiliga atamai. E tali Ieova i a tatou tatalo, e ala i le foaʻi mai o le filemu e ʻleoleoina ai o outou loto ma mafaufau,’ ina ia fesoasoani ai iā i tatou e faia faaiʻuga saʻo.—Fili. 4:6, 7; 1 Pete. 5:7.

10. E faapefea ona atiaʻe ni faauōga fou?

10 Ia faatumauina ni faiā lelei. Ia taʻu atu ou faalogona ma mea na e tofo iai i au uō vavalalata, aemaise i latou e ono tutusa luʻi ma mea na latou olioli ai ma mea foʻi na oo iā i tatou. O le faia faapea, e mafai ona faaleleia ai ou faalogona. (Fai. 4:9, 10) O au uō na iai i lou tofiga muamua, e tumau pea ona avea ma au uō. I lou tofiga fou, e manaʻomia ona iai ni au uō fou. Ia manatua, e manaʻomia ona e faaleuō ina ia maua ai se uō. E faapefea ona e atiaʻe ni faauōga fou? Ia faasoa atu i isi le tele o mea lelei na tutupu i lau auaunaga, ina ia latou iloa ai le olioli ua e mauaina i le auaunaga iā Ieova. E tusa pe e lē malamalama isi i le faapotopotoga i lou maelega i le auaunaga faataimi atoa; ae e tosina mai isi i au faaaʻoaʻoga lelei ma avea ai i latou ma uō lelei. Ae ia manatua, aua neʻi faauaʻi mai isi i mea ua e ausia, ma aua foʻi e te taulaʻi i ou faalogona lē lelei.

11. E faapefea ona faatumauina pea le fiafia i lau faaipoipoga?

11 Pe a tuua lo oulua tofiga ona ua gasegase lau paaga, aua e te tuuaʻia o ia. Ae afai o oe na maʻi, aua e te tuuaʻia oe e faapea ua lē taulau lo oulua tofiga ona o oe. Ia manatua, ua avea oulua ma “tino e tasi,” ma na lua tautō iā Ieova e tausia e le tasi le isi po o ā lava tulaga e oo iai. (Mata. 19:5, 6) Afai na tuua lo oulua tofiga ona o se maʻitaga e leʻi  faatalitalia, ia faamautinoa i lo oulua alo e sili ona tāua o ia nai lo o le tofiga. Ia faamautinoa atu pea i la oulua tama, o ia “o se taui” mai i le Atua. (Sala. 127:3-5) I le taimi e tasi, taʻu atu iā te ia faamanuiaga na maua mai i lo oulua tofiga. O le faia faapea, e mafai ona uunaʻia ai lo oulua alo e faaaogā lona ola mo le auaunaga iā Ieova e pei ona sa oulua faia.

LE AUALA E FESOASOANI AI ISI

12. (a) E faapefea ona tatou fesoasoani iā i latou i le auaunaga faataimi atoa e faaauau pea i o latou tofiga? (e) E faapefea ona tatou fesoasoani iā i latou i le auaunaga faataimi atoa, ia faigofie ona faamasani i o latou tofiga fou?

12 O le mea moni, e tele faapotopotoga ma tagata taʻitoʻatasi o loo fesoasoani iā i latou i le auaunaga faataimi atoa, ia tumau pea i o latou tofiga. E latou te faia faapea e ala i le faalaeiau o ē i le auaunaga faataimi atoa, e faaauau i a latou tofiga. E latou te avatu se fesoasoani tau tupe ma mea faitino, pe fesoasoani foʻi i le tausiaina o o latou aiga. (Kala. 6:2) Afai e maua e i latou e galulue faataimi atoa se tofiga fou i la outou faapotopotoga, aua neʻi manatu ua lē taulau pe ua aʻoaʻia foʻi i latou. * Nai lo o lea, ia fesoasoani iā i latou ia faigofie ona faamasani i o latou tofiga fou. Ia faafeiloaʻi ma le māfana i latou ma faamālō iai mo galuega na latou faia, e tusa lava pe ua itiiti mea ua latou faia ona o maʻi. Ia faamasani iā i latou. Ia aʻoaʻo mai ai foʻi i le tele o o latou tomai, o a latou toleniga ma lo latou poto masani.

13. O le ā le fesoasoani e mafai ona tatou avatu mo i latou e maua se tofiga fou?

13 I le taimi muamua, e ono manaʻomia e i latou ua maua tofiga fou le fesoasoani i ni  mea e nonofo ai, auala o femalagaaʻiga, galuega ma isi manaʻoga masani. E latou te ono manaʻomia foʻi faamatalaga fou, e faatatau i le totogiina o lafoga ma le faia o inisiua. Ia manatua, o le mea e sili ona tāua, e latou te lē mananaʻo e tatou te misi alofa atu, ae ia tatou malamalama i o latou tulaga. Atonu o loo latou tauivi ma faafitauli i le soifua mālōlōina a se tauaiga, po o i latou foʻi. Pe atonu foʻi o loo faavauvau ona o le maliu o sē e pele iā i latou. * Ma atonu o loo mafatia pe nanā foʻi o latou foliga faanoanoa, ona o le motusia o le mafutaga ma o latou aiga faaleagaga i le tofiga sa iai muamua. E umi se taimi o tau foʻia ona faalogona ootia ma le lē mautonu.

14. Na faapefea ona fesoasoani le ʻautalaʻi i se tuafafine e faamasani ai i lona tofiga fou?

14 I le taimi nei, o a outou faaaʻoaʻoga ma le lagolagosua, e fesoasoani lea iā i latou e faamasani ai. Na faapea mai se tuafafine na auauna i se atunuu mo le tele o tausaga, “I loʻu tofiga na iai muamua, na ou faia i aso uma suʻesuʻega faale-Tusi Paia. Ae i loʻu tofiga ua iai nei, e faigatā tele ona maua se avanoa e faitau ai se mau, pe faaali foʻi se vitiō i le talaʻiga. Ae na valaaulia aʻu e le ʻautalaʻi o laʻu faapotopotoga fou, e matou te ō e fai a latou asiga ma suʻesuʻega. O le maelega, ma le lototetele o nei uso ma tuafafine e fai a latou suʻesuʻega faale-Tusi Paia e agaʻigaʻi i luma, na ou maua ai se vaaiga saʻo. Na ou aʻoaʻoina le auala e amata ai ni talanoaga i le oganuu fou. O nei mea uma na ou toe maua ai le fiafia.”

IA AGAʻIGAʻI PEA I LUMA!

Saʻili auala e faalautele ai lau faiva i la outou oganuu (Tagaʻi i palakalafa e 15-16) *

15. E faapefea ona e taulau i lou tofiga fou?

15 E mafai ona e taulau i lou tofiga fou. Aua neʻi e manatu ua sui lou tofiga, ona ua e lē taulau i le tofiga na e iai. Ia manatunatu i auala o loo fesoasoani mai ai Ieova iā te oe, ma faaauau pea ona talaʻi. Ia faaaʻoaʻo i le faatuatua o Kerisiano i le uluaʻi senituri. Po o fea lava na latou iai, ae na ō atu “i le nuu, ma  folafola atu le tala lelei o le afioga a le Atua.” (Galu. 8:1, 4) O au taumafaiga e talaʻi pea le tala lelei e ono maua ai iʻuga lelei. O se faaaʻoaʻoga, o paeonia na tutuliese mai i se atunuu, na siitia atu i se atunuu tuaoi, lea na tele ai le manaʻoga i le gagana e tautatala ai paeonia. I ni nai masina, ae ua toʻatele tagata fiafia.

16. E faapefea ona e maua le olioli i lou tofiga fou?

16 “O le olioli mai iā Ieova, o lo outou malosi lea.” (Nee. 8:10) O lo tatou olioli sili e maua i le iai o se faiā lelei ma Ieova, ae lē o tofiga e tusa pe e pele iā i tatou. O lea, ia faaauau ona savavali faatasi ma Ieova, saʻili atu iā te ia mo le atamai, puipuiga, ma lana lagolagosua. Ia manatua, na e matuā fiafia i lou tofiga na i ai ona sa tuu atoa lou loto e fesoasoani i tagata i lenā vaipanoa. Ia tuu atoa foʻi la lou loto i lou tofiga fou, ma taulaʻi atu i auala e fesoasoani ai Ieova e te maua ai le fiafia.—Fai. 7:10.

17. O le ā e tatau ona manatua e faatatau i o tatou tofiga i le taimi nei?

17 E tatau ona tatou manatua o la tatou auaunaga iā Ieova e tumau e faavavau, ae o o tatou tofiga i le taimi nei e lē tumau. I le lalolagi fou atonu o i tatou uma o le a suia tofiga. Na talitonu Aleksey, o mea o loo tutupu iā te ia i le taimi nei, ua sauniunia ai o ia i suiga i le lumanaʻi. Na ia faapea mai, “Na ou iloa e moni Ieova ma le lalolagi fou, ae foliga e mamao i laʻu vaai. I le taimi nei, ua i oʻu luma Ieova ma ua matuā latalata mai le lalolagi fou.” (Galu. 2:25) Po o ā lava o tatou tofiga, ia faaauau pea ona savavali faatasi ma Ieova. E na te lē tuua lava i tatou, ae o le a ia fesoasoani mai e maua le olioli i so o se mea e tatou te faia po o fea lava e auauna ai.​—Isa. 41:13.

PESE 90 Ia Fefaalaeiauaʻi

^ pala. 5 E iai taimi, e ono tuua ai e uso ma tuafāfine o loo i le auaunaga faataimi atoa o latou tofiga, pe maua foʻi ni tofiga fou. O le a talanoaina i lenei suʻesuʻega luʻi e latou te fesagaʻia, ma auala e fesoasoani ai iā i latou ina ia faafaigofie ona faamasani i suiga fou. O le a talanoaina ai foʻi mea e mafai ona fai e isi e faalaeiau ma lagolagosua ai, faapea taʻiala e mafai ona fesoasoani iā i tatou uma e fesagaʻia suiga.

^ pala. 4 E faapena foʻi uso taʻimua ua matutua, e toʻatele i latou ua faamatuu atu o latou tiute tauave i uso talavou. Tagaʻi i mataupu, “Kerisiano Matutua—E Tautele iā Ieova lo Outou Faamaoni” i Le Olomatamata o Setema 2018, ma le “Ia Faatumauina le Filemu o le Mafaufau pe a Suia o Tatou Tulaga” i Le Olomatamata o Oketopa 2018.

^ pala. 12 E tatau i toeaina o le faapotopotoga na galulue muamua ai, ona vave fai se tusi faafeiloaʻi i le faapotopotoga fou, ina ia vave faaauau ai le auaunaga faapaeonia, o se toeaina, po o se auauna o le faiva.

^ pala. 13 Tagaʻi i le faasologa o mataupu “Fesoasoani mo Ē e Faavauvau” i le Ala Mai!, Nu. 3 2018

^ pala. 57 FAAMATALAGA O ATA: Ua tuua faamalosi e se ulugalii misionare le la galuega i se atunuu na galulue ai, ae faamavae atu ma loimata i le faapotopotoga.

^ pala. 59 FAAMATALAGA O ATA: O le ulugalii lava lea e tasi ua toe foʻi i lo la atunuu, o loo tatalo faatauanau iā Ieova mo se fesoasoani e fesagaʻia ai faafitauli.

^ pala. 61 FAAMATALAGA O ATA: Ua toe faaauau le auaunaga faataimi atoa a le ulugalii ona o le fesoasoani a Ieova. O loo la faaaogāina le gagana na aʻoaʻoina a o avea ma misionare, e faasoa atu ai le tala lelei i ē na siitia ane i le oganuu a le la faapotopotoga fou.