Skip to content

Skip to table of contents

Talavou​—“Ia Faaauau Ona Outou Galulue mo lo Outou Faaolataga”

Talavou​—“Ia Faaauau Ona Outou Galulue mo lo Outou Faaolataga”

“E pei ona sa masani ona outou usiusitaʻi . . . ia faaauau ona outou galulue mo lo outou faaolataga, i le mataʻu ma le gatete.”​—FILI. 2:12.

PESE: 133, 135

1. Aiseā e matuā tāua ai le laasaga o le papatisoga? (Tagaʻi i le ata i luga aʻe o le matua.)

E FAITAU afe tagata aʻoga o le Tusi Paia e papatiso i tausaga taʻitasi. O le toʻatele o i latou o talavou ma fanau iti. Atonu na tausia aʻe i latou i le upu moni. Pe e faapena oe? Pe afai o lea, e faamālō atu iā te oe. O le papatisoga o se laasaga e tatau ona uia e Kerisiano, ma e tāua mo le mauaina o le faaolataga.​—Mata. 28:19, 20; 1 Pete. 3:21.

2. Aiseā e lē tatau ai ona e fefe e tuuina atu oe iā Ieova?

2 E ui lava o le papatisoga e maua ai le tele o faamanuiaga, ae e aofia ai ni tiute tauave. I le ā le itu? I le aso o lou papatisoga, na e tali atu ai ioe i le fesili lenei, “E ala i le faatuatua i le taulaga togiola a Iesu Keriso, po ua e salamō mai i au agasala ma tuuina atu oe iā Ieova e faia lona finagalo?” O lou papatisoga na faailoa atu ai i isi ua uma ona e tuuina atu. O se tautoga lea na e faia iā Ieova o le a e alofa iā te Ia ma faamuamua lona finagalo nai lo o se isi lava mea. E matuā tāua lenā tautoga. Pe e tatau ona e salamō i le faia o lenā tautoga? E leai! O le tuu atu o oe i aao o Ieova e lē o se  filifiliga sesē. Ia manatunatu i le isi itu! O se tagata e faaesea o ia mai iā Ieova, ua pulea o ia e Satani. E lē popole Satani i lou faaolataga. O le mea moni, e fiafia o ia pe a e lē maua le ola e faavavau ona o lou lagolagoina o lana itu e tetee atu i le pule silisili ese a Ieova.

3. O ā faamanuiaga ua e mauaina ona o le tuuina atu o lou ola iā Ieova?

3 Nai lo o le lagolagoina o Satani, ia manatunatu i faamanuiaga ua e maua o se Kerisiano ua tuuina atu ma papatisoina. Talu ai o lea ua e tuuina atu lou ola iā Ieova, ua mafai nei loa ona e faailoa atu ma le mautinoa e faapea: “O loo ʻau Ieova ma aʻu; ou te lē fefe lava. O le ā se mea e mafai ona faia e tagata iā te aʻu?” (Sala. 118:6) E leai lava se isi faaeaga e sili atu nai lo o le lagolagoina o le itu a le Atua ma maua lona finagalo malie.

O SE TIUTE TAUAVE A LE TAGATA LAVA IA

4, 5. (a) Aiseā e faapea atu ai o le tuuina atu o le tiute tauave lea a le tagata lava ia? (e) O ā luʻi o loo fesagaʻia e Kerisiano e tusa lava po o le ā le matutua?

4 I le avea ai ma Kerisiano papatiso, o lau faiā ma Ieova e lē faalagolago i ou mātua e pei ona e faalagolago i ou mātua e faatau credit o lau telefoni. Nai lo o lea, o lou faaolataga o lau lea tiute tauave e ui o loo outou nonofo faatasi pea ma ou mātua. Aiseā e tāua ai ona manatua lenā mea? Talu ai e te lē iloa luʻi o le a tulaʻi mai i le lumanaʻi. O se faataʻitaʻiga, afai na e papatiso a o e laʻitiiti, e lē taumatea o le a e fesagaʻia ni faalogona ma ni luʻi fou a o e tuputupu aʻe e avea ma talavou. Na faapea mai se teine talavou: “E lē faapea e lē manaʻo se tamaitiiti e avea o ia ma Molimau a Ieova, ona o le lē maua o sana fasi keke mai i le keke o se aso fanau i le aʻoga. Ae i tausaga mulimuli ane pe a faasolo ina malolosi ona faanaunauga e faia feusuaʻiga, e tatau ona matuā faatalitonuina le talavou o le usiusitaʻi i tulafono a Ieova o le filifiliga saʻo lea i taimi uma.”

5 O le mea moni, o le feagai ma luʻi fou e lē na o talavou e aafia ai. E oo foʻi i ē na papatiso ua matutua e latou te fesagaʻia le tele o tofotofoga o le faatuatua e leʻi faatalitalia. Atonu o ni tofotofoga i totonu o le faaipoipoga, faafitauli i le soifua mālōlōina, po o le galuega. Ioe, o tagata uma e tusa lava po o le ā le matutua, o le a fesagaʻia tulaga e manaʻomia ai ona faamaoni iā Ieova.​—Iako. 1:12-14.

6. (a) Aiseā e tāua ai le faamaoni e tusa ai ma lo tatou tuuina atu iā Ieova? (e) O le ā e tatou te aʻoaʻoina mai i le Filipi 4:11-13?

6 Ina ia fesoasoani iā te oe e tumau i so o se tulaga, ia manatua o le tautoga na e faia iā Ieova e aofia ai le faamaoni iā te Ia e tusa lava po o ā luʻitau e tulaʻi mai. O lona uiga, o lenā na e taʻu atu i le Pule Silisili Ese i le aoao o mea o le a e auauna pea iā te ia, e tusa pe lē toe faia faapea e au uō po o ou mātua. (Sala. 27:10) I so o se tulaga e tulaʻi mai, e mafai ona e maua le malosi e te faamaoni ai i lou tuuina atu ona o le fesoasoani a Ieova.​—Faitau le Filipi 4:11-13.

7. O le ā le uiga o le galue mo lou lava faaolataga “i le mataʻu ma le gatete”?

7 E finagalo Ieova ia avea oe ma ana uō. Peitaʻi, e manaʻomia ni taumafaiga ina ia faatumauina ai lenā faauōga ma ia galue mo lou faaolataga. Ua taʻua i le Filipi 2:12: “Ia faaauau ona outou galulue mo lo outou faaolataga, i le mataʻu ma le gatete.” Ua faailoa mai i nei upu e manaʻomia ona e mafaufau lelei pe faapefea ona faatumauina la oulua faauōga ma Ieova, ma tumau pea ma le faamaoni i so o se luʻi e tulaʻi mai. E lē tatau ona e mautinoa naʻuā. E iai nisi ua loa tausaga o auauna i le Atua ae ua latou lē toe faia faapea. O lea, e mafai faapefea ona e galue mo lou lava faaolataga?

 E TĀUA LE SUʻESUʻE O LE TUSI PAIA

8. O ā mea e aofia ai i suʻesuʻega a le tagata lava ia, ma aiseā e tāua ai?

8 O le faauōga ma Ieova e aofia ai vala nei e lua tau fesootaʻiga, o le faalogologo ma le talanoa. O suʻesuʻega a le tagata lava ia i le Tusi Paia, o le auala autū lea e tatou te faalogologo atu ai iā Ieova. E aofia ai le aʻoaʻoina o le poto e ala i le faitau ma manatunatu loloto i le Afioga a le Atua ma lomiga faale-Tusi Paia. A o e faia faapea, ia manatua o le suʻesuʻeina o le Tusi Paia e sili atu nai lo o le tau ina aʻoaʻoina o ni mea. E lē faapea o loo e taumafai e tauloto ni faamatalaga moni ina ia pasi ai i se suʻega i le aʻoga. O suʻesuʻega uigā, e tai pei o loo alu sau maimoaga i se nofoaga matagofie, lea e mafai ai ona e saʻili ma maua ni vala fou e faatatau i uiga o Ieova. O le a fesoasoani lea e te mafuta vavalalata atu ai iā Ieova, ona mafuta vavalalata mai lea o ia iā te oe.​—Iako. 4:8.

Po o lelei a oulua fesootaʻiga ma Ieova? (Tagaʻi i le palakalafa 8-11)

9. O ā meafaigaluega ua aogā i au lava suʻesuʻega?

9 E anoanoaʻi meafaigaluega ua saunia mai e le faalapotopotoga a Ieova, e fesoasoani i lau polokalame o le faia o au lava suʻesuʻega. O se faataʻitaʻiga o le vala “Bible Study Activities” e maua i le vaega “Teenagers” i le jw.org, e mafai ona fesoasoani iā te oe e aʻoaʻoina ai ni lesona aogā mai i tala o loo i le Tusi Paia. E mafai foʻi ona fesoasoani mataupu mo suʻesuʻega i le vaega “What Does the Bible Really Teach?” i le jw.org e atiaʻe ai lou mautinoa i ou talitonuga. E fesoasoani na mataupu e te aʻoaʻoina ai le auala e faamatala atu ai ou talitonuga i isi. Mo isi auala e faia ai au lava suʻesuʻega, tagaʻi i le mataupu “Ua Fesili Mai Talavou . . . E Faapefea Ona Faatupu Loʻu Fiafia i le Faitauina o le Tusi Paia?” i le Ala Mai! o Iulai-Setema 2009. E tāua tele au lava suʻesuʻega ma le manatunatu loloto, a o e galue mo lou faaolataga.​—Faitau le Salamo 119:105.

E TĀUA LE TATALO

10. Aiseā e matuā tāua ai mo se Kerisiano papatiso le tatalo?

10 O suʻesuʻega a le tagata lava ia o se tasi lea o auala e tatou te faalogologo atu ai iā Ieova, ae o le tatalo o le auala lea e tatou te talanoa atu ai iā te ia. E lē tatau ona vaai se Kerisiano i le tatalo o se masaniga e tau ina fai, po o se mea e fai ina ia laki ma manuia ai ana taumafaiga. Nai lo o lea, o le tatalo o le auala moni lea e te lua fesootaʻi ai ma Lē na faia oe. E finagalo Ieova e faafofoga mai  iā te oe. (Faitau le Filipi 4:6.) Pe a e feagai ma so o se ituaiga popolega, ua fautua mai le Tusi Paia “ia tuuina atu iā Ieova ou popolega uma.” (Sala. 55:22) Pe e te talitonu moni lava i lenā manatu? E faitau miliona uso ma tuafāfine e mafai ona latou faamautinoa atu iā te oe le moni o lea fautuaga. E mafai foʻi ona fesoasoani le tatalo iā te oe!

11. Aiseā e tatau ai ona tatou faafetai atu e lē aunoa iā Ieova?

11 E tele atu mea e mafai ona tatou tatalo ai nai lo o le tau ina talosaga atu iā Ieova mo lana fesoasoani. Ua faapea mai le Tusi Paia: “Ia faaalia foʻi lo outou loto faafetai.” (Kolo. 3:15) O nisi taimi e tatou te soona popole i o tatou faafitauli ma galo ai le anoanoaʻi o faamanuiaga o loo tatou maua. Aiseā e te lē taumafai ai i aso taʻitasi e mafaufau i ni mea se tolu pe sili atu, e te lotofaafetai ai? Ia faafetai atu iā Ieova mo na faamanuiaga. Na taʻua e se talavou e igoa iā Abigail na papatiso ina ua 12 ona tausaga e faapea: “Ou te lagona o Ieova e alagatatau ona faafetaia nai lo o se isi lava i le lagi ma le lalolagi. E tatau ona tatou faafetai atu e lē aunoa iā te ia ona o meaalofa ua ia foaʻi mai. Na ou faalogo i se manatu manaia e faapea: Pe afai e pau mea o le a tatou maua o mea na tatou faafetai ai iā Ieova, o ā la mea o le a tatou mauaina?”

E TĀUA MEA UA E TOFO TOTINO I AI

12, 13. (a) O ā auala ua e tofo totino ai i le lelei o Ieova? (e) Aiseā e tāua ai le manatunatu i auala patino ua fesoasoani mai ai Ieova iā te oe?

12 Na laveaʻiina le tupu o Tavita mai i le tele o tofotofoga faigatā. Na ia taʻua i upu o lana pese: “Inā outou tofotofo ia ma iloa ai e lelei Ieova; e fiafia foʻi le tagata e sulufaʻi atu iā te ia.” (Sala. 34:8) O loo faamamafa mai i lenei mau le tāua o mea ua tatou tofo totino i ai. Pe a e faitau i le Tusi Paia ma lomiga faale-Tusi Paia, faapea foʻi ma le auai i sauniga a le faapotopotoga, e te faalogo ai i tala faalaeiau o mea na tutupu e faatatau i le auala na fesoasoani ai le Atua i isi ina ia tumau ma le faamaoni. Peitaʻi, a o e tuputupu aʻe faaleagaga, e tāua ona e iloa auala patino o loo fesoasoani ai Ieova iā te oe. Ua faapefea ona e tofo totino i le lelei o Ieova?

13 E iai se auala faapitoa ua tofo ai Kerisiano uma i le lelei o Ieova. E faapefea? E ala lea i lona valaaulia o i tatou taʻitoʻatasi e mafuta vavalalata atu iā te Ia ma lona Alo. Na fetalai Iesu: “E lē mafai ona sau o se tagata iā te aʻu pe a lē tosina mai o ia e le Tamā o lē na auina mai aʻu.” (Ioa. 6:44) Pe e te manatu o loo faatatau atu na upu iā te oe? E ono manatu se talavou, ʻNa tosina atu e Ieova oʻu mātua iā te Ia, ma ua ou mulimuli atu ai foʻi ma aʻu.’ Peitaʻi, ina ua e tuuina atu oe lava iā Ieova ma e papatiso, o lenā ua e faaalia atu ua iai sa oulua faiā faapitoa ma ia. O lona uiga, ua silafia lelei oe e Ieova. Ua faamautinoa mai i le Tusi Paia: “Afai e alofa se tasi i le Atua, e na te silafia lenā tagata.” (1 Kori. 8:3) Ia faaauau pea ona e faatāua ma talisapaia lou tulaga i le faalapotopotoga a Ieova.

14, 15. E mafai faapefea ona fesoasoani le faiva ina ia faamalosia ai lou faatuatua?

14 O se isi auala e mafai ona e tofo totino ai i le lelei o Ieova, o le mauaina lea o lana fesoasoani a o e talanoa atu i isi e faatatau i lou faatuatua. E mafai ona e faia faapea i le aʻoga ma le faiva i le fanua. E faigatā i nisi ona talaʻi atu i ē e latou te aʻoʻoga faatasi. E lē taumatea o loo e malamalama i le māfuaaga, auā e te lē iloa le auala o le a latou tali mai ai. O se matuā luʻi le talanoa atu i luma o ni talavou se toʻatele, nai lo o le talanoa i se talavou se toʻatasi e te lua vasega. O le ā e mafai ona fesoasoani iā te oe?

15 Muamua, ia mafaufau i le māfuaaga ua e mautinoa ai i ou talitonuga. Po o maua i lau gagana mataupu mo suʻesuʻega i le jw.org? Pe afai e te lē o mautinoa, ia faaalu se taimi e saʻili ai lea vaega. Na saunia na mataupu  ina ia fesoasoani iā te oe e manatunatu ai i mea ua e talitonu i ai, o māfuaaga ua e talitonu ai, ma le auala e te faamatala atu ai ou talitonuga i isi. Pe afai ua e matuā mautinoa ma ua e sauni lelei, o le a uunaʻia ai oe e molimau atu mo le suafa o Ieova.​—Iere. 20:8, 9.

16. O le ā e ono fesoasoani iā te oe e ʻalofia ai le faatalatū e talanoa atu i isi e faatatau i ou talitonuga?

16 Peitaʻi, e ui i au sauniuniga lelei ae atonu o loo e faatalatū lava e talanoa atu e faatatau i ou talitonuga. Ua taʻutino mai e se tuafafine e 18 ona tausaga ae na papatiso ina ua 13 ona tausaga e faapea: “Na ou iloa mea na ou talitonu i ai, ae o nisi taimi na faigatā ona ou faamatala atu mea na ou mafaufau i ai.” E faapefea ona ia fesagaʻia lenei luʻi? Ua ia faapea mai: “Ou te taumafai e talatalanoa faasamasamanoa. E talanoa ma le saʻoloto tamaiti o laʻu vasega i a latou mea e fai. E tatau foʻi la ona ou saʻoloto e faia faapea. A o matou talanoa la ma isi tamaiti, ou te taʻua se faamatalaga e pei o le, ʻNa fai le matou galuega talaʻi i le isi aso ma . . . ,’ ona toe faaauau lea o laʻu tala. E ui e lē o talanoa patino e faatatau i le Tusi Paia, ae o le tele o taimi e fia iloa e tamaiti po o le ā laʻu tala e fai pe a ou alu e talaʻi. O nisi taimi e fai mai a latou fesili. O le talatalanoa soo faapea, o le faigofie foʻi lenā ona molimau atu i isi. O le iʻuga, ou te matuā lagona ai le fiafia!”

17. O ā nisi fautuaga e fesoasoani iā te oe a o e talanoa atu i isi?

17 Pe afai e te faaaloalo i isi ma naunau moni iā i latou, e lē taumatea o le a latou faaaloalo mai foʻi iā te oe. Na faapea mai Olivia e 17 ona tausaga ae na papatiso a o laʻitiiti: “Na ou fefe ina neʻi manatu tamaiti ou te fiaamiotonu pe a ou taʻua le Tusi Paia i se matou talanoaga.” Ae na faasolo ina suia le auala e mafaufau ai o ia. Nai lo o le mafaufau tele i lona fefe, na manatu Olivia: “O le toʻatele o talavou e latou te lē iloa ni Molimau a Ieova. E na o i tatou lava Molimau a Ieova e latou te iloaina. O lea, o le auala e tatou te gaoioi ai e aafia ai le auala o le a latou tali mai ai. O le ā la e tupu pe a tatou matamumuli, fefefe, pe faigatā ona tatou talanoa atu e faatatau i o tatou talitonuga, pe tatou te lē toʻa foʻi a o avatu se molimau? O le a latou manatu ai e tatou te lē o mitamita i le avea o i tatou o ni Molimau a Ieova. E latou te ono faaseā mai foʻi ona o le leai o ni o tatou lagona mautinoa. Peitaʻi, pe a tatou talanoa atu ma le toʻafilemu ma le mautinoa e faatatau i o tatou talitonuga, ma avea o ni talanoaga masani iā i tatou, e lē taumatea o le a latou faaaloalogia i tatou.”

IA FAAAUAU ONA E GALUE MO LOU FAAOLATAGA

18. O ā mea e aofia ai i le galue mo lou faaolataga?

18 E pei ona tatou talanoaina, o le galue mo lou lava faaolataga o se tiute tauave tāua. E aofia ai le faitau o le Afioga a le Atua ma manatunatu loloto i ai, tatalo iā Ieova, ma mafaufau i auala patino ua faamanuia ai Ieova iā te oe. O le faia o nei mea o le a fesoasoani e faatupu ai lou mautinoa i lou faaeaga o le avea ma uō a Ieova. O le iʻuga, o le a uunaʻia ai oe e talanoa atu i isi e faatatau i ou talitonuga.​—Faitau le Salamo 73:28.

19. Aiseā e aogā ai au taumafaiga e galue mo lou lava faaolataga?

19 Na fetalai Iesu: “A fia mulimuli mai se tasi iā te aʻu, ia faafitia e ia o ia lava ma amo le laau e faapuapuagatia ai o ia, ma mulimuli mai pea iā te aʻu.” (Mata. 16:24) E manino mai la, ina ia mulimuli iā Iesu, e tatau i so o se Kerisiano ona tuuina atu ma papatisoina. O le iʻuga, o le a e maua ai le tele o faamanuiaga i le taimi nei, ma le ola e faavavau i le lalolagi fou a le Atua. Ioe, e tele māfuaaga e tatau ai ona faaauau ona e galue mo lou lava faaolataga!