Skip to content

Skip to table of contents

E Faapefea Ona E Faamasani i Lau Faapotopotoga Fou?

E Faapefea Ona E Faamasani i Lau Faapotopotoga Fou?

UA FAAPEA mai Allen: * “Na ou popole i le siitia mai i inei. Ou te leʻi iloa po o le a maua ni aʻu uō fou pe talileleia foʻi aʻu.” O loo tau faamasani Allen i se faapotopotoga fou lea e toetoe 900 maila (silia i le 1,400 km) mai i lona aiga.

Pe afai ua e siitia i se isi faapotopotoga, atonu la o loo e lagona foʻi le popole. O le ā e mafai ona fesoasoani iā te oe a o feagai ma lenā suiga? O le ā e mafai ona e faia pe afai ua faigatā lenā suiga nai lo o le mea na e faatalitalia? I le isi itu, e mafai faapefea ona e fesoasoani i ē o loo feagai ma suiga ona e fou mai i le faapotopotoga?

E FAAPEFEA ONA E FAAMASANI MA E TAULAU I SE FAAPOTOPOTOGA FOU?

Seʻi mafaufau i le faataʻitaʻiga lenei: Pe a sua se laau ina ia toe totō i se isi mea, o le a faigatā ona ola. A o taumafai e sua ese se laau mai i le palapala, o le tele o ona aa o le a motusi ina ia faigofie ai ona ave i se isi mea. Ae o le taimi lava e toe totō ai le laau, e tatau ona vave ona toe tutupu ona aa fou. I se tulaga talitutusa, o le siitia atu i se isi faapotopotoga, e te ono lagona ai le popole. I lau faapotopotoga muamua, na pei na tutupu ni “aa” ina ua e atiaʻe ni faauōga māfana ma iai sau faasologa faaleagaga na e masani ai. Ae ua tatau nei ona e atiaʻe ni aa fou, o ni uō fou ma se faasologa faaleagaga ina ia e taulau ai i le siʻomaga fou. O le ā o le a fesoasoani iā te oe? O le faatatau lea o mataupu silisili o le Tusi Paia. Seʻi o tatou tilofaʻia nisi o na mataupu silisili.

O le tagata e faitau e lē aunoa i le Afioga a le Atua, “e pei lava o se laau ua totō i tafatafa o vaitafe, e fua mai ona fua i ona lava tau e lē mamae foʻi ona lau, ae e taulau manuia mea uma e na te faia.”​Sala. 1:1-3.

E manaʻomia e se laau le vai i taimi uma ina ia faaauau ai ona ola lelei. E tatau foʻi ona fafagaina e lē aunoa se Kerisiano i le Afioga a le Atua, ina ia tumau ai ona malosi faaleagaga. O lea, ia faaauau ona faitau le Tusi Paia i aso taʻitasi ma auai e lē aunoa i sauniga a le faapotopotoga. Ia tausisi i lau masaniga lelei o le faia o le tapuaʻiga a le aiga ma au oe lava suʻesuʻega. Po o ā lava mea na e faia i le taimi muamua ina ia faamalosia ai la oulua faiā ma Ieova, e te manaʻomia foʻi i le faapotopotoga fou ua e auai ai.

“O lē e na te matuā faasūsū isi, o le a matuā faasūsūina o ia.”​Faata. 11:25.

O le a faamalosia oe ma vave ona e masani pe a faia sou sao atoatoa i le faiva. Ua faapea mai Kevin o se toeaina Kerisiano: “O le mea na fesoasoani tele iā i maʻua ma laʻu avā ina ua ma faatoʻā taunuu i le ma faapotopotoga fou, o le fai lea o la ma paeonia lagolago. Na vave ai ona ma masani i uso, paeonia, ma le oganuu.” Ua faapea mai Roger lea na siitia atu i se vaipanoa e silia i le 1,000 maila (silia i le 1,600 km) mai le mea sa nofo ai: “O le auala sili e faamasani ai i se faapotopotoga fou, o le auai lea i le faiva i le fanua i le tele e mafai ai. E lē gata i lea, ia faailoa atu i toeaina o loo e avanoa e fesoasoani i so o se mea, atonu e ala i le faamamāina o le Maota mo Sauniga, tauofo i se vaega i le sauniga, pe ofo atu e momoli nisi i le sauniga. Pe a vaaia e uso ma tuafāfine se isi e fou atu o loo faaalia le agaga faataulaga, e latou te talia lelei o ia.”

“Ia faalautele atu o outou loto.”​—2 Kori. 6:13.

Ia faalautele atu lou alofa faaleuso. Ina ua siitia atu Melissa ma lona aiga i se faapotopotoga fou, na latou uaʻi atu i le mauaina o ni uō fou. Ua ia faapea mai: “Na matou faifaimea faatasi ma isi i le Maota mo Sauniga a o leʻi amata pe māeʻa foʻi sauniga. O le faia faapea  na maua ai le taimi e talanoa ai nai lo o le tau ina faamālō atu.” Na fesoasoani foʻi lea i le aiga e vave ai ona latou iloa igoa o isi i le faapotopotoga. Na faalautele atu foʻi lo latou alofa faaleuso e ala i le talimālō i isi, ma na faamalosia ai a latou faauōga. Na faapea atili mai Melissa: “Na faamau i lalo numera o a matou telefoni ina ia mafai ai ona matou fesootaʻi, ma faaaofia i matou i mea faaleagaga ma isi fuafuaga.”

Pe afai e faafaigatā ona e talanoa atu i ni tagata fou, e mafai ona e amata i ni auala faigofie. O se faataʻitaʻiga, ia ʻataʻata e tusa lava pe e te lē o fia ʻata. O le mataʻataʻata o le a fiafia mai ai isi iā te oe. O le mea moni, “o le malamalama o mata [po o le mataʻataʻata] e faafiafia ai le loto.” (Faata. 15:30) Ua faapea mai Rachel o lē na siitia mamao ese mai i le mea na ola aʻe ai: “O aʻu lava ia ou te matamuli. O nisi taimi ou te faamalosi e talanoa atu i uso ma tuafāfine i laʻu faapotopotoga fou, e tusa lava po ou te lē fia talanoa. Ou te saʻilia se tasi o loo saofaʻi i le Maota mo Sauniga e lē o talanoa i se isi. Atonu o lenā tagata e matamuli e pei foʻi o aʻu.” Aiseā e lē faatū ai se sini o le talanoa ma se tagata fou a o leʻi amata pe māeʻa foʻi sauniga taʻitasi?

I le isi itu, atonu na e fiafia e feiloaʻi i tagata fou i le amataga. Peitaʻi, a o faagasolo taimi e mafai ona mou atu lenā fiafia. Pe afai o lea, e manaʻomia ona e finafinau ina ia faaauau ona maua ni uō fou.

Pe a sua se laau ina ia toe totō i se isi mea, o le a faigatā ona ola. Ae o le taimi lava e toe totō ai, e toe tutupu ona aa fou

E MANAʻOMIA SE TAIMI E TE FAAMASANI AI

O nisi laau e umi se taimi e toe sosolo ai aa i le palapala fou nai lo o isi laau. I se tulaga talitutusa, e lē tutusa uma le umi e faamasani ai tagata i se faapotopotoga fou. Pe afai ua umi se taimi talu ona e siitia i se isi faapotopotoga ae o loo faafaigatā pea ona e faamasani i ai, e mafai ona fesoasoani mataupu silisili nei iā te oe:

“Aua neʻi o tatou fiu e faia le mea lelei, auā e iai le taimi e tatou te selesele mai ai, pe a tatou lē faavaivai.”​Kala. 6:9.

Ia lava le taimi e te faamasani ai nai lo o le umi na e faatalitalia. O se faataʻitaʻiga, o le toʻatele o misionare na toleni i Kiliata e nonofo mo ni tausaga i atunuu ese ua tofia i ai, a o leʻi toe asiasi atu i o latou atunuu. O le faia faapea ua fesoasoani iā i latou ina ia māfana ai i uso i na atunuu, ma faamasani ai i se aganuu fou.

E malamalama lelei Alejandro o sē na siitia i isi vaipanoa i le tele o taimi, e umi se taimi e taumafai ai e faamasani i se siʻomaga fou. Ua ia faapea mai: “O le taimi mulimuli na ma siitia ai, na faapea mai laʻu avā, ʻO aʻu uō uma o loo i le faapotopotoga lea na ta iai!’” Na faamanatu atu e Alejandro i lana avā, o lana faamatalaga foʻi lenā na fai i le lua tausaga muamua atu na la siitia ai. Ae a o faagasolo lenā lua tausaga, na faaalia e le tuafafine le naunau i isi ma na avea ai tagata ese ma ana uō mamae.

“Aua le faapea ane: ʻAiseā ua sili ai ona lelei aso ua mavae nai lo o nei aso?’ auā e lē o le atamai ua e fesili ai i lenei mea.”​Fai. 7:10.

Ia ʻalofia le faatusatusa o lau faapotopotoga fou i le faapotopotoga na e iai muamua. O se faataʻitaʻiga, o uso i lau faapotopotoga fou atonu e tau lē talanoa pe e lē fefefe foʻi e faailoa mai o latou manatu, nai lo o uso i le faapotopotoga na e iai muamua. Ia e uaʻi atu i o latou uiga lelei e pei foʻi ona e manaʻo e latou te uaʻi mai i ou uiga lelei. O nisi e fou i isi faapotopotoga ua faateʻia i nei uiga ma ua manaʻomia ai ona latou fesili ifo, ʻPo ou te alofa moni lava “i le ʻauuso atoa”?’​1 Pete. 2:17.

 “Ia talosaga atu pea, ona foaʻiina mai lea iā te outou.”​Luka 11:9.

Ia faaauau ona tatalo mo le fesoasoani. Ua faapea mai David o se toeaina: “Aua e te taumafai e onosaia na o oe lenā tulaga. O le tele o mea e faatoʻā mafai ona tatou faia e ala i le fesoasoani a Ieova. Ia tatalo e faatatau i lenā faafitauli.” E ioe foʻi Rachel lea na taʻua i le amataga i lenei manatu. Ua ia faapea mai: “Pe a ma lagona ma laʻu tane e pei i maʻua o ni tagata ese i le faapotopotoga, e ma te tatalo iā Ieova, ʻFaamolemole ia e faailoa mai po o iai se mea o loo ma faia, ua faafaigatā ai i isi ona māfana mai iā i maʻua.’ Pe a uma, ona ma taumafai lea e faaalu le tele o lo ma taimi faatasi ma uso ma tuafāfine.”

Mātua e, pe afai o loo faigatā i lau fanau ona faamasani i le faapotopotoga fou, ia faaalu se taimi e tatalo faatasi ai ma i latou e faatatau i lenā faafitauli. Ia fesoasoani iā i latou ina ia maua ni uō fou e ala i le fuafua o ni faatasitasiga e faalaeiauina ai.

IA TALIA FIAFIA I LATOU E FOU MAI I LE FAAPOTOPOTOGA

O le ā e mafai ona e faia e fesoasoani ai i ē ua siitia mai i lau faapotopotoga? Ia taumafai e avea oe ma uō moni mai lava i le amataga. Ina ia e faia faapea, ia mafaufau po o ā mea e te fiafia i ai pe afai o oe o le tagata fou, ona faitino lea o na mea. (Mata. 7:12) Pe e mafai ona auai mai ē fou i le tapuaʻiga a le tou aiga, pe matamata le polokalame o le masina i le TV i le Initaneti a Molimau a Ieova? Pe e mafai ona e valaaulia i latou e tou te galulue faatasi i le faiva? Pe a e valaaulia i latou mo se ʻaiga māmā, o le a latou manatua pea lou agaga talimālō. O ā nisi mea e mafai ona e fesoasoani ai i ē e fou mai i lau faapotopotoga?

Ua faapea mai Carlos, “Ina ua matou faatoʻā taunuu i le faapotopotoga fou, na aumai e se tuafafine se lisi o faleoloa e taugofie. Na matuā fesoasoani lenā iā i matou.” O i latou foʻi ua siitia mai ae e lē masani i le tau a lo tatou atunuu, e latou te talisapaia pe a faailoa i ai le auala e fai ai ofu mo le tau vevela, tau mālūlū, po le tau o timuga. E mafai foʻi ona e fesoasoani iā i latou ina ia taulau i le faiva, e ala i le faamatala i ai o le talafaasolopito po o talitonuga faalotu o le atunuu.

O AOGĀ O LE FAAMASANI I LE FAAPOTOPOTOGA FOU

Ua silia nei i le tausaga talu ona iai Allen lea na taʻua i le amataga i lana faapotopotoga fou. Ua ia faapea mai: “I le taimi muamua na faafaigatā ona ou faamasani i uso ma tuafāfine. Ae i le taimi lenei, ua pei i latou o soʻu aiga ma ua ou maua le fiafia.” Ua iloa e Allen, e leʻi faapea ua leai ni ana uō ina ua siitia. Nai lo o lea, ua ia maua ni uō fou lea e lē taumatea o le a avea pea ma ana uō i lona olaga atoa.

^ pala. 2 Ua suia nisi igoa.