Skip to content

Skip to table of contents

Aua Neʻi Aveesea e se Mea lo Outou Taui

Aua Neʻi Aveesea e se Mea lo Outou Taui

“Ia aua neʻi aveesea mai iā te outou le taui e se tasi.”​—KOLO. 2:18.

PESE: 122, 139

1, 2. (a) O le ā le taui o loo tulimataʻi e auauna a le Atua? (e) O le ā e fesoasoani iā i tatou ina ia taulaʻi atu ai pea i le taui? (Tagaʻi i le ata i luga aʻe o le matua.)

I LE pei o le aposetolo o Paulo, ua iai i Kerisiano faauuina i aso nei le faamoemoe tautele o le mauaina lea ʻo le taui o le valaau faalelagi mai i le Atua.’ (Fili. 3:14) O loo latou tulimataʻia le auauna faatasi ma Iesu Keriso i lona Malo i le lagi ma toe faafoʻisia tagata i le ola lelei atoatoa. (Faaa. 20:6) Maʻeu se sini matagofie ua valaaulia i latou e le Atua ina ia tuliloa! Ae e ese foʻi le faamoemoe o isi mamoe. O loo latou tulimataʻia le taui o le ola e faavavau i luga o le lalolagi. Maʻeu se faamoemoe matagofie!​—2 Pete. 3:13.

2 Ina ia fesoasoani i ona uso Kerisiano faauuina ia tumau faamaoni ma maua le taui, na faalaeiau e Paulo i latou e faapea: “Ia taulaʻi o outou mafaufau i mea faalelagi.” (Kolo. 3:2) Sa tatau ona latou manatua i taimi uma le faamoemoe tautele o le mauaina lea o lo latou tofi i le lagi. (Kolo. 1:4, 5) Ioe, o le mafaufau i faamanuiaga ua saunia mai e Ieova mo ona tagata, e fesoasoani  i auauna uma a le Atua ina ia taulaʻi atu ai pea i le taui e tusa po o le lagi po o le lalolagi.​—1 Kori. 9:24.

3. O ā mea na lapataʻia ai e Paulo Kerisiano?

3 Sa lapataʻia foʻi e Paulo Kerisiano e faatatau i mea e mafai ona aveesea ai lo latou taui. O se faaaʻoaʻoga, na tusi atu o ia i le faapotopotoga i Kolose e faatatau i Kerisiano pepelo na taumafai e faafiafia le Atua, e ala i le tausia o le Tulafono nai lo o le faatuatua iā Keriso. (Kolo. 2:16-18) Sa talanoa foʻi Paulo e faatatau i mea e mafai ona aveesea ai lo tatou taui i aso nei. O se faaaʻoaʻoga, na ia faamatala auala e teena ai tuʻinanauga lē mamā, foʻia ai faafitauli i le va ma isi Kerisiano, faapea faafitauli i le aiga. O loo aogā iā i tatou i aso nei ana fautuaga e faatatau i nei mataupu. O lea, seʻi o tatou iloilo nisi o lapataʻiga alofa a Paulo o loo i lana tusi i Kerisiano i Kolose.

IA FASIOTIA TUʻINANAUGA LĒ MAMĀ

4. Aiseā e mafai ai ona aveesea lo tatou taui ona o tuʻinanauga lē mamā?

4 Ina ua uma ona faamanatu atu e Paulo i ona uso lo latou faamoemoe matagofie, ona ia tusi lea e faapea: “O le mea lea, ia fasiotia tuʻinanauga i o outou itutino, o le faitaaga, o amioga lē mamā, le tuʻinanau i feusuaʻiga, o tuʻinanauga leaga ma le manaʻo tele.” (Kolo. 3:5) E matuā malolosi tuʻinanauga lē mamā ma e mafai ona aveesea ai a tatou ʻoa faaleagaga. Ina ua toe foʻi mai i le faapotopotoga se uso na lolo atu i tuʻinanauga lē mamā, na faapea mai o ia: “Na matuā malolosi oʻu tuʻinanauga lē mamā, ma na iʻu lava ina ou tosina i ai ma ou faia.”

5. E mafai faapefea ona puipuia i tatou lava mai i tulaga e faaosoosoina ai?

5 E tāua ona tatou faaeteete aemaise lava pe a tatou iai i tulaga e ono faaosoosoina ai ia solia tapulaa tau amio a Ieova. O se faaaʻoaʻoga, o se faiga atamai i se alii ma se tamaʻitaʻi o loo uō ona faataatitia ni tapulaa mo i laʻua mai i le amataga, i tulaga e pei o le fepaʻiaʻi, feasogi, po o le iai na o i laʻua i se nofoaga. (Faata. 22:3) E ono tulaʻi mai foʻi ni tulaga e faaosoosoina ai pe a toesea se Kerisiano mai i le aiga ae malaga mo ni mataupu faapisinisi, pe galulue faatasi foʻi ma se tasi o le isi itupā. (Faata. 2:10-12, 16) Pe a lua faigaluega faatasi ma se tasi o le isi itupā, ia faailoa atu o oe o se Molimau a Ieova, ia gaoioi i se auala faaaloalo, ma ia manatua e iai iʻuga leaga o le faatafai solo. E ono matuā faaosoosoina foʻi i tatou pe a tatou lotomafatia ma lotovaivai. O taimi faapena e tatou te ono manaʻomia ai se tagata e naunau mai iā i tatou. Atonu o le malolosi o na faalogona e tatou te fiafia ai e talia so o se tasi o le isi itupā e naunau mai. Pe afai e tupu se tulaga faapena iā te oe, ia saʻili atu iā Ieova ma ona tagata mo se fesoasoani, ina ia aua neʻi e faatagaina na mea e aveesea ai lou taui.​—Faitau le Salamo 34:18; Faataoto 13:20.

6. O le ā e tatau ona tatou manatua pe a filifili a tatou faafiafiaga?

6 Ina ia fasiotia tuʻinanauga lē mamā, e manaʻomia ona tatou teena faafiafiaga lē mamā. O le tele o faafiafiaga i aso nei e talitutusa ma tulaga na tutupu i Sotoma ma Komoro i aso anamua. (Iuta 7) Ua atagia mai i faafiafiaga a i latou e faia faafiafiaga, le manatu e faapea o feusuaʻiga lē mamā o se vala masani o le olaga, ma e leai ni iʻuga leaga e iʻu i ai. E lē tatau ona tatou faatamala ai ma talia so o se faafiafiaga e ofo mai e lenei lalolagi. E ao ona tatou filifilia faafiafiaga o le a lē taofia ai i tatou mai i le taulaʻi atu pea i le taui o le ola.​—Faata. 4:23.

“IA OOFU OUTOU” I LE ALOFA MA LE AGALELEI

7. O ā faafitauli e ono feagai ma i tatou i totonu o le faapotopotoga Kerisiano?

7 E tatou te ioe uma lava o se faamanuiaga le avea ai ma vaega o le faapotopotoga  Kerisiano. E tatou te suʻesuʻeina le Afioga a le Atua i a tatou sauniga, ma e tatou te alolofa ma lagolagosua ma le agalelei le tasi i le isi. O vala nei e fesoasoani iā i tatou e taulaʻi atu ai pea i le taui. E ui i lea, e iai taimi e aliaʻe mai ai ni tulaga e lē femalamalamaaʻi ai, ma e ono faapogaia ai feeseeseaʻiga i le va o sui o le faapotopotoga. Pe afai e tatou te lē foʻia na faafitauli, e faigofie ona iʻu atu ai i faalogona ita.​—Faitau le 1 Peteru 3:8, 9.

8, 9. (a) O ā uiga o le a fesoasoani iā i tatou ina ia maua ai le taui? (e) O le ā e fesoasoani iā i tatou ina ia faatumauina ai le filemu pe a faatigā mai se isi Kerisiano?

8 O faalogona ita e mafai ona aveesea ai lo tatou taui. E faapefea la ona tatou ʻalofia lenei tulaga? Na fautua atu Paulo i Kerisiano i Kolose e faapea: “O outou o ē ua filifilia e le Atua, o ē ua paia ma alofagia, ia oofu outou i le alofa mutimutivale, le agalelei, lotomaulalo, agamalu ma le faapalepale. Ia faaauau ona onosaʻi le tasi i le isi, ma ia fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia. Peitaʻi, e iai foʻi se isi mea e manaʻomia, ia oofu outou i le alofa, auā o le fusi lea e atoatoa ona autasi ai.”​—Kolo. 3:12-14.

9 E mafai ona fesoasoani le alofa ma le agalelei ina ia tatou lotofaamagalo ai i isi. O se faataʻitaʻiga, pe afai e tatou te tigā i faamatalaga po o gaoioiga a se isi Kerisiano, ia taumafai e mafaufau i ni taimi na tatou faia ai ni faamatalaga po o ni gaoioiga lē agalelei i se tasi. Pe e tatou te lē talisapaia le alolofa ma le agalelei o uso ma tuafāfine o ē na lē amanaʻia a tatou mea sesē? (Faitau le Failauga 7:21, 22.) E sili ona tatou lotofaafetai i le agalelei o Keriso lea ua tatou autasi ai o ni tagata tapuaʻi moni. (Kolo. 3:15) E tutusa le Atua o loo tatou alolofa uma i ai, tutusa le feʻau o loo tatou talaʻia, ma e tutusa faafitauli o loo tatou fesagaʻia. Pe afai e tatou te agalelei ma fefaamagaloaʻi ma le alofa, o le a tatou saosaolaumea ai i le autasi o Kerisiano ma tatou taulaʻi atu ai pea i le taui o le ola.

10, 11. (a) Aiseā e mataʻutia ai le lotoleaga? (e) E faapefea ona tatou faamautinoa e lē aveesea lo tatou taui ona o le lotoleaga?

10 Ua faamanatu mai iā i tatou i faaaʻoaʻoga lapataʻi o loo i le Tusi Paia, e mafai ona aveesea lo tatou taui ona o le lotoleaga. O se faaaʻoaʻoga, o le lotoleaga o Kaino na māfua ai ona ia fasiotia lona uso o Apelu. Na lotoleaga Koru, Tatano, ma Apiramo iā Mose ma latou fouvale ai iā te ia. Sa lotoleaga foʻi le tupu o Saulo i le taulau manuia o Tavita ma taumafai ai e fasiotia o ia. E lētioa la a faapea mai le Afioga a le Atua: “O le mea o iai le lotoleaga ma le faamisa, e iai foʻi le vevesi ma mea leaga uma.”​—Iako. 3:16.

11 Pe a atiaʻe i o tatou loto le alofa ma le agalelei, o le a faigofie la ona tatou ʻalofia le lotoleaga. Ua faapea mai le 1 Korinito 13:4: “E faapalepale ma e agalelei le alofa. E lē lotoleaga le alofa.” Ina ia aua neʻi mauaa le lotoleaga i o tatou loto, e ao ona tatou taumafai ia vaai i mea e pei ona silasila i ai le Atua. E ao ona tatou manatu i o tatou uso ma tuafāfine o sui o le tino e tasi, o le faapotopotoga Kerisiano lea. O le faia faapea o le a fesoasoani e tatou te faaalia ai le tigā alofa, ina ia ōgatusa ai ma le fautuaga lenei: “Afai e faamamaluina se itutino e tasi, e olioli ai foʻi itutino uma.” (1 Kori. 12:16-18, 26) O lea la, nai lo o le lotoleaga, o le a tatou fiafia pe a maua e isi ni faamanuiaga. Seʻi manatu i le faaaʻoaʻoga a Ionatana le atalii o le tupu o Saulo. E leʻi lotoleaga Ionatana ina ua tofia Tavita e avea ma tupu, ae sa ia faalaeiau iā Tavita. (1 Samu. 23:16-18) Pe e mafai ona tatou agalelei ma alolofa e pei o Ionatana?

 IA MAUA FAATASI O SE AIGA LE TAUI

12. O le ā le fautuaga faale-Tusi Paia o le a fesoasoani e tatou te maua faatasi ai o se aiga le taui?

12 O le faatatau o mataupu silisili o le Tusi Paia, e mafai ona maua ai le filemu ma le fiafia i se aiga ma fesoasoani iā i latou ina ia maua ai le taui. O le ā le fautuaga faale-Tusi Paia mo aiga na avatu e Paulo i Kerisiano i Kolose? Na faapea atu o ia: “O outou avā, ia gauaʻi i a outou tane, auā o le mea lea e tatau i le Alii. O outou tane, ia alolofa atu pea i a outou avā, ma aua le soona feita iā i latou. O outou le fanau, ia usiusitaʻi i o outou mātua i mea uma lava, auā o le mea lea e finagalo malie i ai le Alii. O outou tamā, aua le faaonoono i a outou fanau, ina neʻi lotovaivai i latou.” (Kolo. 3:18-21) E mautinoa e te ioe mai o le a maua e tane, avā, ma fanau aogā pe afai e faatatauina lenei fautuaga a Paulo.

13. E faapefea i se tuafafine Kerisiano ona fesoasoani i lana tane lē talitonu ina ia talia le tapuaʻiga moni?

13 Ae faapefea pe afai o oe o se avā ma e te manatu e lē lelei le auala e feutagaʻi mai ai lau tane lē talitonu iā te oe? Po o le a faaleleia le tulaga o mea pe afai e te ita ma finau atu e faatatau i ona uiga? E tusa foʻi pe e fai e lau tane le mea o e manaʻo i ai, ae po o le a ia talia ai le upu moni? Atonu e leai. Peitaʻi, pe afai e te faaaloalo i le tulaga ulu o lau tane, o le a e saosaolaumea i le mauaina o le filemu i lou aiga, o le a e faamamaluina  Ieova, ma atonu o le a talia ai e lau tane le tapuaʻiga moni. O le iʻuga, o le a lua maua uma ai le taui.​—Faitau le 1 Peteru 3:1, 2.

14. O le ā e tatau ona fai e se tane Kerisiano pe afai e lē faaaloalo mai iā te ia lana avā lē talitonu?

14 Ae faapefea pe afai o oe o se tane ma e te manatu e lē o faaaloalo mai iā te oe lau avā lē talitonu? Po o le a faaaloalo mai lau avā pe afai e te avaavau atu iā te ia ma fai i ai o oe o le pule? E mautinoa e leai! E finagalo le Atua ia faatino lou tulaga ulu i se auala alofa ina ia faaaʻoaʻo ai iā Iesu. (Efe. 5:23) O loo faatino e Iesu lona tulaga ulu i le faapotopotoga i se auala alofa ma onosaʻi. (Luka 9:46-48) Pe afai e faaaʻoaʻo se tane iā Iesu, e ono mafai ona ia fesoasoani ai i lana avā ina ia talia le tapuaʻiga moni.

15. E faapefea ona faaalia atu e se tane Kerisiano lona alofa i lana avā?

15 Ua faatonuina tane i le Kolose 3:19 e faapea: “Ia alolofa atu pea i a outou avā, ma aua le soona feita iā i latou.” O le tane alofa e āva o ia i lana avā e ala i le faalogologo atu i ona manatu, ma faamautinoa i ai e tāua iā te ia ona manatu. (1 Pete. 3:7) E ui e lē o taimi uma e mafai ai e le tane ona fai mea e talosaga mai ai le avā, ae o le faalogologo atu i lana avā o le a fesoasoani e na te faia ai ni filifiliga lelei. (Faata. 15:22) O se tane alofa e taumafai e gaoioi i se auala o le a faaaloalo mai ai lana avā iā te ia, nai lo o le faamalosia o le avā e faaaloalo iā te ia. Pe a alofa se tane i lana avā ma le fanau, e lē taumatea o le a latou maua se aiga e auauna fiafia iā Ieova ma maua le taui o le ola.

E faapefea ona ʻalofia le avea o faafitauli i le aiga ma pogai e aveesea ai lo tatou taui? (Tagaʻi i le palakalafa e 13-15)

TALAVOU​—AUA NEʻI AVEESEA E SE MEA LO OUTOU TAUI

16, 17. E faapefea iā te oe o se talavou ona ʻalofia le lē fiafia i ou mātua?

16 Ae faapefea pe afai o oe o se talavou ma e te manatu e lē o malamalama ma ua faasāsā naʻuā ou mātua Kerisiano iā te oe? O lou lē fiafia atonu e te masalosalo ai po o le auauna iā Ieova o le olaga sili lea. Peitaʻi, pe afai e avea lou lē fiafia ma pogai e te lafoaʻia ai le auauna iā Ieova, mulimuli ane o le a e iloa e leai nisi e sili ona alolofa moni iā te oe, nai lo o ou mātua e matataʻu i le Atua ma lau faapotopotoga.

17 Pe afai e lē faasaʻoina oe e ou mātua, po o le a e lē taumānatu la pe e alolofa moni ou mātua iā te oe? (Epe. 12:8) Atonu o le mea lenā e te lē o fiafia ai o le auala o loo aʻoaʻi ai oe e ou mātua. Ae nai lo o le faaseā i le auala o loo aʻoaʻi ai oe, ia taumafai e iloa atonu e iai se māfuaaga ua la faia ai faapena. O lea, ia toʻafilemu pea ma taumafai malosi e ʻalofia le soona inainā i faitioga a ou mātua. Ua faapea mai le Faataoto 17:27: “O lē ua pulea ana upu ua iā te ia le poto, a o le tagata ua iai le faautaga loloto ua toʻafilemu lona loto.” Ia fai ma ou sini le avea ma sē e matua le mafaufau e mafai ona talia ma le filemu fautuaga, ma maua mai ai aogā e aunoa ma le soona popole i le auala o loo aumai ai fautuaga. (Faata. 1:8) Ia manatua, o se faamanuiaga le iai o ni mātua e talitonu ma alolofa moni iā Ieova. E mautinoa e la te mananaʻo e fesoasoani iā te oe ina ia maua le taui o le ola.

18. Aiseā ua e maumauaʻi ai e taulaʻi atu pea i le taui?

18 E lē mafaatusalia le matagofie o le taui ua saunia mai mo i tatou, e tusa po o le ola e lē mafai ona oti i le lagi po o le ola e faavavau i le lalolagi. O se faamoemoe e mautinoa ona e faavae mai i le folafolaga a Lē na foafoaina mea uma. Ua taʻua e le Atua e faatatau i le lalolagi Parataiso: “O le a tumu le lalolagi i le poto e uiga iā Ieova.” (Isa. 11:9) O le a aʻoaʻoina e le Atua i latou uma o le a ola i le lalolagi i lenā taimi. E mautinoa e tauia lo tatou tauivi ina ia maua lenā taui. O lea, ia taulaʻi atu pea o tatou mafaufau i mea ua folafola mai e Ieova, ma ia aua neʻi aveesea e se mea lo tatou taui!