Skip to content

Skip to table of contents

E te Silafia?

E te Silafia?

Pe sa faatatau atu mataupu silisili o le Tulafono a Mose i le taulimaina o mataupu faaletulafono i aso taʻitasi i Isaraelu anamua?

IOE, i nisi taimi. O se faaaʻoaʻoga, ua taʻua i le Teuteronome 24:14, 15 e faapea: “Aua e te faapiʻopiʻo ona fai se totogi o sē na e faafaigaluegaina o lē e pagatia ma mativa, e tusa po o ou uso, po o se tagata ese o aumau i lou laueleele . . . ina ia lē alaga atu o ia iā Ieova ona o oe, ma avea ma mea e te agasala ai.”

O le taʻegaipu omea lea na tusia ai le talosaga a le tagata galue fanua

Na faamauina se talosaga i se mataupu faapea i le senituri lona fitu T.L.M., lea na maua e latalata i Asetota. E foliga mai na tusia lenei talosaga mo se tagata galue fanua, atonu e na te leʻi avatuina le aofaʻiga o saito e pei ona faatonuina ai. Sa tusia lenei talosaga i se taʻegaipu omea e faapea: “Ina ua uma ona faaputu e lau auauna [lē o loo talosaga atu] saito na seleseleina i nai aso ua mavae, na sau Hoshayahu le atalii o Shobay ma ave le ofu o lau auauna. . . . O le a molimau isi tagata uma na matou galulue faatasi i le seleselega i le aasa o le lā . . . e moni le tala ua ou fai atu ai. E leai saʻu agasala. . . . Pe afai e manatu le kovana e lē o sana tiute tauave le toe faafoʻi mai o le ofu o lau auauna, ia toe faafoʻi mai ona o lou alofa mutimutivale i lau auauna! Ou te ōle atu ina ia e amanaʻia se leo o lau auauna, ona ua aveesea le ofu o lau auauna.”

Ua taʻua e Simon Schama o se faitofā i talafaasolopito, o lenei talosaga “e tele ni mea ua taʻu mai ai iā i tatou nai lo o na o se ʻaiʻoiga a se tagata faigaluega ina ia toe faafoʻi mai lona ofu. Ua faaalia mai ai foʻi e iai se mea na iloa e lē na talosaga atu e faatatau i le tulafono a le Tusi Paia, aemaise lava poloaʻiga o loo i le Levitiko ma le Teuteronome e faatatau i le lē faileagaina o tagata matitiva.”