Skip to content

Skip to table of contents

Toese ma Faaauau Ona Lafoaʻi le Tagata Tuai

Toese ma Faaauau Ona Lafoaʻi le Tagata Tuai

“Ia toese le tagata tuai ma ana gaoioiga.”​KOLO. 3:9.

PESE: 121, 142

1, 2. O le ā na mātauina e faatatau i Molimau a Ieova?

NA FAAMATALA e nisi uiga mataʻina na latou mātauina i tagata o Ieova. O se faaaʻoaʻoga, na tusi le tusitala o Anton Gill e faatatau i o tatou uso ma tuafāfine i le taimi na pulea ai Siamani e le ʻau Nasi: “Na matuā inosia e le ʻau Nasi Molimau a Ieova. . . . E oo ane i le 1939 ua 6,000 Molimau a Ieova na iai i nofoaga o faasalaga mamafa.” Ae na taʻua atili e le tusitala, e ui lava i sauāga ogaoga na fesagaʻia e Molimau a Ieova, ae na latou faaalia le “maufaatuatuaina ma le toʻafilemu i tulaga faigatā” faapea le “faamaoni ma le autasi.”

2 Talu ai nei lava, na mātauina ai e tagata i Aferika i Saute se mea mataʻina foʻi faapena e faatatau i tagata o le Atua. Sa iai le taimi na faasā ai ona faatasitasi Molimau e eseese o latou lanu i lenā atunuu. Peitaʻi, i le Aso Sa, Tesema 18, 2011, e silia i le 78,000 o tatou uso o ituaiga eseese mai i Aferika i Saute ma isi atunuu tuaoi, na tumutumu i le malae taalo aupito i telē i le aai o Johannesburg ina ia faalogologo i se polokalame faaleagaga. Na taʻua e se tasi o pule o lenā malae taalo e faatatau i ē na auai ai: “O outou o tagata pito i sili ona amiolelei ua ou vaaia ua faaaogāina lenei malae taalo. E ofu mamā uma tagata, ma sa outou teuina faamamā le fale. Ae o  le itu e sili ona mataʻina, o le tou miomiō faatasi e ui e eseese tou ituaiga, aganuu, ma lanu.”

3. Aiseā ua tutasi ai lo tatou ʻauuso?

3 Ua taʻu mai i na faamatalaga a tagata e lē o ni Molimau a Ieova, le matuā tutasi o lo tatou ʻauuso i le lalolagi aoao. (1 Pete. 5:9) Ae aiseā ua matuā tutasi ai i tatou mai i so o se isi lava faalapotopotoga? Talu ai o le fesoasoani a le Afioga a le Atua ma lona agaga paia, ua tatou taumafai malosi ai ina ia “toese le tagata tuai,” ae tatou ʻoofu i le tagata fou.’​—Kolo. 3:9, 10.

4. O ā manatu o le a tatou talanoaina i lenei mataupu, ma aiseā?

4 E lē gata e manaʻomia ona toese le tagata tuai, ae e manaʻomia foʻi ona faaauau ona tatou lafoaʻia. O le a talanoaina i lenei mataupu auala e mafai ona tatou toese ai le tagata tuai, o māfuaaga e faanatinati ai ona faia faapea, ma māfuaaga e mafai ai ona faia suiga e tusa lava po o le ā le matuiā o ni mea sesē sa tatou faia. O le a tatou iloiloina foʻi mea e mafai ona faia e i latou ua autausagā i le upu moni, ina ia faaauau ai ona lafoaʻi le tagata tuai. Aiseā e manaʻomia ai nei faamanatu? E faanoanoa ona o nisi na auauna iā Ieova ua lē mataala ma ua iʻu ina toe foʻi i o latou ala tuai. O lea, o i tatou uma lava e manaʻomia ona manatua le lapataʻiga lenei: “O lē ua manatu o loo tū o ia, ia faaeteete neʻi paʻū.”​—1 Kori. 10:12.

“IA FASIOTIA” SO O SE TUʻINANAUGA E FAIA LE “FAITAAGA”

5. (a) Faataʻitaʻi mai pe aiseā e manaʻomia ai ona vave toese le tagata tuai. (Tagaʻi i le ata i luga aʻe o le matua.) (e) O ā amioga o loo taʻua i le Kolose 3:5-9 e aofia ai i le tagata tuai?

5 O le ā lau mea e fai pe afai ua palapalā ma atonu ua manogi leaga lou ofu? E vave lava ona e tatala ese lenā ofu palapalā. I se tulaga talitutusa, e manaʻomia ona tatou vave usitaʻia le faatonuga ia toese ni masaniga e inosia e Ieova. E tatou te mananaʻo e utagia le faatonuga manino lenei a Paulo i Kerisiano i ona aso: “Ia outou tuu ese mai iā te outou [mea nei].” Seʻi o tatou talanoaina agasala e lua na taʻua e Paulo, (1) faitaaga, ma le (2) amioga lē mamā.​—Faitau le Kolose 3:5-9.

6, 7. (a) E faapefea ona iloa mai i upu a Paulo e manaʻomia ona tatou tauivi malosi ina ia toese le tagata tuai? (e) O le ā le ituaiga olaga na ola ai Sakura, ma na faapefea ona ia maua le malosi ina ia lafoaʻia ai lenā olaga?

6 Faitaaga. I le Tusi Paia, o le upu “faitaaga” e aofia ai feusuaʻiga i le va o ni tagata e leʻi faaipoipo faaletulafono, ma faiga faatauatane ma tauafafine. Na faapea atu Paulo i ona uso Kerisiano “ia fasiotia” o latou ʻtuʻinanauga i o latou itutino.’ O lona uiga ia liaʻi ese so o se tuʻinanauga e faia le “faitaaga.” Ua manino mai i faamatalaga a Paulo, e manaʻomia ona tatou tauivi malosi ina ia aveesea so o se tuʻinanauga sesē. Peitaʻi, e mafai ona tatou manumalo i lenā tauiviga.

7 Seʻi manatu i le mea na tupu iā Sakura * mai i Iapani. A o tuputupu aʻe, sa tauivi o ia ma faalogona tuua toʻatasi ma le lē aogā. I le 15 o ona tausaga, sa amata ona ia faia le faitaaga ma tagata eseese ina ia faaitiitia ai ona lagona tuua toʻatasi. Ua ia taʻutino mai ma le māsiasi e faapea: “O le iʻuga, e faatolu ona faapaʻū aʻu pepe.” Ua ia faamatala mai e faapea: “I le taimi muamua, sa ou fiafia pe a ou faia feusuaʻiga lē mamā, ma na ou manatu sa amanaʻia ma alofagia aʻu e tagata. Peitaʻi, o le tele lava o loʻu faia o feusuaʻiga, o le atili foʻi lenā ona ou lagona o le lē fiafia.” O le ituaiga olaga lenā sa faaauau ona ola ai Sakura seʻia atoa le 23 o ona tausaga, ma ia suʻesuʻeina ai loa le Tusi Paia ma Molimau a Ieova. Sa fiafia Sakura i mea na ia aʻoaʻoina, ma o le fesoasoani a Ieova na mafai ai ona ia manumalo i faalogona o le matuā nofosala ma māsiasi,  ma lafoaʻia ai le faia o le faitaaga. O loo auauna nei Sakura o se paeonia sauatoa ma e na te lē o toe lagona le tuua toʻatasi. Nai lo o lea, ua ia faapea mai: “Ua ou matuā fiafia i le mauaina o le alofa o Ieova i aso uma.”

AUALA E TAOFIA AI AMIOGA LĒ MAMĀ

8. O ā nisi o mea e mafai ona tatou lē mamā ai i le silafaga a le Atua?

8 Amioga lē mamā. I le Tusi Paia, o le faaupuga “amioga lē mamā” e tele mea e aofia ai nai lo o na o agasala tau feusuaʻiga. E mafai ona faasino atu i masaniga leaga o le ulaula ma le faia o tausuaga matagā. (2 Kori. 7:1; Efe. 5:3, 4) E faatatau atu foʻi i gaoioiga lē mamā e faia e se tasi pe a na o ia, e pei o le faitau i tusi e faagaee ai faalogona tau feusuaʻiga po o le matamata i ata matagā tau feusuaʻiga, lea e ono iʻu atu ai i le amioga lē mamā o le taaloalo i totogasā.​—Kolo. 3:5. *

9. O ā iʻuga e iʻu i ai ona o le “tuʻinanau i feusuaʻiga”?

9 O i latou e fai ma masani le matamata i ata matagā tau feusuaʻiga, ua latou faatupu le “tuʻinanau i feusuaʻiga” ma e ono iʻu ai ina pulea o latou olaga i na tuʻinanauga. Ua iloa mai i suʻesuʻega e faapea, o tagata e pulea i le matamata i ata matagā tau feusuaʻiga, e tutusa lava ma i latou ua pulea e le ʻava malosi ma fualaau faasāina. E lē o se mea la e faateʻia ai i le iai o āuga matuiā o le matamata i ata matagā tau feusuaʻiga, e pei o faalogona o le matuā māsiasi, paiē e galue, leai se fiafia i le aiga, tatala le faaipoipoga, ma le pule i le ola. Ina ua atoa le tausaga talu ona tuua e se tamāloa lana masaniga o le matamata i ata matagā tau feusuaʻiga, na faapea mai o ia: “Ua mafai nei ona ou toe faaaloalogia aʻu lava.”

10. Na faapefea ona taofia e Ribeiro lana masaniga o le matamata i ata matagā tau feusuaʻiga?

10 O le toʻatele o tagata, o se tauiviga faaauau pea le taofia o le matamata i ata matagā tau feusuaʻiga. Peitaʻi, e mafai ona manumalo i lenei tauiviga, e pei ona faaalia mai i le mea na tupu iā Ribeiro mai i Pasili. Na tuua e Ribeiro lona aiga a o talavou ma mulimuli ane faigaluega i se kamupani e gaosi ai pepa fou mai tusi tuai, ma o i inā na vaai ai i tusi o ata matagā tau feusuaʻiga. Ua faapea mai o ia: “Na faasolosolo mālie ona pulea loʻu mafaufau i nei ata matagā. Na faasolo ina matuā leaga ma na ou tulimataʻia taimi e alu ese ai mai i le fale le fafine na ma nonofo faapouliuli, ae seʻi matamata aʻu vitiō o ata matagā.” Ae i se tasi aso i le galuega, na iloa atu ai e Ribeiro i se faaputuga o tusi tuai le tusi Le Ala e Maua ai le Fiafia i le Aiga. Na ia aveese mai le tusi ma faitau i ai, ma o mea na ia aʻoaʻoina mai ai na uunaʻia ai o ia e suʻesuʻe le Tusi Paia ma Molimau a Ieova. Peitaʻi, na umi se taimi o ia taumafai e tuua lenei masaniga leaga. O le ā na fesoasoani iā te ia? Ua ia faapea mai: “E ala i le tatalo, suʻesuʻe le Tusi Paia, ma manatunatu loloto i mea ua ou aʻoaʻoina, na faatupulaʻia ai loʻu talisapaia o uiga o le Atua seʻia oo ina sili atu ona malosi loʻu alofa mo Ieova nai lo o le tuʻinanau i ata matagā.” O le fesoasoani a le Afioga a le Atua ma lona agaga paia, na mafai ai e Ribeiro ona toese lona tagata tuai, papatiso ma ua avea nei o se toeaina i le faapotopotoga.

11. O le ā e fesoasoani i se tasi ina ia taofia ai le matamata i ata matagā tau feusuaʻiga?

11 Ia mātau, e tele mea na manaʻomia ona faia e Ribeiro ina ia manumalo ai i lenei tauiviga, nai lo o le tau ina suʻesuʻe le Tusi Paia. Na tatau ona ia faaalu se taimi ina ia goto ai i lona loto le feʻau o le Tusi Paia. O le tatalo ma le manatunatu loloto, na manumalo ai lona alofa mo le Atua nai lo o le tuʻinanau i ata matagā. O le auala sili e taofia ai  le matamata i ata matagā tau feusuaʻiga, o le atiaʻe lea o le alofa loloto mo Ieova ma ʻinoʻino i mea leaga.—Faitau le Salamo 97:10.

IA TUU ESE LE ITA, UPU MASOĀ, MA LE PEPELO

12. O le ā na fesoasoani iā Stephen ina ia tuu ese ai le ita ma upu masoā?

12 O tagata e maitaita e masani ona faaalia atu lo latou ita e ala i upu masoā. O lenei uiga e lē mafai ona maua ai se fiafia i le aiga. Ua faapea mai Stephen, o se tamā mai i Ausetalia: “Sa masani ona ou palauvale ma ou ita e tusa lava po o ni mea lāiti. Na faatolu ona ma nonofo eseese ma loʻu toʻalua ma na toetoe a tatala la ma faaipoipoga.” Mulimuli ane, na suʻesuʻe e lenei ulugalii le Tusi Paia ma Molimau a Ieova. O le ā se aafiaga iā Stephen ina ua taumafai e faatatau fautuaga a le Tusi Paia? Ua faapea mai o ia: “Na matuā faaleleia le tulaga o lo matou aiga. E ala i le fesoasoani a Ieova, ua ou maua ai le tele o le filemu i le loto ma le mafaufau, e lē pei o le taimi muamua sa ou inainā ma vave ona pasae aʻe loʻu ita e tusa lava po o ni mea lāiti.” Ua avea nei Stephen ma auauna o le faiva, ma ua tele tausaga o paeonia sauatoa lana avā. Na faapea mai toeaina o le faapotopotoga o loo auai ai Stephen: “O Stephen o se uso e filemu, galue malosi, ma lotomaulalo.” E latou te lē o manatua se taimi na ita ai Stephen. Pe e manatu Stephen o ia ua māfua ai lenei suiga? Ua faapea mai o ia: “E lē mafai ona ou maua nei faamanuiaga matagofie i loʻu olaga, pe ana ou lē talia le fesoasoani a Ieova ia suia atoatoa oʻu uiga.”

13. Aiseā e mataʻutia ai le ita, ma o le ā le lapataʻiga o loo aumaia i le Tusi Paia?

13 E iai le māfuaaga lelei ua lapataʻia ai i tatou i le Tusi Paia ia ʻalofia le ita, upu masoā, ma le soona ʻeʻē. (Efe. 4:31) E faanoanoa ona o nei uiga e masani ona iʻu ai i gaoioiga sauā. E ono manatu le lalolagi o le ita o se uiga masani, peitaʻi e lē faamamaluina ai Lē na faia i tatou. O le pogai lea na tatau ai i le toʻatele ona toese nei uiga leaga a o leʻi oofu i latou i le tagata fou.​—Faitau le Salamo 37:8-11.

14. Pe e mafai ona avea se tagata sauā ma sē e agamalu?

14 Seʻi manatu i le faaaʻoaʻoga a Hans, o se toeaina i se faapotopotoga i Austria. Ua faapea mai le sooupu o le ʻautoeaina i lenā faapotopotoga: “O Hans o se uso e sili ona agamalu.” Peitaʻi, e leʻi agamalu Hans i le taimi ua teʻa. A o talavou o ia, sa amata ona inutele i le ʻava malosi ma iʻu ai ina sauā. Ina ua onā i se tasi taimi, sa ita tele ma ia fasiotia ai lana uō teine. O le iʻuga o lona faamasinoga e faafalepuipui mo le 20 tausaga. I le taimi muamua, e leʻi suia e le faasalaga i le falepuipui uiga sauā o Hans. Mulimuli ane, na faatulaga e le tinā o Hans se toeaina ia asiasi i lana tama i le falepuipui, ma amata ai loa ona suʻesuʻe e Hans le Tusi Paia. Ua faapea mai Hans: “O se tauiviga faigatā le taumafai e toese loʻu tagata tuai. Ae na faalaeiauina aʻu i mau e pei o le Isaia 55:7 lea e faapea mai: ʻIa lafoaʻi e le tagata amioleaga lona ala,’ ma le 1 Korinito 6:11 lea e faatatau i ē ua lafoaʻia o latou ala leaga: ʻSa faapena foʻi nisi o outou.’ Sa onosaʻi Ieova i le tele o tausaga e fesoasoani mai iā te aʻu e ala mai i lona agaga paia, ina ia ou ofu i le tagata fou.” Ina ua mavae le 17 ma le ʻafa tausaga na faafalepuipui ai, sa tatala mai ai loa Hans a ua avea o se Kerisiano ua papatisoina. Ua ia faapea mai: “Ou te faafetai iā Ieova i le tele o lona alofa mutimutivale ma lona faamagalo.”

15. O le ā le isi vala o le tagata tuai, ae o le ā ua taʻua i le Tusi Paia e faatatau i lenā uiga?

15 E lē gata i upu masoā, ae o le pepelo o le isi vala lea o le tagata tuai. O se faaaʻoaʻoga, e masani ona pepelo tagata ina ia ʻalofia ai le totogi o a latou lafoga, pe ina ia ʻalo ai mai i āuga o a latou agasala. Peitaʻi, o Ieova o le  “Atua faamaoni.” (Sala. 31:5) O lea la, e finagalo Ieova i ona tagata tapuaʻi “taʻitasi” ia “tautala i le mea moni ma lona tuaoi” ma “aua le pepelo.” (Efe. 4:25; Kolo. 3:9) E manino mai, e tatau ona tatou tautatala i le mea moni e tusa lava pe e māsiasi ai pe faigatā foʻi.​—Faata. 6:16-19.

AUALA NA LATOU MANUMALO AI

16. E mafai faapefea ona taulau se tasi e toese le tagata tuai?

16 E lē mafai i so tatou lava malosi ona toese uiga o le tagata tuai. O tagata ia na taʻua i lenei mataupu, o Sakura, Ribeiro, Stephen, ma Hans, sa tatau ona tauivi malosi ina ia tuu ese o latou uiga leaga. Na mafai ona latou manumalo ona na taaʻina o latou mafaufau ma loto i le mana o le Afioga a le Atua ma lona agaga paia. (Luka 11:13; Epe. 4:12) Ina ia aogā iā i tatou lenā mana, e tatau ona tatou faitau le Tusi Paia i aso taʻitasi, manatunatu loloto i ai, ma tatalo e lē aunoa mo le atamai ma le malosi ina ia faatatau ai fautuaga a le Tusi Paia. (Iosua 1:8; Sala. 119:97; 1 Tesa. 5:17) E tatou te maua foʻi aogā mai i le Afioga a le Atua ma lona agaga paia pe a tatou sauniuni ma auai i sauniga a le faapotopotoga. (Epe. 10:24, 25) E tatou te mananaʻo foʻi ia faaaogā tatau isi vala ua saunia mai ai meaʻai faaleagaga mo tagata o le Atua i le lalolagi aoao.​—Luka 12:42.

E mafai faapefea ona tatou taulau e toese le tagata tuai? (Tagaʻi i le palakalafa e 16)

17. O le ā o le a tatou talanoaina i le mataupu o loo sosoo mai?

17 Na tatou talanoaina le tele o masaniga leaga e tatau i Kerisiano ona toese ma faaauau ona lafoaʻia. Peitaʻi, pe e na o le pau na o mea e manaʻomia ina ia maua ai le finagalo malie o le Atua? E leai. E tatau foʻi ona tatou oofu i le tagata fou. O le a tatou talanoaina i le mataupu o loo sosoo mai, vala eseese o le tagata fou e manaʻomia ona avea pea ma vaega o lo tatou ofu faafaatusa.

^ pala. 7 Ua suia nisi igoa i lenei mataupu.

^ pala. 8 Tagaʻi i le tusi ʻIa Faatumau iā te Outou i le Alofa o le Atua’ i le Faaopoopoga Ia Manumalo i le Masaniga Leaga o le Taaloalo i Totogasā, itu. 218-219.