Skip to content

Skip to table of contents

Fesili Mai le ʻAufaitau

Fesili Mai le ʻAufaitau

Ua faapea mai le Tusi Paia, e lē itiiti ifo i le toʻalua molimau e manaʻomia ina ia faamaonia ai se mataupu. (Nu. 35:30; Teu. 17:6; 19:15; Mata. 18:16; 1 Timo. 5:19) Ae i lalo o le Tulafono, pe afai e faamalosi e se tamāloa se teine ua faamau “i le fanua” ma na ʻeʻē le teine, e lē nofosala la o ia i le mulilua ae e nofosala le tamāloa. Talu ai e leʻi vaai se isi o toso e le tamāloa le teine, aiseā la na lē nofosala ai le teine ae faamaonia le solitulafono a le tamāloa?

E lē o faaautū atu le tulafono i le Teuteronome 22:25-27 i le faamaonia o le solitulafono a le tamāloa, ona ua iloa e solitulafono. Peitaʻi, na uaʻi atu lenei tulafono i le lē nofosala o le teine. Ia mātau le siʻomaga o le mau.

I fuaiupu muamua atu, o loo talanoa ai e faatatau i se tamāloa na feusuaʻi ma se teine ua uma ona faamau “i le aai.” Ona o lenā tulaga, na nofosala la le tamāloa i le mulilua, ona o le teine ua faamau na vaai i ai o se teine ua uma ona faaipoipo. Ae e faapefea le teine? E leʻi ʻeʻē le teine i le aai. Pe ana ʻeʻē, e mautinoa e lagona e nisi ma e latou te laveaʻi iā te ia. Ae e leʻi ʻeʻē o ia. O lea, na malie le teine e fai le mulilua, ma na faasala faatasi i laʻua o ni tagata solitulafono.​—Teu. 22:23, 24.

Ua faamatala mai e le Tulafono se isi tulaga e ese mai: “Afai o le fanua na maua ai e le tamāloa le teine ua faamau, ma ua toso e le tamāloa o ia ma la momoe, e ao ona oti tau lava o le tamāloa na momoe ma ia, ae aua neʻi faia se mea i le teine. E leai se agasala a le teine e tatau ai ona oti o ia, auā e tutusa lenei mea ma le tulaʻi o le tamāloa e faasagatau i lona tuaoi ma fasiotia lava lenā tagata. Auā na ia maua o ia i le fanua. Na ʻeʻē le teine ua faamau ae ua leai se isi e laveaʻiina o ia.”​—Teu. 22:25-27.

I lenā tulaga, na talitonu faamasino i le teine. I le ā le itu? Na latou talitonu, “na ʻeʻē le teine ua faamau ae ua leai se isi e laveaʻiina o ia.” E na te leʻi faia la le mulilua. Peitaʻi, na solitulafono le tamāloa i lona faamalosi o le teine ua faamau, ma le faia o le mulilua talu ai na “toso e le tamāloa o ia ma la momoe.”

O lea la, e ui na uaʻi atu le tulafono i le lē nofosala o le teine, ae na tonu le faamatalaina o le solitulafono a le tamāloa, o sē e toso teine ma mulilua. E tatou te mautinoa na “matuā saʻili” māeʻaeʻa e faamasino le mataupu, ma faia se faaiʻuga e ōgatusa ma tapulaa manino a le Atua na tele taimi na ia faailoa mai ai.​—Teu. 13:14; 17:4; Eso. 20:14.