Skip to content

Skip to table of contents

 SUʻESUʻEGA 51

Po o E Iloa Lelei Ieova?

Po o E Iloa Lelei Ieova?

“E faatuatua iā te oe o ē e iloa lou suafa, Ieova e, e te lē tuua lava o ē o loo saʻili iā te oe.”​—SALA. 9:10.

PESE 56 Ia Fai Mou le Upu Moni

AOTELEGA *

1-2. O le ā e tatou te aʻoaʻoina mai i le mea na tupu iā Angelito?

PO O tausia aʻe oe e ni mātua e Molimau a Ieova? Afai o lea, e ao ona e manatua, e lē otometi ona e mauaina se faiā māfana ma Ieova, ona e Molimau a Ieova ou mātua. E tusa pe e auauna o tatou mātua i le Atua pe leai, ae e tatau iā i tatou taʻitoʻatasi ona atiaʻe se faauōga ma Ieova.

2 Seʻi mātau le mea na tupu i le uso o Angelito. Na tausia aʻe o ia i se aiga Molimau. Peitaʻi, e leʻi matuā vavalalata atu o ia i le Atua a o laʻitiiti. Na ia taʻutino mai, “Na ou auauna iā Ieova ona na ou mulimuli i mea sa faia e lo matou aiga.” Peitaʻi, na filifili Angelito e faaalu lona taimi e faitau ai le Afioga a le Atua ma mafaufau loloto i ai, ma na amata foʻi ona ia tatalo e lē aunoa iā Ieova. O le ā le iʻuga? Na faapea mai Angelito, “Na ou aʻoaʻoina e pau le auala e vavalalata atu ai i lo tatou Tamā pele o Ieova, o loʻu iloa lelei lea o ia.” O le mea na tupu iā Angelito ua lāgā ai ni fesili tāua: O le ā le eseesega o le iloa o Ieova ma le iloa lelei o ia? E faapefea ona tatou iloa lelei Ieova?

3. O le ā le eseesega o le iloa o Ieova, ma le iloa lelei o ia?

3 E mafai ona tatou faapea atu e tatou te iloa Ieova, ona e tatou te iloa lona suafa, o ni ana fetalaiga po o ni mea foʻi na ia faia. Peitaʻi, o le iloa lelei o Ieova e tele mea e aofia ai. E tatau ona faaalu se taimi e aʻoaʻo ai e faatatau iā Ieova ma ona uiga matagofie. E na o le pau lea o le auala e amata ai ona tatou malamalama, i le māfuaaga na fetalai ma gaoioi ai o ia. O le a  fesoasoani iā i tatou e malamalama ai po o fiafia o ia i o tatou manatu, filifiliga ma gaoioiga. E tatou te malamalama loa i le finagalo o Ieova mo i tatou, ua tatau loa la ona tatou gaoioi e tusa ma mea ua tatou aʻoaʻoina.

4. E faapefea ona fesoasoani faaaʻoaʻoga mai i le Tusi Paia iā i tatou?

4 Atonu e tauemu mai nisi ona o lo tatou mananaʻo e auauna iā Ieova, ma e ono atili tetee mai pe a amata ona tatou auai i sauniga. Ae pe a tatou maufaatuatuaina Ieova, o le a ia lē tuulafoaʻia la i tatou. O le a tatou atiaʻe se faavae mo se faauōga tumau ma le Atua. Pe e mafai ona tatou iloa lelei Ieova? Ioe, e mafai! Ua faamaonia mai i faaaʻoaʻoga na faataatia e tane lē lelei atoatoa e pei o Mose ma le tupu o Tavita, e mafai ona tatou iloa lelei Ieova. A o talanoa i mea na la faia, o le a tatou taliina ai fesili nei e lua: Na faapefea ona la iloa lelei Ieova? O ā lesona e tatou te aʻoaʻoina mai i a la faaaʻoaʻoga?

NA ILOA ATU E MOSE “LĒ E LĒ O VAAIA”

5. O le ā na filifili Mose e fai?

5 Na faatatau e Mose mea na ia aʻoaʻoina. E pe ā ma le 40 tausaga o Mose, na filifili ai o ia e faatasitasi ma tagata o le Atua, o tagata Isaraelu, nai lo o le taʻua o ia “o le tama a le afafine o Farao.” (Epe. 11:24) Na ia tuua se tulaga aloaʻia. Na ia iloa o le a toʻatamaʻi Farao, o se tupu e matuā malosi ma na manatu i ai tagata Aikupito o se atua, ina ua lagolagoina e Mose tagata Isaraelu na nonofo pologa i Aikupito. Maʻeu le matuā malosi o lenā faatuatua! Na maufaatuatuaina e Mose Ieova. O le maufaatuatuaina e Mose o Ieova, na avea o se faavae mautū i le faatumauina o le la faiā.​—Faata. 3:5.

6. O le ā e tatou te aʻoaʻoina mai i le faaaʻoaʻoga a Mose?

6 O le ā le lesona mo i tatou? I le pei o Mose, o i tatou uma e iai la tatou filifiliga e fai: Po o le a tatou filifili e auauna i le Atua ma faatasitasi ma ona tagata? Atonu e iai ni faataulaga e tatou te faia ina ia auauna ai i le Atua, ma e ono teena i tatou e nisi e lē iloa Ieova. Ae pe a tatou maufaatuatuaina lo tatou Tamā i le lagi, e mautinoa o le a ia lagolagoina i tatou.

7-8. O le ā na faaauau ona aʻoaʻoina e Mose?

7 Na faaauau ona aʻoaʻoina e Mose uiga o Ieova ma fai Lona finagalo. O se faaaʻoaʻoga, ina ua faatonuina Mose e taʻitaʻia le nuu o Isaraelu mai i Aikupito, na lē mautonu o ia ma na tele taimi na ia faapea atu ai iā Ieova, e lē agavaa. Na faailoa mai i le tali a Ieova lona alofa mutimutivale, o lona uiga, na malamalama Ieova i faalogona o Mose, ma na ia saunia se fesoasoani mo Mose. (Eso. 4:10-16) O le iʻuga, na mafai ona taʻu atu e Mose feʻau faafaamasinoga malolosi iā Farao. O inā, na iloa ai e Mose le malosi o Ieova, ina ua ia laveaʻiina Isaraelu ae faaumatia Farao ma lana ʻautau i le Sami Ulaula.​—Eso. 14:26-31; Sala. 136:15.

8 Na faaauau ona faitio tagata Isaraelu ina ua uma ona taʻitaʻia i latou e Mose mai i Aikupito. E ui i lea, na mātauina pea e Mose le tele o le onosaʻi o Ieova, i ana feutagaʻiga ma tagata na ia faasaʻolotoina mai i le nofo pologa i Aikupito. (Sala. 78:40-43) Na iloa foʻi e Mose le mataʻina o le lotomaulalo o Ieova, ina ua toe sui Lana faaiʻuga i le talosaga a Mose, ia aua neʻi faaumatiaina Lona nuu.​—Eso. 32:9-14.

9. E tusa ai ma le Eperu 11:27, o le ā le vavalalata o le faiā a Mose ma Ieova?

9 Ina ua mavae le faasaʻolotoina mai o le nuu o Isaraelu mai i Aikupito, na matuā vavalalata le faiā a Mose ma Ieova, e pei ua mafai ona ia vaai atu i lona Tamā i le lagi. (Faitau le  Eperu 11:27.) Na iloa le māfana o lenā faiā, auā o loo taʻua i le Tusi Paia: “Ua fetalai mai foʻi Ieova iā Mose ae o loo fesagaʻi i laʻua e pei ona talanoa atu o se tamāloa i lona tuaoi.”​—Eso. 33:11.

10. Ina ia iloa lelei Ieova, o le ā e tatau ona tatou faia?

10 O le ā le lesona mo i tatou? Ina ia iloa lelei Ieova, e tatau ona tatou aʻoaʻoina ona uiga ma fai lona finagalo. O le finagalo o Ieova i aso nei “ia faaolaina ituaiga uma o tagata, ma ia maua le poto saʻo i le upu moni.” (1 Timo. 2:3, 4) O se tasi o auala e tatou te faia ai le finagalo o le Atua, o le aʻoaʻo lea o isi e faatatau iā Ieova.

11. E faapefea ona tatou iloa lelei Ieova a o tatou aʻoaʻo isi e faatatau iā te ia?

11 O le tele e tatou te aʻoaʻo ai isi e faatatau iā Ieova, o lo tatou iloa lelei foʻi lenā o ia. O se faaaʻoaʻoga, e tatou te iloa faamaoniga o le alofa mutimutivale o Ieova i tagata, pe a ia fesoasoani mai iā i tatou ia maua tagata e saʻo o latou loto. (Ioa. 6:44; Galu. 13:48) Ua tatou iloa le malosi o le Afioga a le Atua, pe a tatou mātauina a tatou tagata suʻesuʻe ua saʻoloto mai i masaniga leaga, ma ua amata ona oofu i le tagata fou. (Kolo. 3:9, 10) Ua tatou iloa foʻi faamaoniga o le onosaʻi o le Atua, i lona tuu avanoa i le toʻatele i la tatou oganuu, ina ia aʻoaʻoina e faatatau iā te ia ma faaolaina ai.​—Roma 10:13-15.

12. E pei ona taʻua i le Esoto 33:13, o le ā na talosaga atu ai Mose, ma aiseā?

12 E leʻi manatu māmā Mose i le la faiā ma Ieova. Na iloa lelei e Mose Ieova, ona na faaaogā o ia e Ieova e faia le tele o galuega mamana. Peitaʻi, na talosaga atu pea Mose iā Ieova ina ia ona iloa atili o Ia. (Faitau le Esoto 33:13.) Pe ā ma le 80 tausaga o Mose ina ua ia fai atu lenā talosaga, ae na ia iloa e tele atu isi mea e tatau ona ia aʻoaʻoina e faatatau i lona Tamā alofa i le lagi.

13. O le ā se tasi o auala e faamaonia ai lo tatou faatāuaina o la tatou faauōga ma le Atua?

13 O le ā le lesona mo i tatou? Po o le ā lava le umi o tatou auauna iā Ieova, e lē tatau ona tatou manatu māmā i la tatou faiā ma ia. O se tasi o auala sili e faamaonia ai lo tatou faatāuaina o la tatou faauōga ma le Atua, o le talanoa atu lea iā te ia i le tatalo.

14. Aiseā e sili ai ona tāua le tatalo i le aʻoaʻoina atili e faatatau i le Atua?

14 O le vala sili ona tāua i le mauaina o se faiā malosi, o le lelei o fesootaʻiga. O lea, ia mafuta vavalalata i le Atua e ala i le tatalo e lē aunoa, ma ia aua le fefe e faailoa atu ou faalogona ma manatu. (Efe. 6:18) Ua faapea mai Krista mai i Take: “E faateleina loʻu alofa mo Ieova ma loʻu maufaatuatuaina o ia i taimi uma, e faailoa atu ai oʻu manatu iā te ia i le tatalo, ma mātauina lana fesoasoani mai iā te aʻu. O le iloaina o le auala o loo tali mai ai Ieova i aʻu tatalo, ua fesoasoani lea iā te aʻu e vaai iā Ieova o se Tamā ma o se Uō.”

O SE TAGATA UA MALIE I AI LE LOTO O IEOVA

15. O le ā le auala na faamatala ai e Ieova le tupu o Tavita?

15 Na fanau mai le tupu o Tavita i se nuu na tuuina atu iā Ieova le Atua. Peitaʻi, e tele atu mea na faia e Tavita nai lo o le tau ina mulimuli i le tapuaʻiga a lona aiga. Na ia atiaʻe se faiā ma le Atua, ma na matuā alofa Ieova iā te ia. Na faamatala e Ieova Tavita, o se tagata ua malie i ai lona loto. (Galu. 13:22) Na faapefea ona matuā vavalalata Tavita iā Ieova?

16. O le ā na aʻoaʻoina e Tavita mai iā Ieova a o ia vaavaai atu i le foafoaga?

16 Na aʻoaʻoina e Tavita mea e faatatau iā Ieova mai i le foafoaga. A o talavou Tavita, na tele taimi na iai i le fanua e leoleo mamoe a lona tamā. Atonu o le taimi lenā na amata ai ona ia manatunatu loloto i mea na foafoaina e  Ieova. O se faaaʻoaʻoga, a o vaavaai aʻe Tavita i le lagi i le pō, e lē gata na ia mātauina le faitau afe o fetu ae na ia iloa ai foʻi uiga o Lē na foafoaina nei mea. Na uunaʻia Tavita e tusi: “Ua faalauiloa mai e le lagi le mamalu o le Atua; ma o loo taʻu atu foʻi e le vanimonimo galuega a ona aao.” (Sala. 19:1, 2) A o manatunatu loloto Tavita i le auala na foafoaina ai tagata, na ia iloa ai le tele o le atamai o Ieova i ana galuega. (Sala. 139:14) A o ia manatunatu loloto foʻi i galuega a Ieova, na ia iloa ai lona faatauvaa.​—Sala. 139:6.

17. O le ā e tatou te aʻoaʻoina pe a manatunatu loloto i le foafoaga?

17 O le ā le lesona mo i tatou? Ia uaʻi atu i mea o le foafoaga. Ia faaalu se taimi e mātau ai mea na foafoaina e Ieova i lenei lalolagi matagofie, ma ia talisapaia nei mea. I aso uma o lou olaga, ia manatunatu loloto i mea o le foafoaga o loo siʻomia ai oe e pei o laau, manu ma tagata, po o le ā e te aʻoaʻoina mai ai e uiga iā Ieova. O lou faia faapea, o le a e aʻoaʻoina mai ai i aso taʻitasi ni lesona tāua e faatatau i lo tatou Tamā alofa. (Roma 1:20) O aso uma foʻi, o le a e mātauina ai le faateleina o lou alofa mo ia.

18. E pei ona taʻua i le Salamo 18, o le ā na iloa e Tavita?

18 Na iloa e Tavita o loo fesoasoani Ieova iā te ia. O se faaaʻoaʻoga, ina ua laveaʻia e Tavita le mamoe a lona tamā mai i se leona ma se pea, na ia iloa na fesoasoani atu Ieova iā te ia e fasimate nei manufeʻai. Ina ua ia faatoʻilaloina le sauʻai malosi o Koliata, na iloa lelei e Tavita na taʻitaʻia o ia e Ieova. (1 Samu. 17:37) Na iloa foʻi e Tavita na faasaoina o ia e Ieova, ina ua mafai ona sola ese mai i le tupu lotoleaga o Saulo. (Sala. 18, ulutala) E mafai e se tagata mimita ona ia maua viiga mai i mea na faia e Tavita. Peitaʻi, na lotomaulalo Tavita, ma na mafai ai ona ia iloa le fesoasoani a Ieova i lona olaga.​—Sala. 138:6.

19. O le ā e tatou te aʻoaʻoina mai i le faaaʻoaʻoga a Tavita?

19 O le ā le lesona mo i tatou? E manaʻomia ona tatou faia ni mea e sili atu, nai lo o le tau ina talosaga iā Ieova mo se fesoasoani. E tatau ona tatou taumafai e iloa le taimi, ma le auala o loo ia fesoasoani mai ai iā i tatou. Pe a tatou lotomaulalo e faailoa atu mea e gata ai lo tatou mafai, o le a tatou iloa manino ai le fesoasoani a Ieova e faataunuu mea e lē mafai ona tatou faia. O taimi uma foʻi e tatou te iloa ai le fesoasoani mai a Ieova, o le a atili faamalosia ai la tatou faiā ma ia. Na iloa e Isaac le moni o lenei manatu, o se uso ua tele tausaga o auauna iā Ieova i Fiti. Na ia faapea mai: “Pe a ou toe tepa i tua i loʻu olaga, ua ou iloa ai le auala na fesoasoani mai ai Ieova i le taimi na amata ai ona ou suʻesuʻeina le Tusi Paia, e oo mai lava i aso nei. O le iʻuga, ua matuā moni lava Ieova iā te aʻu.”

20. O le ā e tatou te aʻoaʻoina mai i le faiā a Tavita ma le Atua?

20 Na faaaʻoaʻo Tavita i uiga o Ieova. Na foafoaina i tatou e Ieova ma le tomai e faaaʻoaʻo ai i ona uiga. (Kene. 1:26) O le tele e tatou te aʻoaʻoina ai uiga o Ieova, o le tele foʻi lenā e mafai ona tatou faaaʻoaʻo ai iā te ia. Na iloa lelei e Tavita lona Tamā i le lagi, ma mafai ai ona ia faaaʻoaʻo iā te Ia pe a feutagaʻi ma isi. Seʻi mātau se tasi o faaaʻoaʻoga nei. Na agasala Tavita iā Ieova ina ua mulilua ma Patisepa, ma mulimuli ane faatonuina e Tavita le fasiotia o le tane a Patisepa. (2 Samu. 11:1-4, 15) Peitaʻi, na faaalia e Ieova le alofa mutimutivale iā Tavita, o se tane na faaalia le alofa mutimutivale i isi. Talu ai na iai se faiā lelei a Tavita ma Ieova, na avea la o ia ma tupu e sili ona alolofa i ai tagata, ma na faaaogā e  Ieova Tavita e avea ma faaaʻoaʻoga lelei mo isi tupu i Isaraelu.​—1 Tu. 15:11; 2 Tu. 14:1-3.

21. E tusa ai ma le Efeso 4:24 ma le 5:1, o ā iʻuga e oo i ai pe a tatou “faaaʻoaʻo i le Atua”?

21 O le ā le lesona mo i tatou? E tatau ona tatou “faaaʻoaʻo i le Atua.” O le faia faapea, e lē gata e tatou te maua ai aogā, ae e fesoasoani foʻi e tatou te iloa lelei ai o ia. Pe a faaaʻoaʻo i ona uiga, ua faamaonia atu la o i tatou o lana fanau.​—Faitau le Efeso 4:24; 5:1.

IA SAʻILI PEA INA IA MATUĀ ILOA LELEI IEOVA

22-23. O le ā e tupu pe a tatou faatatau mea ua aʻoaʻoina e uiga iā Ieova?

22 Ua tatou iloa, e mafai ona tatou aʻoaʻoina mea e uiga iā Ieova mai i ana foafoaga, ma i lana Afioga le Tusi Paia. E tutasi le Tusi Paia, e tumu i faaaʻoaʻoga o auauna faamaoni a le Atua, e pei o Mose ma Tavita lea e mafai ona tatou faaaʻoaʻo i ai. Ua uma ona fai le vaega a Ieova. O lea, e manaʻomia ona fai la tatou vaega, o le aʻoaʻoina atili lea o mea e faatatau iā te ia i le tele e mafai ai.

23 E lē muta lo tatou aʻoaʻoina o mea e uiga iā Ieova. (Fai. 3:11) O le mea tāua, e lē o le tele o mea e tatou te iloa e uiga iā Ieova, ae o lo tatou faatatauina o mea ua tatou iloa e uiga iā te ia. Pe a tatou faatatau mea ua tatou aʻoaʻoina ma taumafai e faaaʻoaʻo i lo tatou Tamā alofa, o le a faaauau ona ia mafuta vavalalata mai iā i tatou. (Iako. 4:8) E ala mai i lana Afioga, ua ia faamautinoa ai e na te lē tuulafoaʻiina i latou e saʻili pea ina ia matuā iloa lelei o ia.

PESE 80 Ia Tofotofo ma Iloa e Lelei Ieova

^ pala. 5 E talitonu le toʻatele e iai le Atua, ae e latou te lē o iloa lelei o ia. O le ā le uiga o le iloa o Ieova, ma o le ā e tatou te aʻoaʻoina mai i faaaʻoaʻoga a Mose ma le tupu o Tavita, e faatatau i le auala e atiaʻe ai se faiā malosi ma Ia? O le a taliina nei fesili i lenei mataupu.