Skip to content

Skip to table of contents

 SUʻESUʻEGA 49

“E Iai le Taimi e Atofaina” mo Galuega ma Mālōlōga

“E Iai le Taimi e Atofaina” mo Galuega ma Mālōlōga

“Seʻi o tatou ō . . . i se mea tuufua ma fai ai sina mālōlōga.”​—MARE. 6:31.

PESE 143 Galue, Mataala, ma Faatalitali

AOTELEGA *

1. O le ā le vaaiga a le toʻatele o tagata i galuega?

O LE ā le vaaiga a le toʻatele o tagata i lou vaipanoa i galuega? I le taimi nei, o le tele o atunuu ua matuā soona galulue tagata ma uumi taimi e galulue ai, nai lo o se isi lava taimi. O tagata e matuā soona galulue, e leai se taimi e malolo ai, leai se taimi e faaalu mo le aiga, pe faamalie ai foʻi o latou manaʻoga faaleagaga. (Fai. 2:23) Ae o nisi tagata, e lē fiafia e galulue ma e latou te faia faamolemolega i le māfuaaga e lē galulue ai.​—Faata. 26:13, 14.

2-3. O ā faaaʻoaʻoga na faataatia e Ieova ma Iesu i le faia o galuega?

2 E lē tutusa le silasila a Ieova ma Iesu i galuega, ma le vaaiga lē paleni a tagata o le lalolagi. Seʻi o tatou talanoaina le silafaga a Ieova ma Iesu i galuega. E fiafia Ieova e galue. Na faamanino mai e Iesu e faapea: “O loo galue loʻu Tamā e oo mai i le aso nei, ma o loo oʻu galue foʻi.” (Ioa. 5:17) Seʻi mafaufau i galuega uma a le Atua na fai, e pei o le foafoaina o le lē mafaitaulia o foafoaga agaga ma le vateatea aoao. O loo tatou vaaia foʻi le tele o galuega matagofie o le foafoaga i lenei lalolagi o loo tatou nonofo ai. Ua moni ai upu a le faisalamo: “Ieova e, ua matuā tele lava au galuega! Ua e faia ia mea uma i le atamai. Ua tumu foʻi le lalolagi i mea na e faia.”​—Sala. 104:24.

3 Na faaaʻoaʻo Iesu i lona Tamā. O le Alo o le Atua, o le faaataga sili o le atamai o le Atua, ma na fesoasoani i lona Tamā ina ua Ia “saunia le lagi.” Na faatasi Iesu ma Ieova “o se tufuga poto.” (Faata. 8:27-31) I se taimi umi mulimuli ane, ina ua afio  mai Iesu i le lalolagi, na ia faia se galuega mataʻina. O lenā galuega na pei o se meaʻai iā te ia. O ana galuega na faamaonia ai na auina mai o ia e le Atua.​—Ioa. 4:34; 5:36; 14:10.

4. O le ā e tatou te aʻoaʻoina mai iā Ieova ma Iesu e faatatau i mālōlōga?

4 Po o faaaʻoaʻoga o le galulue mamafa na faataatia e Ieova ma Iesu, e uiga atu e lē manaʻomia ona tatou mālōlō? E leai. Talu ai e lē vaivai Ieova, e na te lē manaʻomia la se mālōlōga. Peitaʻi, ua faapea mai le Tusi Paia, ina ua māeʻa ona foafoaina e Ieova le lagi ma le lalolagi, “ona mālōlō ai lea o ia.” (Eso. 31:17) O lea la, e uiga atu le mālōlō o Ieova i le taofi o ana galuega o le foafoaga, ae faaalu se taimi e fiafia ai i ana galuega na fai. E ui na galue mamafa foʻi Iesu a o iai i le lalolagi, ae na ia faamautinoa e iai se taimi e mālōlō ma aai faatasi ai ma ana uō.​—Mata. 14:13; Luka 7:34.

5. O le ā le faigatā o loo fesagaʻia e le toʻatele?

5 O loo faalaeiau e le Tusi Paia tagata o le Atua, ina ia fiafia e galulue. E tatau i ana auauna ona tōʻaaga e galulue ae aua le paiē. (Faata. 15:19) Atonu o loo e galue i se galuega totogi e tausi ai lou aiga. O le matafaioi a soo uma o Keriso, o le talaʻia o le tala lelei. Ae e tatau foʻi ona lava lau mālōlō. Pe e iai ni taimi e faigatā ai ona e faapaleni le taimi e alu i galuega totogi, talaʻiga ma mālōlōga? E faapefea ona tatou iloa po o le ā le tele o le taimi e galulue ma mālōlō ai?

IA IAI SE VAAIGA SAʻO

6. E faapefea ona faaalia i le Mareko 6:30-34, na iai se vaaiga saʻo a Iesu i galuega ma mālōlōga?

6 E tāua ona iai le vaaiga saʻo i galuega. Na faagaeeina le tupu o Solomona e tusi: “E iai le taimi e atofaina mo . . . mea uma e tutupu.” Na ia taʻua le totō, fausia, tagi, ʻataʻata, osooso ai ma le fiafia ma isi gaoioiga. (Fai. 3:1-8) E manino mai la, e lua vala tāua o le olaga, o le galue ma mālōlō. Na saʻo le vaaiga a Iesu i galuega ma mālōlōga. I se tasi aso na toe foʻi mai aposetolo mai i le latou galuega talaʻi. Ona o lo latou pisi tele, “ua leai ai se taimi e mālōlō pe aai ai.” O lea, na fetalai atu ai Iesu: “Seʻi o tatou ō na o i tatou i se mea tuufua ma fai ai sina mālōlōga.” (Faitau le Mareko 6:30-34.) E ui e lē o taimi uma na maua ai e Iesu ma ona soo mālōlōga na latou manaʻomia, ae na silafia e Iesu na manaʻomia uma ona latou mālōlō.

7. E faapefea i le talanoaina o le tulafono o le Sapati ona fesoasoani iā i tatou?

7 E iai taimi e manaʻomia moni ai ona fai sina mālōlōga ma fai ni nai suiga. E tatou te iloa lenā mea mai i le Sapati faalevaiaso, o se faatulagaga na faia e le Atua mo ona tagata i aso anamua. E tatou te lē o toe ola i lalo o le tulafono faa-Mose, ae e tatou te maua aogā mai i le talanoaina o lenā Sapati. O lesona e tatou te aʻoaʻoina mai ai, o le a fesoasoani iā i tatou e iloilo ai la tatou vaaiga i galuega ma mālōlōga.

LE SAPATI​—O SE ASO E MĀLŌLŌ MA TAPUAʻI AI

8. E tusa ai ma le Esoto 31:12-15, o ā mea na fai i le aso Sapati?

8 O loo taʻua i le Afioga a le Atua, ina ua mavae “aso” e ono o le foafoaga, ona taofi ai lea e le Atua o ana galuega i le lalolagi. (Kene. 2:2) Peitaʻi, e fiafia Ieova e galue, ma “o loo galue” pea o ia. (Ioa. 5:17) O le faatulagaga mo le Sapati faalevaiaso, e tai tutusa lava ma le faatulagaga o le aso mālōlō o Ieova o loo taʻua i le Kenese. Na fetalai le Atua, o le Sapati o se faailoga i le va o ia ma le nuu o Isaraelu. O se aso e “mālōlō ai. O se mea paia lea iā Ieova.” (Faitau le Esoto 31:12-15.) Na faasā ona galue so o se tasi i le aso Sapati,  e aofia ai tamaiti, pologa ma manu tausi a tagata. (Eso. 20:10) O le Sapati na maua ai le avanoa o tagata e matuā uaʻi atu ai i mea faaleagaga.

9. O le ā le vaaiga sesē e faatatau i le Sapati i le taimi o Iesu?

9 Sa lelei mo tagata o le Atua le aso Sapati, peitaʻi, e toʻatele taʻitaʻi lotu i le taimi o Iesu na pulepuletutū, ma e leʻi iai se vaaiga saʻo i le Sapati. Na latou manatu o se solitulafono le tau o fua o saito, pe faamālōlō se tagata maʻi i le aso Sapati. (Mare. 2:23-27; 3:2-5) Peitaʻi, o nei manatu e leʻi ōgatusa ma le finagalo o le Atua, ma na faamatala manino atu e Iesu i ē na fia faalogo iā te ia.

Na faaaogā e le aiga o Iesu le Sapati e uaʻi atu ai i mea faaleagaga (Tagaʻi i le palakalafa e 10) *

10. O le ā e tatou te aʻoaʻoina mai i le Mataio 12:9-12 i le vaaiga a Iesu i le Sapati?

10 Na faamamaluina e Iesu ma ona soo Iutaia le Sapati, ona sa ola i lalo o le Tulafono a Mose. * Ae na faaalia mai i upu ma gaoioiga a Iesu lona fetuutuunaʻi i le tausia o le Sapati. Na manino lona faapea mai: “E taga i le tulafono ona fai le mea lelei i le sapati.” (Faitau le Mataio 12:9-12.) E leʻi manatu Iesu o le faia o gaoioiga agalelei, ma le fesoasoani i isi e solia ai le Sapati. Na matilatila mai i gaoioiga a Iesu le māfuaaga autū o le Sapati, ina ia uaʻi atu ai tagata o le Atua i mea faaleagaga, ona na mālōlō mai i a latou galuega masani. Na ola aʻe Iesu i se aiga na faaaogā le Sapati mo mea faaleagaga, ma maua ai aogā. Ua tatou iloa lenei mea pe a faitau i tala e faatatau iā Iesu a o iai i lona nuu o Nasareta: “E  tusa ma lana masani [Iesu] i le aso sapati, ua ulu atu o ia i le sunako, ona tū lea i luga e faitau.”​—Luka 4:15-19.

O LE Ā LAU VAAIGA E FAATATAU I GALUEGA?

11. O ai na avea ma faaaʻoaʻoga lelei o le galue iā Iesu?

11 E mautinoa na iā Iosefa le silafaga a le Atua i galuega, a o ia aʻoaʻoina lona ataliifai o Iesu, e avea ma se kamuta. (Mata. 13:55, 56) Sa vaai Iesu i le galue mamafa o Iosefa i aso uma e tausia lona aiga toʻatele. E mataʻina ai la le fetalaiga a Iesu i ona soo: “E tatau le totogi i le tagata faigaluega.” (Luka 10:7) Ioe, na masani Iesu i le galue mamafa.

12. O ā mau e faatatau i le galue mamafa o loo i le Tusi Paia?

12 Na galue mamafa foʻi le aposetolo o Paulo. O lana galuega autū, o le molimau i le suafa o Iesu ma lana feʻau. Ae na galue foʻi Paulo mo le tausiaina o ia. Na iloa lelei e Kerisiano i Tesalonia le ʻgalue fitā’ o Paulo, lona galue i le “pō ma le ao” ina ia lē “faatigāina” ai se tasi. (2 Tesa. 3:8; Galu. 20:34, 35) Ina ua taʻua e Paulo le galulue, atonu na ia faasino atu i lana galuega o se fai faleʻie. A o iai i Korinito, na nofo o ia faatasi ma Akula ma Pisila, ma “latou galulue faatasi [ai] auā e tutusa a latou galuega, o ni tagata fai faleʻie.” O le galue o Paulo i le “ao ma le pō,” e leʻi uiga atu faapea na galue e aunoa ma se mālōlō. Na fai ma mālōlō o ia mai i lana galuega, e oo foʻi i le aso Sapati. O lenā aso na ia maua ai avanoa e talaʻi atu ai i tagata Iutaia, ia na mālōlō foʻi i le aso Sapati.​—Galu. 13:14-16, 42-44; 16:13; 18:1-4.

13. O le ā e tatou te aʻoaʻoina mai i le faaaʻoaʻoga a Paulo?

13 Na faataatia e le aposetolo o Paulo se faaaʻoaʻoga lelei. E lē gata na ia galue i se galuega totogi, ae na ia faamautinoa foʻi o loo faia e lē aunoa sona sao, i le “galuega [paia] o le folafola atu o le tala lelei a le Atua.” (Roma 15:16; 2 Kori. 11:23) Na ia faalaeiauina isi e faia e lē aunoa lenei galuega. O se faaaʻoaʻoga, na avea Akula ma Pisila ma ni ē e “galulue faatasi [ma Paulo] o ni soo o Keriso Iesu.” (Roma 12:11; 16:3) Na faalaeiau atu foʻi Paulo i Kerisiano i Korinito “ia tele pea mea e fai i le galuega a le Alii.” (1 Kori. 15:58; 2 Kori. 9:8) Na faagaeeina foʻi e Ieova Paulo e tusi: “Afai e lē fia galue se tasi, aua neʻi ʻai o ia.”​—2 Tesa. 3:10.

14. O le ā le uiga o le fetalaiga a Iesu o loo i le Ioane 14:12?

14 O le galuega e sili ona tāua i nei aso e gata ai, o le galuega talaʻi ma le faia o isi ma soo. O le mea moni, na fetalai Iesu o le a faia e ona soo galuega e sili atu, nai lo o galuega na ia faia! (Faitau le Ioane 14:12.) E leʻi uiga atu Iesu o le a faia e ona soo ni vavega, ae na uiga atu i le tetelē o oganuu, toʻatele tagata, ma umi le taimi e talaʻi ma aʻoaʻo atu ai ona soo, nai lo o ia.

15. O ā fesili e ao ona tatou fesili ifo ai iā i tatou lava, ma aiseā?

15 Afai o loo e galue i se galuega totogi, ia fesili ifo: ʻPe e iloa aʻu i le fale faigaluega o se tagata e galue mamafa? Pe ou te faia le mea e sili i laʻu galuega ma faamāeʻa i le taimi faatulagaina?’ Afai o le ioe lau tali, e maufaatuatuaina la oe e lou pule. Atonu foʻi o le a naunau tagata i le galuega e faalogo atu iā te oe, a o e faailoa atu le feʻau o le Malo. Ae e faapefea lau galuega talaʻi ma le aʻoaʻo atu? E tatau ona e fesili ifo iā te oe lava: Pe e iloa aʻu o se tagata e galue mamafa i le talaʻiga? Pe ou te sauniuni lelei mo uluaʻi asiasiga? Pe e vave ona ou toe foʻi e asi tagata fiafia? Po o fai e lē aunoa soʻu sao i vala eseese o le talaʻiga?’ Afai e mafai ona e tali mai ioe, o le a e olioli la i lau faiva.

 O LE Ā LAU VAAIGA I MĀLŌLŌGA?

16. O le ā le eseesega o le vaaiga a Iesu ma aposetolo i mālōlōga, ma le vaaiga a le toʻatele i aso nei?

16 Na silafia e Iesu e iai taimi na latou manaʻomia ai ma ona aposetolo sina mālōlōga. Peitaʻi, e toʻatele tagata i aso ua mavae ma aso nei, ua pei o le tamāloa mauʻoa o loo i le talafaatusa a Iesu. Na maumaututū le tamāloa i ona manatu: ʻIa ou faifaimālie, ia ʻai ma inu, ma fiafia.’ (Luka 12:19; 2 Timo. 3:4) Na faamuamua i lona olaga mālōlōga ma mea faafiafia. Peitaʻi, e leʻi faamuamua i olaga o Iesu ma ona aposetolo mea faafiafia.

O le iai o se vaaiga saʻo i galuega ma mālōlōga, o le a tatou uaʻi atu ai i le faia o galuega lelei e faafouina ai i tatou (Tagaʻi i le palakalafa e 17) *

17. E faapefea ona tatou faaaogā le taimi lea e mālōlō mai ai i galuega totogi?

17 I aso nei, e tatou te taumafai e faaaʻoaʻo iā Iesu, e ala i le faaaogā o le taimi lea e tatou te mālōlō mai ai i galuega totogi, ina ia mālōlō ai ma fai ni galuega lelei mo isi e ala i le talaʻi atu ma auai i sauniga faa-Kerisiano. O le mea moni, ona e matuā tāua iā i tatou le faia o isi ma soo ma auai i sauniga, e tatou te faia la taumafaiga uma ina ia auai e lē aunoa i na gaoioiga faaleagaga. (Epe. 10:24, 25) E tusa po o tatou iai i ni faigāmālōlōga, e tatou te pipii pea i la tatou faasologa faaleagaga o le auai e lē aunoa i sauniga po o fea lava o tatou i ai, ma saʻili avanoa e fai ai ni talanoaga faale-Tusi Paia ma i latou e tatou te feiloaʻi i ai.​—2 Timo. 4:2.

18. O le ā e finagalo lo tatou Tupu o Iesu Keriso e tatou te faia?

18 Maʻeu lo tatou lototalisapaia o le fetuutuunaʻi o lo tatou Tupu o Iesu Keriso, ma lana fesoasoani ia saʻo la tatou vaaiga i galuega ma mālōlōga! (Epe. 4:15) O lona finagalo ia tatou maua le mālōlōga e manaʻomia. E finagalo foʻi o ia e tatou te galulue mamafa e tausia o tatou manaʻoga faaletino, ma auai i le galuega e faafouina ai o le faia o isi ma soo. I le suʻesuʻega o loo sosoo mai, o le a tatou talanoa ai i le matafaioi a Iesu, o le faasaʻoloto mai o i tatou i le faapologaina i se tasi o faiga sauā.

PESE 38 E na te Faamalosia Oe

^ pala. 5 Ua aʻoaʻoina i tatou e le Tusi Paia i le auala e maua ai se vaaiga saʻo i galuega, ma mālōlōga. O le a talanoaina i lenei mataupu le Sapati faalevaiaso na tausia e le nuu o Isaraelu, lea o le a fesoasoani e iloilo ai la tatou vaaiga i galuega ma mālōlōga.

^ pala. 10 Talu ai na matuā faatāua e soo o Iesu le tulafono o le Sapati, na taofia lo latou sauniunia o mea manogi ma suāuu manogi mo le teuina o le tino o Iesu, seʻia mavae le aso Sapati.​—Luka 23:55, 56.

^ pala. 55 FAAMATALAGA O ATA: O loo ave e Iosefa lona aiga i le sunako i le aso Sapati.

^ pala. 57 FAAMATALAGA O ATA: O se tamā e faigaluega mo le tausiaina o lona aiga, e na te faaaogā lona taimi e mālōlō mai ai i galuega totogi ina ia auai i gaoioiga faaleagaga, e tusa pe e iai i ni faigāmālōlōga ma lona aiga.