Skip to content

Skip to table of contents

E Fiafia i Latou e Auauna i “le Atua Fiafia”

E Fiafia i Latou e Auauna i “le Atua Fiafia”

“E fiafia foʻi le nuu e fai Ieova ma o latou Atua!”​—SALA. 144:15.

PESE: 44, 125

1. Aiseā e fiafia ai Molimau a Ieova? (Tagaʻi i le ata i luga aʻe o le matua.)

O MOLIMAU A IEOVA o ni tagata fiafia. E mātaulia a latou sauniga, fonotaga, ma faatasiga faasamasamanoa i talanoaga fiafia ma le taliē faatasi. Aiseā e latou te fiafia ai? O le māfuaaga autū, ona e latou te iloa Ieova “le Atua fiafia,” ma o loo latou auauna ma taumafai e faataʻitaʻi iā te ia. (1 Timo. 1:11; Sala. 16:11) Talu ai o le Atua le puna o le fiafia, e finagalo la o ia ina ia tatou fiafia, ma ua ia aumaia le tele o māfuaaga e tatou te fiafia ai.​—Teu. 12:7; Fai. 3:12, 13.

2, 3. (a) O le ā e uiga i ai le fiafia? (e) Aiseā e faigatā ai ona tatou maua le fiafia?

2 Ae e faapefea oe? Po o e fiafia? Pe e mafai ona faateleina lou fiafia? E mafai ona faamatalaina le fiafia i le iai o faalogona lelei ma faamalieina i le olaga, po o le matuā olioli foʻi. Ua faailoa mai i le Tusi Paia e na o i latou e iai se faiā lelei ma Ieova e mafai ona mauaina le fiafia moni. Peitaʻi, ua faigatā ona maua i aso nei le fiafia. Aiseā?

3 E faigatā ona tatou maua le fiafia pe a maliu pe faateʻaina sē e pele iā i tatou, ma pe a tatala le faaipoipoga pe vāea foʻi mai i le galuega. E mafai foʻi ona aafia lo tatou fiafia, ona o faafitauli  i le aiga ma le leaga o fesootaʻiga, o tauemuga mai i ē e tatou te aʻoʻoga ma faigaluega faatasi, faapea sauāga po o le faafalepuipui ona o la tatou tapuaʻiga. E lē gata i lea, e aafia lo tatou fiafia ona o le faalētonu o le soifua mālōlōina, aafia i se maʻi faaumiumi, po o le lotomafatia. E ui i lea, o Iesu Keriso o “le Pule fiafia e toʻatasi,” e naunau o ia e aumaia faamāfanafanaga ma le fiafia i tagata. (1 Timo. 6:15; Mata. 11:28-30) I lana Lauga i le mauga, na ia taʻua ai nisi o uiga e mafai ona tatou maua ai le fiafia, e ui i tofotofoga faigatā mai i le lalolagi a Satani.

O LE MALOSI FAALEAGAGA O SE VALA TĀUA MO LE FIAFIA

4, 5. E faapefea ona tatou maua ma faatumauina le fiafia?

4 E matuā tāua le vala muamua na taʻua e Iesu, na fetalai o ia: “E fiafia o ē e naunau i mea faaleagaga, auā e fai mo i latou le malo o le lagi.” (Mata. 5:3) E faapefea ona iloa e tatou te naunau i mea faaleagaga? E ala lea i lo tatou aai i meaʻai faaleagaga, faatāua tapulaa faaleagaga, ma faamuamua la tatou tapuaʻiga i lo tatou Atua fiafia. O le faia faapea e mafai ona faateleina ai lo tatou fiafia, ma faamalosia ai lo tatou faatuatua i folafolaga a le Atua o le a faataunuuina. E lē gata i lea, o le a faalaeiauina i tatou i “le faamoemoe fiafia” o loo taʻua i le Afioga a le Atua mo tagata tapuaʻi moni.​—Tito 2:13.

5 O le atiaʻe o se faiā malosi ma Ieova, o se vala tāua lea mo le faatumauina o le fiafia. Na tusi le aposetolo o Paulo: “Ia olioli e lē aunoa i le Alii [o Ieova]. Ou te toe fai atu foʻi, Ia olioli!” (Fili. 4:4) Peitaʻi, e manaʻomia ona maua le atamai mai i le Atua, ina ia olioli ai i lenā faiā tautele. Ua faapea mai le Afioga a le Atua: “E fiafia le tagata ua maua le atamai, ma le tagata ua iai le faautaga loloto. O le laau foʻi o le ola iā i latou o ē e fetagofi atu i ai, ma e fiafia i latou o ē e pipii atu i ai.”​—Faata. 3:13, 18.

6. O le ā e faalagolago i ai lo tatou mauaina o le fiafia tumau?

6 Peitaʻi, ina ia faaauau ona tatou maua le fiafia tumau, e tāua ona faitau le Afioga a le Atua ma faatatau. Na faamautinoa mai e Iesu le tāua o le faatatau o mea ua tatou aʻoaʻoina, ina ua ia fetalai: “Afai ua outou iloa nei mea, e fiafia outou pe a outou faia.” (Ioa. 13:17; faitau le Iakopo 1:25.) O le ki lea mo le faamalieina o o tatou manaʻoga faaleagaga ma maua ai le fiafia tumau. Ae e faapefea ona tatou maua le fiafia, e ui i le tele o luʻi e mafai ona aveesea ai lo tatou fiafia? Seʻi o tatou iloiloina isi fetalaiga na sosoo ai a Iesu i lana Lauga i luga o le mauga.

O UIGA E MAFAI ONA MAUA AI LE FIAFIA

7. O le ā le itu e fiafia ai i latou e faanoanoa?

7 “E fiafia o ē e faanoanoa, auā e faamāfanafanaina i latou.” (Mata. 5:4) Atonu e taumānatu nisi: ʻE faapefea ona fiafia i latou o loo faanoanoa?’ E leʻi fetalai Iesu e faatatau i ē uma e faanoanoa, talu ai e mafai foʻi ona faanoanoa tagata amioleaga ona o faafitauli o loo latou fesagaʻia i nei “aso e sili ona faigatā.” (2 Timo. 3:1) Peitaʻi, nai lo o le vavalalata atu ai iā Ieova, ae e latou te taulaʻi atu i o latou lava tulaga faanoanoa, ma lē maua ai le fiafia. O lea, sa fetalai Iesu e faatatau i ē e naunau i mea faaleagaga. E latou te faanoanoa pe a vāai atu e teena e le toʻatele le Atua, ma lē mananaʻo e ola e tusa ma ona ala. E latou te amanaʻia foʻi lo latou tulaga agasala, ma  faigatā ua oo i ai ona o le tulaga agasala. O loo silafia e Ieova i latou o loo faanoanoa moni, ma ua ia faamāfanafanaina i latou e ala mai i lana Afioga, ma aumaia le fiafia ma le ola e faavavau.​—Faitau le Esekielu 5:11; 9:4.

8. E faapefea i le faaalia o le agamalu ona maua ai le fiafia?

8 “E fiafia o ē e agamalu, auā e fai mo latou tofi le lalolagi.” (Mata. 5:5) E faapefea i le faaalia o le agamalu ona maua ai le fiafia? E iai nisi sa inainā, faamisa, ma fia malolosi. Ae na latou faia suiga, ina ua latou aʻoaʻoina le poto saʻo e faatatau i le upu moni. Ua latou oofu i “le tagata fou” ma faaalia “le alofa mutimutivale, le agalelei, lotomaulalo, agamalu ma le faapalepale.” (Kolo. 3:9-12) O le iʻuga, ua latou maua le filemu, faiā lelei ma isi, ma le fiafia i le olaga. E lē gata i lea, ua folafola mai i le Afioga a le Atua o le a “fai mo latou tofi le lalolagi.”​—Sala. 37:8-10, 29.

9. (a) O le ā na uiga i ai Iesu ina ua fetalai o ē e agamalu, “e fai mo latou tofi le lalolagi”? (e) Aiseā e mafai ai ona fiafia ē e “fia aai ma fia inu i le amiotonu”?

9 O le ā na uiga i ai Iesu ina ua fetalai o ē e agamalu, “e fai mo latou tofi le lalolagi”? O soo faauuina o Iesu, o le a fai mo latou tofi le lalolagi pe a latou pule mai o ni tupu ma ositaulaga. (Faaa. 20:6) Peitaʻi, o le faitau miliona e lē mauaina le valaaulia i le lagi, o le a fai mo latou tofi le lalolagi pe a latou nonofo ai e faavavau i se tulaga lelei atoatoa, filemu, ma fiafia. O le ʻaufaauuina ma isi mamoe, sa faatatau i ai le fetalaiga a Iesu e “fiafia o ē e fia aai ma fia inu i le amiotonu.” (Mata. 5:6) O le a faamalieina atoatoa i le lalolagi fou lo latou fia aai faaleagaga ma le fia inu i le amiotonu. (2 Pete. 3:13) Pe a faaumatia e le Atua ē e amioleaga uma, o le a fiafia ē e amiotonu ona o le a lē toe iai ni solitulafono ma faiga lē tonu.​—Sala. 37:17.

10. O le ā le uiga o le alofa mutimutivale?

10 “E fiafia o ē e alolofa mutimutivale, auā e faaalia i ai le alofa mutimutivale.” (Mata. 5:7) O le alofa mutimutivale e uiga atu i le iai o faalogona māfana, faapelepele ma tigā alofa i se tasi o loo mafatia. Peitaʻi, e iai isi mea e aofia ai i le alofa mutimutivale nai lo o le tau ina iai o ni faalogona. Ua aʻoaʻo mai i le Tusi Paia, o le alofa mutimutivale e aofia ai le faia o se gaoioiga e fesoasoani atu ai i isi.

11. O le ā e tatou te aʻoaʻoina mai i le talafaatusa i le Samaria agalelei?

11 Faitau le Luka 10:30-37. O le talafaatusa a Iesu i le Samaria agalelei, ua faamatala mai ai i se auala matagofie le uiga o le alofa mutimutivale. O le tigā alofa ma le alofa mutimutivale o le tamāloa Samaria, na ia faia ai se gaoioiga e fesoasoani ai i lē na mafatia. Na uma loa ona faamatala e Iesu le talafaatusa, ona ia fetalai lea: “Inā alu ia, ma ia faapea ona e faia.” O lea, ia tatou fesili ifo: ʻPo o oʻu faaaʻoaʻo i le tamāloa Samaria? Po o oʻu faaalia le tigā alofa e pei o le tamāloa Samaria? Po o oʻu faaalia le alofa mutimutivale ma le agalelei i ē o loo mafatia? O se faataʻitaʻiga, pe e mafai ona ou fesoasoani i se isi i le faapotopotoga, se tuafafine ua maliu lana tane, po o se talavou e lē upu moni ona mātua? Po ou te tausolomua e “faamāfanafana i ē mafatia”?’​—1 Tesa. 5:14; Iako. 1:27.

Ia tausolomua e faaalia le alofa mutimutivale ma maua uma ai e tagata le fiafia (Tagaʻi i le palakalafa e 12)

12. E faapefea i le faaalia o le alofa mutimutivale ona tatou maua ai le fiafia?

12 E faapefea i le faaalia o le alofa mutimutivale ona tatou maua ai le fiafia? Pe a tatou alolofa mutimutivale i isi, e tatou te maua le fiafia mai i le foaʻi atu.  E tatou te maua foʻi le fiafia i le iloaina o loo tatou faafiafiaina Ieova. (Galu. 20:35; faitau le Eperu 13:16.) Na faapea mai Tavita e faatatau i se tasi e manatu mamafa i isi: “E leoleoina o ia e Ieova ma faaola iā te ia. E taʻua o ia o lē e fiafia i le lalolagi.” (Sala. 41:1, 2) Pe a tatou faaalia le alofa mutimutivale i isi, o le a tatou maua foʻi le alofa mutimutivale o Ieova ma le fiafia e tumau e faavavau.​—Iako. 2:13.

MĀFUAAGA E FIAFIA AI “Ē E LOTOMAMĀ”

13, 14. Aiseā e fiafia ai “ē e lotomamā”?

13 Na fetalai Iesu: “E fiafia o ē e lotomamā, auā e latou te iloa atu le Atua.” (Mata. 5:8) E tatau ona faatumauina le mamā o o tatou mafaufauga ma faanaunauga ina ia mamā ai pea o tatou loto. E tāua tele lea vaega, pe a tatou mananaʻo e talia e Ieova la tatou tapuaʻiga.​—Faitau le 2 Korinito 4:2; 1 Timo. 1:5.

14 E maua e i latou e lotomamā se tulaga lelei i luma o Ieova, auā na fetalai o ia: “E fiafia i latou ua tatā o latou ofu talaloa.” (Faaa. 22:14) O le ā le uiga o le ʻtatā o o latou ofu talaloa’? O le ʻtatā o ofu talaloa’ o le ʻaufaauuina, e uiga atu i le silasila o Ieova iā i latou o ni ē e mamā, ma foaʻi i ai le ola e lē mafai ona oti i le lagi, ma latou fiafia ai e oo i le faavavau. Ae mo le motu o tagata e toʻatele e faamoemoe e ola i le lalolagi, e uiga atu i le mafai ona avea o i latou ma uō a Ieova, ma e silasila o Ia iā i latou o ni ē e amiotonu. Ua faapea mai le Tusi Paia, “ua tatā o latou ofu talaloa, ma faapaʻepaʻeina i le toto o le Tamaʻi Mamoe.”​—Faaa. 7:9, 13, 14.

15, 16. E faapefea i ē e lotomamā ona “iloa atu le Atua”?

15 E faapefea i ē e lotomamā ona “iloa atu le Atua” ae ʻe lē mafai ona vaai se tasi i le Atua ma ola pea o ia’? (Eso. 33:20) O le upu Eleni ua faaliliuina “iloa,” e uiga atu i le “faaāta i le mafaufau, malamalama, ma le iloaina o se mea.” O i latou e iloa atu le Atua i ʻmata o o latou loto,’ e latou te iloa lelei o ia, ma talisapaia ona uiga. (Efe. 1:18) Na faaatagia atoatoa mai e Iesu uiga o lona Tamā, o lea na ia fetalai ai: “O lē ua vaai mai iā te aʻu, ua vaai foʻi o ia i le Tamā.”​—Ioa. 14:7-9.

16 O tagata tapuaʻi moni o le Atua, e lē gata e latou te iloa uiga o le Atua, ae e latou te iloa foʻi auala na fesoasoani ai le Atua iā i latou. (Iopu 42:5) E taulaʻi atu ʻmata o o latou loto’ i faamanuiaga ua folafola mai e le Atua mo i latou e tumau ona mamā ma faamaoni iā te ia. Ae mo le ʻaufaauuina o le a toetutū i le lagi, o le a latou vāai moni iā Ieova i le taimi e maua ai lo latou taui faalelagi.​—1 Ioa. 3:2.

 FIAFIA E UI I FAAFITAULI

17. Aiseā e fiafia ai ē e faatupuina le filemu?

17 Na sosoo ai ma le fetalai o Iesu: “E fiafia o ē e faatupuina le filemu.” (Mata. 5:9) E iai māfuaaga lelei e fiafia ai i latou e tausolomua e faatupu le filemu. Na tusi le soo o Iakopo: “Ua lūlūina ma le filemu le fua o le amiotonu, e i latou ua faatupuina le filemu.” (Iako. 3:18) Pe a iai se mea e faalētonu ai la tatou faiā ma se tasi i le faapotopotoga po o le aiga, e mafai ona tatou talosaga i le Atua e fesoasoani mai ina ia avea i tatou o ni ē e faatupuina le filemu. O le a fesoasoani lona agaga paia iā i tatou e faaalia uiga faa-Kerisiano, ma tatou maua ai le fiafia. Na faamatilatila e Iesu le tāua o le tausolomua e faatupu le filemu ina ua ia fetalai: “Pe afai foʻi e te avatu lau taulaga i le fata faitaulaga, ona e manatua ai lea o loo iai se mea e lē malie ai lou uso iā te oe, inā tuu ia o lau taulaga i luma o le fata faitaulaga, ae ia e alu e muaʻi faalelei ma lou uso, ona e sau ai lea ma avatu lau taulaga.”​—Mata. 5:23, 24.

18, 19. Aiseā e olioli ai pea Kerisiano e tusa pe e feagai ma sauāga?

18 “E fiafia outou pe a upuleagaina, sauāina, ma tuuaʻia pepelo outou i mea leaga uma ona o aʻu.” O le ā na uiga i ai le fetalaiga a Iesu? Na ia faapea atili mai: “Ia outou olioli ma fiafia, auā o loo i le lagi lo outou taui e tele; auā na faapena foʻi ona latou faasauā i perofeta o ē na muamua atu iā te outou.” (Mata. 5:11, 12) I le taimi na sasaina ai le ʻauaposetolo ma faasā le talaʻiga, “ona ō ese ai lea o i latou mai i luma o le Faamasinoga Sili, ua olioli.” E ui o le sasaina o i latou e lē o se mea e fiafia ai, ae na latou olioli ʻina ua taʻuaogāina i latou ia faaleagaina ona o le suafa o Iesu.’​—Galu. 5:41.

19 I aso foʻi nei, o loo olioli pea tagata o Ieova e tusa pe e sauāina ona o le suafa o Iesu, pe e feagai foʻi ma tofotofoga faigatā. (Faitau le Iakopo 1:2-4.) E pei o le ʻauaposetolo, e lē o se mea e fiafia ai pe a feagai ma sauāga. Ae pe a tatou faamaoni pea iā Ieova, o le a ia foaʻi mai le lototele ina ia tatou tumau ai. O se faaaʻoaʻoga, iā Aokuso i le 1944, na auina atu ai e taʻitaʻi o se pulega tautalatasi Henryk Dornik ma lona uso i se nofoaga mo faasalaga. E ui i lea, na faapea mai ē e tetee: “E matuā lē mafai lava ona tauanau i latou e faia so o se mea. E olioli i latou e tusa lava pe feoti o ni maturo.” Na faapea mai Henryk: “E ui e lē o iai soʻu faanaunauga e oti o se maturo, ae o oʻu puapuaga ma le lototele, ma le toʻafimālie ona o loʻu faamaoni iā Ieova, na ou olioli ai. . . . O aʻu tatalo mai i le loto na ou vavalalata atu ai iā Ieova, ma e mautinoa o ia o se Fesoasoani maufaatuatuaina.”

20. Aiseā e tatou te fiafia ai e auauna i lo tatou “Atua fiafia”?

20 E tusa pe e tatou te feagai ma sauāga, teteega mai i le aiga, o maʻi po o le soifua matua, ae e tatou te maua lava le fiafia pe a tatou iloa o loo faafiafiaina lo tatou “Atua fiafia.” (1 Timo. 1:11) E tatou te maua foʻi le fiafia ona o folafolaga matagofie uma a le Atua, o lē “e lē mafai ona tala pepelo.” (Tito 1:2) Pe a faataunuuina folafolaga a Ieova, o le a tatou lē toe manatua faafitauli ma faigatā o loo tatou fesagaʻia i le taimi lenei. Maʻeu le matagofie o faamanuiaga o le a tatou fiafia ai i le Parataiso, e sili atu i so o se mea e tatou te mafaufau i ai! O le mea moni, o le a ʻmatuā faafiafiaina i tatou ona o le tele o le filemu.’​—Sala. 37:11.