Alu i mataupu o loo iai

Alu i le lisi o mataupu

Ia Maufaatuatuaina Keriso lo Tatou Taʻitaʻi

Ia Maufaatuatuaina Keriso lo Tatou Taʻitaʻi

“E toʻatasi lo outou Taʻitaʻi o le Keriso lea.”​—MATA. 23:10.

PESE: 16, 14

1, 2. O ā luʻi na feagai ma Iosua ina ua maliu Mose?

NA MANATUA pea e Iosua le fetalaiga a Ieova e faapea: “Ua maliu laʻu auauna o Mose; o lea ia e tulaʻi ma sopoʻia atu lenei vaitafe o Ioritana, o oe ma lenei nuu uma, i le laueleele ou te foaʻiina atu iā i latou.” (Iosua 1:1, 2) Na vave ona suia le tulaga o mea mo Iosua, o lē na avea ma auauna a Mose mo le toetoe 40 tausaga.

2 Talu ai ua leva ona avea Mose ma taʻitaʻi o Isaraelu, na ono taumānatu la Iosua po o le a faapeʻī le tali mai a tagata o le Atua i lana taʻitaʻiga. (Teu. 34:8, 10-12) Ua taʻua i se lomifefiloi faale-Tusi Paia e faatatau i le Iosua 1:1, 2 e faapea: “I aso anamua ma aso nei, pe a sui le taʻitaʻi o se atunuu, o se tasi lea o taimi e sili ona faigatā mo le saogalemu o ona tagatānuu.”

3, 4. E faapefea ona tatou iloa e leʻi sesē le maufaatuatuaina e Iosua o le Atua, ma o le ā e tatou te ono fesili ifo ai iā i tatou lava?

3 E lē taumatea na lagona e Iosua le fefe, ae ina ua mavae ni nai aso, na ia faia loa se gaoioiga. (Iosua 1:9-11) E leʻi sesē le maufaatuatuaina e Iosua o le Atua. E pei ona taʻua i le Tusi Paia, na taʻitaʻia e Ieova Iosua ma Lona nuu o Isaraelu, e ala i se agelu. Ua talafeagai  ona faapea atu, o lenā agelu o le Upu, o le Alo ulumatua o le Atua.​—Eso. 23:20-23; Ioa. 1:1.

4 O le fesoasoani a Ieova na faigofie ai i tagata Isaraelu ona lagolagoina le suia o lo latou taʻitaʻi iā Iosua, ina ua maliu Mose. Ua tatou ola foʻi i taimi o suiga iloga, ma atonu e tatou te taumānatu, ʻA o faatelevave pea le agaʻigaʻi i luma o le faalapotopotoga a le Atua, pe e iai ni māfuaaga e tatau ona tatou maufaatuatuaina ai Iesu lo tatou Taʻitaʻi ua tofia?’ (Faitau le Mataio 23:10.) Seʻi mātau le auala na saunia ai e Ieova le taʻitaʻiga maufaatuatuaina i aso ua mavae a o faia suiga.

TAʻITAʻIA LE NUU O LE ATUA I KANANA

5. O ai na feiloaʻi ma Iosua ina ua lata i Ieriko? (Tagaʻi i le ata i luga aʻe o le matua.)

5 E leʻi leva talu ona sopoʻia e le nuu o Isaraelu le vaitafe o Ioritana, ae tupu loa se mea e leʻi faatalitalia. Na feiloaʻi Iosua ma se tagata o loo uu se pelu i lona lima, i se nofoaga e lata i Ieriko. E leʻi iloa e Iosua po o ai lea tagata. O lea na ia fesili atu ai: “Pe e te ʻau ma i matou po o matou fili?” Na faateʻia Iosua i le faailoa mai e lea tagata toa, o ia “o le perenise [po o le taʻitaʻi] o le ʻautau a Ieova,” ma ua nofosauni o ia e puipuia tagata o le Atua. (Faitau le Iosua 5:13-15.) E ui lava o loo faaalia i isi mau o loo fetalai tuusaʻo mai Ieova iā Iosua, ae e lē taumatea sa fetalai mai Ieova e ala mai i se agelu, e pei ona masani ai i taimi ua teʻa.​—Eso. 3:2-4; Iosua 4:1, 15; 5:2, 9; Galu. 7:38; Kala. 3:19.

6-8. (a) Aiseā na foliga atu ai e leai se aogā o nisi o faatonuga a Ieova i le vaaiga a tagata? (e) Na faapefea ona iloa le atamai ma le talafeagai o le taimi na aumaia ai na faatonuga? (Tagaʻi foʻi i le faaopoopoga i le pito i lalo.)

6 E manino faatonuga na tuuina mai e lenā agelu iā Iosua, i le auala e faatoʻilalo ai le aai o Ieriko. Na ono foliga mai i le taimi muamua e lē atamai nisi o na faatonuga. O se faaaʻoaʻoga, na faatonuina e Ieova ina ia peritomeina tane uma, o se gaoioiga o le a lē mafai ai ona latou tau mo ni nai aso. Po o le taimi talafeagai lea e peritomeina ai nei tane malolosi?​—Kene. 34:24, 25; Iosua 5:2, 8.

7 Atonu na mafaufau nei fitafita Isaraelu, po o le a faapefea ona puipuia o latou aiga pe a osofaʻia e nei fili malolosi lo latou togālauapi. Peitaʻi, na faafuaseʻi ona suia le tulaga o mea. Na maua tala “ua matuā puipuia le aai o Ieriko ona o le fanauga a Isaraelu, e leai se tasi na toe alu i fafo po o se tasi foʻi na sau i totonu.” (Iosua 6:1) Pe e leʻi faamalosia ai lo latou faatuatuaina o faatonuga a le Atua, ona o le suia faafuaseʻi o le tulaga o mea?

8 Na faatonuina foʻi tagata Isaraelu e aua le faatoʻilaloina Ieriko, ae ia faatasi ona savavali faataamilo i le aai mo aso e ono. Ae pe a oo i le aso lona fitu, ona faafitu lea ona savavali faataamilo i le aai. Na ono manatu nisi o fitafita, ʻUa maʻimau lo matou taimi ma le malosi.’ Peitaʻi, na silafia lelei e Ieova le Taʻitaʻi o Isaraelu le gaoioiga na ia faia. O le mulimuli o tagata Isaraelu i ana faatonuga, e lē gata na faamalosia ai lo latou faatuatua, ae e leʻi manaʻomia ai foʻi ona latou tau ma tagata totoa o Ieriko.​—Iosua 6:2-5; Epe. 11:30. *

9. Aiseā e tatau ai ona tatou mulimuli i faatonuga mai i le faalapotopotoga a le Atua? Aumai se faataʻitaʻiga.

9 O le ā e tatou te aʻoaʻoina mai i lenā tala? E ono iai taimi e tatou te lē malamalama atoatoa ai i māfuaaga e faia ai e le faalapotopotoga a Ieova ni fuafuaga fou. O se faataʻitaʻiga, atonu na tatou mafaufau i le  taimi muamua pe e iai se aogā o le faaaogā o masini faaonapōnei mo suʻesuʻega a le tagata lava ia, i le faiva, ma sauniga. Ae o lea ua tatou iloa nei aogā o le faaaogā o nei masini pe a mafai. O le vaaia o iʻuga lelei o na suiga e ui e tatou te leʻi mautinoa ai i le taimi muamua, ua faamalosia ai lo tatou faatuatua ma le autasi.

TAʻITAʻIGA A KERISO I LE ULUAʻI SENITURI

10. O ai na faatonutonuina le fono tāua sa faia e le vaega pule i Ierusalema?

10 E pe ā ma le 13 tausaga talu ona liliu Konelio e avea ma Kerisiano, ae na tausisi pea nisi o Kerisiano Iutaia i le peritomeina. (Galu. 15:1, 2) Ina ua fevaevaeaʻi uso i Anetioka, na faia loa se fuafuaga ina ia ave e Paulo lea mataupu i le vaega pule i Ierusalema. Ae o ai na aumaia lenā faatonuga? Na taʻua e Paulo: “Na ou alu aʻe ona o se faaaliga mai i le lagi.” E manino mai, na faatonutonuina e Keriso le tulaga o mea ina ia mafai ai e le vaega pule ona foʻia lenā finauga.​—Kala. 2:1-3.

Na iai faamaoniga o le taʻitaʻiga a Keriso i le uluaʻi senituri (Tagaʻi i le palakalafa e 10, 11)

11. (a) O le ā le manatu sa iai pea i nisi o Kerisiano Iutaia e faatatau i le peritomeina? (e) Na faapefea ona tofotofoina le lotomaulalo o Paulo e lagolagoina le faatonuga a toeaina i Ierusalema? (Tagaʻi foʻi i le faaopoopoga i le pito i lalo.)

11 E ala i le taʻitaʻiga a Keriso, na faailoa manino atu ai e le vaega pule e lē manaʻomia ona peritomeina Kerisiano e lē o ni Iutaia. (Galu. 15:19, 20) Ae ina ua mavae ni nai tausaga, na faaauau pea ona peritomeina e le toʻatele o Kerisiano Iutaia a latou fanau. Ina ua faalogo toeaina i Ierusalema i le talafeaveaʻi e faapea, e lē o tausisia e Paulo le Tulafono a Mose, na latou avatu ai iā te ia ni faatonuga e na te leʻi faatalitalia. * (Galu. 21:20-26) Na latou faatonuina o ia ina ia ave ni tamāloloa se toʻafā i le malumalu ina ia faamamāina i latou, ma iloa ai e tagata na ʻtausia e Paulo le Tulafono.’ Na ono fesiligia e Paulo le atamai o lenā faatonuga, ma finau atu o le pogai o le faafitauli o Kerisiano Iutaia e leʻi malamalama i le mataupu o le peritome. Nai lo o lea, na ia lagolagoina ma  le lotomaulalo le faaiʻuga a toeaina lea e faaauiluma ai le autasi o uso talitonu. Ae e tatou te ono tuufesili, ʻAiseā e leʻi vave ai ona taulima e Iesu lenei mataupu, ae ua faalēaogāina e lona maliu le Tulafono a Mose?’​—Kolo. 2:13, 14.

12. O ā māfuaaga atonu e leʻi vave ai ona taulima e Keriso le mataupu e faatatau i le peritomeina?

12 E iai i latou e manaʻomia se taimi ina ia fetuutuunaʻi ai pe a iai se suiga i le malamalamaga. Na manaʻomia e Kerisiano Iutaia se taimi e toe fetuunaʻi ai o latou manatu. (Ioa. 16:12) Na faigatā i nisi ona talia le manatu, e lē o toe avea le peritomeina ma faailoga o se faiā faapitoa ma le Atua. (Kene. 17:9-12) Ae o le fefefe o nisi neʻi sauāina i latou, na latou faatalatū ai e matilatila ese mai i tagata Iutaia. (Kala. 6:12) Peitaʻi, a o faagasolo taimi na saunia mai ai e Keriso isi faatonuga atili, e ala mai i tusi a Paulo.​—Roma 2:28, 29; Kala. 3:23-25.

TAʻITAʻIA PEA E KERISO LANA FAAPOTOPOTOGA

13. O le ā e mafai ona fesoasoani iā i tatou e talisapaia ai le taʻitaʻiga a Keriso i aso nei?

13 Pe afai e tatou te lē malamalama atoatoa i māfuaaga ua faia ai nisi o suiga i le faalapotopotoga, e ao ona tatou manatunatu i le auala na taʻitaʻia ai e Keriso tagata o le Atua i aso ua mavae. E tusa po o taimi o Iosua po o le uluaʻi senituri, ae na faaauau pea ona saunia e Keriso faatonuga atamai ina ia puipuia ai tagata o le Atua, faamalosia lo latou faatuatua, ma faatumauina ai lo latou autasi.​—Epe. 13:8.

14-16. Ua faapefea ona atagia mai le manatu mamafa o Keriso i lo tatou itu faaleagaga, e ala i faatonuga mai i “le pologa faamaoni ma le faautauta”?

14 O faatonuga ua aumai i le taimi tatau e ala mai i “le pologa faamaoni ma le faautauta,” ua atagia mai ai le manatu mamafa o Iesu i lo tatou itu faaleagaga. (Mata. 24:45) Ua faapea mai Marc o se tamā e toʻafā lana fanau: “O loo taumafai Satani e faavaivaia faapotopotoga e ala i le osofaʻia o aiga. Ae o faalaeiauga ina ia faia pea tapuaʻiga a le aiga i vaiaso taʻitasi, ua faamamafa mai ai i ulu o aiga le feʻau lenei: ia puipuimalu o latou aiga.”

15 Pe a tatou malamalama i le auala o loo taʻitaʻia ai i tatou e Keriso, e tatou te iloa foʻi lona naunautaʻiga ina ia tatou agaʻigaʻi pea i luma faaleagaga. Ua faapea mai Patrick o loo auauna o se toeaina: “I le taimi muamua, na lagona e nisi le lotovaivai e feiloaʻi i ni vaega toʻalaiti mo talaʻiga i faaiʻuga o vaiaso. Ae o lenei faatulagaga ua faaalia ai se tasi o uiga autū o Iesu, o lona naunau moni lea i tagata faatauvaa. Ua lagona e uso ma tuafāfine e matamumuli pe seāseā talaʻi, le matuā talisapaia ma le tāua o i latou. O le iʻuga, ua latou tuputupu aʻe ai faaleagaga.”

16 E lē gata e tausia e Keriso o tatou manaʻoga faaleagaga, ae e fesoasoani mai foʻi ina ia tatou taulaʻi atu pea i le galuega e sili ona tāua o loo faia i le lalolagi i aso nei. (Faitau le Mareko 13:10.) E taumafai lava André o se toeaina fou, e mulimuli i so o se faatonuga fou e aumaia e le faalapotopotoga a le Atua. Ua faapea mai o ia: “O le faaitiitia o i latou e galulue i ofisa o lālā, ua faamanatu mai ai le faanatinati o le taimi ua iai, ma e manaʻomia ona faaaogā lo tatou malosi i le galuega talaʻi.”

LAGOLAGO MA LE FAAMAONI LE TAʻITAʻIGA A KERISO

17, 18. Aiseā e tāua ai le taulaʻi atu i aogā ua maua mai i le fetuutuunaʻi i ni suiga na faia talu ai nei?

17 O le taʻitaʻiga o loo tatou maua mai iā Iesu Keriso lo tatou Tupu tofia, o le a fesoasoani iā i tatou i le taimi lenei ma le lumanaʻi. O lea, ia tatou taulaʻi i aogā ua maua mai i le fetuutuunaʻi i ni suiga na faia talu ai nei. Atonu o se mea lelei le talanoaina i la outou tapuaʻiga a le aiga, o  auala ua aogā ai iā te outou suiga ua faia i sauniga i vaiaso taʻitasi po o le faiva.

Po o e fesoasoani i lou aiga ma isi ina ia piiama atu pea i le faalapotopotoga a Ieova? (Tagaʻi i le palakalafa e 17, 18)

18 Pe a tatou malamalama i le māfuaaga ua aumaia ai e le faalapotopotoga a Ieova ni faatonuga faapea o latou aogā, e mautinoa o le a tatou fiafia foʻi e mulimuli i na faatonuga. E tatou te lotofaafetai i le tele o tupe ua sefe ona o le faaitiitia o lomiga ua lomiaina, ma le faaaogā o masini faaonapōnei. O le iʻuga, ua mafai ai ona faalautele atu le galuega o le Malo i le lalolagi aoao. O le manatuaina o lenā mea, o le a tatou faaaogā ai lomiga, ata, ma vitiō i luga o masini faaonapōnei i le tele e mafai ai. O se tasi lea o auala e tatou te lagolagoina ai Keriso, i le faaaogā tatau lea o foaʻi tautupe a le faalapotopotoga.

19. Aiseā e tatau ai ona tatou lagolagoina le taʻitaʻiga a Keriso?

19 Pe a tatou lagolagoina ma le faamaoni le taʻitaʻiga a Keriso, e tatou te faamalosia ai le faatuatua o isi ma saosaolaumea i lo tatou autasi. O le faamatalaga lenei a André e tusa ai ma le faaitiitia o aiga Peteli i le lalolagi aoao: “O uiga lelei na faaalia e i latou sa galulue muamua i le Peteli e tusa ai ma lenā suiga, na atili faamalosia ai loʻu faatuatua ma loʻu faaaloalo iā i latou. E latou te piiama atu pea i le kariota a Ieova, e ala i le olioli i so o se tofiga e tuuina atu iā i latou.”

IA MAUFAATUATUAINA LO TATOU TAʻITAʻI

20, 21. (a) Aiseā e mafai ai ona tatou maufaatuatuaina lo tatou Taʻitaʻi o Keriso? (e) O le ā le fesili o le a taliina i le mataupu o loo sosoo mai?

20 E lē o toe umi ona “manumalo aʻiaʻi” lea o lo tatou Taʻitaʻi tofia o Iesu Keriso, ma ia faataunuuina “mea mataʻutia.” (Faaa. 6:2; Sala. 45:4) Ae mo le taimi lenei, o loo ia sauniunia tagata o le Atua mo le lalolagi fou, lea o le a faia ai so tatou sao i le aʻoaʻoina o i latou o le a toetutū mai, faapea le toe faafoʻisia o le lalolagi ina ia avea ma parataiso.

21 O le a taʻitaʻiina atu i tatou i le lalolagi fou e lo tatou Tupu faauuina, pe afai e faaauau ona tatou matuā maufaatuatuaina o ia e ui i suiga i o tatou tulaga. (Faitau le Salamo 46:1-3.) E iai taimi e faigatā ai ona tatou talia ni suiga, aemaise pe afai o ni suiga e leʻi faatalitalia. E faapefea la ona tatou maua pea le filemu o le mafaufau ma matuā maufaatuatuaina Ieova? O le a taliina lenā fesili i le mataupu o loo sosoo mai.

^ pala. 8 Na maua e tagata e suʻesuʻeina toega o mea i le eleele le tele o faaputuga saito mai i toega o le aai o Ieriko. Ua faaalia ai e leʻi umi se taimi na vagaia ai le aai. Na faatonuina tagata Isaraelu e aua neʻi o latou aveesea ni meaʻai mai i le aai o Ieriko. O lea, e fetaui lo latou faatoʻilaloina o le aai ma le vaitaimi o le seleselega lea na anoanoaʻi ai meaʻai na maua i le laueleele.​—Iosua 5:10-12.