Skip to content

Skip to table of contents

 SUʻESUʻEGA 48

ʻIa Outou Faauma Ona Fai’

ʻIa Outou Faauma Ona Fai’

ʻIa outou faauma ona fai.’​—2 KORI. 8:11.

PESE 35 Ia Faamautinoa Mea e Sili Ona Tāua

AOTELEGA *

1. O le ā ua tuu mai e Ieova iā i tatou e fai?

UA TUU mai e Ieova iā i tatou e filifili le auala e tatou te ola ai. O loo ia aʻoaʻoina i tatou i auala e faia ai filifiliga lelei, ma fesoasoani mai ia tatou taulau i le faia filifiliga e faafiafiaina ai o ia. (Sala. 119:173) O le tele e tatou te faatatauina ai le atamai o loo i le Afioga a le Atua, o lo tatou atamamai foʻi lenā i le faia o filifiliga lelei.​—Epe. 5:14.

2. O ā faafitauli e tatou te ono fesagaʻia pe a māeʻa ona faia se filifiliga?

2 E tusa lava pe e tatou te faia se filifiliga atamai, ae atonu e faigatā ona tatou faataunuuina. Seʻi mātau nisi o faaaʻoaʻoga nei: O se uso talavou na filifili e faitau le Tusi Paia atoa. Na sologa lelei lana faasologa i ni nai vaiaso, ae teʻi ua lē toe faaauauina. Na filifili se tuafafine e paeonia sauatoa, ae na faatuatuai i le aso e amata ai. Na ioe faatasi le ʻautoeaina e fai asiasiga faaleoleo mamoe i le faapotopotoga, ae ina ua mavae le tele o masina e leʻi faataunuuina lava. E ui e eseese nei tulaga, ae e iai le mea na tutusa ai. E latou te leʻi faataunuuina mea na filifili e fai. E faapena foʻi le faafitauli na feagai ma uluaʻi Kerisiano i Korinito. Ia mātau po o le ā e tatou te aʻoaʻoina mai iā i latou.

3. O le ā le filifiliga na faia e le faapotopotoga i Korinito, ae o le ā na tupu?

3 Na faia e le faapotopotoga i Korinito se filifiliga tāua i le pe ā o le 55 T.A. Na latou logotala o loo feagai uso i Ierusalema ma Iutaia ma mafatiaga ma le mativa, ma o loo aoina tupe a isi faapotopotoga e fesoasoani ai iā i latou. Ona o le agalelei ma le limafoaʻi o uso i Korinito, na filifili ai le faapotopotoga e fai  se foaʻi e fesoasoani ai. Na latou fesili foʻi iā Paulo i le auala e fesoasoani ai. Na avatu e Paulo i le faapotopotoga faatonuga, ma tofia Tito e fesoasoani i le aoina o le foaʻi. (1 Kori. 16:1; 2 Kori. 8:6) I masina mulimuli ane, na iloa e Paulo e leʻi faia lava e le faapotopotoga i Korinito le mea na latou filifili e fai. O le iʻuga, e leai sa latou meaalofa na saunia i le taimi na tatau ona ave faatasi ai ma foaʻi a isi faapotopotoga i Ierusalema.​—2 Kori. 9:4, 5.

4. E pei ona faamatilatila i le 2 Korinito 8:7, 10, 11, o le ā na faalaeiau e Paulo le faapotopotoga i Korinito e fai?

4 Na faia e le faapotopotoga i Korinito se filifiliga lelei, ma na faamālō i ai Paulo i le malosi o lo latou faatuatua, ma lo latou naunau e foaʻi. Ae na ia faalaeiauina foʻi i latou ina ia faataunuu le filifiliga na latou faia. (Faitau le 2 Korinito 8:7, 10, 11.) Ua tatou aʻoaʻoina mai i le mea na tupu i le faapotopotoga i Korinito, e oo foʻi i Kerisiano faamaoni, e ono faigatā iā i latou ona faataunuu ni filifiliga lelei.

5. O ā fesili o le a tatou taliina?

5 Atonu e i ai taimi e ono faigatā ai iā i tatou ona faataunuu ni filifiliga na tatou faia, e pei ona tupu i le faapotopotoga i Korinito. Aiseā? Ona e tatou te lē lelei atoatoa, e tatou te ono faatuatuai ai. Po o ni tulaga lē maʻalofia foʻi, atonu e faigatā ai mo i tatou ona faataunuu mea na tatou filifili e fai. (Fai. 9:11; Roma 7:18) E faapefea ona toe iloilo se filifiliga na tatou faia, ma iloa pe manaʻomia ona toe suia? E faapefea ona tatou faamautinoa ua faataunuu filifiliga na tatou faia?

A O LEʻI FAIA SE FILIFILIGA

6. O le ā le taimi e ono manaʻomia ai ona toe sui a tatou filifiliga?

6 E tatou te lē toe suia nisi filifiliga tāua na tatou faia. O se faaaʻoaʻoga, e tatou te pipii pea i la tatou filifiliga ia auauna iā Ieova, ma ia faamaoni pea i a tatou paaga faaipoipo. (Mata. 16:24; 19:6) Ae o isi filifiliga, atonu e manaʻomia ona sui. Aiseā? Talu ai e suia tulaga o mea. O le ā e mafai ona fesoasoani iā i tatou e faia ai filifiliga e sili ona lelei?

7. O le ā e tatau ona tatou tatalo ai, ma aiseā?

7 Ia tatalo mo le atamai. Na faagaeeina e Ieova Iakopo e tusi: “Pe afai ua leai se atamai i se tasi o outou, inā ōle atu pea ia i le Atua, auā o ia na te foaʻi tele mai.” (Iako. 1:5) O i tatou uma, e iai taimi e “leai [ai] se atamai.” O lea, ia faalagolago iā Ieova pe a fai pe toe iloilo foʻi se filifiliga. O le faia faapea, o le a fesoasoani ai Ieova iā te oe e fai filifiliga atamai.

8. O ā saʻiliʻiliga e tatau ona tatou faia a o leʻi faia se filifiliga?

8 Ia faia ni saʻiliʻiliga māeʻaeʻa. Ia saʻili i le Afioga a le Atua, suʻesuʻe i lomiga mai i le faalapotopotoga a Ieova, ma talanoa atu i tagata e te maua mai ai fautuaga atamai. (Faata. 20:18) E tāua na saʻiliʻiliga a o leʻi faia se filifiliga e sui se galuega, siitia i se isi nofoaga, po o le filifili foʻi o se aʻoga ina ia maua ai se tomai e suʻe ai se galuega e lagolago ai lau faiva.

9. E faapefea ona maua aogā pe a tatou faamaoni iā i tatou lava?

9 Ia iloilo le uunaʻiga. E tāua iā Ieova le uunaʻiga e tatou te faia ai mea. (Faata. 16:2) O lona finagalo ia tatou faamaoni i mea uma. O lea, pe a fai filifiliga, ia faamaoni iā i tatou, ia faamaoni foʻi i isi, e faatatau i uunaʻiga e tatou te faia ai mea. Pe afai e tatou te lē faamaoni, atonu la o le a faigatā ona tatou faia le mea na tatou filifili e fai. O se faaaʻoaʻoga, atonu e filifili se uso e paeonia sauatoa. Ae ina ua māeʻa sina taimi, na faigatā iā te ia ona ausia itula e manaʻomia, ma ua leai sona fiafia i le faiva. Atonu na ia manatu o le māfuaaga autū na paeonia ai, ona na manaʻo e faafiafia Ieova. Ae pe lē o le uunaʻiga autū  lava na paeonia ai le uso, ina ia faafiafia ai ona mātua po o se isi e fiafia i ai?

10. O le ā e tatou te manaʻomia ina ia fai ai suiga?

10 Seʻi iloilo le tulaga o se tagata suʻesuʻe ua filifili e tuu lana ulaula. Na faigatā i le taimi muamua, ae na sologa lelei i se vaiaso pe lua, peitaʻi na toe ulaula foʻi. Ae i le iʻuga, na taulau manuia! Na ia tuua lea masaniga leaga, ona o lona alofa mo Ieova ma lona naunau e faafiafia o ia.​—Kolo. 1:10; 3:23.

11. Aiseā e tatau ai ona iai ni o tatou sini maʻoti?

11 Ia iloa lelei ou sini. O le iai o ni ou sini maʻoti, o le faigofie foʻi lenā ona e ausiaina. O se faaaʻoaʻoga, atonu e te filifili e faitau e lē aunoa le Tusi Paia. Ae afai e leʻi faia sau faasologa, atonu la e faigatā ona e ausia lenā sini. * Pe atonu foʻi e filifili toeaina e faia e lē aunoa asiasiga faaleoleo mamoe i le faapotopotoga, ae ina ua mavae sina taimi e latou te leʻi faia lava. Ina ia mafai ona faataunuuina na asiasiga, e tatau ona latou fesili ifo: “Po ua tatou iloa uso ma tuafāfine e aogā patino i ai nei asiasiga? Pe ua faatulaga se taimi patino e asia ai i latou?”

12. Atonu o le ā e manaʻomia ona e faia, ma aiseā?

12 Ia iloa mea e mafai ona e faia. E leai se tasi o i tatou e iai se taimi, meafaitino, po o le malosi e fai ai mea uma e tatou te mananaʻo ai. O lea, ia iloa mea e gata ai lou malosi ma ia paleni. Pe a talafeagai, atonu e manaʻomia ona sui se filifiliga ua e iloa e lē mafai ona e faataunuuina. (Fai. 3:6) Seʻi faapea na e iloiloina lau filifiliga, fai ni fetuunaʻiga manaʻomia ma e iloa ane ai e mafai ona e faataunuuina. Ia iloilo vala e lima e mafai ona fesoasoani iā te oe e faataunuu ai filifiliga na e faia.

VALA E FAATAUNUUINA AI AU FILIFILIGA

13. E faapefea ona e maua le malosi e te manaʻomia e faataunuu ai se filifiliga?

13 Ia tatalo mo le malosi e gaoioi ai. E foaʻi atu e Ieova iā te oe “le malosi” e gaoioi ma faataunuu ai lau filifiliga. (Fili. 4:13) O lea, ia talosaga atu iā Ieova mo lona agaga paia, ina ia foaʻi atu iā te oe le malosi e te manaʻomia. Ia tatalo pea, e tusa pe e foliga mai e lē o tali mai Ieova i au tatalo. E pei ona taʻua e Iesu: “Ia talosaga atu pea, ona foaʻiina mai lea [o le agaga paia] iā te outou.”​—Luka 11:9, 13.

14. E faapefea ona fesoasoani iā te oe le mataupu silisili o loo i le Luka 14:28, e faataunuu ai lau filifiliga?

14 Ia fai se faasologa. (Faitau le Luka 14:28) Ina ia uma ona fai se galuega na e amataina, e manaʻomia ona iai sau faasologa. E manaʻomia foʻi ona e mulimuli i lenā faasologa. E faapena foʻi pe a e faia se filifiliga, ia tusi se lisi o vala uma e manaʻomia ona fai, ina ia faataunuu ai lenā filifiliga. Pe afai e faigatā se galuega, ia vaevae i ni tamaʻi vaega ina ia faigofie ai ona e iloa mea ua uma ona fai. Na faalaeiau e Paulo Kerisiano i Korinito, ina ia tuu ese se mea mo a latou foaʻi i “aso muamua uma o le vaiaso,” nai lo o le faatali ma tau aoao tupe pe a taunuu atu. (1 Kori. 16:2) O le vaevaeina o se galuega telē i ni tamaʻi vaega, e mafai ona ʻalofia ai le lotovaivai.

15. O ā mea e mafai ona fai pe a māeʻa ona fai se faasologa?

15 Pe a tusi i lau faasologa vala uma o loo e fuafua e fai, o le a faigofie foʻi ona e faia na mea. (1 Kori. 14:40) O se faaaʻoaʻoga, ua faatonuina le ʻautoeaina e tofia se toeaina e faamaumau faaiʻuga taʻitasi e latou te faia. E faamaumau foʻi i lalo toeaina ua tofia e faatino faaiʻuga na fai, ma le taimi e māeʻa ai. Pe a mulimuli toeaina i lenei taʻiala, o le a faigofie  foʻi la ona faataunuuina mea ua latou filifili e fai. (1 Kori. 9:26) E mafai foʻi ona e faia faapea i au mea e fai i aso taʻitasi. O se faaaʻoaʻoga, e mafai ona sauniuni sau lisi o mea e fai i aso taʻitasi ma ia faatulaga i lau lisi mea e manaʻomia ona faamuamua. O le faia faapea, o le a faataunuu ai mea na e fuafua e fai, ma o le a tele ai foʻi mea e mafai ona faia i se taimi puupuu.

16. O le ā le mea e manaʻomia ona fai ina ia faataunuu ai lau filifiliga, ma e faapefea ona lagolagoina e le Roma 12:11 lenā manatu?

16 Ia toʻaga. E manaʻomia ona e galue malosi, ina ia pipii ai i lau faasologa ma faataunuu ai. (Faitau le Roma 12:11.) Na taʻu atu e Paulo iā Timoteo ia “toʻaga pea”ma ia “tumau” ona avea ma faiaʻoga lelei. E mafai foʻi ona faatatau le fautuaga lenei a Paulo i so o se sini faaleagaga e tatou te mananaʻo e fai.​—1 Timo. 4:13, 16.

17. E faapefea ona fesoasoani iā i tatou le Efeso 5:15, 16 ina faataunuu ai se mea ua tatou filifili e fai?

17 Ia faaaogā lelei lou taimi. (Faitau le Efeso 5:15, 16.) Ia filifili se taimi e faataunuu ai le mea ua e filifili e fai ma pipii i ai. ʻAlofia le faatalitali i le taimi e sili ona talafeagai e fai ai, auā e lē ono oo mai lenā taimi. (Fai. 11:4) Ia faaeteete, aua le faatagaina mea e lē tāua tele, e maʻimau ai lou taimi ma le malosi lea e manaʻomia mo mea e sili ona tāua. (Fili. 1:10) Pe a mafai, ia filifili se taimi e tau leai ai nisi e faalavelave atu iā te oe. Ia taʻu atu i isi e te manaʻomia le taimi e te uaʻi lelei ai i le mea o loo e faia. E lelei foʻi pe a tapē lau telefoni ma siaki au imeli po o auala o fesootaʻiga i se isi taimi. *

18-19. Pe a feagai ma faigatā, o le ā e fesoasoani iā te oe ina ia e taumafai ai pea e faataunuu mea na e filifili e fai?

18 Ia uaʻi atu i aogā e maua pe a faataunuu se filifiliga. E pei le iʻuga po o le taunuuga o sau filifiliga, o se nofoaga e taunuu i ai lau malaga. Pe a e manaʻo moni lava e taunuu i lenā nofoaga, e mafai lava ona faaauau lau malaga e tusa po ua tapuni se auala, ma ua manaʻomia ai ona e ui atu i se isi auala. I se tulaga talitutusa, pe a tatou uaʻi atu i iʻuga aogā o a tatou filifiliga, e tatou te lē fiugofie pe a feagai ma faafitauli.​—Kala. 6:9.

19 E faigatā ona fai filifiliga lelei, ma o se luʻi le faataunuuina o na filifiliga. Ae o le fesoasoani a Ieova, o le a e maua ai le atamai ma le malosi e te manaʻomia, e faataunuu ai lau filifiliga.

PESE 65 Ia Agaʻi i Luma!

^ pala. 5 Pe na e salamō i ni filifiliga sa e faia? Pe na iai ni taimi na faigatā ai iā te oe ona fai ni filifiliga lelei ma faataunuu? O le a fesoasoani lenei mataupu iā te oe i le auala e te fesagaʻia ai na luʻi, ma faataunuu filifiliga na e muaʻi faia.

^ pala. 11 Ina ia fesoasoani e fuafua lau faasologa o le faitauga Tusi Paia, e mafai ona e faaaogā le “Faasologa mo le Faitauga Tusi Paia” lea o loo maua i le jw.org®.

^ pala. 17 Mo nisi fautuaga e faatatau i le faaaogāina lelei o lou taimi, tagaʻi i le mataupu “20 Auala e Maua ai le Taimi” i le Ala Mai! o Aperila 2010.